يالبراوننق أرقدي وسط الجفير

[عاشق الجبل]

السلام عليكم ورحمة الله وبركاته


لاشك أن الأسلحة لها متعة في أقتنائها خاصة إذا كانت مصرحة ، لأنها سند للرجال بعد الله في الضيق

والصيد والمتعة في التحدي على الرمي من بعيد .

كنت من عشاق بنادق البراوننق وبعد أن ظهرت السوبر بانيلي بان الفرق بين الصناعتين من ناحية

الدقة خفة الوزن والتحمل وسرعة الفك والتركيب .

فجاء في خاطري أن أنظم قصيدة هجاء في البراوننق :)



فقلت :




يالبـراوننق أرقدي وسط الجفيــر
راح وقتـــك وأنتهيتـي من زمان

. . .

وردت روما لنـــــا سلاحٍ خطيــر
أتـــقنوا صنعه وحطوا له ضمان

. . .

تذبـــح اللي واقعٍ واللي يطيـــــر
وفوق هـذا تـــأخذ بـبطنه ثـــمان

. . .

ماتــفرق بيــــن غـر ومستذيـــر
بأذن ربي تذبح الصيـــد السمان

. . .

يشتريها من غدى قلبه بصيـــــر
ويخسر اللي أحتقرها وأستـهان

. . .

وأنتشاره بيننــا اصبح كثيــــــــر
من شمال المملكة وحتى عمـان

. . .

السوابر أصبحن مثـــــل السفـير
بكل ديرة تظهر اليــــوم وتبــــان

. . .

البراوننق عقبها عمره قصيــــر
مالقت بين السوابــــــر له مكان



وهذه القصيدة وصلت لوكيل بنادق سوبر بانيلي في الكويت بأسمي : ( أبومنصور )

[ريف النشاما]

السلام عليكم ورحمة الله وبركاته

أولا -- أهنئ خيمتنا العزيزة في ظهور (سهيل ) من خلف الجبل ......فأهلا وسهلا فيك بيننا شاعرا

تبين من خلف التله :cool: .......مشاء الله أثري عندنا شعراء وحنا ماندري

ثانيا -- أنا لأول مره أشاهد قصيده مكشاتيه في بندقيه ........فهذا سبق مكشاتي حسب علمي :good:


ثالثا -- لانريد هذا المعين أنا يتوقف .........


ولك مني أجمل تحيه

[عاشق الجبل]

الأخ : ريف النشاما


أشكرك على هذا الثناء الذي لا أستحقه وإن دل فإنما يدل على حسن ذاتك وعشقك وتذوقك للشعر .

ومنك نستفيد يالغالي .


وسوف أطرح القصيدة الثالثة قريبآ إن شاء الله .

[الضاحي]

صح لسانك يا عاشق وعز الله انك شاعر وصدقت في اللي كتبته في السوبر .

اتطلع للمزيد من قصائدك الجميلة .

[al-nashmi]

السلام عليكم ورحمة الله وبركاته

اخونا عاشق الجبل

مشكور على القصيدة وتستاهل السوبر المدح والثناء

ولو اني وكيل البنلي كان عطيتك وحدة جديدة بكرتونها......... تستاهلها وتستاهلك يالبواردي :good:


تحياتي

النشمي

[((( الحر)))]

صح لسانك يالعاشق

وبارك الله فيك

وعلى قول ابو عبدالعزيز

نامل ان تستمر بابداعاتك

تحيتي

[أبوأحمد98]

صح لسانك أخوي ((عاشق الجبل))..وعز الله ان السوبر تستاهل

[عاشق الجبل]

الأخ

( الضاحي )


( لاهنت على مرورك يالغالي )



. . .



الأخ


( النشمي )


ماعليك زود طال عمرك وهذا من طيب أصلك



. . .




الأخ


( الحر )



ماقصرت ومشكور


. . .


الأخ



( أبوأحمد 98 )


صح بدنك وعز الله تستاهل مثل ماتفضلت

[ابو طنب]

صح لسانك يا عاشق الجبل


اهنيك على هذه الرائعة اللي نورت المنتدى


ولا تحرمنا من جديدك

[عاشق الجبل]

صح بدنك أخوي الغالي

[غيّام]

ماشاء الله والله منتب سهل يابو منصور صح لسانك
بس عسى الوكاله شرهوك بقطعه تستاهل
عسى القصيده الثانيه في التيتان
ننتظر ابداعاتك
ابو عبدالكريم
غيام

[عاشق الجبل]

يبوعبدالكريم ( الحمدلله مانيب من اللي يقصد وينتظر الشرهات ) :)


من زين فعايل السوبر بانيلي ( صادت وعل ناخس في السودان بالمتوسع ) بعدها قصدت فيها هالقصيدة .

[صوعان]

للفاهم والي يبي يستشير
ومن يبي الصنعه والضمان
براوننق وخل مخك مستنير
واترك عنك صنع الطليان
ياما ذبحت من الصيد الكثير
وفعلها مثل العلم بان
ام شجره با البنادق مالها مثيل
انشد عنها كل من قال خبير
من قناها ما اظنه يستشير
وانا اشهد ان الصيد عليه هان


مجرد محاوله رد على ابو منصور لان بندقي براوننق بلجيك ام شجره القديمه ولها معزه بقلبي:)

[عاشق الجبل]

صح لسانك يالشيخ : صوعان

وكان الدعوى على الذكريات فما ألومك والبراوننق لها ذكريات قديمة معي .... لكن !!!

مشكلتها ماتتحمل فشق ضغط عالي ومعقدة الفك والتركيب اذا أنكسر فيها ناتوش أو أبرة وخشبها يتشلخ مع الأيام .

عليك وأنا أخوك بالسوبر بانيلي فيبر بماصورة براوننق 3 أنش ( للضغط العالي ) لأن الذكريات ماتنفع وقت العطال :)

وكل مافي البراوننق القديمة رمي ماصورتها ، نأخذ ماصورتها ونرهمها على السوبر وخلاص :)

[الحضري]

صح لسانك ياشيخ ..


قصيدة رائعة بس ياخوك ما كنك زعلت البراوننق :) .. دام لها ذكريات عندك اقل شئ قول فيها قصيدة شكر وعرفان ههههههههه



المهم جعله بالعافية البدن الناخس .. ودام الفشقه متوسعه ماعليك خلاف .. اكيد المرمى قريب ؟


في حفظ الله

[عاشق الجبل]

تسلم أخوي الحضري

باين عليك راعي صنف ( صيد البدون ) والوعل مرمي على بعد 25 متر

والبراوننق أندثر زمانها وأنا أخوك والتكنولوجيا وتطوير صناعة الأسلحة لعب دور كبير في أندثارها ماعدا الغازية الجديدة

[دله وفنجال]

السلام عليكم...
مشاء الله وش هزين اخوي ابو منصور والله انك جبته وصح السانك على هلقصيدة من عقبك يبون يسكرون مصنع البرووننق..؟

[عاشق الجبل]

هلا بدله وفنجال :)

رفع الله قدرك على رفع الموضوع :)

والسيارات والصيد أشغلني على القصيد .... لكن هناك جديد :)

[نقا هشال]

يامرحبا ويامسهلا

صح لسانك مليون اخوي

قصيده جداً جميله

[عاشق الجبل]

تسلم أخوي ( نقا هشال )

[صوح الجبل]

مشكــــــــور ..... يابومنصور ...... ويخليك ربي ..... قصيده جميله مشوقه لاقتنائها .... وبانتظار جديدك يالغالي ....