ابستشيركم بخصوص خياش الرمل على الصندوق قبل ماتنقلب بي الموتر((بسم الله علي))

[اسير الغضا]

السلام عليكم ورحمة الله وبركاته

كيف حالكم طيبين

تعرفون اهل الدداسن والمعاناة مع المناقز بالطريق لو انا حليب كان:D صرت لبن
فيه حل وهو سحب سستة التحميل بس:mad: انا مابي اسحبه لاني احمل حمول بعض الاحيان
ولا ودي ادمر الموتر
جاء ببالي احط خيشة رمل وتعرفون ان كثير من هل الشواصي والهايلكسات يركبون خياش بالصندوق
بعضهم يحط وحده ويملاه وبعضهم يحط ثنتين على نص

وانا بحكم اني مطفوق وسواقتي الله بالخيرلاصار الشارع فاضي اخذ الدوار وانا لاف لفة غشيمه وعلى سرعه وتعرفون عنيزه ماهنا زحمات بالحيل

ولاتفهمون غلط ياجماعة الخير:D بالزحمات اصير عاقل ولا اعرف اخطم على احد

ودايم الف لف على سرعه وهذا طبع بي مااقدر اخليه واخاف ارفع كفرين شغل اس الحربي ومايهزك ريح :eek: ويصير لي بلاوي

فحبيت استشير يصلح لي الخياش واخوكم ماهنا ركاده ولا ارضى بالمناقز:(

اخاف الخياش يسببن انقلاب والله يستر ومثلكم عارفين ان هل الترفيع يحملون خياش

[احمد الشمال]

والله كان ودي ان افيدك باستشارتك لكن انا ماعندي خلفيه عن وضع الخياش بالصندوق.

سؤال: انت تريد ان تضع الخياش على طول موجود بالديره وبالبر؟؟

[Ra3i.mekshat]

وعليكم السلام ورحمة الله وبركاته :

أنا اللي أعرفة ان اهل الهايلكسات يركبون خياش علشان يتواسى الموتر من ورا وقدام ويطلع شكلة نصب
وفي بعضهم مب لم النصب وحاطينها علشان الراحة من المطبات والمناقز



تقبل مروري
أخوك : فتى الخوالد

[اسير الغضا]

اخوي احمد الشمال يعطيك العافيه
الخياش لهن فايدتين يرسن الموتر مايبدا يناقز

وبالبر للدداسن والهايلكسات يدورن الكفرات على سنع لن به ثقل عليهن
انا اللي خايف منه الانقلاب
ماودي يفهمون الاخوان اني غشيم وشغل تخطيم بين السيارات الحمدلله اسواقه راكده لاكن بحكم اني من عنيزه ولا هنا زحمات عادي اخذ الدوار على سرعه
ولا الف على سرعتي


وعليكم السلام ورحمة الله وبركاته :

أنا اللي أعرفة ان اهل الهايلكسات يركبون خياش علشان يتواسى الموتر من ورا وقدام ويطلع شكلة نصب
وفي بعضهم مب لم النصب وحاطينها علشان الراحة من المطبات والمناقز



تقبل مروري
أخوك : فتى الخوالد


والسؤال للاخوان راعين العرف وش الاضرار

منورين

[asdali]

بطريقتك هذي احتمال الانقلاب وارد وصارت لواحد ايام الشباب

انصحك ما تحط شي وتعود مع الدوار انك تشل الموتر على كفرين افضل من التحميل

[اسير الغضا]

بطريقتك هذي احتمال الانقلاب وارد وصارت لواحد ايام الشباب

انصحك ما تحط شي وتعود مع الدوار انك تشل الموتر على كفرين افضل من التحميل

عندي خبره على خفافي بالترفيع:D
المسأله حمل +عب كفرك+هوز مظبوط+وزن الموتر واذا سدح يجي معك ((نصيحه لااحد يطبق))
الكلام سهل والفعل صعب

ومشكور على الافاده يابعدي

[الرياضي1111]

لا ان شاء الله ماهنا انقلاب ولاشي بس ركب خيشه وحده ازين عشان ماتلعب اذا لفيت

وحطه بالنص وابد ان شاء الله ماتحرك ولا تقلب

الله يكفينا واياكم الشر

والصدز الددسن والهيلوكس زينته بالمطامر

وشكرا

[التعـ King ـديل]

نصيحه لاتحط شي وانت حر

[أبوفـهـــــد]

لالالا عاادي بس لاتكثر من الخياش وتطول وانت حاطها لانها تدمرررر الكارونه ..

[bn_501]

طيب اسحب سست وطول العاب

مجرد راي


والخياش اشوف هالي ينصبون يحطونه


تحياتي

[شنكار]

ابد اطمئن اخوي لا تخاف
انا حاط ثنتين مب وحدة
والف مع الدوار والموتر يزحف
ولايضرة لا انقلاب ولاشي
بالعكس تخلي الموتر ثقيل وراسي
سوها وماجاك علي

[((ابوملاك))]

ياخي اللي يحطونها عشان يرفعون

خلنا نقول انك بتحطها بالنص بظنك مهي متحركه مع الوقت ؟

قل مع شوارعنا الجميله تحركت ووما رديت به راحت لجهةوحده ولفيت وانقلبت بتنفعك خيشه

[ابوصالح77]

