سوبر سفاري جديد ولا Vxr 2003 فل كامل مستعمل..؟!!!

[ابـو صا لـــح]

اول شي السلام عليكم ورحمة الله وبركاته ...
وثاني شي الشتاء قرب(بس مهب بالحيل) وناوي اشتريلي موتر وكنت مصمم على الVXR مستعمل طبعا
2003 أو 2004 فل كامل نظيف طبعا بس مالقيت الا من 135 وانت طالع .

قالي واحد من الشباب ورا ماتشوف السوبر سفاري 2005 فل كامل بحدود 135000 (بدون جلد والجلد 145)
بلوحات والعداد زييييرو وموتر ممتاز وفيه مميزات افضل من الVXR ومن هالكلام ....!
طبعا انا احترت بالحيل ومدري وش اسوي
بس ياليت اخواننا بمنتدى المكشات ان يسدوننا بارائهم
طبعـــا الVXR ماعليه كلام لكن هل السوبر سفاري اذا كان بالسعر هذا أفضل ؟؟؟؟ :confused: :confused:

[عاشق الجبل]

وعليكم السلام ورحمة الله وبركاته

مبروك مقدمآ يبوصالح السيارة مدام أنك نويت تشتري :)

بصراحة أنا من عشاق النياسين ولكن

اذا أنت رجال تبي تستخدم السيارة لمدة لاتنقص عن 5 سنوات فعليك بالباترول ولن تندم وتبي تدعي لك على شرط يكون

فيتك 4800 .

وأن كنت تبي تبيع قريب فعليك بالــ v x r لأني شاريه من 3 سنوات ونزلته السوق ونقص 2500 ريال فقط

[{السبيعي}]

يا طويل العمر vxr
ماعليه كلام عز الله انه موتر بر وكشخة ومقناص
اما السفاري ممافيه الاعضروب واحد الغبار
وانا جربت vxr

والسفاري
واحسنهن vxrالانه موتر صح

وان كانك رجال بتستعمل وبتقنص وكذا وبتكشخ
انصحك بvxrالانه رعيها
وانت ناوي تستعمل
المهم خذ قير عايدي على كيف كيفك

[عاشق الأشهب]

vx.r ولا عليك ولا تشاور

[عـبـود 911]

أنصحك بال في اكس ار

حق كشخه وحق كلش وزين وسعره ما يطيح

والباترول قوي وزين بس عيبه انه يصرف بنزين


والخيار الأول والأخير لك

[ماجد الشمري]

اخوي ابو صالح ...
مبروك مقدما .. نصيحة خذ لك باترول .. الباترول توه متغير ولاراح يتغير الان اما اللاند بيتغير كاملا السنة الجاية 2007 .. والباترول اخف شوي واعلى قوة وعزم وشكل الجديد فخم جدا وتحسنت جودة المواد الداخلية فيه ... انا اشوف ان شكله خصوصا الاسود من الداخل هيليوز ملكي ..مع الشاشة الامامية والخلفية .. مايحتاج ...





اخوكم ماجد الشمري

[عابد]

السلام عليكم ورحمة الله وبركاته

مثقل ما قالو الإخوان اللي قبلي إن كنت من اللي يشترون السيارة وبعد شهرين ثلاثة قلت ببيع ننصحك بالتايويتا عموماً وإن كنت تستعمل فعليك بهذا
http://www.nissan-arabia.com/vb/attachment.php?attachmentid=11573&stc=1

ومبروك مقدماً والله يعطيك خيرها ويكفيك شرها.

اخوك عابد

[ع.ف.الدرويش]

صبحكم الله بالخير جميعاً

أبو صالح.. قبل كل شئ مبروك والله يوقعك الموقع الصالح
طبعاً أنا أميـــل للنيســـان ولذلك أقول توكل على الله وخذ لك سوبر سفاري.. يكفيك إنه بيكون موتر جديد وبسعر معقول مقارنة بآخر مستعمل
أنت وبصراحة مانت دافع 10000 وإلا أقل منها لا بتحط شئ واجد فخذ لك جديد يريحك بإذن الله ولا يتعبك
والسفــــاري الـ2005 يا زين شكله ويا زين مواصفاته وغير كذا لا تنسى قوة محركه فيتك 4800 سي سي

أخوك // أبو فهد

[_جنط مسخن_]

اخوي أبو صالح"
انا ماني زايدن عن الأخوان الشيء الكثير لأنهم ماقصروا كفوا وفوا بس أنا ابقول كلمتين ال Vxr سعره فيه ويمسك سوقة وغير كذا مايصرف بانزين مثل السفاري .... اما السفاري تراه نشاط ومكينة بس انه لادخلته للسوق بعد كم سنة وثر السعر مب مثل مانت تبي فنصيحتي لك خذا ال Vxr وريح عمرك والله يطرح لك فأي من الأثنين البركة,,,,, ومبروك مقدماً

