وش رايكم في الددسن الدفرنسين؟؟؟

[طخيمان]

بسم الله الرحمن الرحيم

ياشباب وش رايكم في الددسن الدفرنسين ،(160) حصان 2400efi ؟؟؟

[عاشق الجبل]

من وجهة نظري أنه أقتصادي بالبنزين لكن عزمه ضعيف في الرمل إذا حملته .

[طخيمان]

مشكور ياعاشق الجبل على الرد بس يقولون انه اذا نسمته وشغلت الدبل انه يطلع ازين من الجيوب لانه خفيف
وبعدين الددسن اللي مافيه دبل اذاعرضت الكفرات ونسمت يمشيك في النفود فما بالك بالدبل وش بيطلع. :rolleyes:

[عاشق الجبل]

كلامك صحيح لكن لازم تشد عليه شوي في الطلوع والرمل الناعم لأن مشكلته الحموله وهو 4 سلندر

[طخيمان]

أنا في اعتقادي ان اهم مشكلة فيه هي المرتبة الخلفية لأنها توجع الظهر .

[اسيزو 4x4]

صدقني ثقيل بالرمل خاصة 160 Hp

الكلبليتر 2400 أزين بالرمل

.

[طخيمان]

مشكور يا اسيزو 4x4 على الرد بس اليوم رحت لوكالة اسوزو (اليمني) وسألتهم عنه قالو لي سعر الفل كامل 75000 وسعر الددسن 64000 بس بصراحة فيه فرق مراتب الديماكس اريح بكثير بس فيه مشكلتين:
1_ الدبل زر ومكانه غلط.
2_ البانزين ما يجي اللا سياحي مايجي جنوط ولا مراتب مفصولة وشكل قيرة غبي.

[راع الونيت]

أخوي أبو الطواري
أنا مثلك كنت محتار لكن بعدمشاهدة السيارات قررت ونفذت
أنا شريت داتسون دفرنسين 2005 من الرياض ب 61000 ريل بدون لوحات من معرض نجد بالنسيم ومواصفاتها هي
- غمارتين دفرنسين 2005
- القزاز والأبواب كهرب
- بخاخ
- 160 حصان
وجيت عليها للقصيم والله ممتازه وقبل ما أجي مريت الغرابي وركبت لها فيبر أسود وشريت جنوط باث فندر نيكل حجم 16 لأن جنوطها 15 واطيه وكفرها نحيف شوي وركبت عل الجنوط كفرات دنلوب عريض مقاس 245/70/16 وطلعت السيار كلام وحجيبلك أخبارها إذا جاء الشتاء إن شاء الله أما الصور فسأنزلها قريبا بإذن الله

[طخيمان]

مشكور ياراعي الونيت لكن انت ليش شريتها
احد قايللك انها ممتازة
او احد مجربها
او ظربت حظ
س_مرتبتها الخلفية ما بهذلتك
ارجو التقدم بالرد السريع.

[أبوناصر]

والله على حد علمي القاصر إن الونيت غمارتين دبل من أفضل السيارات خفيف ومكينته قويه

واقتصادي في البنزين وصبور

لكن المجرب هو الحكم الفاصل في ها الموضوع

[اسيزو 4x4]

أخوي الغالي أبو الطواري ...

الدبل زر ولكن تقدر تولف لة علبة غطاء للدبل وكثير أقترحت عليهم هذا وولفوا لة وطلع ممتاز إذا تبي الدبل فك العلبة وإظغط الزر

وعلبة على نفس الطبلون >>>>>>>> تغطي أزرار الدبل ....

[بو خليفه]

تحية طيبة و بعد
الدتسن دفرنشين جداً ممتاز و اعرف كثير عندهم و أكثر الناس يبدلون الجنوط يركبون فيه جنوط سفاري يكون أجمل و لايق عليه الجنط مع الإطارات أما البنزين فهو يصرف حال أي ونيت و يوجد في الشرقية جير اوتوماتيك دفرنشين دركسون بور و زجاج وقفل اوتوماتيك
من وجهة نظري الشخصية إذا كنت ترغب للدتسن فاشتر ديزل
ولكم تحياتي و تقديري

[ابورشا]

السلام عليكم
تبي شور ناصح امين
الهايلكس وبس وكما يقلون الصلاة خير من النوم
والفرق مهوب شوي
البيع
القوه
عدم الهرقله

[طــــويـــق]

