( إخراج المفطح من القدر) ماهي أسهل طريقة , نريد أفكار؟

[أبو دحوم]

السلام عليكم ورحمة الله وبركاته

دائما مايواجه المضيف صعوبة أو تخوف من إخراج الذبيحة من القدر بعد الاستواء

خصوصا إذا كان المفطح مستوي مره فممكن أن ذنب الخروف ينقطع أو حتى نفس الذبيحة

تقطع معك , فأنا أستخدم الشناكر لرفع المفطح وأحيانا أجيب العيد:eek: ( مثلكم عارف وش العيد والله من الإحراج:D ).

فياأحبائي نريد أفكار جديد أو لدى أحد الأعضاء طريقة أفضل من كذا

أرجو المشاركة من الجميع كل واحد وطريقته لعلي أجد حل في هذه المعضلة

وشكرا

[اميرالبحر]

بسيطة يا اخي قلط الرجال بالقدر بدون ما تحرك الذبيحة !!!! ذكي صح؟

[فهدالغيهب]

وعليكم السلام ورحمة الله وبركاته

حياك الله أخي الكريم

فصل لك سلة ستيل كبيرة بحجم الذبيحة مثل اللي تجي مع القدر الكاتم وضع الذبيحة في هالسلة ودخلها القدر

وإذا استوت الذبيحة ارفع السلة وداخلها الذبيحة فأنت على كذا تشيل الذبيحة كاملة بدون مرقة وفي نفس الأمر تشيلها كاملة بدون تحريك وكذا تضمن عدم تقطعها واتوقع إن إخراجها من السلة بيكون سهل أسهل من إخراجها من مرقتها الحارة ، طبعاً أنا أقول ذلك وأنا ما جربت الطريقة بس مجرد فكرة خطرت في بالي .

[قنااااص]

عليك والله بالشناكير طيرت شلوى


لكن والله من العيد جبته بسبتهن

[درب الكشات]

السلام عليكم ،،،
سو كل شيء شارو عليك الشباب الا طريقة مطاعم طبخ ولائم الأعراس يربطون الذبيحة بحبال ملونة تختلف من ذبيحة لذبيحة اولا لتمييز الذبائح كل لصاحبها و ثانيا للرفع بعد الطبخ من القدر ،، و الله يعلم الحبال منين جاية و ايش استعملت له قبل ،
و شـــــــــــــكرا لك

[بن مانع التميمي]

وعليكم السلام ورحمة الله وبركاته

حياك الله أخي الكريم

فصل لك سلة ستيل كبيرة بحجم الذبيحة مثل اللي تجي مع القدر الكاتم وضع الذبيحة في هالسلة ودخلها القدر

وإذا استوت الذبيحة ارفع السلة وداخلها الذبيحة فأنت على كذا تشيل الذبيحة كاملة بدون مرقة وفي نفس الأمر تشيلها كاملة بدون تحريك وكذا تضمن عدم تقطعها واتوقع إن إخراجها من السلة بيكون سهل أسهل من إخراجها من مرقتها الحارة ، طبعاً أنا أقول ذلك وأنا ما جربت الطريقة بس مجرد فكرة خطرت في بالي .

100%

:good2:

[العاذر]

مثل ما قال اخوي فهد الغيهب
شبك ستيل
وهذا مجرب
تحياتي

[أبو دحوم]

يعطيكم العافية ياشباب

وين عباقرة مكشات يعطونا من حلولهم

[ابوعبدالعزيز6]

منكم نستفيد

[سارق الكحل]

عليك بالمشابك ( الله يخلي علاقات الملابس ) اربطها بالذبيحه قبل انزاله بالقدر

[الستانس]

اخوي لو للقدر بزابيز

اذا استوى المفطح

تنقل المرقه لقدر ثاني ويبقى لك المفطح وكذا يكون التعامل معه اسهل


(مجرد اقتراح)

[مسرج الخيل.]

ونا اخوك فصلك ملاس كبر الذبيحة والله يعينك على الشقل

[برق السيل]

مشكور على فتح الموضوع الشيق الذي تجد من يرد على موضوعك يتخيل الهرفي وسط القدر ولا احلى


من واقع تجربتي بالطبخ واذا حاب ان المفطح مايخرب عليك او تطيح لية الطلي


هو انك عند السلاخه انك تخلي من كسرة الظهر شوي من الجانبين
وتقول للسلاخ ابي تشقير الضلوع سبعه والكسرة خل منها ربعها
وكذا راح يكون معك المفطح 100%
وبالهناء والعافيه

[فواز الشيباني]

اخوي اللي يخلي الذبيحة تنكسر من الظهر او الذنب ينقطع كثر الطبخ او بعض الناس يكبسون على
المفطح وكذا يجي اللحم متملهص
فيه طريقة انك اول ماتنجظ الذبيحة تشيلها في صحن بالكوب (شنكار او معلاق )
وبعدها اشخلها البصل والطماط وحط رزك
على فكرة كثر الطبخ يغير طعم اللحم حلاة الذبيحة تجي عردة شوي

[مفتون صيد]

كلام اخوي فهد الغيهب حلو بصراحة واعتقد انه اقرب فكرة للواقع شبك على قد القدر يسقط فيه
ومثل ما قال اهم شيء ستيل وعدد الخفوس فيه قليلة لان كثرت الفتحات تصير مثل المبشرة فاذا كان مطبوخ اللحم واجد تصير مثل المبشرة لو تبي تزيحه عن السلة وتدفه الى قدر ثاني
اتمنى اني اقتبست صح من الاخوان وقدرت افيد

[أبو دحوم]

الله يعطيكم العافية وماقصرتم أفكار جميلة ورائعة

[أبو دحوم]

رفع

للفائدة

[محمد أبو حمد]

جب صحن يدخل بوسط القدر اللي طبخت فيه الذبيحة

وصب المرقة وأنت ضاغط بيدك على المفطح

وإذا خفت المرقة وصار المفطح ظاهر , أرفعه بالشناكير اللي تكلم عنها الأخوان مع اللي بيساعدك من النشاما

[تركي1]

موضوع مفيد

فكرتي مثل ما قال الأخ أبو أحمد

وهي أنك تفرغ القدر من المرقة حتى تنتهي تقريبا وإذا بردت اللحمة تماسكت بعض الشيء
ومن ثم تضع تحتها صحن طويل أو ما شابة وتستطيع حملها بعد ذلك بإذن الله

لأن تقليل حرارة المفطح يجعلها تتماسك أكثر من قبل

دمتم جميع لبخير

[عاشق السيل]

أنت ورنا المفطح ونعلمك كيف نرفعه هههههههههههه

بصراحة طلعت أفكار حلوة من الشباب الله يعافيهم ،، وبيض الله وجهك على طرح الموضوع ليستفيد اللي مثلي لأني ماعمري مريت على هالسالفة !!!!