ادواك عندي يالهايلكس الجديده

[بندر بريدة]

بسم الله الرحمن الرحيم
الســـــــــــــلام عليـــــــــــــــكم ورحمـــــــــــــــــــــة اللــــــــه وبركـــــــــــــــاته
اليوم جالس افكر الحين جاي وقت الكشتات والتطعيس والوناسه لكن الزمن حكم علينا والتجار بعد وجبولنا هايلكس ماتنفع بالبر
والسبب البدي خفيف والوجهيه طامنه وحساسات وبلاوي فا قلت خل انزل موضوع يحل المشكله وهو تعديلات على الهايلكس
الجديده<البقره> واتبع المثل ال يقول <مع شباب القصيم مافي شي مستحيل> الحين اقولكم وش تسون علشان تدخلون النفود
بأمان :
1-تشتري صدام تجاري وتقصه مع النص وتركبه.
2-تركب صاجه قويه لتحمي الاديترات.
3-تركيب مساعدات فكسار ويايات استراليه.
4-تركيب مراوح سابارو وفلتر امريكي.
5-تركيب كفرات يوكوهاما 215.
6-تركيب ماصوره شخلات 3 بوصه وراح يفرق عزمه.
7-تركيب كعكات فوق الياي.
وبعدين رح لنفود وستانس ويروح الوساويس وموتري يضرب وجهه موتري انكسر اديتره خلاص انطلق لنفود وبدا الوناسه
وراح تقضون الشتاء بخير ان شاء الله وهذا الموضوع زينته لعيونكم واذا احد عنده ازياده يتحفنا فيه منكم نستفيد.
ومع الســـــــــــــــــــــــــــــــــــلامه

[سرطوقا]

ههههههههههههه

هلا اخوي بندر كيف حآلك ، ايه يآأهل القصيم دآيم مبدعين :)

بآرك الله فيك مآقصرت على هذه المعلومآت

لكن توقع كم بيكلف هـ/ الشغل كلـه وأنآ أخوك ؟

تقبل مروري

[ابوخلف الحربي]

صراحه اخووي مافي مثل الموتر لاجاك على وكلته لاتفك وتركب يجيك وكاله احسن من الترهيم

[التعـ King ـديل]

وش حادني احط لي 80 الف في موتر تايلندي بقره على قولتك

وعندي عطي الله الددسن يالله من فضلك الفل ب 60 ولا يحتاج ترهيمات ولا قصقصه

كلمه قلتها قبل ومازلت ارددها التويوتا من بعد 2004 وهم يخنبقون

[باث 3]

حلوه يخنبقون


خخخخخ

أشكرك يا
التعـ King ـديل

ع الكلمه المعبره جدا

[كبسولة2]

نعم الددسن أثبت جدارته بقوووووووة صراحة

وكما قالوا الأخوان مامثل الموتر شد بلد

[بروق ساق]

مثل ما قالوا الإخوان اللي قبلي الداتسون ممتاز جدا ورخيص مقارنة بالهايلوكس
اليوم أنا بالمعارض داتسون فل كامل 62 ألف 2010
هايلوكس 79 ألف 2011

[اسير الغضا]

ياجماعة الخير
اسمحولي بالبر مافيه مقارنه بين الددسن والهايلكس من ناحية القوه وهذا المطلوب

وللعلم الهايلكس تحمل اكثر من الددسن بس الفرق بالمشكله بالصدام اللي قدام والرفارف ولا الشاصي والكاين والمحركات الهايلكس افضل

وللعلم محاتسيكم معه ددسن 2010 وعذروبه انه ماتمد بالثاني

[ا ص ر 2222]

الله لايهينك يابنــــــــــدر

[مكسر الشوك]

الهايلكس الجديد مايصلح للبر يتفكك على طول
والتعديل مو كل واحد يجيله نفس يعدل على موتر جديد

[بندر بريدة]

مشكورين اخواني على الردود الحلوه يمكن تكلف 1500 وتطلع موتر بر والا خليها وكاله
الله يعينك على الكرتير والا ديتر والصدام ولكم الخيار

[dra99]

بالنسبة للأسعار
الصدام المقصوص ينباع ب70 ريال أسود
الصاجه الحديد يجي سعرها جديدة ب 300 ريال
المساعدات الأمامية الفكسار سعرها مع شغل اليد حول 500 ريال
اليايات الاسترالية جديدة ب 480 ريال
مراوح سوبارو جديدة من عند الدغيري مع التسليك وشغل مضبوط وتمام 550 أو 600 ريال تقريبا
ماصورة الشخالات جديدة مفرغة كامل ب 250 ريال وتصل 300 ريال
الكعكات على حسب طول الكعكة الواحدة وأسعارها جديدة من 50 ريال إلى 75 ريال بدون تركيب طبعا