[الدشقة]

لو اني مكانك اشتري تويوتا وأنا مغمض

يا حبيبي هذا vxr مو لعبه والفرق عن السفاري اشياء كثيره
1- يستاهل قيمته بسبب الميزات المتوفره فيه اكثر من الي في السفاري
2- طبعا انت ما بتحتاجه لبر بس اكيد بتكشخ فيه داخل البلد وهو ذو فخامه عالية جدا
3- الناس دايم يجذبها الاند كروزر اكثر من اي جيب ثاني .
4- انا من اهل الجنوب والتويوتا اقوى من النيسان في المرتفعات اذا بيخدمك في المناطق الجبلية
5- القوة في الاماكن الرملية وما يخفى على احد قوته في الرمال
6- يمسك سعره
7- يمسك البنزين
8- وجود مرفقات قيمة
9- قطع الغيار وهذي مهمه جدا ترا النيسان والله نار قطع غياره تخيل واحد من الشباب يبغا يغير شمعات للنيسان حقه والله قالوله 700 ريال وين يا عمي سلامات
10- الرفاهية والسعه الداخلية والتبريد افضل من النيسان بكثير
11- النيسان يحتاج لربط بإستمرار ومن الي فاضي كل شهر يودي الورشه علشان يربط موتره

ملاحظه :
انا كان عندي نيسان ويا ليتني ما قلت للوالد يشتريه لي عذبني يارجال حرارته وبنزين وربط وما كان لي كرت في البر اذا جتك الاند كروزر
سوء العروض لدى الوكيل وبعته بخساره ومبسوط من الفكة منه
الحين معي برادو vx 6 سرندل يجمد على الشارب بس انصح في القير العادي انتبه تاخذ تماتيك العادي يصمل معك في اي سياره والخيار الاخير لك وابشرك مرتاح مع موتري الجديد لابنزين ولا قطع غيار وقوه وعزم وفخامه صح انه غالي بس حقه فيهانشاء الله
ومع احترامي لاهل النيسان والله ما احط فيه اكثر من 90 الف وانا خسران كمان .

[ابـو صا لـــح]

عاشـــــــق الجبل
الســــــــبيعي
عاشـــق الاشهب
عـــــــــبــود 911
ماجــد الشــمري
عـــــــــابد
ابــــو فـــهد
جنــــط مســــخن
الـــــــــدشــــقــه
والله انكم ماقصرتم والف شكر كفيتوا ووفيتوا بس زادت الحيره حـــــــــيره
اذا فيه احد مجرب سوبر سفاري 2005 يفيدنا وينفعنا

لان الVXR مايبيله مطوع معروف بس المشكله اني ابضطر للمستعـــمل..... :confused:

[أبوغمارة]

عليك بالسفاري ولا تتعداه

[ماجد الشمري]

والله انا اشوف موتر تطلعه على يدك جديد احسن من اي موتر مستعمل ...






اخوكم ماجد الشمري

[حـاتـم]

حنا مجربين الباترول الفيتك 2002 و 203 ال2005 لسى ماجربناه

بس مايبيله كلام شيخ المواتر ال4800 يروع عزمه بصراحه وقوته ،طلع ال4500 حقي الي فرحان به ولا شي عند 4800

وكلام اخوي عاشق الجبل 100%

وشكرا

[قناص الليل]

يا طويل العمر اشتر السفاري (( جديد و لا احد استعمله ، اضمن لك و اريح )) المستعمل الله يكفيك شر خراباته ما تدري عنه اسبوع اسبوعين تلقى طالع فيه مشكلة ...

نصيحه اشتر السفاري الجديد (( و الله مجرب في البر ما شاء الله عليه ، راحه و قوة و عزم و خفة و بعدين رفيع ما يتعلق بسهولة )) و صدقني لن تندم بإذن الله ..

جديد و الله اررررررررررريح لك يالغالي ...

[عاشق الجبل]

طلع الدراهم وأنا أخوك وطق النيسان وطرب رأسك ..... لاتردد :)


باركوا لأبوصالح ياجماعة الخير ولاتنسون تذكرون الله وتشترون الهدايا :)

[ابـو صا لـــح]

والله العظيم اني عارف انكم ياعضاء المكشات راح تعطوني الراي السديد
انشالله باذن الله راح اشتري لي سوبر سفاري جديد وكل هذا بفضل الله ثم فضلكم
بس ادعولي بالتوفيق ...


مشـــــــــــــــــــــــــكووووووووووووووريــــــ ـــــــــــن

[حـاتـم]

ابو صالح لاجيت تبيع تراني شراي بس ارفق عليه لاتكسره لي ههه هاذا وهو مبعد شراه


نشاء الله يرزقك الله واحد ويبارك فيه