أرجو التكرم بذكر باقي أبيات هذه القصيدة ( لمن يعرفها )

[قرقاص مع شاهي]

السلام عليكم ورحمة الله








لاخاب ضنك بالرفيق الموالي
مالك مشاريه على باقي الناس

أرجو من الأخوان اللي عنده تكملة للأبيات الباقية لايقصر معنا

[جرير]

اخوي قرقاص السلام عليكم
الابيات التي ذكرت لشاعر احمد السديري رحمه الله ومطلعها.. يقول من عدا على راس عالي.. وهي من اجمل ماقيل ومشهوره جدا اضافه الي قصيدته الاخري التي مطلعها الله من هم بروحي سهجها تعتبران من عيون الشعر

وهذه القصيده

يقول من عـدا على راس عـالي= رجم طويل يدهله كل قرناس
في راس مرجوم عسير المنالي =تلعب به الارياح مع كل نسناس
في مهمن قفر من الناس خـالي= يشتاق له من حس بالقلب هوجاس
قعـدت في راسه وحـيد لحالي= براس الطويل ملابقه تقل حراس
مـتذكر في مرقبي وش غدالي=وصفقت بالكفين ياس على ياس
اخــذت اعـد ايامـها واللــيـالي=دنيا تقلب ما عرفنا لها قياس
كم فرقت ما بين غالي وغالي = لوشفت منها ربح ترجع للافلاس
يقطـعك دنيا ما لها اول وتالي=لو اضحكت للغبن تقرع بالاجراس
المستريح اللي من العقل خالي= ما هو بلجات الهواجيس غطاس
ماهـوب مثلي مشكلاته جـلالي= ازريت اسجلهن بحبر وقرطاس
حملي ثقيل وشـايلة باحـتمالي=. واصـبر على مر الليالي والاتعاس
وارسي كما ترسي رواس الجبالي= ولا يشتكي ضلع عليه القدم داس
يابجاد شب النار وادن الدلالي=واحمس لنا يابجاد ما يقعد الراس
ودقه بنجر ياظريف العيالي= يجذب لنا ربع على اكوار جلاس
وزله الى منه رقد كل سالي= وخله يفوح وقنن الهيل بقياس
وصبه ومده ياكريم السبالي= يبعد همومي يوم اشمه بالانفاس
فنجال يغدي ما تصور ببالي= وروابع تضرب بها اخماس واسداس
لاخاب ظني بالرفيق الموالي =مالي مشاريه على نايد الناس
ياعل قصر ما يجيله ظلالي= ينهد من عال مبانيه للساس
لاصار ما هو مدهل للرجالي= وملجا لمن هو يشكي الضيم والباس
بحسناك يامنشي حقوق الخيالي= ياخالق اجناس ويامفني اجناس
تجعل مقره دارس العهد بالي = صحصاح دوِّ دارس مابه اوناس
والبوم في تالي هدامه يلالي= جزاك ياقصر الخنا وكر الادناس
متى تربع دارنا والمفالي =وتخضر فياض عقب ما هيب يباس
نشوف فيها الديدحان متوالي =مثل الرعاف بخصر مدقوق الالعاس
وينثر على البيدا سوات الزوالي = يشرق حماره شرقة الصبغ بالكاس
وتكبر دفوف معبسات الشما لي= ويبني عليهن الشحم مثل الاطعاس

وهذه ايضا

الله من هم بروحي سهجها= بخافي ضميري في كنين الحشا لاج
احر من نار قو قد وهجها= منها خطر روحي على سلك ديباج
وعين عسى المولى يعجل فرجها= يفوح ناظرها كما عين هداج
استرسلت للدمع مسمار هجها= غيظ يكظ عبارها مثل الامواج
كم واحد له غاية ماهرجها= يكنها لو هو للادنين محتاج
يخاف من عوجا طوال عوجها= هرجت قفا يركض بها كل هراج
يقضب عليك المخطية من حججها=حلو نباه وقلبه اسود من الصاج
الله خلق دنيا وساع فججها=وعن ما يريب القلب لك كم منهاج
والرجل وان شطت لياليك سجها= عسى تواليها تبشر بالافراج

[المفرنك]

اخي جرير
الابيات للشاعر الامير محمد بن احمد السديري
وليس (احمد السديري)
للاحاطة وشكرا لابرادك الابيات والله يرعاكم

[قرقاص مع شاهي]

أخوي جرير أشكرك بعنف وماقصرت ولايهون أخوي المفرنك

[جرير]

اخوي المفرنك شكرا علي التصحيح
وتراها مطبعيه ولا محمد الاحمد السديري ماينغدا عنه
لك شكري

[غيّام]

اسجل شكري لمثري الخيمه استاذنا الفاضل جرير
اشكرك من اعماق قلبي اخي العزيز وانا من المتابعين والمعجبين بتجاوبك معنا اول بأول وهدا ان دل انما يدل على طيب منبتك واصلك
تقبل من اخوك المحب غيّام وافر التحيه والتقدير
وجزاك الله خير