[.أبوعبدالرحمن]

الله يعطيك العافية اخوي بندر

هذا للي يبي يسوي فعايل المبزرة اللي يناقز ويطامر مطامر ماله سنع

والا اللي يبي يستانس ما خبر يبي يكسر سيارته

[ابن عكاش]

الهايلكس القطري ارخص من الددسن
غمارتين 2010م بـ59ألف و2011م بـ64ألف خليجي شد بلد
طبعاً احسب الفرق في العمله حول 1800ريال والأسعار قريتها من موضوع احد الأعضاء

[عميد سامودة]

ما مثل الموتر شد بلد

[N-xterra]

ياجماعة الخير
اسمحولي بالبر مافيه مقارنه بين الددسن والهايلكس من ناحية القوه وهذا المطلوب

وللعلم الهايلكس تحمل اكثر من الددسن بس الفرق بالمشكله بالصدام اللي قدام والرفارف ولا الشاصي والكاين والمحركات الهايلكس افضل

وللعلم محاتسيكم معه ددسن 2010 وعذروبه انه ماتمد بالثاني

معليش أخوي أنا أختلف معاك هنا

الددسن عليها شاصي هيفي ديوتي مخصص لتحمل التحميل العالي والسحب ، وللمعلومية هو أفضل وأقوى من شاص الهايلوكس الدفرنسين أيضا

أما بالنسبة للقير فقير الددسن أقوى من قير الهايلكس في السحب والدليل ان النمر محشورة أكثر وتروس دفرنسها الريتو فيها عالي (االريتو هو مسننات الدفرنس)

أيضا تصميم المحرك في الددسن أفضل بكثير من محرك الهايلكس وأصغر حجم (حجم 1 ونص مكينة للدسن يجي كبر محرك الهايلكس) وبنفس القوة والآداء لكن عزكها مو مبين بسبب قوة القير و وزن أكبر للشاصي والتعليق الأمامي والصدامات اللتي ألغيت في الهايلكس لتخفيف وزنها عشان تصير قوية

تحياتي

[باترول 82]

والله العظيم انكم بكم بلا هالحين صاحب الموضوع طرحه على ترهيم بعض القطع للهايلكس عشان الوناسه وانتم تقولون الددسن احسن

[اسير الغضا]

معليش أخوي أنا أختلف معاك هنا

الددسن عليها شاصي هيفي ديوتي مخصص لتحمل التحميل العالي والسحب ، وللمعلومية هو أفضل وأقوى من شاص الهايلوكس الدفرنسين أيضا

أما بالنسبة للقير فقير الددسن أقوى من قير الهايلكس في السحب والدليل ان النمر محشورة أكثر وتروس دفرنسها الريتو فيها عالي (االريتو هو مسننات الدفرنس)

أيضا تصميم المحرك في الددسن أفضل بكثير من محرك الهايلكس وأصغر حجم (حجم 1 ونص مكينة للدسن يجي كبر محرك الهايلكس) وبنفس القوة والآداء لكن عزكها مو مبين بسبب قوة القير و وزن أكبر للشاصي والتعليق الأمامي والصدامات اللتي ألغيت في الهايلكس لتخفيف وزنها عشان تصير قوية

تحياتي

انت ابخص يابعدي بس اللي خلان اقول كذا حادث اصتدام وجه بوجه

اذا وصل الشاص الهايلكس تحمل اكثر

تحياتي

[بريداوي اصليm]

والله العظيم انكم بكم بلا هالحين صاحب الموضوع طرحه على ترهيم بعض القطع للهايلكس عشان الوناسه وانتم تقولون الددسن احسن

تشوف والله يا هم فرحين قوه بالدقشن

[اسير الغضا]

ياجماعة الخير خن نقطع الموضوع اللي يبي ددسن ياخذ ددسن واللي يبي هلي ياخذ هلي وخلو الهواش بين مصنع تايوتا ونيسان

يتحالتون بالمفكات الددسن ازين لا الهايلكس ازين((يازين المشاحط خص لاصرت فاضي

[GS5]

الله يعطيك العافية اخوي بندر

هذا للي يبي يسوي فعايل المبزرة اللي يناقز ويطامر مطامر ماله سنع

والا اللي يبي يستانس ما خبر يبي يكسر سيارته

ماشاء الله , صارت فعايل مبزره ؟؟!!
كلن ينام على الجنب اللي يريحه هو يجوز له المراقا و الطيران وش اللي خلاك تقول فعايل مبزره ؟؟

كلن له وناسته , به اللي وناسته جيبه ابو دبل مايطلع للبر ولا يطب الردميه بعد و به اللي وناسته موتره مايرتاح ابد ..

