جنوط الغرابي

[طخيمان]

بسم الله الرحمن الرحيم
حبيت أسألكم ياجماعة عن الجنوط اللي تباع في الغرابي (لأهل الرياض)
يجي منها جنوط لكزس ولاند كروزر وباترول وغيرها ...
وأغلب الناس يركبونها على سياراتهم لأن سعرها هو على ما أظن بين ال800 الى ال1500 ريال
بينما الجنوط الأصلية تكون أسعارها غالية مقارنة بأسعار الجنوط اللي في الغرابي
وسمعت انها وارد دبي
وسؤالي هل يعتمد عليها ويؤمن شرها يقولون انها تنعفط اذا جاها ضربة قوية او بنشر وأيضا انها تعدم المساعدات
وما هو البديل لها هل هي انك تشتري الجنوط من التشليح
ولكم مني جزيل الشكر وآسف على الإطالة .

[ابن بدران]

السلام عليكم

أخوي ابو الطواري

من تجربة قديمة بسوق الغرابي انصحك ما تاخذ جنوط الا من واحد تعرفه بالغرابي

لأن فيها الجنوط الممتازة وتكون شد وكالة ما أعجبت راعي السيارة وغيرّها ...

وفيه من دبي مثل ما ذكرت وأعرف واحد يشتغل بالغرابي دايم يروح لدبي يجيب جنوط ..

وفيه من التشليح والغالب تكون مصدية ومكسورة ويعدلون كل شي فيها بالمخارط اللي بالصناعية

القديمة ولو مريت المخارط هذي وشفت وش يسوون بتمسك راسك وتستغرب ؟؟!! الجنط يجيهم كأنه

قوطي صلصة من التشليح ويرجعونه وكالة وبويه جديدة بس عند الاستعمال ما يصمل أبد ...

من تجربة أنصحك أخوي ما تشتري الا من واحد تعرفه .. أو لا شريت خذ على الشرط واعرضه

على واحد منهم أو أي بنشري علشان يعلمك عن الجنط هو زين أو لا ..

[أبو عكفة]

يا أخي ما أفتيك لكن أعرف ناس كثيرين مركبينها على مواترهم ولا أشتكو منها وخصوصاً جنوط اللكزسس

[طخيمان]

شكرا
ابن بدران على المعلومات القيمة
شكرا
أبوعكفة على ماقدمته من معلومات