من يعرف القصيده هذي ومن قايلها؟؟

[صوعان]

بسم الله الرحمن الرحيم
فيه ابيات اسمعها من زمان وتتردد بين الشباب وكبار السن لكن كل ما سألت احد عنها قال مدري ما اعرف منها الا الابيات هذي
فحبيت انزلها هنا يمكن احد من اخوانا الاعضاء يعرفها ولا يعرف من الي قايلها
وهي
يا اهـل الهـافـات زيـدو سـعرهنه...لاترخصو الثـمن با الكـامـلاتـي
لا نهمت الهاف جاك الهاف كله ...تقل يشرب من غراش المسكراتي
مـركـز الكـبريت يـامـا سـهجنه....سـهجنه والرفـارف واقفـاتـي
كـم شـراعن للسـواحل قـطعنه...قـطعنه مـقبلات ومـقفياتي

[عاشق الجبل]

الأخ : صوعان

هذا مطلوبك


قبل أكثر من أربعين سنه تقريباً كان التتن ممنوع بيعه في السعوديه وكانوا يهربونه عبر النقاط الحدوديه على الفروت والهافات
وأشهر نقطة ذيك الأيام ( أبرق الكبريت ) على الحدود بين السعودية والكويت .... تعيـّن في ذيك النقطة واحد إسمه :

( سعيد بن ودمان ) وهو اللي وقف للمهربين وقدر يخفف من تهريب التتن للسعوديه حتى سمحت به الحكومه , لكن الشي اللي حفظه التاريخ هو ( أدب التهريب ) جرت مساجلات شعريه كثيره وعديده بين ابن ودمان وبين المهربين ... وعلى اللي كان بينهم من رمي بالبنادق وهوايش لكن كانوا رجال يقدرون بعضهم ومثل ما قال ابن ودمان عنهم ( ونعم الله ربي وربهم ) وبأعطيكم القصايد اللي تم حفظها وجرت ذيك الأيام وكل الأسماء الموجودة حقيقية ومعروفة والقليل منهم لا زال حي مثل ابن ودمان حارس الحدود الشهير
المهم أول ما تعين ابن ودمان كتب قصيده وحطها بدرج مكتبه في مركز أبرق الكبريت لكنها تسربت ووصلت للمهربين وردوا عليه
( ملاحظه : عنتر ناش ( أنترناشونال ) المذكور في القصيد نوع من الجيوب انقرض )... يقول ابن ودمان :

ياهل الهافات عنتر ناش جاكم ****** وا عنا من صادفه بأرضن خليـّه
لعنبوكم هونوا جاكم عناكم ****** جاكم الموت الحمر ماهي زريـّه
هفوة ٍ زلـّت لكم وإكلوا..... ******* بيعوا الهافات بأقيام ٍ رديـّه
وإعلموا وإدروا ترانا في قفاكم ******** ومن يقاوي له جبل ما راح نيـّه
ياهل الهافات عابينا عباكم ******** الفروت جداد والعزبه قويـّه
ياهل الهافات خيـّبنا رجاكم ******* نحمد اللي قدرته ماهي خفيـّه
بيعوا الهافات ردوا في سراكم ******* خلـّوا السمره وطـّوال الحنيـّه
الدهر ذعذع لكم ثمن جفاكم ******* وإفهموا وإدروا ترى في الجحر حيـّه
خسرت الشركة وخيـّبنا ثناكم ******* وبعضكم بالقسط ما خلـّص وديـّه
ياهل الهافات حنا من وراكم ******* والسعد قدامنا في كل هيـّه
تحت حكم اللي عن المنكر نهاكم ******* عن طريق الدين تلقون المنيـّه
عندنا اللي يمرجن باقي شواكم ****** خمسه وستين ضد الجندليـّه
والذي هيـّض غرامي من خطاكم ****** هرجة ٍ من واح ٍ جتني خطيـّه



بعد ما تسربت القصيده للمهربين رد عليه واحد منهم يقال له فهد الكحيلي ويقول :


ياهل الأبرق تبـّين لي خطاكم ******* والخطا راعيه يقنع بالخطيـّه
يا عوينك وارد الستـّه لفاكم ******* وعنترك خربان والخمسه رديـّه
كم ونيت ٍ لا كمل حمله وطاكم ******* وقاعد ٍ بأرقابهن تثني الهديـّه
وإن لحقتم موتره عنده دواكم ******* أرنب ٍ حمرا عيون مجادعيـّه
من قديم وسلمها تاكل ...... ******* فعلها في جدكم لا رحم حيـّه
إن بغيت الصلح جاكم ما كفاكم ****** وإن بغيت الزود رد العلم ليـّه


مضت أيام وطرح ابن ودمان وعسكره هاف موديل سته وستين لولد عم فهد الكحيلي جديد ... عندها إستغل ابن ودمان الفرصه ورد يقول :


