سرقة السيارات والنازل والامن عاجز عن بعض الحالات

[مجالس الرجال]

السلام عليكم000000000000 مساء الخير للجميع

سرقات حدث ولا حرج كل يوم اربعاء وخميس تسمع لك سالفة
ليش هاليومين مثلكم عارفين يا باستراحة او مسافر
وخصوصا المنازل صارت مهازل وشي شاهته بأم عيني
سيارة تمسح المنطقة من المغرب طبعا الحيل معروفه لديهم
تضليل - اللوحة الامامية غير موجودة - اللوحة الخلفية مسروقة
يعني ياقف بجنبك ويفحط بوجهك ويهرب
بعد العشاء بساعة وقفت السيارة عند الباب وقمز الراكب
وعند الهجوم عليهم هربوا طبعا بعد الاستهتار
احداث اعمارهم مابين 17 وحولها وياحول يالبنقالي حاطين حيلنا عليه
وصار اللي يسرق مبزرتا وتم ابلاغ الدوريات واتو وطلعت اللوحات مسروقه
وحيلت العاجز يقولون وش نسوي اللوحات ومسروقة وما قبضنا عليهم بوقته
(الحل حط عندك ونيت قديم واصدمه وقفه على جدار :d)

[hightech]

ـ والله شي يقهر والمشكله السرق صار في وضح النهار عيني عينك والموضوع
ـ
ـ صار اكبر من كذا وصل الى خطف شنط الحريم...
ـ

الحل الوحيد هو ان يتشاركون الجيران واهل الحارة في حماية بيوتهم ومراقبتها
ـ
ـ اوتاجير شركة امنيه لحماية ممتلكاتهم..
ـ نفسي اشوف دوريه امنيه في حارتنا لو جاي بالغلط.....

[ولد وايل..]

الا والله الحل خل المعشق بجيبك...

وان فاتك الموتر لا يفوتك الرأس !!!

[مقلع الرمث]

سجل محاوله سرقه اكسنت لدينا موديل 2010 لكن بحمد الله صاح جرس النتبيه وهربوا

الجهاز مفيد جدا

انا افكر بأشياء حاليا وهي وضع كميرات مراقبه على السيارات وداخل البيت

[ملقاط بن جمر]

قبل 3 أيام في العمل :

أحد الزملاء يقول لنا .. اتصل عليه جاره ويسأله من اللي عند سيارتك ؟؟
يقول على طول نزلت وأول ما سمعوا الباب انفك إلا ما تشوف إلا غبارهم .. ويقول شباب ما يتعدون الخمسطعش!!!!

..

والله ياجت علينا فتره .. إني أنا والوالد وواحد من إخواني خفارة في الليل في الشارع لين يذن الصبح .. وخاصة بعد ما سافروا الجيران في الإجازة ؟؟

..

أذكر مره سرقت ددسن قديمة مكسرة كانت لنا وحاطينها للأغراض والغنم فقط .. سرقت عند صلاة الفجر ..

صليت ورحت للشرطة وبلغت عنها .. والله وبالله وتالله إن الشرطي ضحك علي يوم قلت له دورها زين وعساكم تلقونها .. قال يا رجال الله يعوضك بس .. قلت له بس .. قال بس ..

ويا قلب لا تحزن ..

[ن م ر]

تعطيل الحدود هو السبب الرئيسي

غفلة وضعف الأمن وعدم جديتهم في أمن المواطن .. صار الأمن مسخر لخدمة الطبقة المخملية فقط

محد يراقب أبنائه وين يروحون ومع من ؟ السارق مهوب جاي من المريخ .. واحد من أبناء البلد

[راعي سمنان]

والله من القصص المحزنة قصه زميل بالعمل في نهاية شهر شعبان 1431 هـ وزميلي هذا صغير بالسن ولم يحسن التصرف بالموقف ....