اخوي ابو الطواري

انا سمعت ان الكلتش حق الدادسن الدفرنسين ضعيف جداً ولاتتحمل ودايم يحتاج الى تغيير .(يعني يحترق بسرعه بعد طلعه او طلعتين في النفود ).وسبق اني لقيت شباب في الثمامة متعطلين لهذا السبب. وايضا سمعت انهم يستبدلون الكلتش ( صحن الكلتش ) من محل 4*4 مادري في القصيم او في الرياض ويكون مخصص للداتسن .يقولون انهم يجيبونه من الامارات ويكون مدبل حتى انه يتحمل اكثر . عموما عزم الداتسون بعد ماحطوه بخاخ والله ما ينفع . بعدين ابغاك تتأمل في شكل الرفارف السود رايح تشوف انها قبيحه وتحس انها تلفيق يعني ماتصلح تقول انها مو من الوكاله تقول من محلات الغرابي مركبة . ارجوا انك تتريث وتفكر قبل لاتشتري . اتمنا لك التوفيق.

[طخيمان]

شكرا للاخوان على المرور وتقديم المعلومات ونتمنى لهم التوفيق في مواضيعهم القادمة.

[راع الونيت]

أبو الطواري الأخوة الأعزاء
أنا لقبت الددسن مع واحد قريبي بشركة الكهرباء موديل 2002 والله يكرفها كرف وماشية معه أكثر من 150000 كلم ولافيهاشي أبد مع العلم كفراتها والجنوط شد بلد وبعدين أي سيارة مهما كان ماأنت شاريها على شان تلعب فيها فهي تخدمك حسب إستعمالك والددسن عموما قطعها بأ قرب تموينات والدفرنسين ماتفرق عن العادية إلا بالدبل وبعدين أنا ما أحب الديزل لذلك ما سألت عنها
والسياره مازالت بالتمرين لكن محتسينها بخير وأنا أشور عليك بالددسن دفرنسين لأنني مقتنع فيها والله يوفقك

[قناص القرائن]

قبل ثلاث ايام طالع لصيد الدخل وماخذ سيارة واحد من الشباب من نوع دفرنسين ددسن 2005 ممتاز من ناحيت الصرف والقوه
ومركب له مساعدات وصاير شي من ناحية البر والخط من قطعت شعيب × شعيب وممتاز
انصحك به


قناص القرائن

[Abo Nader]

السلام عليكم

أخوي من ناحية المرتبة الخلفية روح أسأل أي فني سيارات

راح يقول أنه البدي مربوط مع محور مدري بدي السياره و هذي بعد في الهايلكس يعني مهب عيب

[طخيمان]

شكرا لكم على الردود ونتمنى منكم المزيد لأني بصراحة محتار لأن الددسن فل ب61000 فقط أما الديماكس السياحي ب62000 .
الددسن 160 حصان (بخاخات) 2400 cc وزنه خفيف.
الديماكس 128 حصان (ما ادري بخاخ ولا كلبليتر) 2500 cc .

[اسيزو 4x4]

الديماكس ديزل ما يجي بخاخ ولا كلبليتر


.

[طخيمان]

أنا أقصد يا اسيزو 4x4 الديماكس البنزين ما أقصد الديزل (البنزين بخاخ ولا كلبليتر) الله يهديك بس .

[عاشق الأشهب]

أنصحك بسوزو وبس
أريح وعليهه مكيف كنه ثلاجه وأجمل شكل وإن حصل ديزل فهو الأفضل
قوي واقتصادي والله يختارلك الصالح





أخوك أبو سليمان

[جو الصمان]

اسمع النصيحه من واحد له اثنين من اخوياه معهم ددسن دفرنسين
واحد غماره 2002
وواحد غمارتين 2004
والله الموتر قوي في الرمل واطلق من كل المواتر في الرمل بدون منازع
لاكن ممشاه في الخط خجمه مايمشي مايجيب 150 يعني ماينفع لواحد يحب يسرع
ومركبه مراتب قدام حلو مره وورا ضيق جدا اي واحد حجم كبير مايدخل يمكن الابالقوه
والله اعلم

[طخيمان]

شكرا جزيلا لكل من تكرم وتفضل علينا بالرد المقنع و المفيد وننتظر المزيد من الأعضاء والزوار.

[اسيزو 4x4]

أخوي الغالي أبو الطواري أنت ذكرت>>> 2500 ماقلت 2400 >>>>>>>> 2500 ديزل وليس بنزين البنزين 2400 هذا بالنسبة للديمكس



يالنشمي راجع ردك


.

