نسى نفسه والنتيجة ضياع خويه وربعه

[حد السيف]

السلام عليكم ورحمة الله وبركاته
هذة قصة حصلت لاحد الاخوة الاسبوع الماضي
المسيكين مامعه قارمن ولا جهاز ارسال
وربعة ماشاء الله تبارك الله اجهزة ملاحة واجهزة اتصال وسيارات اخر مديل
وهالمسكين قدرة انة معة العفش فقط حتى ادوات الاكل والعزبة في سيارة ثانية
والدليلة هو الاول ومعة القارمن وجهاز الارسال وهاتمداخلات ونسى الضعيف المسكين اللي باخر القافلة
وهات من السواليف الين نسو اساسا ان معهم واحد لامعة جهازملاحة ولاحتى جهاز اتصال
وبنشر الاخير ووقف حتى يصلح سيارتة
وهذولا الاولين ماجابو خبر
ابعد وصلح الرجال البنشر
وركب سيارتة يدور ربعة وكل شوي وهو راكبلة ردمية يمكن منا او يمكن منا
الين صار هو بالغرب وربعة بالشرق
وثلاثة ايام ها المسكين وهو يدور ربعة
وكل هوين وهو ناشد وكل شوي وهو ناطل وجهة على ناس يبي يدلونة الدرب يبي ينكس للديرة
حتى الصدقة حلت علية بسب ربعة
المهم رجع للديرة
وش موقفك اذا اميرك وربعك من ها النمونة


محبكم اخيكم ابو سليمان
ودمتم سالمين

[جلوبلستار]

الخطأ الأول من ربعه الي ما انتبهوا لرفيقهم
الخطأ الثاني من الشخص نفسه

الي ما معه قارمن ولا جهاز ارسال لا يطلع للبر .. يكشت جنب الرصيف احسن له .
مشكور ابو سليمان .

[جبل مشرف]

هذي بتكون له درس لاعاد يمشي في آخر الركب ..... وانا اشره على الاخوياء اللي من هذا النوع لان فيهم شي من الانانيه والجهل بالبر ومواجيب الخوي

[أبو يوسف]

والله موقف لا يحسد عليه
اما قولة اللي ما معه اجهزة لا يطلع هذي ماهي صحيحة
من عرفت روحي وانا ما استخدم القارمن ولا اللاسلكي والحمد لله عايش
عموما اللي ربعه كذا لا يعتمد عليهم ابد ويسنع اموره بلاهم والشكوى لله يطق قارمن ولا يحاول يفتح ذهنه ويعرف الاتجاه ويمسك جواد تتجه لاقرب اسفلت

مع الشكر لك اخي ابو سليمان

[صقر]

الخطأ خطأ ربعه

المفروض انهم يديرون بالهم عليه وخصوصا انهم يعلمون ان مامعه اجهزة .

لذا الحق يركب خوياه.

والنقطة الثانية المفروض انه يوم تعطل يرجع لمكان وما يتحرك ... وأكيد خوياه يرجعون مع طريقهم .

وسلامتكم

[المربد]

الخطأ من الطرفين
الاول من خوياه انهم ما راقبوه وتفقدوه!!
والثاني منه هو ،، انه تحرك من مكانه ، كان المفروض انه ينتظر واكيد بيرجعون عليه.

[al-nashmi]

الخطأ خطأ ربعه


المفروض انهم يديرون بالهم عليه وخصوصا انهم يعلمون ان مامعه اجهزة .

لذا الحق يركب خوياه.

والنقطة الثانية المفروض انه يوم تعطل يرجع لمكان وما يتحرك ... وأكيد خوياه يرجعون مع طريقهم .

وسلامتكم



وهذا درس له وفائدة عظيمة .... تعلمة انه ما يعودها و يخاوي ...... اللي ما ينتبهون لخويهم....

ولا من قل السنع لهم امير .... والامير مطنش.... ولا تفقد رعيته.... امحق امير...


و السلام عليكم ورحمة الله وبركاته....

[سداااااح]

الا اكيد الساراة الثانيه ركابه مصاريا من كثر السوالف نسو حتى كم سا عه مشو والله يعوض رفيقنا بطلعه فيها زوله

[علوم رجال]

انا اشوف ان الخطأ عليه ،،،، ليه يبنشر بهالوقت اللي ما له داعي


والخطأ الكبير والكبير مرة ،، انه راح مع ناس ما يقدرون الرفقة ولا يبالون باخواياهم

والخطأ الثالث انه يشيل العفش معه ولا يشيل العزبة ،،، اذا كانت سيارته ونيت المفروض اول ما يشيل العزبة وخصوصاً اللحم والرز ، على شان كل المجموعة تحافظ عليه ..

