خبراء وعشاق الشاص ,, وقفه واستشاره !!

[تيتشر]

السلام عليكم ورحمة الله وبركاته

سمعت ان الشاص 2010 غير مرغوب مقارنه بـ 2009 هل هذا صحيح ؟؟ وما هو السبب ؟؟

وما هي أفضل المواصفات للشراء وما هي الفئات المتوفره بالشاص بشكل عام ؟؟

ومن هم أفضل الوكلاء لأني اخبر فيه العماني والاماراتي والسعودي وكلن له ميزته !!

واذا كان فعلا 2009 أفضل من 2010 , هل يوجد بالسوق 2009 أصفار ؟؟

مع شكري وتقديري

[أبوسعود711]

السلام عليكم ورحمة الله وبركاته

سمعت ان الشاص 2010 غير مرغوب مقارنه بـ 2009 هل هذا صحيح ؟؟ وما هو السبب ؟؟

بالعكس الحين الشااص العشره مرغوب اكثر من التسعه
والسبب صرفية البنزين اقل من 2009 والمكينه راسين يزود النشااط والناس اختلفوا بالمكينه والديكور تغير تغير جذري

وما هي أفضل المواصفات للشراء وما هي الفئات المتوفره بالشاص بشكل عام ؟؟
انا انصحك تاخذ فل كامل واحرص ان يكون بريمي عماني
فل كامل يعني ونش ودفلك لان سمعته بالسوق كويسه افضل من غيره

ومن هم أفضل الوكلاء لأني اخبر فيه العماني والاماراتي والسعودي وكلن له ميزته !!
العمااااني ولا دوور غيره

واذا كان فعلا 2009 أفضل من 2010 , هل يوجد بالسوق 2009 أصفار ؟؟
اتوقع تلقى بس ناادر
مع شكري وتقديري
اتمنى افدتك اخوووي وتقبل مروري




اتمنى افدتك اخوووي وتقبل مروري

[تيتشر]

ابو سعود جزاك الله خير لا خلا ولا عدم

انتظر آراء البقيه

[عاشق z71]

مشكلة 2010 جا المكينه الجديده حتى 2009

الي هي 4000 صحيح احصنه اكثر لكن تورك اقل واقل تحمل من 4500 الي ماتوقع انه بيجي للشاص عز مثل وقت هالمكينه


لذلك تلاقي اصحاب الترهيم والتعطيس المبالغ فيه }} الي يجيك راقي الطعس بالدبل الثقيل بالثالث


بعضهم طقت معهم المكينه بسرعه


بعكس المكينه الاولى


ولكن اذا رفيزك راعي ركاده وعادي مكاشيت عاديه او انه كبير بالسن مثلا

فخله ياخذه وهو مطمن

يبقى انه شاص وملك الاعتماديه ..

[نجد 2007]

انا معي بريمي 2010
ماعندك احسن منه عزم وقوه
خذه ولاراح تندم إن شاء الله
ولايهمونك وكالة يقولون ولا أحد جرب منهم بس يقولون
مكينته مثل البرادو والفور تشنر والجكسار
فيه أحد اشتكى منه مافيه
توكل على وخذالعشره وديكوره من داخل شئ افضل من الأول بكثير
تحياتي

[SIF]

حبيب قلبي

صدقني من يقول إن موديل 2009 أفضل من ألي بعده كله كلام فاضي
أشتر الجديد دائما وترى هذه من حركات الشريطية بالسوق لانزل جديد وأنكبوا بألي معاهم قاموا يعطون من الرخيص

ورضى الناس لايدرك

بعضهم يقولون 2007 أفضل أبو شنب و .....
والعكس صحيح

والاند 2007 أفضل من الجديد
لا
الاند 97 أفضل منهم كلهم

وتسمع الكثير وبالأخير مايصح إلا الصحيح

الناس تبيع القديم وتشتري الجديد

فعليك بالجديد ياملى الغناة والعافية

[تيتشر]

عاشقz71 , نجد2007 , SIF


جزاكم الله خير ويامال العافيه


فعلا مثل هالردود من خبراء أو مجربين ذات أهميه كبيره ولها نسبه أكبر في تحديد رأي صاحب الشأن


انتظر آراء ومعلومات أكثر

[اسير الغضا]

انا سمعت ان 2010 دعسته كهرب 2009 سلك وهاذي على ماسمعت سلبيه بالنفود السلك افضل

انا صراحه مالي خبره لاكن بشكل عام هل الشاص الجديد فيه اكترونيات وكميوتراذا كان نعم يصير 2009 ازين لان الاكترونيات توهيقه بالبران

[تيتشر]

اسير الغضا لاهنت

[واحد مبسوط]