[طخيمان]

مشكور يا اسيزو 4x4 على التصحيح لكن على ماأظن ان الديزل يجي منه 3.0 ولكن السؤال هل الديماكس البنزين زين ولا لا مع العلم انه مايجي شكله حلو لأنه مايجي جنوط الفل كامل ويجي لون الرفارف أسود والقير حقه طويل وشكله غبي . :D

[(الأشهب)]

بسم الله الرحمن الرحيم

أولا احب اهنيكم على هالمنتدى الرائع

وثانياً : أخوي ابو الطواري خذ الددسن الدفرنسين ولا تشاور ما يحتاج انا معي من ثلاث سنين

والحمد لله ماشي معي تمام مشيت عليه تقريباً 170000 وغير كذا الي قال انه ما يمشي في الطعوس

اذا حملة عليه والله انا اشوف غير كذا لانه معي واحمل عليه واكرفه وبعدين محمل عليه جركل ازرق الكبير

ومعه واحد اسود والحمد لله يمشي في الطعوس مع الدبل وش زينه بس يبيله تنسيم خفيف وصرفيته في البنزيم حلوه

يمشيك تقريبا 550 الا 600 اذا ماشبيت عليه يعني بالعربي موتر حطه على يمناك وسلامتكم وشف عاد الي انت تبيه
وانت ابوها وسمها

[طخيمان]

شكرا لك يا (الأشهب )على المعلومات القيمة ولكن بكم تعبيه فل ؟وكم يمشيك خط وديرة؟ وهل اللي معك غمارة ولا غمارتين ؟ وهل هو بخاخات ولا كلبليتر؟ أرجوا التكرم بالرد السريع وشكرا.

[اسيزو 4x4]

الديماكس البنزين ممتاز بالحيل ومابة مشكلة الجنوط تتركب والرفارف السود ممتازة >>>>> أنا ودي رفارف

موتري سوداء علشان الحكات والوصخ أكرمك الله ما تبين

وبالنسبة للديماكس الديزل يجي 3000 سي سي تيربو و139 حصان >>>> وهو أقوى من الددسن البنزين

وأقوى من الديماكس البنزين أيضا

وإذا تبي شوري الديزل 3000 تيربو أزين وأقوى ولا يظرة التحميل أبد وأقتصادي ومريح ودبل >>>>>>
عطي الله...
.

[بن نويشر]

أبو الطوارئ .. تحية لك وللجميع .

البكب أنواع وأشكال والياباني عموماً ينشد به الظهر ولكن هي مسئلة ذوق ، فإذا كنت معجب بالداتسون فتوكل على الله وشتر وخل عنك الحسوفه . أما إذا كنت محتار فخذ المسئلة بمقاييس .
الأسوزو شكله فخم ودلع وغالي بـ 79000 ريال للقير التوماتيك .
التويوتا البازعي زين وقوي وسعره بـ 70000 ريال .
الداتسون مع واحد من الزملاء يمدحه وسعره مشجع بس يقولون أن الدركسون نص هواء .
مازدا طارحه كذلك بكب بمواصفات جداً رائعه 4×4 وشكله قريب من الأسوزو ، ديزل 2900 سي سي (لا يفوتكم) بسعر 67000 ريال .
الميسوبيشي (استرادا) 4×4 والحقيقة المتسوبيشي حمار شغل وشاهدته بكثره في صلاله .

خلاصة القول لا تستعجل لف ودور على راحتك ولا تنسي بأن الشركات تعمل خصومات سنوياً في شهر رمضان المبارك .

وسلامتكم ..

[(الأشهب)]

أخوي ابو الطواري اعبيه تقريبا 60 إلى 65 موتري غمارتين بخاخات فل كامل وغير كذا يعني انا مركب عليه جنوط يعني مثقله

اكيد يصرف اكثر من الطبيعي الخط 550 بس اذا كانت سرعتك ثابته وانا ما حسبتها في الديره بس في الخط

على العموم انت لا تتسرع واستخر والله يوفقك بس اذا كنت متردد لا تدور غير الددست الدفرنسين

[طخيمان]

مشكورين وما قصرتوا وبيض الله وجيهكم :) .

[طير حوران]

والله عندي الايسوزو اصرف من الددسن والهايلكس

[طخيمان]

وجهة نظر نحترمها يا طير حوران ولكن ماتحس ان الاسيزو مبالغ في سعره شوي.

[ربع]

السلام عليكم ورحمة الله وبركاته.
أول مشاركه لي
انشاء الله افيد واستفيد
المهم
ماأنصحك به
لانه خطر
سريع الانقلاب لأنه مرتفع
بالقوه مدري
إذا تبغى خذ هايلوكس
أقوى وأفضل 20 مره

[طخيمان]

مشكور يا ربع على المشاركة ولكن اذا على الارتفاع فالهايلكس مرتفع ضعف ارتفاع الددسن.

