ماهي ادنى نسبة% لنظافة الماكينة عند الفحص بالكمبيوتر ؟

[مفخرة فورد]

السلام عليكم
عند شرائي للموتر فحصت الماكينة بالكمبيوتر وطلعت النسبة 80% !

صراحة ماطمنتني هالنسبة
رحت بعدها لورشتين فحص يدوي - قالوا لي نظيفة

الحين ودي اللي يعرف في نسبة الفحص بالكمبيوتر يعطينا العلم :

ماهي أدنى نسبة لنظافة الماكينة ؟

وهل احتاج الى تصليح او تجديد عند النسبة 80%

والا أريح راسي واطمئن لنتيجة الفحص اليدوي ؟

والله الموفق

[البريهي]

مافيه الاالعفيه

[سرطوقا]

اتوقع 80 مافي شيء الموتر زين وانت لك الخيار بارك الله فيك

[مفخرة فورد]

البريهي
الله يعافيك وشاكر مرورك
سرطوقا
الله يسعدك ويبارك فيك , الموتر شريناه وخلاص
لكن من باب العلم بالشيء ودي أعرف اقل نسبة لنظافة الماكينة يعني اذا مثلاً طلعت 65% أو 50% أو أقل هل معناه ان الماكينة على وشك أو يبغالها توضيب ؟
وفقكم الله

[راعي المجهم]

واحد من الشباب أشترى تاهو 2009 جديد وكالة زيرو !!!!

فحص المكينة طلعت نسبتها 94 % ؟؟؟؟؟؟؟؟

يعني الفحص هذا كلام فااااااااضي

و80 % تعتبر جديدة

[مفخرة فورد]

راعي المجهم
حياك الله , صراحة غريبة ماهي 100% :confused: دامها وكالة !

المشكلة ان واحد قال لي هالكمبيوتر طلع نسبة 30% لماكينة ماتدخن ولاتنقص !

والله أعلم ايش الصحيح

شاكر اضافتك

[طلال123]

ياجماعة الخير الفحص بالكمبيوتر كلام فاضي

مرة انا وواحد من الشباب تحدينا على سيارة مكينتها تصرف زيت وتدخن والمكينة على النهاية المهم يوم رحنا للفحص وفحصنا المكينة بـ100 ريال قالي العامل ان النسبة 80% يعني نظيف >> والله ضحك على الناس عيني عينك ماكملت اسبوع الا والمكينة مخبطة

[بن مانع التميمي]

انا فحصت كابرس 2004 نظييييييييف ماشي 120 الف طلعت نسبه المكينه 96%

وخويي فحص فورد 2009 بعد وماشي 40 بس طلعت النسبه 86%

يعني مدري وش السالفه

[مفخرة فورد]

حياكم الله كل باسمه

وانا بعد محتار هل هالكمبيوتر يعتمد عليه في الفحص ؟ وهل النتيجة تشرح ايش يبي له الموتر من اصلاحات في الماكينة ؟

[التعـ King ـديل]

فحص الكمبيوتر سعه صدر وسوالف

موتر مقلوب ومسكمر ومكينته على وشك تضرب خالطه مويه وزيت وعطانا بالفحص 80%

[مفخرة فورد]

التعـ King ـديل
حياك الله , مشكلة اذا طلع سوالف :( , بزعمي انه يكشف أشياء مايقدر يكشفها الميكانيكي أثناء الفحص !

[البرتقالي]

كلها تجاره ما مثل تجيب معك ميكانيكي
يكشف على المكينة لو من الصوت وتعطيه ورقة زرقاء

[vxr99]

كلها اجهزه للنصب على البشر هي وجهاز السمكره كلها تخمين وطريقه للنصب
والدليل افحص على جهاز ثاني مختلف وشف الفرق لو النسبه متقاربه ممكن لكن
يجيك موتر وكاله ويقولك بعد فحص السمكره الموتر مرشوش اكيد مرشوش من مصنعه

[مفخرة فورد]

شكراً للجميع كل باسمه
والظاهر انه مايغني عن الفحص اليدوي للماكينة
وفقكم الله

[فرامل]

قال فرامل عافاه الله وإياكم:

المعلومات التي في مخي عن فحص الكمبيوتر للسيارة لا تتعدى فحص تدفقات الكهرباء إلى البخاخات والبواجي من الدينمو والكويلات ومنظمات الكهرباء .. وكذلك فحص العادم.. فقط..

بمعنى أنه إن كان هناك إشكالاً في أمور كهرباء المحرك أو في كمية العادم فسيكشفها الكمبيوتر ، وما سوى ذلك فماهو إلا هراء في هواء!.. قال ضغط البستم قال؟!!! ... طيب ابي افهم وشلون يتبين ضغط البستم من سلك يشبك في سلك البوجي؟!!..

هذا ما يلوكه مخ فرامل من معلومات حيال هذه القضية ، والله أعلم وأحكم..

أخوكم / أبو زامل .. فرامل.. والخير شامل

[مكشآتي للآخر]

مرسيدس 90 نسبة المكينة 79 ومرسيدس اخرى عندي موديلها 2005 عطاها 0 بالمية ؟؟تصدقون؟؟
بس بصراحة كنت توني موضب مكينة ال2005 وتوضيبة طلع فآشل

[المهاجر انا]

الفحص الصحيح عب بنزين وامسك الدائري وامش 120 ويطلع اللي في بطنه وبس

[أبو هاجوس2000]

إذا بغيت تشترى سيارة . حاول تشتري من واحد شخص قريب أو صديق أو معرفة فالثقه موجوده . وريح بالك من الفحص .

[نقطه]

يالرجاال الفحص هذا إستنزااف للفلوس

وليت الواحد يتطمن بعده

[مفخرة فورد]

قال فرامل عافاه الله وإياكم:

المعلومات التي في مخي عن فحص الكمبيوتر للسيارة لا تتعدى فحص تدفقات الكهرباء إلى البخاخات والبواجي من الدينمو والكويلات ومنظمات الكهرباء .. وكذلك فحص العادم.. فقط..

بمعنى أنه إن كان هناك إشكالاً في أمور كهرباء المحرك أو في كمية العادم فسيكشفها الكمبيوتر ، وما سوى ذلك فماهو إلا هراء في هواء!.. قال ضغط البستم قال؟!!! ... طيب ابي افهم وشلون يتبين ضغط البستم من سلك يشبك في سلك البوجي؟!!..

هذا ما يلوكه مخ فرامل من معلومات حيال هذه القضية ، والله أعلم وأحكم..

أخوكم / أبو زامل .. فرامل.. والخير شامل
ابوزامل والخير شامل
الله يشملنا واياكم برحمته
صراحة اللي يلوكه مخك :good2: ماشاء الله عليك


مرسيدس 90 نسبة المكينة 79 ومرسيدس اخرى عندي موديلها 2005 عطاها 0 بالمية ؟؟تصدقون؟؟
بس بصراحة كنت توني موضب مكينة ال2005 وتوضيبة طلع فآشل
صراحة ودك تستغني عن هالفحص بفحص ميكانيكي فهمان في هالامور أفضل
وفقك الله

الفحص الصحيح عب بنزين وامسك الدائري وامش 120 ويطلع اللي في بطنه وبس
صحيح كلامك لكن لازم يكون الواحد ملم ببعض اصوات تطلع وايش سببها
ماقصرت الله يوفقك

إذا بغيت تشترى سيارة . حاول تشتري من واحد شخص قريب أو صديق أو معرفة فالثقه موجوده . وريح بالك من الفحص .
حياك ابو هاجوس
لكن ماهو بكل الاحوال - واسأل مجرب :(