بخصوص جيب اف جي شلون استخدمه ارجو الدخول

[abo_hoor]

السلام عليكم ورحمة الله وبركاته
يعطيكم العافيه اخواني حبيت استفسر من عندكم
خاطري اشتري جيب اف جي وكاله وحبيت اسال هل هو عملي ومناسب للسفر وخرباته قليله
وانا مو عزوبي عائله صغيره3 عيال هل يصلح لي لاني اذا شريته بشتريه اقساط يعني بعد خمس سنوات
عاد ارتاح من القسط ياليت الكل يقولي عن استخدامه واسمحولي على الازعاج
تقبلو تحياتي لكم اخوكم ابو حور

[abo_hoor]

ناطركم شباب لحد يبخل علي بشي الله يوفقكم ويحفظكم

[مجنون نحم]

والله انا كنت ناوي على واحد بس دايم اقرا عن مشاكل القير ومشاكل في ميكانيكا السيارة

كانك تبي موتر تحطة على يمناك خذلك سوبربان شفر مكينة 1500 اذا كنت تستخدمة للخطوط وتدخل البر قليل ( مريح جدا )

و2500 كانك راعي كرف وراعي بر ( قاسي شوي )

[سليمان20041]

انا كنت محتار بين الاف جي والبرادو فبعد مقارنة بمواصفات السيارة وحجمها ومميزاتها اخترت برادو 2010

[baaasss]

الراي والله اعلم ابتعد عن الاف جي خصوصا انه عندك 3 عيال الله يخفظهم لك المرتبة الخلفية صغيرة ما راح تكفيهم وتركيبهم وتنزيلهم راح يكون صعب عليهم ... وصعب عليك اذا كانوا نايمين
ولا تستهين في النقطة هذي ابدا.
ارشح لك اكسبلور سعره معقول وعملي جدا

[abo_hoor]

والله انا كنت ناوي على واحد بس دايم اقرا عن مشاكل القير ومشاكل في ميكانيكا السيارة

كانك تبي موتر تحطة على يمناك خذلك سوبربان شفر مكينة 1500 اذا كنت تستخدمة للخطوط وتدخل البر قليل ( مريح جدا )

و2500 كانك راعي كرف وراعي بر ( قاسي شوي )
مشكور اخوي مجنون نحم على المرور وماقصرت الامريكي صح كلامك مريح
بس الامريكي الحين الكل ينحش منه الله يجزاك خير على التوضيح

[abo_hoor]

انا كنت محتار بين الاف جي والبرادو فبعد مقارنة بمواصفات السيارة وحجمها ومميزاتها اخترت برادو 2010
هلا والله اخوي سليمان يامرحبا فيك
صح كلامك اللي قلته عن موصفات برادوانه احس مميزات واكثر الله يجزاك خير

[abo_hoor]

الراي والله اعلم ابتعد عن الاف جي خصوصا انه عندك 3 عيال الله يخفظهم لك المرتبة الخلفية صغيرة ما راح تكفيهم وتركيبهم وتنزيلهم راح يكون صعب عليهم ... وصعب عليك اذا كانوا نايمين
ولا تستهين في النقطة هذي ابدا.
ارشح لك اكسبلور سعره معقول وعملي جدا
هلا والله اخوي baaasss الله يسلمك من كل شر ويجزاك الله خير
صح كلامك انه مو وسيع والاكسبلور والله اني اخاف من الامريكي تراني متعود على ياباني والله يجزاك خير على هالتوضيح

[برهان1]

اخوي بالنسبه لحجم العائله عندك يصلح لك يا باثفندر او برادو اف جي صغير عليك لان المرتبه الثانيه ظيقه او اكسبلور يعني بالعربي ثلاث مراتب افضل لك

وبالتوفيق

[باترول 4500]

وعليكم السلام ورحمة الله وبركاته

إذا كنت ناوي تاخذ أقساط خذ لك باترول 2010 موتر وسيع ومريح بالطريق ونشيط بالبر

[كم كيلو باقي]

اعتقد ان الإف جي .. صغير عليكم نوعا ما

[واحد مبسوط]

الاف جي يصلح للشخص الواحد او الشخصين او من عنده سيارة للعائلة ويحب البر

لكن ليس من السيارات المريحة للعائلة في السفر لضيق المرتبة الخلفية

فالاف جي سيارة من جميع النواحي ويطرب وليس له اعطال تذكر
انا وصلت عليه 80 الف كيلو لم اغير مسمار واحد ولله الحمد

[الشقردي 205]

خذ تاهو . . .

