المساعد الشخصي الرقمي

مشاهدة النسخة كاملة : يا أهل الفورد الـ Explorer أنتم الحكم


جال النفود
08/10/2010, 03:09 PM
بسم الله الرحمن الرحيم


بعد التحية


يا جماعة الخير أنا رجال شاب راسي اللي يشوفني أبعمر بيت ماني شاري سيارة


ودي بـ فورد اكسبلور


لكن الكثير شاروا علي وقالوا لا يقربك


وأنا ناوي من 2006 وفوق وبكل صراحة معجبني بس ما أدري هل هو مضمون وإلا لا


المشكلة إني راعي خطوط من الرياض ومدرس بأقصى الشمال



قالوا فيه مشكلة بالقير والدفرنس وإذا أنت راعي نفود بعد لا تقربه


طيب يفرق الأمريكي عن الخليجي


الموتر فخم شكل ومو ذاك الغلا



الفزعة يأ أهل الاكسبلور يا أهل الرابطة


أفيدوني


له دعوة بظهر الغيب
الله يزوجه
اسير الغضا
08/10/2010, 03:22 PM
طيب اللي ماوده يتزوج الحين ((خخخخخ ماعلينا

من ناحية البران الموتر هذا سلمك الله مب حق تطعيس وتفجير ومقامز سيوف الموتر يوصلك لمكان كشتك وتستانس وبه دبل
بس مراقا ماينفع
جال النفود
08/10/2010, 03:33 PM
طيب اللي ماوده يتزوج الحين ((خخخخخ ماعلينا

من ناحية البران الموتر هذا سلمك الله مب حق تطعيس وتفجير ومقامز سيوف الموتر يوصلك لمكان كشتك وتستانس وبه دبل
بس مراقا ماينفع


الله يسسلمك أخوي أسير

مسألة المراقا وشغل الهواش مع المكينة ما أعرفه ولا أحبه

لكن يهمني أكثر الخطوط هل إذا مسكت فيه خط أضمنه أرتاح من ناحية الأعطال وغيره

بيض الله وجهك أخوي .
حايلي .نت
08/10/2010, 04:30 PM
من تجربه اخوي
الموتر شي لا من ناحيه النفود ولا من ناحيه الخط

اذكر مره طالع به للنفود الموتر طبعا 2002
فاك الدبل وطلعت فوق راس طعس وفيه راعي باترول 2007 عجز يوصل مكاني وتفس الحاله هايلكس 2010 دبل

هذا موب مدح في السواق مدح في الموتر ^_^

هذا بالنسبه للنفود وفيه كم واحد ساقه فالنفود ويمدح في الموتر

اذا جينا للخط الموتر له عندي 6 سنوات كل صيفيه امسك به طريق الجنوب ولا شفت منه الا الخير

اما خراب القير والدفرنس

الدفرنس فيه صوت تقل صوت طياره ومعرف هذا الصوت في الاكسبلورر الشكل القديم من 2005 وتحت

لكن القير من 2004 وتحت فيه مشكله الي اذا جيت تعش لـD يطق الموتر

ومن 2005 وفوق عدلوا المشاكل الي فيه


وصراحه الموتر شي لا من ناحيه الشكل ولا القوه ولا السعر الفل كامل 2010 قبل فتره بـ 105


عاد انت استخر واذا ناسبك الموتر توكل على الله
عاشق يوكن
08/10/2010, 09:32 PM
السلام عليكم
يا أخوي أنا مجرب السيارة انصحك تاخذ 8سلندر لان المكينة تدوم
والله يوفقك
البرتقالي
08/10/2010, 09:52 PM
انا مثلك سمعت ان فيه مشاكل بالقير لكن ما افتيك

وللفائدة قبل اسبوع كنت بالتوكيلات مخرج 8
سعر اقل فئة بلوحاته 97000
التعـ King ـديل
08/10/2010, 09:57 PM
عزيزي انت محتار لانك تسئل الشخص الخطاء

لاتسئل عن سياره لاي احد الا لشخص جربها لعده سنوات فقط هو اللي بيعطيك الزبده
m3ax
09/10/2010, 12:20 AM
اخوي ..

معاي 2006 امريكي V8

الموتر والله انه عز ويعجبك لا من ناحية خطوط ولا من ناحية بر

اسوقه كأني أسوق سيارة سيدان وسط المدينة والله ما ابالغ في هالشي ابد ..