الله يجزاك خير انك طرحت هالاستفسار

تويوتا استغنت عن المكينة السابقة اللي وردت من تقريبا موديل 91 الى 2009
والتي اثبتت نجاحها وقوتها وقلة اعطالها
واستبدلتها بالمكينة الجديدة التي وردت منذ فترة 2003 للبرادو
واستخدمتها تويوتا في جميع فئات الدفع الرباعي سته سلندر
مثل
البرادو
الاف جي
الفورشنر
اللاندكروزر6سلندر
والشاص والربع2010
المكينة حسب استخدامي لها في الاف جي
لايعلى عليها قوة وعزم وهدوء
لكن الاف جي لايقارن بالشاص الذي يتعرض لاحمال واثقال وهل تتناسب هذه المكينة مع هذه الاحمال لا اعلم
ولاتنس ان المكينة الجديدة المنيوم بستم نايم مثل مكينة vxr8سلندر
التي اثبتت نجاحها من موديل 1998
وفيه نقطه احب اذكرها
بالنسبة للدبل في الشاص 2010هل هو تروس مثل الموديلات السابقة ام نظام جنزير
نرجوا من اهل هذه السيارات الافادة عنها

واذا تبغى الكلام اللي يجمد على الشارب
خذ موديل جديد وريح راسك
واحرص على الفل كامل ونش ودوفلك
مصير الناس ترجع له غصب ولا طيب

تحياتي للجميع

[تيتشر]

اشكرك اخوي واحد مبسوط

حقيقتا قرأنا آراء ووجهات نظر مهمه مع شكري وتقديري

[العسكري]

أخي الحبيب ... عليك بالشاص 2010 سياره ممتازه ... والموديلات القديمه راحت بسلبياتها وأيجابياتها ... والسيارات موديلات فلا ترجع للخلف . بارك الله فيك.

[s3ed]

السلام عليكم

يمكن يا اخوان اختلف معاكم انا جربت المكينة الجديدة ال 4 لتر

ميزات ال 4 لتر
- اقتصادية
-انطلاقة قوية
-خفيفة الوزن


عيوبها مافيها عزم او تورك قوي اذا حملت في الشاص الجديد حملة ثقيلة تحس بمعاناة المكينة وثقل +انة المكينة تبرد

السبب دائما المكينة الراس واحد اقوي في العزم اقل سرعة واكثر صرفية بترول اللي هية مكينة الشاص ال2009 مكينة 4.5

+المكينة القديمة البلوك او راسها حديد المكينة الجديدة الومنيوم


انا ماني بشريطي ولا تاجر سيارات بس او ماسمعت بخبر تغير المكينة اشتريت لي شاص 2009 جديد الحين ماشي 5 الاف فقط ولله الحمد

ال4.5 غير وذة المكينة اللي نجحت الشاص

المسألة انة تويوتا تريد توحد المحركات لاسباب اقتصادية

[sa3d]

حياك اخوي كانك رجال تحمل على الشاص حمل ثقيل وانت راعي نفود انصحك ب 2009وكان عزبتك خفيفه ومافي ذاك الحمل الثقيل فتوكل على الله وخذ 2010 وعلى فكره 2010 افضل في الخطوط من 2009 واذا بالنسبه لي افضل 2006وعسى الله يوفقك ولاتنسى صلاه الاستخاره وانااخووك

[من كبار تجار]

انا معي بريمي 2010




ماعندك احسن منه عزم وقوه
خذه ولاراح تندم إن شاء الله
ولايهمونك وكالة يقولون ولا أحد جرب منهم بس يقولون
مكينته مثل البرادو والفور تشنر والجكسار
فيه أحد اشتكى منه مافيه
توكل على وخذالعشره وديكوره من داخل شئ افضل من الأول بكثير
تحياتي

السلام عليكم

اكيد الجديد احسن من القديم من ناحية الصبر لاكن الجديد أخف نفس بس يحتاج رعاية اكثر
وبنسبه لكلام اخوي نجد
انا كنت اعتقد ان الجكس والبرادو والإف جي والشاص مكينة وحده بس بعد السؤل والتحقق لقيت انها تختلف في حجم البساتم وبعض التقنيات

(ولا تنساء صلاة الإستخارة في كل الامور بارك الله فيك)
وبالتوفيق للجميع

[تيتشر]

الإخوان s3ed , s3ad , من كبار تجار

اشكر لكم مروركم

تم بحمد الله شراء بريمي 2010 (عادي ) لولد خالي

مع العلم ان وجهات النظر التي طرحت كان لها تأثير كبير بقرار الشراء

مع شكري وتقديري للجميع

[اسير الغضا]

الله يطعمه من خيره ويكفيه شره

[s3ed]

الإخوان s3ed , s3ad , من كبار تجار



اشكر لكم مروركم


تم بحمد الله شراء بريمي 2010 (عادي ) لولد خالي


مع العلم ان وجهات النظر التي طرحت كان لها تأثير كبير بقرار الشراء



مع شكري وتقديري للجميع







الله يبارك لة ويسلمة من كل شر

[الؤلؤي 2006]

عزيزي
خذ 2010 وتوكل على الله محاكيك طاق 2010 تطق باصبع للموديلات القديمه وعلى قولة الاخوان خلك من وكالة يقولون

[نيتروجين xp]

ما شاء الله ، ألف مبرووووووووك الموتر ..

الله يعطيه من خيره ويكفيه من شره ..

موفقين خير ..