&& استطلاع أراء الأعضاء (باترول 2010) [الأرشيف]

مشاهدة النسخة كاملة : && استطلاع أراء الأعضاء (باترول 2010)

ومض الصدف

30/09/2010, 02:43 PM

بسم الله الرحمن الرحيم
السلام عليكم
لاهنتم يالاخوان باخذ رايكم
باشتري باترول 2010الجديد هل تنصحوني فيه :good: ام لا :(؟
وشكرا:good2:

الربذي

30/09/2010, 02:56 PM

الي جربوه يمدحونه
نعومه فائقه كالكزس
عزم يرضيك تماما
صوت رياضي بانغام التيرنيدو في حالة الدعس بقوة

انا ادور مستعمل 320حصان ماحصلت ابي اقل نوعيه بفتحة
هذا التسارع حقه من موضوع لاخونا منتظر الجديد

http://www.mekshat.com/vb/showthread.php?t=293677&highlight=%C7%E1%CF%D1%E6%C8+2010

اسف اخوي نسينا وعليكم السلام ورحمة الله وبركاته

الماضي الدفين

30/09/2010, 03:00 PM

إذا كنت صامل على الموتر وتبي راي انتظر حتى ينزل موديل 2011 حتى يتم تلافي جميع العيوب المصنعيه في 2010

والله اعلم

السلمان2010

30/09/2010, 03:03 PM

إذا كنت صامل على الموتر وتبي راي انتظر حتى ينزل موديل 2011 حتى يتم تلافي جميع العيوب المصنعيه في 2010

والله اعلم

:good2::good2::good2:

عاشق السيل

30/09/2010, 03:06 PM

وعليكم السلام ورحمة الله وبركاته ،،

إذا الموتر معجبك اشتر ولا تشاور ،، وعن رأيي الشخصي السيارة تستاهل قيمتها !!

وألف مبروك مقدما .....

ولد الغلباء

30/09/2010, 05:04 PM

اذا تبي نصيحتي خذ الفكسار الجديد وذا كنت ما تبي فخذ الباترول والصراحة الموتر ماعليه كلام
ومبروك مقدما

أطلال نجد

30/09/2010, 05:13 PM

أنتظر موديل 2011 ليتم تلافي العيوب المصنعية !
أعرف شخصين معهم 2010 نصف فل فتحة 320 حصان يقولون فيه عيب بالهوبات
( يصدر صوت مزعج أثناء السير ) والوكالة ما حلوها إلى الآن !

اسير الغضا

30/09/2010, 05:21 PM

الموتر ماعاد موتر تطعيس وكرف الموتر صار موتر اخو الاكس بلورر مكاشيت عائليه وخفافي يوصلك للمكان بس ارفق عليه تراه يحط كريم ماودك البشره تخرب

التعـ King ـديل

30/09/2010, 05:55 PM

بعض المواتر لها من اسمها نصيب وبعض المواتر تظل اسم فقط

بطل الدروب بحكم تجربتي له اول مانزل وتجربه ناس اعرفهم فعلا بطل الدروب اسم على مسمى

غالي

30/09/2010, 06:59 PM

أبو فيصل 99

30/09/2010, 07:00 PM

الكل يمدحه موتر ما شاء الله عليه

ابن عكاش

30/09/2010, 07:11 PM

المسمى باترول الجديد اشوف انه سيارة جديده غير الباترول يمكن ارمادا مطور يعني صار موتر كشخه وخطوط وفخامة إذا انت تبحث عن هالشي فاقول لك يصلح لك وسعره مغري على مواصفاته مع ان مشاكل النيسان في الكهرب معرفه
وترى اللي في توقيك هو الباترول

ابودعسان

01/10/2010, 03:24 AM

انا سقته صراحه ماودك تنزل من الراحه الفخامه وجوده مواد الديكورات والعزم جباااااااااااار
واذاتبي نصيحتي قارن بين مواصفاته ومواصفات اللاند

ومض الصدف

02/10/2010, 06:00 PM

الشكر كل الشكر لجميع الأخوة على ماأسدوا به من نصائح
ولكن نريد الكثير الكثير من الأخوة المكشاتيين ومقترحات اكثر

Abu Saad

02/10/2010, 06:38 PM

اخي العزيز نصيحة.
حاول تاخذ النصيحة من المجربين .
الله يوفقك.