الموتر من موديل 2005 ونازل يقولون كان فيه مشاكل بالقير والدفرنس

اما من 2006 وطالع القير تم تعديله بعد ما كان فقط 4 سرعات صار 6 سرعات

مريح جداً في الخطوط وفخم بس يبيله رجال يحافظ عليه مو رجال يكده كأنه يكد هايلكس 85 :)

عسى الله يوفقك اخوي ويرزقك الموتر اللي يريحك
جال النفود
09/10/2010, 04:07 PM
حايلي نت


بيض الله وجهك وعز الله ما قصرت الله يعافيك لاهنت


..



عاشق يوكن


لاهنت يالغالي وما قصرت يا بعدي .. أما مسألة 8 سلندر أبشوف عنها عما قريب إن شاء الله


تسلم .


..


بروستد حاشي


تسلم لي يا بعدي شاكر لك ولاهنت


..


التعديل


سلمت يالغالي وصادق يا أخوي .. وإن شاء الله الربع من اللي يعرفون له


لاهنت


..


معاكس


بيض الله وجهك وما قصرت لاهنت يالغالي


تسسلم


..



الله يزوجكم وأنا معكم لو ثانية
ولد وايل..
09/10/2010, 07:30 PM
أخوي سلمك الله...

فإذا عزمت فتوكل على الله...

الموتر ماعليه ممتاز إذا تبي من 2006 وفوق توكل على الله أخبر اخونا تناهيت الله يوفقه بمدح بالموتر بالخطوط ومعتمد على الله ثم عليه...

وانا اقول لك شف الفرق بالسعر بينه وبين الإكسبدشن والا اليوكن او التاهو...

لان الإكسبدشن واليوكن اكثر إعتماجيه نوعا ما.

وأحرررررررص على النظيف الأمريكي إذا اخذته نظيف و تهتم بصيانته يطربك ويعيش اكثر من غيره...


بالتوفيق لك اخي العزيز ....ولا تنسااانا من دعوااات الغيب...
You Like Me
09/10/2010, 08:20 PM
السلام عليكم ورحمه الله

اخي الغالي

كنت اسمع نفس ما سمعت
لكن لي ولد خال كان معاه 2006 مطلعه من الوكاله
ولا اشتكى منه ابد استخدامه بالنفود قليل لكن اذا دخل به
مايرده شي اي مكان يبغاه بإذن الله يروح له الموتر بحسب كلامه
نفسه خفيف فالنفود وفي الخط شايل نفسه ولا يعلى عليه
الموتر صار له حادث معاه وباعه طلع له 2009 برضو جديد
يعني الرجل تقدر تقول ادمن على السياره وماوده يتركها
سعره مقارنتاً بالتكنولوجيا والراحه وسمعة فورد
اعتبرة ولا شي ومناسب جداً لو قارنته بسيارات اُخرى
لا تضاهيه رفاهيه وانا بإذن الله ناوي على 2010

بالنسبة للأخ اللي يقول تاهو ويوكون
ياخوي انا معاي يوكون 2009 من الوكيل مطلعه والله انه دابل كبدي
ياكثر العيوب التصنيعيه اللي فيه كل ما رحت للوكيل والموتر تحت الضمان المشكله
الفنيين يقولون طبيعي كل GMC كذا
والله ماعاد صرت اعرف وش اللي مو طبيعي
لكن يوم اخذو القريشات ما قالو مو طبيعي تدفع كل هالفلوس
انصحك لا تتورط لا بتاهو ولا يوكون
ترا بتبلش بحساسات الاطارات والبكرات والاقفال وضغط هواء السياره اللي يتمرجح
من اول يوم طلعت السياره من الوكاله ويقولون عادي طبيعي
186,000 ريال وبالأخير سياره كلها عيوب تصنيعيه والوكيل يقولك عادي
كل السيارات كذا
على فكره اخوي معاه تاهو 2008
نفس المشاكل اللي عندي بالضبط
واحد من زملائي في الدوام معاه يوكون 2008
جاري يوكون 2009 نفس المشاكل بالضبط
وكلهم سمعو نفس الكلام اللي سمعته من الوكيل
والله على ما اقول شهيد
مغلي
11/10/2010, 09:52 AM
بما انك وصلت لل 105 الاف ريال

خذلك فورتشنر فكس 1 او 2
مكينه 6 سلندر

يكفي انه تويوتا

تبيه خط --- تبيه تطعيس وهبال --- تبي اعادة بيع شيك

والسعر 108 والثاني 117
وبل الغمام
11/10/2010, 11:25 AM
الاكسبلورر..
عندي موديل 2003م امريكي كلمة حق أقولها ان السيارة عملية وما عليها مقارنة بسعرها وصيانتها ماتكلف وداخل الديرة حجمها معقول ..