يا سلاح الحد يوم الله عطاكم ******* لا تهابون الخطر والمخطريـّه
خلوا الرشاش مركوز ٍ حداكم ******* والمخازن وسطها النار الصليـّه
يالكحيلي وارد الخمسه خذاكم ******* وستـّتك مع حملته ما راح نيـّه
ربعنا صادوه عانه من وراكم ******* ما مشى ياكود ألف وخمسميـّه
والعناتر يالكحيلي في حراكم ******* والفروت الحمر وجنود السريـّه
يالكحيلي ما مشينا في رضاكم ******* إن زعلتوا أو رضيتوا بالسويـّه
ياهل الهافات ما خذتوا قضاكم ******* ما بكم قاصر ولكن معجزيـّه
والكحيلي في قصيده ما كفاكم ******* دوروا غيره ترى الدنيا هبيـّه
ياهل الهافات تالي منتهاكم ******* والله إنه عند سلك العسكريـّه
مثل ٍ ناس قد وطاهم ما وطاكم ******* فعلهم كنـّه عملكم بالسويـّه
أو نسفـّركم ونسلم من غثاكم ******* والحكومه دونكم والله غنيـّه
إن مشيتوا بالسنع محد ٍ شناكم ******* ما يجازى واحد ٍ ماله قضيـّه
وإن عصيتوا الأمر معروف ٍ جزاكم ******* بأمر شيخ ٍ ما يبى راعي الخطيـّه
والحكومه رتبـّتنا في نحاكم ****** نمنع المنكر عن أفراد الرعيـّه


ملاحظة : منقول وتم شطب بعض الكلمات الغير لائقة تقديرآ للقراء




==================================================


ومضت الأيام وخف التهريب ... لكن تجمعوا المهربين ومروا مع المركز وحذفوا لهم ورقة فيها هالقصيده كتبها واحد منهم يقال له ( ناجي ) ويقول :

ياهل الهافات زيدوا سعرهنـّه ****** إشتروهن نقد وألا بالقصودي

ما حلا مرواحهن بحمولهنـّه ****** جاوزوهن غيبة الشمس الحدودي

أبرق الكبريت لا زم يسهجنـّه ****** مركزك يالعبد بيـّاع الجلودي

ما بغنـّه لازم إنهن ياصلنـّه ****** فوق والهافات عجلات الردودي

كل ما سكـّر طريق ٍ يفتحنـّه ****** يقطعن ّ الطنب ويطيح العمودي

والدريسن حملهن من سامهنـّه ****** وارد الهافات ما ينقص يزودي

عنترك بدروبهنـّه حملنـّه ****** أصبحن يالعبد عن حد النفودي

وكم صبي ٍ بالمساري زاد فنـّه ****** ما ينام الليل والعالم رقودي


وكالعاده تصدى لهم ابن ودمان .... ورد عليهم شعرياً بهالقصيده وتعتبر أطلق قصايد التهريب مما فيها

من معاني وقوة أبيات :


مل قلب ٍ هيـّضه ناجي بفنـّه ****** شاعر ٍ قام ايتعلم للردودي

لو تغبى لازمن نظهر مغنـّه ****** عارفينه لو تذرى بالحدودي

وكل قولك عارفينه لو تكنـّه ****** مير ما نبغيك جعلك ما تعودي

والعلوم الخايبه مالك وهنـّه ****** والمرد الشين عندي ما يكودي

مثل بعض الناس عندي له محنـّه ****** حشمة ٍ لشعيب خذها لك سنودي

والحنش الاسود أنا بأنصحك منـّه ****** لا تحسب إنه من العالم شرودي

ومن بغى التهريب هافه لا يحنـّه ****** والخطر قدمه على حد الحدودي

إن نوى الله فكتّـه ما فيه منـّه ****** كل دربه لا مشى لينه سهودي

أو يصادف لا نوى ربي يعنـّه ****** ياخذون الهاف وعيونه شهودي

والعوض من عقبها يخشر بسنـّه ****** والنصيفه من حلاله للجنودي

مير وين أهل القلوب المرجهنـّه ****** كانكم توفون للقول العهودي

مروا الأبرق وهن بحمولهنـّه ****** عارضوا قدام بابه يالفهودي

خلوا العنتر يشوف أزوالهنـّه ****** والخطوط طوال والدرب امحمودي

وما حلا شوف البكم يرثع بشنـّه ****** في عفاش القاع مع جدع الطرودي

وما حلا صفق الفشق بجنوبهنـّه ****** والبرن ّ يعدهن عد النقودي

وكل هاف ٍ فيه جندي ٍ يقنـّه ****** والمهرب طايح ٍ ما فاد فودي

والسنافي في عهوده سمهنـّه ****** ياصل الحروات لو دون الحدودي

إضربوا درب الخطر والموت سنـّه ****** والفتى عمره على اللوح امحدودي

والذي يوعد ولا يوفي بهنـّه ****** ودك إن ايحط في صدره نهودي :)

[صوعان]

الله يعطيك العافيه يا عاشق
سوالفك توسع الصدر

[عاشق الجبل]

ا لأخ : القصيدة المطلوبة تجدها في أخر الصفحة

[al-nashmi]

السلام عليكم ورحمة الله وبركاته

اخونا صوعان حياك ربي..

وشكرا لك ؟

اخونا عاشق الجبل.

مشكور الله يعافيك على هالرديات ايام اللتتن ........... ايام كان يجي سواق الهاف خرمان يبي زقارة و يقشع

الخيام مايشوف( زمان كان مراكز حرس الحدود يسكنون بخيام... ويسمونها شراع).....

وسلامنكم

[النداوي HZ2AF]

صح السانك يا عاشق
ورحم الله والدينا ووالديك ووالدي جميع المسلمين

اخوك ابو عبدالله

[عاشق الجبل]

تسلم يالنشمي

صح بدنك وبدن شعار زمان أول يالنداوي