وش أزين العادي ولا التماتيك؟؟؟

[طخيمان]

بصراحة ودي أشتري لاندكروزر وش رايكم آخذ قير عادي ولا تماتيك مع العلم اني مخصصه للبر ...
ايا كان الجواب يجب ذكر الأسباب وعجلوا تكفون.

[بواسامه]

اذا مخصخصه للبر بس منتب سايقه بالرياض المزدحم وعندك صغيره للرياض تماتيك

فلا تشتري للبر الا عااااااااااااااااااااااد
اقوى
اقل صيانه
تقدر تنتعه لو ضعفت البطاريه
ممكن تجور على القير عند اللزوم


اما للبيع فكلها عليها رغبه وطلب عادي ولا اوتو

[المترو]

السلام عليكم ورحمة الله وبركاته
اخي ابو الطواري

يعتمد كما تفضل اخي ابو اسامه

اذا كنت رعي بران وصحاري وخاصه وخاصه وخاصه ركز على هاذي تحب المطامر بالرمال القويه وراعي بران في بران لا تتعدى العادي قوي وقوة موترك بيدك ماهي على كيفه ؟؟؟ ولا يحتاج صيانه وتغيير فلتر وزيت كل فتره هذا في ما يخص العادي

التاماتيك قوي لكن اقل من العادي ما يتحمل الجور الكايد وهو تراه يدلع المكينه ويدلع نفسه اللى يقدر عليه يسويه لكن لو انك قررت بلحظة انك تحتاج قوه اكثر لموقف انت وقعت فيه بالبر بيقول لك هذا حادي
عدو التماتيك الرمال اقل قوه بالرمال ولعلمك حده 3-4 ساعات ويحتمي القير بالرمال للسير المتواصل ويقل عزم السياره بعد هذه المده
يحتاج صيانه دوريه وتغيير فلتر مع الزيت للقير وخاصه اذا طلعت مناطق جبليه شاهقه ومرتفعات يحترق الزيت وتطلع ريحته يعني اول ما تنزل من المناطق الجبليه غير زيت قير سيارتك تلقاه اسود لو انك مغيره قبل فتره بسيطه

لكن انا برأيي الشخصي المتواضع التماتيك ميزته انه مريح للسائق داخل المدن والطرقات الغير وعره والغير رمليه عاد انت قرر حاجتك لاستخدامه
وختامها اذا ديره وبالشطره مطره للبر خذ تماتيك وانت مغمض

السعر دائما التماتيك احسب من 8 الى 10 الآف زياده عن العادي بالبيع والشراء



ولك اجمل الاماني

ابو ناصر

[path_poth]

صدقت يالمترو

عز الله ان هذا هو الكلام المضبوط

[توونا]

عين الصواب يالمترو اختصرت علينا الطريق

[البيـرق]

السلام عليكم ورحمة الله وبركاته
بالنسبة لاندكروزر ومن واقع خبرة وتجربة
التماتيك افضل رحت وكشت عليه ورحت للصمان وبصراحة لاعنه
ولاقال شي ويوم جيت ابيعه اول سوال من الشريطي تماتيك؟؟؟؟؟
والتماتيك اكثر رغبة في البيع واعلى سعر في المشترى؟؟؟؟
بس العادي اقوى عزم واكثر صرفية بنزين.
اخوك البيـــــــرق..........

[النفود الشرقي]

ألو سلام عليكم

أنا رايي العادي أحسن علشان:
الأول.....فحححطة...الثاني ....فححطة.....الثالث.....فحطة.....الرابع....فحيطة
أمزح أمزح

للديرة أوتوماتيك للبر عاديييييييي
خلاص أتفقنا

يالله في أمان الله

طوط طوط طوط طوط

[اسيزو 4x4]

العادي للبر

وأخوي الغالي المترو ما قصر ..

,

[عاشق الجبل]

وعليكم السلام


وكلام الأخوان فيه البركة لكن مايمنع أفضفض شوي :)


بالنسبة للـ v x r فالأوتوماتيك أفضل بكثير وأقوي وترتاح من قلق فحمة الكلتش وقرقشتها والغيار اليدوي .

اما الــ g x r فالعايدي أقوي من الأوتوماتيك .