[طخيمان]

أمس رحت الوكالة (الحمراني) وقالوا لي سعر الدفرنسين بنزين غمارتين فل كامل 67000 .

[أبـ [مطلق] ـو]

أخوي أبو الطوارئ ...

67000 الف << على الددسن 2005 ولا 2006 ؟

أنتظر ردك


تحياااتي

.

[أبو يوسف]

الددسن دفرنسين ممتاز وابي افيدك ان
الهايلوكس 140 حصان البانزين
السوزو 125 حصان البانزين والديزل 79 حصان فقط :(

وانا اعرف واحد استخدم الددسن بالبر اكثر من الديرة ( راح لمدة 3 سنوات لصلالة عن طريق الربع الخالي ) وهو يقعد بالبر اكثر من الديرة يقول من أحسن المواتر واذا تبيه ما يطلع اصوات اربط كراسي الغمارة والمكينة كل خمسين الف ( شدهن بس ) وخذ موتر راااائع

مع التحية
أبو يوسف

[طخيمان]

أقصد يا أبو مطلق 2006 وترا الوكالة أغلى من المعارض يعني اللي يبي ياخذ ياخذ من المعرض
ويقولون ان معرض نجد يجيب دداسن وهايلوكسات جديدة ما مشت شيء.

[طخيمان]

أبو هديل ترا الاسيزو يجي منه نوع ديزل تيربو 130 حصان 3.0 بس انه غالي 70000 وطالع
والددسن 2006 يجي ديزل بس ماعندي عنه معلومات .

[طخيمان]

معليش أدري اني غثيتكم بالأسئلة بس اعذرونا
وشلون الصرفية (البنزين)
واذا كنت في النفود لازم تشب عليه بالأول ولا لا (مع التنسيم لأن طبعي اني اذا دخلت النفود لازم انسم لو معي همر ولا حتى لومعي طيارة ) :d .

[اسيزو 4x4]

السلام عليكم ورحمة الله وبركاته

أخوي أبو الطواري

أزيدك من الشعر بيت سألت مدير مبيعات أسيزو قابلتة بالوكالة يوم سويت الصيانة الدورية للموتر وقالي أنة بينزل 2006 بمحرك أقوى وبحثت بالأنترنت ولقيت هذا هو صورة له :
http://www.mekshat.com/pix/upload/images10/mk6834_d-max 180.jpg


الأسيزو 2006 الفل كامل يجي ديزل تقريبا 180 حصان و3.0 و6 سلندر وسعرة تقريبا 85000

ولكن عزمة تقول ربع تويوتا ...

[حر اليدين]

السلام عليكم ورحمة الله وبركاته

اخوي أبو الطواري<<---ترى غير ابو الطواري =بدون همزة سياحي يعني

انا عندي ددسن دبل 97 وحط تحتها خطين 97 ولكنها روعة في الرمل وهي افضل من بعض الجيوب مع ان كفرها ليس عريض فقط 235/75/15 ويقال ان الكبريتر افضل من البخاخ في الرمل هذا صحيح انا مجرب
ولكن البخاخ افضل في الخط وكل شي يعتمد على القيادة وعرض الكفر وبالنسبة للقطع فهي متوفرة عند الموزعين للنيسان وكذلك الوكالة وسعرها اطن انه مناسب حتى لو شريت من الوكالة بعدين الموتر يعمر انا شايف واحدة مع راعي بعارين انا ماادري شلون صبرت عليه الهاليلوكس قوية وفعالة لكن الدبل منها شكلها متوحش رفيعة جدا خطر تنقلب الايسوزو قوية مايحتاج لكنها سعرها خيالي طبعا اكلمك عن ال 3000 سيسي الفل انا اعرف ناس يروحون عليها الربع الخالي حتى وصلوا حدود عمان بخاخ 2003 ولا شكوا منها بشي بالعكس اقتصادية بالبنزين
وكذلك شكلها مقبول جدا
في الاونةالاخيرة في عنصرية بين اهلالدداسن واهل الهايلوكسات زي مشجعين الهلال والنصر لكن انت قرر برغبتك لانك انت الاول والخير اللي بتستفيد من السيارة

والله يدلك على لالي فيه صالح

اخوك ابو الطوراي سامحوني على الاطالة لكن هذا ماوددت ان اقوله

وسلامتكم