مغلي

02/10/2010, 07:01 PM

يقال
ان
دفرنساته صارت عكوس
فهل هذي جيده او لا في حق موتر تطعيس وجبال وكرف

كيري ميري

02/10/2010, 08:19 PM

اللي اسمك غالي ماعندك سالفه ابد ياليتك سكت احسن لك ....الشكل قدام العالم وكل واجد يشوفه والغالب او الكل معجبه الشكل . واذا لك مقاصد ياليتك تخليها على جنب ولاتخرب سمعة الموقع .

ومض الصدف

02/10/2010, 11:46 PM

شكري وتقديري للجميع

حبل الوريد

03/10/2010, 12:25 AM

والله انه موتر مع 2 من عيال عمي لكن اصبر لين 2011 الاول مابه شيء لكن للحيطه

راعي النياسين

03/10/2010, 01:07 AM

والله ان بغيت الجد

اقسم بالله العلي العظيم هذاني حلفت علشان محد يروحبه الشك بعيد

اذا شفته بالشوارع اقسم بالله انه يضيق صدري واقول الله يرحم حال راعيه

ياخي شكله بشع اقسم بالله

ناظر اسطباته بس من وراء والله يجيب الهم اقسم بالله

نصيحتي لك دور لك جيب لكزس نظيف نصيحه اخو

حتى ابعد عن الاندكروزر لو بتاخذه اجل خذ الباترول مافرقت شيء

اللكزس وبس بكل امانه قمه

ياخي حط صورتين جنب بعض للباترول والجيب اللكزس من الخلف ومن الامام ومن الجنب

منيب قايلك وش النتيجه انت بتعرفها الحالك

ولا تتعدى الابيض الؤلؤي او الكريمي

هذا رأيي وانت لك رأي

موفق

هههههههههههههههه

لاحول ترحم راعيه مره وحده لهدرجه الباترول الجديد قبيح في نظرك :D

اقول ياراعي الموضوع انا كنت متردد مثلك ورحت الوكاله وكان فيه تجربه في وكالة نيسان بالعيا واستغليت الفرصه وجربته

وبعدها مباشره شريت se3 317 فل كامل

الموتر قمه في كل شي تتعب وانت تقول قمه عزم جبار فزة الموتر خرافيه مع انه موب 400 حصان لكن عزمه من جد خرافي

هذا بالنسبه للعزم اما العزل هذا كلام ثاني يختلف تماما عن الفتك تحس انك راكب رنج ماشاء الله

والله يااخوك لو ابجلس امدح من اليوم الى بكره يمكن مااوفيه حقه واذا جربت الموتر انت صدقني بتقتنع بـ كلامي تمام

اتمنى انك اذا جربته تجرب الفكسار والله ان تكره الفكسار والي صنعه فرق بين الموترين فرق السماء عن الارض

الباترول الجديد اصبر عليه سنه اذا جربوه الناس بتلقاه في كل شارع ;)

اتمنى لك التوفيق واذا نويت على الباترول لايفوتك الاسود ومن جوى بيج :good2:

تقبل مروري ..,

أبو أسامة

03/10/2010, 03:46 AM

الموتر معي قمة ما شاء الله لكن ما فيه شيء كامل والكامل الله سبحانه .......
الراحة قمة والعزل قمة بالنسبة له كسيارة من سيارات الدفع الرباعي وبالنسبة للبر أنا جربت بالطعوس قام على كل المواتر اللي تحدوني بها الشباب مثل الأف جي من تايوتا والاند كرزور 2010 ثمانية سلندر جي أكس آر وبرادو وحتى جيب اللكزس كلهم شد بلد لكن السيارات اللي مرهمه مثل الاند لا تفوق علي ومن أسباب تفوقه أن موتره مرفع بيايات أستراليه وموتري شد بلد ما بغيت أدعس من بعيد بعدين يضرب وجه الموتر بحافة الطعس .... وبالنسبة لصرفية البنزين قمة قمة قمة بالنسبة له كسيارة دفع رباعي بالنسبة لقطع الغيار ممتاز مافيه قطعه بغيتها إلا وتكون بالوكالة أقل شيء بجدة وبعد يومين تصل للرياض لكن ملاحظتي عليه ..... نظام الهيدرولك رغم الراحة والرساوة الجيدة لكن لماذا لم يكن أختياري يعني مثل الرنج والكزس والجراند شروكي يعني إذا بغيت أرفع الموتر من نفسي أرفعه وإذا بغيت أنزله أقدر على ذلك وأيضاَ مع التحميل الزائد وليس التحميل العادي وليس الزائد جداَ ينزل الموتر من الخلف وكأن ما فيه هيدروليك أو كأن هيدروليكه مثل هيدروليك البانوراما ليس للتحميل وإنما للراحه والرفاهية ... الموتر اللي معي أبو 400 حصان ..
وبالتوفيق للجميع