في حدود الساعة عشره الا ربع وفي عز تجمع الناس وقف زميلي عند الممشى بحي الروضة والشارع مليان وزحمه ونزل من سيارته ( كابرس 2010 اسود ) وهو مازال بداخلها وهي تعمل في وضع التشغيل ( رجله بالسيارة والأخرى بالأرض وهو واقف على الباب ممسك به ) ويداهمه واحد بخنجر ويقوله انزل او ابعد عن السيارة الرجل من هول الصدمة والروعة والسكين عند بطنه حاول التحايل لتفادي الموقف لكن الحرامي ركب وهم بالهرب زميلي حاول يفتح الباب الخلفي ليركب خلف السائق وهو الحرامي لكن قام المجرم بطعنه بالسكين في يده وهرب بالسيارة ولحق به صاحبي مع احد أصحاب السيارات المتواجدة من حي الروضة ألي صناعية النسيم مطارده ثم اختفى ولم يجده .... ذهب لشرطه النسيم يقولون له السيارة سرقت بالروضة اذهب لشرطه الروضة هم من تم السرقة بمنطقتهم ( والله مسخره ) ..... مسكين ألي يومك والله الرجل لم يجد سيارته .

تعطيل الحدود هو السبب الرئيسي بتزايد المشاكل من قبل ضعاف النفوس

[غالي]

تعطيل الحدود والبطاله (الفقر) وغلاء المعيشه وإنتشار المحرمات (مسكرات ومخدرات ..الخ)


وش خليت ؟

خربوها

ان انمسكوا كم طراق وسجن كم ساعه وطلع

مصيبه الله يبعد عنا شرهم يارب

[asdali]

اخ بس لو يشغلوني جلاد كان اقطع روسهم بالمنشار الكهربائي:mad:

وكل واحد يحذف ردودي ومواضيعي ويوقف مشاراكاتي ما راح يسلم:D

[مجالس الرجال]

لا ومن الاستهتار جو وطقوا الباب يشوفون البيت به احد اولا

[غالي]

لا ومن الاستهتار جو وطقوا الباب يشوفون البيت به احد اولا


عندهم كذا طريقه
منها طق الباب لكم يوم متتاليين

وعندهم وضع المجلات تحت الباب ويطلون يشوفون تحركت والا نفس مكانها

وعندهم وضع علك عند فتحت الباب لانك لين فتحته طاح

وحركات عد واغلط


الله يكفينا شرهم

[رفيع المقآم]

والله الحركات واجد
ومنها يكسر الانوار حقتك اذا شافك ماغيرتها سرق
والله يعين

[ملك الفكتوريا]

آآآآآآآآآآآآآآآآآآآآآآآآآآه يالغبنه على الكابريس 2010


والله المفروض يصدمون الكابريس



اصلحها واستخدمها وهي 2010 او ابيعها واستفيد من المبلغ ولا يسرقها ومدري تفحيط او تشليح




على العموم يعني المفروض نقفل البيبان حتى بوسط الاشارة

[بتاع بر]

من امن العقققققققققققققققققققاب اساء الادب

[((ابوملاك))]

والله ان شفته ما يرده الا صدام الونيت واحشره بالجدار ولا يقدر يطلع وادق على المرور

[الشنه]

الا والله الحل خل المعشق بجيبك...

وان فاتك الموتر لا يفوتك الرأس !!!

[أبو هطل]

مو والله منهم من العطاله

الله يهدي الحكومه المفروض زي الاشكال هذي تسحب مع اذانيها ويودونها للجيش ويشتغلون يخدمون البلد وأنفسهم ولا يكون فيه واحد عاطل

الله يختار لنا اللي فيه الخير ويكفينا شر من في نفسه شر

[عبد الله 99]

عندهم كذا طريقه
منها طق الباب لكم يوم متتاليين

وعندهم وضع المجلات تحت الباب ويطلون يشوفون تحركت والا نفس مكانها

وعندهم وضع علك عند فتحت الباب لانك لين فتحته طاح

وحركات عد واغلط


الله يكفينا شرهم

ومنكم نستفيد <<يبي يتصفق

تقبل مروري