وكما قال الأخ المترو لاتنسى أستخدام مكان السيارة لأن العايدي يطفشك بداخل البلد والزحمة

[تميراوي]

بالنسبه لي انا فاقول والراي لك ان التمتيك احسن بالف مره سوى في البر او الديره لان التمتيك في الاند كروزر معروف انه يتحمل بقوه وانا من راي العادي احسن لك وللزمن ويمكن تندم لو شريت عادي زيي انا

[sultan8861]

الجيوب لاتاخذ الا اتوماتيك لانها قويه وخذ انواع الراحه جيب وتوماتيك

[المترو]

السلام عليكم ورحمة الله وبركاته

اخواني وجهات النظر اختلفت وانا ليس ما ذكرته تقليل من القيرالتماتيك وله ميزات ولكن ما ذكرته ليس وجهة نظر فقط بل من تجارب واليكم ما هي هذه التجارب :
1- رحله الى الربع الخالي والله يا جماعة الخير بعز المربعانيه القير يحتمي وكل رباضه وهو واقف يقول السوق هذا حده وخذ يا يسحب مع العلم ان السائق استاذي انا وخبير سواقة نفود لكن التماتيك عجزه

2- رحله الى النفود الكبير ان التماتيك اذا وقف وقف مابه حيله والا اذا مشى 3 ساعات متوصله صار كانه دتسون 76 ما تسمع الا قرقرته من رداء العزم لان القير محتمي وموديله 2002

3- رحله الى الجنوب العام الماضي بعد كم طلعه وكم عقبه من عقبات الجنوب ريحة الزيت فايحه يوم رجعنا للرياض وفك صرت الزيت للقير ان الزيت اسود كحل مع العلم انه مغيره قبل الرحله

اما اذا تتكلمون عن الاستخدام بالديره اقول صحيح 100% افضل افضل مئات المرات من العادي والطلعات الخفيفه مثل الثمامه وفياض الصمان و الرجال اللي كما يقولون قريب الحراوي وكذلك الاستخدام للخطوط الطويله المعبده اما راعي البر اللي بيعد حراوي وراعي صيد وقنص ورحلات وعره فلا انصحه به نصيحه اخويه ببلاش وكل واحد يعرف استخدامه ومداه


معلومه يا اهل التماتيك هل تعلمون ان الاند كروز التويوتا لا يوجد به مبرد قير مثل السيارات الباقيه؟؟؟ وهذا سبب الحراره اثناء القياده بالرمال لفترات طويله
ولكم اجمل التحايا

المترو

[مرقاب الشرق]

خذ تماتيك ولاتشاور انا معي 2001 تماتيك وزي الحلاوة بالنفود ومرررررررريحه بالديرة بس تراني ماني راعي قنص رحلات يوم يومين بس . (ولاتنسا تصلي استخاره )

[داب الرمث]

خذ عادي وتوكل على الله ترى سواقة العادي متعة ووناسة خاصة ...بالبر :cool: اكثر من التماتيك الي كأنك رايح للدوام :D ................. تحياتي للجميع

[Waleed1]

السلام عليكم

حقيقة الاخوان ماقصروا ويبدوا فعلاً كل واحد يتكلم من واقع خبرة، والمثل يقول أسأل مجرب ولاتسأل طبيب.

أخوى الامر بسيط ولاتحتار قدامك نسب يجب أن تضعها فى ذهنك على طول السنة، وهى كم نسبة قيادتك على الزفلت أى فى المدن والطرقات السريعة ألى نسبة قيادتك خارج الطريق بران نفود ودهنا وغيرها، فلو مثلاً سوف تستخدم السيارة بنسبة 20% الى 30% حق بر و80% حق مدينة لا واللة الاتوماتك أفضل وأذا كان العكس فالعادى أفضل. وبعدين فعلاً زى ماتفضلوا الاخوان الاتوماتيك ليس بجيد فى الرمل ويحتاج الى خبرة أكبر من القير العادى.

أرجوا أن أفدتك وشكراً

[صوعان]

خذ لك باترول نيسان 4800 القير رياضي تبيه تماتيك ولا عادي الي تبي
خذه وراح تدعي لي نشالله

[**الجدي**]

السلام عليكم
ما قصروا الاخوان وفيهم الخير والبركه بس شي بخاطري وابطلعه
العادي هذا يوم ان السيارات مكاينه يالله تشيله ويوم ان اللي يكشت يشيل نصف بيتهم معه من زود الكلافه اما هالايام تغيرت الدنيا ( عزبة وذفه وخيمة وذفة وفراش وذف يعني ما من كلافه ) وتغيرت المواتر مكاين جباره غالبا قوة المكينه فوق الحاجة .. وبعدين السؤال اللي يطرح نفسه وين البر اللي يلزمه قير عادي وجور على الموتر ؟؟ وبعدين عمرك سمعت ان فيه واحد متعلق والا مغرز له ثلاث سنين لان موتره توماتيك ؟؟ كل اللي نعرفهم سياراتهم توماتيك ويروحون ويكشتون ويقنصون وما اشتكوا بعدين انت اكيد انك بالديره اكثر من البر << العضو هذا اسلوب ما فيه .. بس انه جزوم هههههههههههههه
وعسى الله يدبرك على ما فيه خير

