تربيط الموتر

[مطيع لوالديه]

السلام عليكم

انا معي جيب ربع والموتر متفكك( يقرش) وابي اربطه علما ان المراتب مساميرها منحله

وين المحل الزين ولا يكون غالي

وشكرا

[ملقاط بن جمر]

والله ياخوك ماعندي خبر عن ورشة زينة ..

لكن يرفع للمساعدة عسى واحد من الإخوان يفزع لك بإسم لورشة تلبي طلبك ..

[فيصل التميمي]

اخوي فيه النويصر في الصناعية القديمة يمدحونه

[سال السيل]

الحقيقة النويصر سمعته طيبة ..
لكني أعرف اثنين من الربع الطيبين شرواك وشروى من يقرأ، اخذ عليهم النويصر 1700 و3000 ولا استفادوا الاستفادة اللي تستحق المبلغ ..
غير إنه ضبط الباب اللي ورى(كلهم باترولات) والكبرت وأشياء خفايف..

فلذلك انصحك إنك ما تستعجل عليه وتسأل أكثر ..
ويذكرون ابن وضاح أوابن مرضاخ أو حول هالاسم بس مدحوه لي بترهيم مواتر القنص والمواتر الحكومية لكن بالتربيط ما أدري عنه..

عسى الله يوفقك ويستر عليك وين ما رحت

[مطيع لوالديه]

الله يجزاكم خير

انا منيب مستعجل وان شاء الله ان واحد يفيدنا

[قدر مكتوب]

موقعك وين؟

[سوبر مكشات]

رح لا اي ورشه وخلك عنده وقله ربط هذا وهذا

او ربطه انت

ترى الموتر مافيه مسامير واجد

وشف الشيال وكراسي البدي وشيك على باقى المسامير
الصدامات هن اللي يقرشن بالغالب
واستخدم بخاخ الصدا قبل لاتربط

شف ورشعه تثق بخبرته واوقف على راسه
واسعار التربيط بالقصيم من 100 الى 150

[مطيع لوالديه]

وين الموقع في القصيم

[العاذر]

المراتب تقدر تربطها انت العمليه سهله جدا جدا

والتربيط عموما مايبي له فني اي واحد يقدر يربط سيارته بنفسه

[بيك اب 4X4]

يفيدونك الشباب
و لو انت عندنا بالشرقيه كان قلت لك
تروح القطيف
بصراحه ناس مجنونه بالسيارات ( الظاهر يرقدون تحت مواترهم ) هع
و اسعارهم زينه

[قدر مكتوب]

عندك ورشة النجيبان بعنيزة بس تراها بالحجز , مر عليهم وشوف اسعارهم يمكن ماتناسبك


ولو تبي نصيحتي ربط موترك بنفسك

1- مر كهربائي وخله يفك لك الطبلون قطعه قطعه ويلحم فيه ويربط اللي وراء وينظفه ويفك لك ديكور كل باب ويدبس على ديكور كل باب سفنج خفيف ويغلف حديد الباب ببلاستيك مغرى اطرافة بسيلكون.
2- مر ميزان وخله يربط لك اسفل موترك , واذا بالموتر صواميل منكسره او فيها مشكلة تبدلها واذا بالموتر طقيقه بودي مثل قواعد التنده او فصلات الابواب او فصلات الكبوت لانها هي اللي تسبب الطقطقة بكثير من الاحيان
3- غير كل الجلب اللي تحت وربل الابواب واحش الابواب سفنج خفيف مره وقفل على ديكور الباب بلاستك(يوخذ من حقين مواد البناء ) وسيلكون على اطرافه
4- ود الموتر لمنجد وخله يربط لك المراتب وقواعدها اذا مكسوره
5- كراسي البودي +رباطات الموتر اسفل+تغيير مساعدات اذا كانت ضعيفة ولو انت حريص بالحيل ياي اذا فيه مشكلة(او ياي استرالي لينتصب الموتر)
هذا مايحضرني وعلى فكره ترى هذي هي فكرة التربيط

[مطيع لوالديه]

للرفــــــــــــــــــــــــــــــــــــــــــــــ ــــــــــــــتع

[ابوصالح77]

السلام عليكم

انا معي جيب ربع والموتر متفكك( يقرش) وابي اربطه علما ان المراتب مساميرها منحله

وين المحل الزين ولا يكون غالي

وشكرا

أولاً أهنيك على الإسم
ثانياً التربيط خرط بخرط
معك يدين وفراغ وشباب إحمد ربك على هالنعمة وربط الصواميل اللي تقدر عليها بيدك
أما القرشة مو شرط حلها التربيط قد يكون يبغى له تغير قطع
قد تكون القرشة والأصوات من كراسي البدي أو مسامير عمود التوازن أو ربلات أوأو أو أو
تقبل مروري

[المهاجر انا]

رابط الاشياء الداخليه بنفسك تعلم واستفد ترها ما تبي الا مفك عادي ومربع ومفك عشرة واثنى عشر واربع عشر للمراتب مفتوح ومغلق واستعن بالله قبل كل شي

[PATROL]

عليك بورشة ابن مرحاض وتبي تدعي لي ان شاء الله
انا جربتهم قبل موترك يصير كتله وحده

[غاف]

اولا:خذ السياره لمكانيكي محترم وخله يشيك على السياره من تحت ويعلمك وش تحتاج
ثانيا:حاول انك تعرف مصدر القرقشه في السياره
ثالثا:بالنسبه للسياره من داخل تقدر توديها للي ينجدون السيارات خصوصا الي في الصناعيه القديمه لانه تعود على الفك والتركيب
رابعا: غير جلد الكبوت وبعض الجلد التحتيه في السياره والابواب الخلفيه
خامسا: لاتودي سيارتك لا للنويصر ولا ابن مرضاح(اسأل مجرب)ولا تحاول انك تفك الاشياء البلاستيكيه لإنها ماترجع غالبا كما كانت

[((ابوملاك))]

ليه ياخوي الله يهديك مالك يدين ؟

صدقني التربيط سهل جدا كل اللي يبيلك مفك وسكروب وزراديه ( عده عاديه )

وصدقني بتغلي الموتر اكثر لا سويت له الشئ بنفسك