jasser

03/10/2010, 04:29 AM

بالتوفيق عزيزي ونعم الراي والسياره يمدحونها من كل شي
ومن ناحية العيوب لو تمر صيانة نيسان وتسال وتتاكد بنفسك افضل من القيل والقال

ومض الصدف

07/10/2010, 01:06 AM

اشكر جميع من ساهم برأيه من الأعضاء
وابشركم حجزت الموتر اليوم عند الوكالة
وباستلمه الاسبوع القادم دعواتكم

الحرالاشقر

07/10/2010, 02:19 AM

مبروووك
الله يبارك لك مقدما

S4500

07/10/2010, 04:18 AM

مبروك مبروك

ماء شاء الله الله يطعمك من خيرة و يكفيك شرة

ولا تنسانا بتقرير عن السيارة و مدا رضاك عنها اذا طلعت من الوكالة

ماء شاء الله

alamri111

07/10/2010, 05:09 AM

السلام عليكم

الحقيقه محتار وش أقولك

إن بغيت فخامه فخذ وغن بغيت هدوء فخذ والباقي ما أدري عنه

لكنه في ها المقطع ما عجبني يمكن يكون البلا في السواق

http://www.youtube.com/watch?v=MaDXyIV1FQM&feature=related

جبلاوي

07/10/2010, 05:12 AM

الله يباركلك فيه ويعطيك خيره ويكفيك شره

السيف الشريف

07/10/2010, 11:15 PM

مبروك الموتر مقدما أخي
والله يعطيك خيره ويكفيك شره
بالنسبة للموتر ماشاء الله عليه قمة في كل شيء
قوة + فخامة
سمعت عن الموديل الجديد 2011 نزل في الكويت ولكن ماتغير فيه شيء أبد
اللهم السعر زادوا فيه قرابة 10000
وهذه بعض الصور للإستئناس الى ماتستلم موترك

http://filaty.com/i/1010/36076/1.jpg

http://filaty.com/i/1010/31807/2.jpg

http://filaty.com/i/1010/11687/3.jpg

وهذا موتري LE 3

http://filaty.com/i/1010/15259/Image00001.jpg

العابر سبيل2

07/10/2010, 11:45 PM

والله انا ماجربت جيوب النيسان كلها في حياتي سياراتي كلها لاند جي اكس آر وفي اكس آر ومرتاح معها ومتأقلم على قيادتها
لكن السيارة اعني النيسان 2010 قليله بالشوارع وفي ايدي الناس لو اقول لك اني ماشفت في المدينة المنورة الاواحد مع موظف في الجوازات غيره قليل عينتة
واعتقد انه طلع عكس ماتوقعوه زبائنه صحيح مواصفات فخمه من الداخل لكن هل يتحمل البران والطعوس التي كان يتحمله النيسان الباترول في السابق ماضنتي لانه كلما زادت اتكلنوجيا الحديثة في السيارة تصير سيارة اسفلت ومدن اكثر منها سيارة بر
بعكس الاند كروزر فيه رجا الي الان ولازال ماسك متانته كسياره بر وطعوس ولو دخلته بعض التقنية لكن ثقة الناس فيه اكبر من ثقتهم بالنيسان 2010 ولك ان تطالع في الشوارع كم فيها من جيب لاند 2010 وكم فيها من نيسان بالذات وارجو اني ماهضمت حقه بهذة المشاركة التي تعبر عن رأيي الشخصي

سبتان

08/10/2010, 12:12 AM

أنا ماجربت باترول ... ولكن أنظر لآراء الأخوان واستشاراتهم .. وبعدها صل ركعتين واستخر ربك . فإذا عزمت فتوكل على الله . واعلم أن الله لن يخيبك أبداً ... وأما قول أسير الغضا ، فكل السيارات اليوم صارت على شاكلة النيسان من ناحية البودي ..أما أخونا راعي النياسين فقد بالغ كثيراً . في الختام ... أرجو من الجميع المعذرة.