[ABU-AL-3eeS]

اخوي سؤالي لك / هل معنى انك مخصص سيارة للبر انه اذا خلص موسم الكشتات بتوقفها الى الموسم الجاي والا بتستخدمها خلال فترة الصيف.؟

اذا كنت بتوقفها يعني مخصصها كشتات فقط! فلك العادي وخصوصا الكروزرات موديلات 93 تاخذه vxr عادي وشرط يكون نظييييف والله مافيه ازين منه بدي خفيف وقوة ومن واقع تجربة اصدقاء اثنين لهم نفس الموتر


وفيه احد الاخوان ( العضو ابومطلق) مصور الجيب حقه وحاطه بالتوقيع ,, هذا اللي اقصده

وهذه صورته
http://hmodi15.jeeran.com/abo2.jpg
اعذرني ابومطلق :)

[Mohammad]

تحياتى واحترامى للجميع ما هى مشكلة القير اوتوماتك والدبل عادى! اعتقد ان الاخ له رغبه بالاوتوماتك ونتمنى ان نكون دقيقين ومن لديه خبره او رأى مقنع فلا يبخل على الاخ الكريم وعلينا!

اتفق مع الاخوه بالنسبه للماكئن السيارات التى تغيرت كثيرا وتتحمل احد اشباب لديه لكزسس جيب ذهب بها كل مكان ما عدا الرمال وتعامل معها يقسوه اعرف هذا لاننى رأيت هذا ولم تتوقف او تسحن او اى شىء ولكنه يقوم بالصيانه الدوريه ---

الامريكى معروف بالقير الاوتوماتك من زمن بعيد وكل السوبرات الان تأتى بقير اوتوماتك والبر ليس مكان الاقامه اصلا هذا ما اعتقده! فكيف يستفيد من القير العادى؟

اذا قير الدبل عادى يعنى يدوى فهل القير الاوتوماتك يتعطل من تغريزه او تغريزتن؟

انتم يا اهل البر خابرين ان البر ليس كلّه تغريز؟

هذه فرصه يا اخوان لكى نعطى هذا الامر الهام فرصه من التحليل بعيدا عن الاهواء؟

لا اشك ان العادى اكثر امان وطمأنينه ولكنه ثقيل ومزعج جدا! واذا كنت لا تعيش بالبر كل الوقت وتخاف ان يخرب فهذا معقول! ولكن انت الان تذهب الى البر ثم تعود وتريد الاستفاده من هذه السياره وخساره تركنها على حساب البر! الا اذا كنت مستغنى جداجدا فالله كريم ولا بأس ان يكون لك سياره مخصصه للبر فقط بل ستكون تغيير لك ومتعه؟! فهذا اليوكون مثلا اوتوماتك وهو نفس السياره الجمس الحوض ولكنه اوتوماتك؟!!!

هل نغيّر الفكره ؟وما فائدة وضع L2و L1 فى الاوتوماتك الامريكى وما معناها اذا تكرمتم؟
وكذلك الجيب اعتقد به خيارات للتخكم بالسياره الاوتوماتك فى النزول الوعر وكذلك للرمل يستطيع احد الخبراء ان يتكرم بالشرح!

الاستثنائات معروفه كرحلات الاخ الى النفوذ ولا شك تحتاج الى قير عادى! ولكن لنكن واقعيين!

والله اعلم والسلام عليكم ورحمة الله وبركاته

[بو خليفه]

إذا كنت في فقط تستخدم للبر العادي أفضل بسب أنه يتحمل المرتفعات و لا يسخن الجيربوكس

[nahham]

انا شخصيا من عشاق القير العادي

اسحب اي سياره ما اخاف

انتعه

اقوى في البر

واهم شيء المتعه

[منتعش]

والله أنا أقول كلام الأخ ( عاشق الجبل والمترو ) ما عليه غبار .
فخذ نصيحتهم _ ولا يهينون الربع _
لأن من ظاهر كلامهم بأن لديهم خبرة كبيرة في ذلك .
وقبل كل شي ((( أستخر ))) ما خاب من أستخار .

وسلامي للشباب على تفاعلهم وحبهم لأخوهم .