شفتوا يوم اقولكم ان الخطأ عليه

[دله وفنجال]

السلام عليكم...
ابو سليمان الشباب ماقصرو بلردود لاكن عندي اضافة على كلامهم .
وهو انه المفروض يكون الامير بول الركب لجل انه هو الي مجود الشباب مع ارقابهم ويكون هنالك شخص في اخر الركب يحمل معة جهاز قارمن او في اقل الضروف يكون معه جهاز لاسلكي ولا يكون ونيت لانكم خابرين مع المرودح يبي يتناثر العفش لذالك يكون صالون غيرة هذا اذا كان فيه اكثر من سيارة اما اذا كانت سيارتين فلازم ينتبهون الاولين للسيارة الثانية ولا يقعد يتندحلي ويتبطح الي مامعه جهاز لين ان ربعه يروحون عنة ثم يبلش بروحة خلة ينشب بقفا السيارة الثانية ولو يحصل يربط الواير ازين...
اسف على الاطالة....

[النفود الشرقي]

صقر[/I]]وهذا درس له وفائدة عظيمة .... تعلمة انه ما يعودها و يخاوي ...... اللي ما ينتبهون لخويهم....

ولا من قل السنع لهم امير .... والامير مطنش.... ولا تفقد رعيته.... امحق امير...


و السلام عليكم ورحمة الله وبركاته....

بس إذا أنه يقدر يجهز سيارتة بالعدة الكاملة فإن الخطأ علية

و إذا كان المسيكين على قد حالة فربعه فيهم شوية نذالة


بس المفروض منه ما يقول أنهم يبغضوني ويدورون الفكة مني :no2: :no2: :no2:
ترى يمكن أنهم ناسين وخصوصا أنكانهم أقاربه
والله أعلم.......

[شبوب]

أبو سليمان 00

المسأله فيها تفصيل :D 00 اقولك كيف 00؟ اذا هم شلة عمر ، تراء كلش يهون 000 اما اذا هم جدد على بعض فالحمدلله جت من اولها يعني " المريه الغفله " ;)



تحياااتي ،،،

[ريف النشاما]

:D

أيه هين ياشبوب -- والدليل شوية



أبو سليمان 00

المسأله فيها تفصيل :D 00 اقولك كيف 00؟ اذا هم شلة عمر ، تراء كلش يهون 000 اما اذا هم جدد على بعض فالحمدلله جت من اولها يعني " المريه الغفله " ;)



تحياااتي ،،،


ياجماعة الخير -- هذه المسألة تعود على أمير الرحلة -- يجب أن يكون هناك مراقبة لجميع الركب

خاصة إذا فيه أحد مامعه ((جهازإرسال )) لأن لو معه قارمن وش الفايدة

وعلى الأمير أن يحدد كل شي في الرحلة وأن يعرف السيارات ومتى يوقف ومتى يعبي وغيرها

وإذا قدر وضاع الشخص --- لايبعد عن مكانه في حدود الحروة والوقت الكافي -- وإذا ماجاه أحد يقلبها على بيتهم :D

((هذه المشكلة تحصل إذا كان العدد كبير ))

[محمد حمد]

والله مشكله ..........
هذولا اسحب عليهم السيفون ولا عاد تكشت معهم لأنها من بدايتها وهم كذا وشلون لو جت مواقف اصعب من هذي وش يصير ..؟؟
احسن حل اتركهم هم وكشتاتهم ولا تكشت معهم إلا في استراحة وتخب عليهم !!!

[خشم الحصان]

الاخ الغالي
ومشرفنا االفاضل
حد اسيف
ابو سليمان يجعلك تسلم فل امين
اخيي الخطا مهوب منهم الخطا لي بين السواق والراكب؟؟؟؟؟؟؟؟؟؟؟؟؟؟
تدري وشو (باجه .....مصري..........محموس......يعني كيس الفصفص
البلا هو البلا لئن الخشه اذا دارت مكاينها ولا تاقف لين (الرايش) يعني القشام يسد المناخر
وخذ حسي وسواليف
والمسكين عجل علي تركيب الكفر لاياهم يبعدون ..........مادرا ان الربع بعدين عنه من يوم قظبو الخط لئن العقول
مع السنون توالفت والدليل.............حجب القشام عن الشوف والعقل
اخوك
خشم الحصان
....................................

[ابوفريال]

صح لسانك ياريف النشاما ... فعلاً الدليل شويه ....
ويا شبوب (الماريه الغفله ) هذي عند بيوتنا مو في البر .......
تحيات ابو فريال ........