مجالس الرجال

08/10/2010, 01:25 PM

مشعل المشعلي

08/10/2010, 02:20 PM

الباترول من 2003 الى 2009 الي يسمى الفتك ااقولك خذه وانت مغمض اعيونك

الجديد فخامة مركب وآنتظر لاتستعجل آخوآني معاهم حق الموتر الجديد وخاصه اول اصدار
دآم ماتكون فيه عيوب مصنعيه

ومبروك مقدماً

ومض الصدف

10/10/2010, 01:38 PM

الله يبارك في الجميع......
وعسى الله يدبرنا واياكم على الصالح

أطلال نجد

10/10/2010, 04:14 PM

ألف مبروك وأحسنت الأختيار
والله يطعمك من خيره ويكفيك شره

ومض الصدف

11/10/2010, 11:03 PM

ألف مبروك وأحسنت الأختيار
والله يطعمك من خيره ويكفيك شره
وفيك بارك:f

You Like Me

12/10/2010, 12:15 AM

ما شاء الله تبارك الرحمن
إختيار موفق طال عمرك
والله يعطيك من خيره ويكفيك والمسلمين شره

محسن اليامي

12/10/2010, 12:36 AM

ماشاءالله تبارك الله

ويــــاجعل ربي يرزقني بواحدن مثله :)

سوبر152

12/10/2010, 12:47 AM

لومعي قيمته اشتريته وبس

سفاري959

12/10/2010, 02:23 PM

والله مشكله الواحد احيانا يستشير ويتردد زيادة
وانا عن نفسي قبل سنه اسمع المدح والتهاويل بالفتك 2009 وتحت الى درجة اني حسيت
اني ابشري اف 16
طبعا مثل تهاويل راعي النياسين ولكن لقيته بقرة ماعنك احد
والله العالم اني ابتوهق مره ثانيه واجرب الجديد

من اي ناحيه بقره يا بطل الراليات مجرب الفتك من 2002 الى 2009 واللي تقول عنه بقره قير تماتيك وقمت فيه على في اكس ار قير عادي هذا تسميه بقره الا اذا كنت مثل بعض ناس اعرفهم ما يعرف يسوق في الرمل ويسب الموتر والا اعلنها صريحه وقل انا متعصب تايوتا اما كلامك ماهو صحيح مع احترامي لك ومستعد اثبت عكس كلامك وقدام اللي بالمنتدى كلهم تحياتي لك

بدر المحمد

12/10/2010, 05:13 PM

السلام عليكم
أول شي ياخوي أقولك مبروك مقدما
لكن هذا مقطع وقفت عنده كثيرا إلى درجة إني عته كم مره
لكن طااااح الموتر من عيني ولا بعد واحد من الربع موقف موتره بالبيت له شهر ينتظر قطع الغيار

طبعاا الموتر الأول : سكويا 381 حصان
الثاني : تاهو 350 حصان
الثالث : فشل الدروب 400 حصان وضنهم مخطين حاطين حميير لكم الكرامه بدل الحصان

http://www.youtube.com/watch?v=ULI90a0kNpc (http://www.youtube.com/watch?v=ULI90a0kNpc)

ابوطاقية

12/10/2010, 07:02 PM

مبروك مقدما والله يطعمك من خيره ويكفيك شره
امس كنت بالمعارض وحصلت بكل معرض على شارع الاربعين كميات قليله تقريبا كل معرض اربع سيارات باترول وكلها موديلات 2010 لاكن اشوف الاقبال عليها ضعيف يمكن يكون السعر ويمكن يكون الوكيل سيء ويمكن يكون انتظار 2011 هذا والله اعلم