[سيف الظفير]

بـ 80.000 الف ريال


اشتري طير شلوى الشاص




http://dc07.arabsh.com/i/02077/eq7m5pdp4sf9.png (http://arabsh.com/eq7m5pdp4sf9.html)

[ابو نسايم2008]

:dالله يعطيك العافيه علي ردك علي ونا جديد بالمنتدي:d

[أطلال نجد]

حقيقة أنا استغرب من اللي يطعسون بهايلكوسات !

السيارة مخصصة للتحميل وهذولاء بالقوة يطعسون بها ويرقون بها مراقي جيوب !

والله مساكين هاللي يشترون المواتر بعدهم عزز الله أن قيورها ومكاينها ودفرنساتها دماااار

[اسير الغضا]

حقيقة أنا استغرب من اللي يطعسون بهايلكوسات !

السيارة مخصصة للتحميل فقط وهذولاء يطعسون بها ويرقون بها مراقي جيوب !

والله مساكين هاللي يشترون المواتر بعدهم عزز الله أن قيورها ومكاينها ودفرنساتها صارت دماااار

طيّب بقيمة هالبقرة التايلندية أشتر لك جيب باترول ولا تويوتا نظيف واللعب فيه لعب ولا تخسر على تفكيك وتلفيق

انا اعارضك طال عمرك

الهلي معشوقة القصمان صدقن له طعم بالكشتات والتطعيس
وفيه اسباب

هي انه تحمل مجرد قير وكينة ومكيف والالكترونيات قليله عكس بعض السيارات

سعرع مقارنه بالجيوب ارخص

ماتنقلب بسرعه عكس الجيوب

تعطيك حماس غير محدود وقلب مقاطع اليوتيوب وتعرف معنى كلامي
وتحمل على تكسيره واللي يجيه وده للشريطيه يالله يعرفون وش جاه

ويما ناس شرو على انهن نظاف وهن مكسرات ومادروا الا من متابعي التطعيس بحيث الموتر تكون معروفه

[hally]

ياأخواني عندي سؤال..
من يعرف ورشات بالقصيم تصلح الشغلات هاذي أكون له من الشاكرين
والمعذرة من صاحب الموضوع

[رااس القطاه]

يعطيك العافيه بس بصراحه الموتر مايبي هالتعديلات الي ذكرتها

[مدور الخيرة]

سيارة ماهي دفع رباعي , مستحيل اعتمد عليها

أما سالفة اني ابي العب واناقز ناقزوا وعسى الله يهديكم

[اسير الغضا]

ياأخواني عندي سؤال..
من يعرف ورشات بالقصيم تصلح الشغلات هاذي أكون له من الشاكرين
والمعذرة من صاحب الموضوع


تدبيل وترهيم المساعدات ورشة السيف ببريده
مراوح السوباروا اكثر الكهربائيين يزينونهن در لمان تشوف مراوح كهرب معلقينهن على البيبان
رفع الموتر من ورا وقدام عند الميزان بس لازم اذا رفعته تركب مسعدات في اكس ار 97
علشان مقاس الوكاله ينكسر

الصدام تشري تجاري من من محلات قطع الغيار والسمكري يقصه لك

اهم شي جنوط مرسيدس الدمعه على كفر اللي قاله بندربريده علشان ماينفصخ عليك×

[hally]

تدبيل وترهيم المساعدات ورشة السيف ببريده
مراوح السوباروا اكثر الكهربائيين يزينونهن در لمان تشوف مراوح كهرب معلقينهن على البيبان
رفع الموتر من ورا وقدام عند الميزان بس لازم اذا رفعته تركب مسعدات في اكس ار 97
علشان مقاس الوكاله ينكسر

الصدام تشري تجاري من من محلات قطع الغيار والسمكري يقصه لك

اهم شي جنوط مرسيدس الدمعه على كفر اللي قاله بندربريده علشان ماينفصخ عليك×
جزيت خيرا أخوي أسير الغضا على ردك وتجاوبك معي

[GS5]

حقيقة أنا استغرب من اللي يطعسون بهايلكوسات !

السيارة مخصصة للتحميل وهذولاء بالقوة يطعسون بها ويرقون بها مراقي جيوب !

والله مساكين هاللي يشترون المواتر بعدهم عزز الله أن قيورها ومكاينها ودفرنساتها دماااار

منب راعي هايلوكس لكن ياخي اشوفهم مستانسين

ناظر اللي يطاعسون به بأم حزم اللي بعض الجيوب تديور به ولا تريوس

يجيك شادن بالرابع هههههههههههههههههههههه

ويرقا لا و يعطونه نطلتين ماشاء الله تبارك الله الله لايضرهم و يبارك لهم بمواترهم

و راعي التكسير مايبيعه و ان باعه باع بالرخيص , و اصلا الموتر معروف .

[ابو نسايم2008]

:good2:كلن علي همه سري

[hally]

وأنا على همي سريت هههههه