قصيدتي الجيميه!!! ابي رايكم ياجماعة

[أسير المساري]

السلام عليكم ومسيتو بالخير جميع
اليوم يالربع جبت لكم قصيده من انشائي ومناسبتها كانت تحدي بيني وبين واحد من الشباب
طبعا منافسه شريفه حيث انه قالي اتحداك تجيب اي قصيده ماأقدر ارد عليها مهما كانت صعوبتها وجادت قريحتي بهاالقصيدة وسميتها (الجيميه) واتمنى يالربع تعطوني رايكم لانه يهمي واترككم مع القصيدة


لجت جنون المجنى وجبرت رجله تدوج

ولاجت بجاشه هجوسه والجمر بالجاش لاج

ياجبل جاك الجواب ولاتعذر بالهروج

جاوب بجيم وتجمل لاتلجى بالخراج

جاتك جموع الجيوش وجاك جراف البروج

جيش(ن) يجب الجماجم منه يشيب الحجاج

اجتمع واجمع جيوشك واجمع اوراق الدروج

واجهز بجيش المجابه في دجى ليل الولاج

جاك جبار المعاني في لضى جمره يروج

جابهه ولا بيجعل جيشك جفال وهجاج

والمراجل ماتجي في سجة سهول ومروج

جفرت(ن) من دون رجم(ن) جارده جول العجاج

اعجل وعجل هجوسك وانجز وشد السروج

والتعيجز مايجيب المرجله حسب المزاج


http://img264.imageshack.us/img264/5716/catsmv.jpg

[قناص الخمره]

صح لسسسانك..وبيض الله وجهك
بس خويك عساه يرد<ههههه
اذا رد لازم تنزل رده
ملاحظه: القافيه صعبه وتمنيت انك اكتفيت بلاثه ابيات بتكون اقوى< مجرد رأي

[-ظل الجزيرة-]

صـــــــــــــــــــــــــــــــــــــــح لــــــــــــــــــــــــــسانك

[الشاهد1]

قصيدة رائعة وتحدي جميل
ننتظر رد الخصم

[بروق نجد ع]

سلام عليكم
صح لسانك مليون ... وننتظر رد الخوي .. لا هنت .
الله لا يهينك وتسلم يمينك ..

[القزيز]

:fابيات قويه
الله يعين خويك ع الرد

[المكشاتية]

صح لسانك ..............

[مشقاص يام]

الله الله .. صح الله لسانك

ولكن عندي تعقيب طال عمرك

( الجيميه ) وهي معروفه لشاعر يام الشاعر/ علي بن بلال آل فطيح اليامي

وقد كتبت منذو زمن .. واضعها بين يديك للتتحرى ذلك .


هذه قصيده جيميه
للشاعر الكبير

علي بن بلال آل فطيح

من الشعراء الكبار الغنيين عن التعريف




أراجعك فـي جيَـك وجيَـك افجوجـه عـوج

و جاك المنام و جفني النـوم بـه مـا سـاج

جريح(ن) جبيح(ن) جارع(ن) جغمت المشهوج

و بوجهي وجاه الله و جهـدك تجـي بعـلاج

اعلاجي ليا واجهت وجـه(ن) جسـده ينـوج

كما نوج مجمـوع(ن) مـن الجـارد الوليـاج

و حجاج(ن) جبينه للدجـا المدلـه الميبـوج

غنج وادعـج(ن) كنـه سـراج الله الوهـاج

و جذبني جمال(ن) لأجله الرجل جات تسـوج

كمـا الجنـه اللـي لأجلهـا حجـوا الحجـاج

و لاجل ماجرى مجروح والجرح كيف يمـوج

تموج الجبال وجرحي ياللـي لجـا مـا مـاج

اجاهـد هواجيسـي وجاهـل عـن المنتـوج

و جوانب دروج الجـو مجعولـت(ن) ابـواج

و اناجي طيور الجو في الجـو يـوم تـروج

عسـى باجنحـات الزاجـل للشجـن منهـاج

هروج(ن) منجََات(ن) عن الجوج والماجـوج

و جوابات محجوبـه عـن الوجـه يالهـرَاج

بجاه الجليـل منجَـي اللنـج فـوق المـوج

و جبريل واللـي عـرج بـه ليلـة المعـراج

[عاشق الحجاز1]

اسير المساري/اتمنى لك التوفيق

وليتك كما قال احد الاعضاء اقتصرت على اقل من ذلك

لدي تعليق على السريع

1-جراف البروج .........الافضل دكاك لان الجراف يجرف في الارض بينما الدكاك لما هو قام

2-بيجعل............. ضعيفة بسبب الباء والافضل منها...من قبل يجعل

3-التعجيز.......ضعيفة والافضل منها......... التردي

لدي عودة ان شاء الله

[رحال الصمان]

القصيده غير قابله للنقد مشكور يالشاعر:l

[أسير المساري]

اشكركم يالربع على ردودكم الاكثر من رائعه

والاخ عاشق الحجاز انا اقول وانا اخوك لو مشيت على ملاحظاتك صارت القصيده ضعيفه لاني قاصد احط حرف

الجيم بأغلب الكلمات بعدين وانا اخوك انت نقدتني بكلمه انا ماكتبتها ولو ركزت في كلمتك اللي انت اعتقدت انها

بقصيدتي بتشوفها غلط لأنك كاتب (التعجيز) واللي انا كاتبها فوق (التعيجز) والتعيجز يعني التكاود أو التكاسل

والتعجيز هو التصعيب أو الاستحاله

والمعنى اللي انا قصدته فالبيت الأخير ان التكاسل مايوصلك للقمه وتحقيق الهدف المرجو

نقدك على راسي بس اقر القصيده زين وتأمل معانيها وانا اخوك بعدين انقد

http://img823.imageshack.us/img823/3332/mk522210.jpg

[دل البحار]

يقولها الي ما حضر حرب تشرين ...يــــوم المـدافـع تــرني

صـــــــــــــــــــــــــــــــح السانك على القصيده ,,

[عاشق الحجاز1]

الاخ اسير المساري/ صباح الورد

عزيزي تعليقك على راسي وكلامك جميل جدا لكن الشاعر المتمرس شرواك لابد ان يطوع المفردات على مايريد

ولا تكون المفردة هي من تطوع الشاعر

كذلك القصيدة تكون مجزئة اذا كانت مفرداتها تدل على معناها الاصلي اما

ان تعسف المفردة وتضيّر فهنا يتبختر

الضعف وحق له

خذ مثال/قلت جراف البروج والجراف كما ذكرت لك الذي يجرف و يشق

ويحفر ويحرث في الارض فهل تستطيع

ان تهدم به برج قام؟؟؟؟؟؟؟؟؟؟

انت هنا استخدمت المفردة في غير موضعها الاصلي

في كلمة التعيجز لقد اصبت فيما قلت وانا للامانة لم اقصد كلمة

التعجيز وانما اخطأت بكتابتها اذا لا يستقيم بكلمة

التعجيز لا الوزن ولا المعنى

وتبقى كلمة التعيجز كلمة مستهلكة ضعيفة لابد من استبعدها

هذا مالدي وقد اكون جانبت الصواب وانت المحق وكنت الحقيقة عائد

لمتابعة القصيدة غير اني وجدت تعليقك

فعلقت عليه

تقبل مروري

[أسير المساري]

للرفــــــــــــــــــــــع