[abo_hoor]

اخوي بالنسبه لحجم العائله عندك يصلح لك يا باثفندر او برادو اف جي صغير عليك لان المرتبه الثانيه ظيقه او اكسبلور يعني بالعربي ثلاث مراتب افضل لك

وبالتوفيق
هلا اخوي برهان شكراا على هالتوضيح
ماقصرت والله كلامك عين الصواب بس مشكله عندي دش بالي هالجيب وماكو فرق بينه وبينه برادو بسعر كثير
تقبل تحياتي لك

[abo_hoor]

وعليكم السلام ورحمة الله وبركاته

إذا كنت ناوي تاخذ أقساط خذ لك باترول 2010 موتر وسيع ومريح بالطريق ونشيط بالبر
هلا اخوي العزيز والله باترول حلو وقوي بس تراه شوي غالي علي
في اسعر تقبل تحياتي لك

[abo_hoor]

اعتقد ان الإف جي .. صغير عليكم نوعا ما
حياك الله اخوي مشكور على التوضيح بس مشكله دش بالي هالجيب انا عندي صالونسياره ومتئقلم على الوضع لاتحاتي
الله يكتب اللي فيه الخير تقبل تحياتي لك

[كاشت وحداني]

نصيحة يالغالي
وجهة نظري انا لو معاي قيمة الاف جي وكالة احطها في في اكس ار 2005 نظيف ولا احطها في اف جي .
هو شبابي بحت والقير دايم مشاكل ,

[دل البحار]

يا خوي الله يوفقك قبل كل شيء بموتر سمح تستاهله
لكن الاف جي ترى شبابي بحت والله لعايله كنك كاشخ لك في رانجلر صحاري ومعاك عائله الافضل برادو

[ذيب البطين]

شف انا معي اف جي موديل 2009 ( طبعاً انا عزوبي )
ابشرك مابقى ديره مارحت لها جنوب وشمال وشرق
وجربته في البران ماعليـه ممتاز
بس مشكلته الوحيــده في الركاب الي معي خصوصا في الباب الي وراى لزم تفتح الباب الي قدام عشان ينزلون الي ورى ..
وبرضو من ناحيه البنزين يشـرب شرررب
ومدامك مع عائله خذ البرادو ، كلها تايوتا

والله يوفقك اخوي

[abo_hoor]

الله يعطيكم الف عافيه وماقصرتو والله بيض الله وجيهكم
على هالتوضيح وهالنصيحه الطيبه لكم اجمل تحيه طيبه
واحد مبسوط
حمودي الظفيري
كاشت وحداني
دل البحار
ذيب البطين
مكشاتي

[سديراوي نت]

يالغالي.. انت وضعك مشابه لوضعي بالنسبة لأفراد العائلة.. وبالنسبة لي معي الحين برادو 2010 6 سلندر.. وقبله فكرت في الإف جي والفورتشنر والإكسبلورر.. واستبعدت الإف جي لأنه شبابي صراحة واغلب اللي يستخدمونه شباب.. غير ان المرتبة الخلفية ضيقة.. واستبعدت الإكسبلورر لأني صراحة متعود على الياباني ومتخوف من الأمريكي.. والآن بعد مرور 6 اشهر على شرائي للبرادو.. أشوف ان الإكسبلورر خيار مناسب جدا اذا كانت دخلاتك للبر قليلة.. لأن البرادو عيبه مراتبه الخلفية تكفي لشخصين فقط!! عكس الإكسبلورر والأخير شكله الخارجي افضل من البرادو.. غير ان السعر في صالحه ايضا.. استخر وخذ الإكسبلورر بعد ما تستشير اللي جربوه لخمس سنوات واكثر..