بسم الله عليك
الله يحفظك لعين ترجيك
شف وانا أخوك
خذ العلم من خبرة بالدداسن أكثر من 16 سنة :j تراي مانيب شايب
ركب مساعدات خلفية جبريل الأبيض أبوطقة (ثلاث طقات) وخله على الوسطى
والمساعدات الأمامية خلها بلد
أماالرمل فأجدعه عند أقرب مبلط مليس باكستاني .
تقبل مروري

[عبدالرحمن1980]

خيي اسير والله ان المناقز اريح لك يابعدي تراني جربت الجمس قسم بالله قهرني مافيه لاحركه ولاشي يعني انصحك بالمناقز:D:D:D

[اسير الغضا]

الرياضي:مشكور على الافاده
كنق التعديل:خخخ لازم تعلل يابعدي
ابوفهد :مشكور على الافاده
بن :لااخفيك افكر اطول اللعاب بس من غير ما اشيل السست والمناقز سالفه ثانيه الله يعين
شنكار:أسأل مجرب ولاتسئل طبيب
مجهول: لاتخوفنا ارحم والديك
ابوصالح: اهم شي شباب الروح ياما شيبان اعمارهم فوق وروهم بالطعش بالنسبه للمساعدات يمكن تحل بس ماتجيب المطلوب يمكن تعزز للخياش
عبدالرحمن: المناقز له طعم عز الله بس مشكلة الاهل وجدي الله يطول بعمره يناقز بالمرتبه شوي ويصقع السقف

الله يعطيكم العافيه

[الربذي]

وعليكم السلام
ودي اكتب عن المناقز العجيب بس متعاجز انا امس طرت طيرتين بالسيارة ددسن 2007 دبل كنت جاي من الكبري الجديد متجه لدوار الهدية قبل الاشارة فيه مطاب ماتاضح واجي حاط رجلي حول 130 حولها واطير فوق فوق وانزل واطير فوق فوق ويضرب راسي فوق ويطيح العقال والي بالحوض استبنه طارت فواق ثلاث امتار اظن كدت اقلب لم تروعني مثل تلك القفزة طبعا الاستبنه ماكانت معي ولا يقول اخوي لو الاستبنه بالحوض لسبقتك

وش الحل يااخوان هل تركيب مساعدات قويه مفيد
اما الخيش فمفيدها

كان بالموتر هنقلين وتانكيين ماء وشد وكان عاقل وحليل يوم رحمته ونزلتهن ويقعد ينعفص ؟؟؟؟؟؟؟؟؟ يعني مثل الحصان الغير مدرب وحشي

[اسير الغضا]

وعليكم السلام
ودي اكتب عن المناقز العجيب بس متعاجز انا امس طرت طيرتين بالسيارة ددسن 2007 دبل كنت جاي من الكبري الجديد متجه لدوار الهدية قبل الاشارة فيه مطاب ماتاضح واجي حاط رجلي حول 130 حولها واطير فوق فوق وانزل واطير فوق فوق ويضرب راسي فوق ويطيح العقال والي بالحوض استبنه طارت فواق ثلاث امتار اظن كدت اقلب لم تروعني مثل تلك القفزة طبعا الاستبنه ماكانت معي ولا يقول اخوي لو الاستبنه بالحوض لسبقتك

وش الحل يااخوان هل تركيب مساعدات قويه مفيد
اما الخيش فمفيدها

كان بالموتر هنقلين وتانكيين ماء وشد وكان عاقل وحليل يوم رحمته ونزلتهن ويقعد ينعفص ؟؟؟؟؟؟؟؟؟ يعني مثل الحصان الغير مدرب وحشي

خخخخ
قاعد اتصور الوضع:D


ماتلام يابعدي اكثر مطباتنا لا عيون قطط ولا بويه ماتشوفهن حتى بالنهار

بخصوص تخفيف المناقز
فيه الحلين تشيل سسته وهذا مايصلح للي يحمل وشكلك تكشت به وتحط قشك علشان كذا مايصلح تفك سسته

مالك الا تحط عليه حمل
والمساعد القوي ممتاز ويرسي الموتر بس عذروبه الموتر تصير قاسيه
اذا كان استعمالك له للبر بس حط مساعد قوي

موفق

[جيبي جايزلي]

الحل ان شاء الله انك تشري جركل ماء 40 او50 لتر وتحطه باخر الصندوق في الوسط وتربطه بشناكير الصندوق وفيه جراكل شايفها مدبدبه ما تاصل طرف الصندوق وعب ماء وانس المناقز

علي الاقل ماء تستفيد منه او تلقى احد يحتاج الماء
اما الرمل لا تقدر تثبته ولو يجي الخيشه ماء انشقت وحاسك الرمل واذا ربطت فرامل قويه يمكن يجي عندك بالغماره ههههههه

[ابوصالح77]

هلا بك أسير الغضا
بالنسبة للمساعدات مجربهن بغمارة وبغمارتين لا يعلى عليها
لكن ركب خلفيات فقط لأن الأمامية ثقلية بالحيل
والخياش أقرب مبلط
تقبل مروري

[ولد وايل]

ذكرتني عام 1408هــ والله يا انت من وين طالع

صرفية بنزين وخطر للانقلاب

[sameer_1798]

التحميل يخلي الكفر مايحفر لكن مادري انتم تستعملونه بالطعوس وما ادري كيف بيصير معكم
احنا يوم اننا ناوين نطلع ضلعان وعره نحمل الحوض صخور عشان يسير الونيت كنه جيب مايرده شيء .