[خيال الغلبا]

والله يبدو لي والله اعلم
انهم مايبونه وفرحوا بفرصة تأخره ليهربوا منه ويضيعونه
والالو كانوا يبونه كان يوم فقدوه رجعوا الى محل افتراقهم عنه او على الأقل وقفوا شوي لين يلحق بهم
ونصيحتي له يدورله ربع جدد
وبسرعه لأن موسم الكشتات على الأبواب
ومااحلى ليالي سهيل بالدهناء

[حـاتـم]

غلطانين الي يطلعون بدون قارمن والقصصص كثيره وصارت معنا بعد بسبب التجاهل ولالاهمال

او الي يطلعون لحاله مامعه احد ويضيع

اهم شي للطلعه انا اولا القارمن وثاننيا الكينوود

وشكرا

اخوكم /حاتم

[شبوب]

أيه هين ياشبوب -- والدليل شوية

هلابك والله مشرفنا العزيز000

أقول وبالله التوفيق " متحمس :D "

الله يبي من يتقيه ، يابو عبدالعزيز 00!! نسيت اللي " غرز" وموتوه اساسا مهب موتر " بٌـــــــر " ;) ونقوله محفول مكفول بس خل موترك وأركب معنا ، ويعي 00!؟ وخلانا نخـــيم جنب موتره "ثلاث ايام غصب علينا " :no: ، النفود ما يدخله لانه يغرز ، والصفراء يحك بالحصى00؟ يعني صياهد والا القار ;) أجل وشوله أخذه معك 00؟؟

لا بعد من زين خشته جاي يرد 00!! فعلا اللي استحوا ماتوا ;)

[ابوفريال]

هالحين ياشبوب .. الرد للمشرف العزيز او يعني (اسمعي ياجاره) ...
لا وحاطلي علامات استفهام وتعجب وتقاط وايقونات يعني اني اعرف اكتب ......
عطيناك الاحداثيه وقلت (الطرمبه) ماتشتغل ...وشوله مسوي نفسك راعي بر وطربمك خربانه ... ويوم رجعنا قلت ماودي اوهق العيال .. ماندري وشنصدق ... وثاني شي مسوي نفسك فيها الشيخ زايد .. ابروح والحقوني ... ولد النعمه مايبي يشيل ولا يحط مصدق نفسك ..
اما الخشه ... اسأل (ابو نفيل) اي احسن خشتي ولا خشك ......

[ريف النشاما]

السلام عليكم ورحمة الله وبركاته


""

:D


أبو فريال ( يقولون حسني على غفلة صار ريس ....................زززززززززززززززز

وخلها في محلها لاتحرث نصابها .........................والشيخ زايد الله يرحمة أشوى من غيره :j

والقارمن صار مايدل ...........والله عجايب :mad:


أقول ياليتك تشيك على هذا الرابط :j

يافيه سعة صدر وقصيد :D


http://www.mekshat.com/vb/showthread.php?t=1799

[شبوب]

هالحين ياشبوب .. الرد للمشرف العزيز او يعني (اسمعي ياجاره) ...
لا وحاطلي علامات استفهام وتعجب وتقاط وايقونات يعني اني اعرف اكتب ......
عطيناك الاحداثيه وقلت (الطرمبه) ماتشتغل ...وشوله مسوي نفسك راعي بر وطربمك خربانه ... ويوم رجعنا قلت ماودي اوهق العيال .. ماندري وشنصدق ... وثاني شي مسوي نفسك فيها الشيخ زايد .. ابروح والحقوني ... ولد النعمه مايبي يشيل ولا يحط مصدق نفسك ..
اما الخشه ... اسأل (ابو نفيل) اي احسن خشتي ولا خشك ......

هلابك والله ومسهلا 00

أبو فريال 00 تراء ما جاء طاريك الا بكل خير ، لكن اللي " بطنه به ريح ما يستريح " ;) ، عارف ان ثقافك مصريه :) ،أقربها لك شوي يعني بالبلدياتي " اللي على راسه بطحاء يحسسها "00!!
بعدين انا أجزم أن الشيـــخ زايد ، الله يغفرله " راعي بــــر " بس الدعوا " ........ " :p ة((على قولة ريف )) وشو راعيه00؟ راعي " ترعه " :D الا الترعه على طاريها وشي 00؟ :D

منهو اللي مايبي يشيل ويحط 00 !!! ...............:confused:


تحياااتي إلك ،،

[ابوفريال]

دام ريف النشاما رد ماعاد لنا كلام ...
اما انت ياشبوب ..الشيخ زايد شيخ يجلس وكلن يخدمه ــ الله يغفرله ــ ماعليه كلام .. بس انت مسوي نفسك مثله ... ..أما........... وربعه يصلحولك تقدر تسوي فيها شيخ
وترى مهوب كل من شراء جيب وقدر ضاغط وكشاف صار راعي بر ... ترى قيمة (الصندوق) يجب ذولي كلهن ...
بس ماجاوبت ... هالحين يوم شويه كانت (الطرمبه ) خربانه ولا ماودك توهق العيال ..