هلل ال Gxr اقوى من اليوكن

[مريقب العيفار]

حياكم المولى يا اخوان

غرز واحد من الربع على يوكن

وسحبه يوكن ثاني ولا قدر يطلعه

وانا ما كنت حاظر

وبعد ما كلموني الربع

وجيت سحبت الموتر وعلى طول طلع

انا افتكرت خبري باليوكن اقوى من الجيوب

ولا وش رايكم

تراي ما ادري راعي اليوكن الساحب هو منسم كفراته ولا ما نسمها

لأني انا يوم وصلت نسمت للجيب ثم سحبت الرجال

[ابو شكاع]

هلا والله
حي الله مريقب العيفار

لا يسمعك العارض ....عندي ان اذنه الحين تطنننننننننن :)

انا معي يوكون يالغالي ولا قد جربت هاللي تقول ....لكن القوة من ناحية المكينة هو أقوى <<< يعني اليوكون

لكن اذا قدر الله وهكس اليوكون .... عز الله انه عله أسألن انا مجرب تقول حاط تحته طن سليكون .... تقول الأرض ماصته ... ما يتحرك أبد

بس اذا كان طال عمرك منسم له ....تتهادى بهالنفود وبقوة وعزيمة .... يكون شامخ بين المواتر

خل بس العارض يجي ويحتسي لك عن سالفته يوم يغرس جيب بنقرة النفود

وهلابك ومرحبا

[بواسامه]

شكلك يامريقب العيفار طاره :good:
وربعك من جنبها
وكني بخويه الي يسحبه غرز معه :D
لانهم مانسمو هالبعارين اللي معهم
وياثقل طينتهن اذا غرزن :rolleyes:
يالله ونش ولا مريقب العيفار

[الجيب الربع]

هلا والله
حي الله مريقب العيفار
لا يسمعك العارض ....عندي ان اذنه الحين تطنننننننننن :)
خل بس العارض يجي ويحتسي لك عن سالفته يوم يغرس جيب بنقرة النفود
وهلابك ومرحبا

اسأل العارض وش لون غرز اليوكون بالدهناء بالطعس وهو نازل والطعس كان ممطور ليله كامله

وراح أبو فيصل من القهر يسحبه

السيارة من سواقها والا لو هي 12 سلندر و400 حصان مع سواق أرفل غرزت بادنى رمل

[اسيزو 4x4]

السيارة من السواق

ولا ننسى نوع الكفرات يأثر على المواتر والتنسيم مهم جداا جداا ...

.

[ابوفواز]

السالام علبكم ورحمة الله
ياشباب اليوكن قوي من ناحية الماكينه لاكن اهي على السواق لكن اليوكن ان طاح الله يعين صاحبه ترى الموتر ثقيل لكن الموتر جبار وعزمه قوي
لكن الجيب مايعلا عليه عزيز في كل مكان سواء بر او خط او غيره

[مريقب العيفار]

ابو شكاع الله يحييك اكثر

ويا هلا بك

واحد من الربع كان معه جيب تويوتا ثم شرى يوكن

يقول انه انشط بالنفود من الجيب

وكلامك صحيح انه اذا هبك بالنفود يصير علة

لاني سبق اني طلعت واحد ثاني من الربع كان معه يوكن والله ياهو بهذلنا مره

وتراي انتظر اخونا العارض يحكي لنا قصته



اخوي بواسامه الله يحييك ويسلمك

واشكرك على قولك


شكلك يامريقب العيفار طاره
وربعك من جنبها

لكن اكيد انك كود سمعت المثل اللي يقول العور بديرة العميان امير

انا كنت اعور العميان

[مريقب العيفار]

اخوي الجيب الربع يا هلا بك وحياك المولى

والله يا هي فضيحة اذا كان اليوكن مغرز وهو نازل حتى لو ما كان النفود ممطور

وصادق ان السيارة من سواقها

لكن بعض الشباب ما يلامون لانهم ما يروحون النفود الا قليل


يا هلا ومسهلا باخوي اسيزو 4x4

ما فيه شك ان السيارة من سواقها

لكن بعض الشباب يتعيجز عن التنسيم اذا كان على اطراف النفود

ما هو داخل بعيد



اخوي ابوفواز اهلا بك ومرحبا

صادق اخوي فاليوكن اذا غرز ياهو علة

[مرقاب الشرق]

الجيب اقوى من اليوكون بالبر والسواق له دور .
يكفي ان اليوكون كل شوي داق خشمه الارض وغير اللحيه باكالحسبه .

[بو خليفه]

قوة العزم في اليوكن مايقارب 400 نيوتن يعنى يعادل اللاندروفر طبعاً اللاندروفر قوة العزم من 425 - 460
أما vxr فقوة العزم320 نيوتن أقل من اليوكن
اليوكن يسحب 4 طن اللاندكروزر يسحب 3 طن
اليوكن قوة العزم عند 2.5 دورات الماكينه كروز عند 4500 قوة العزم
و أكيد اليوكن لم يخف الهواء من الكفر
و لك تحياتي

[الـ ع ـارض]

مع احترامي للجميع ....

اليوكون ما مثله للنفود بس للي يعرف يتعامل معه ....

فرق بين اليوكون واللاندكرزر والباترول من ناحية القيادة والتعامل مع السيارة وطبيعة الارض ....

وانا جربتهم جميع وبصراحه ما جاب راسي غير اليوكون ... يكفيك لو انك تبي تطلع طعس

اللاندكروزر الى ما يوصل حده ويوقف وتسمع حنة المكينه ولكن الكفرات ثابته ونفس الشي بالنسبه للباترول ...

اما اليوكون فانه ما ما يخلص عزمه وتلاقي كفراته تدور حتى وهو واقف بمكانه ...

ولكن لولا اختلاف الاذواق لبارة السلع ...ولكل سيارة قيادتها وسائقها .....

اما قصة راعي اليوكون اللي مغرز تغريزه غبيه بالدهنا والارض ممطورة فبصراحه كان ودي اخذ منه اليكون واعطيه دنانه ... اقول له طبعا بعد ما حاول اكثر من جيب سحبه وما قدروا .... اقول له اشبك الدبل الثقيل وحط القير على 2 ولكن الرجال مستدلخ جالس يحورف بالمسجل ويسولف مع الحريم اللي معه بالسيارة .... والله لولا مخافة الله كنت مصعته من السيارة وركبتها وطلعتها ....

ولكن قهرني بقووووووووه وشبكت الواير بشنكار موتره وتليته وادعي ربي ان يطلع شاصي موتره معي .....

لا ومن زين الطبايع يو طلعته جالس يسب باليوكون واللي يشريه .( يعني شملني السب والتلعين ) ....

اخخخخخخخخخخ بس من بعض الناس غشيم ويتفلسف على غير سنع ....




العذر والسموحه يا جماعه على كلامي بس والله الى الان وانا مقهور منه

[الكشاح]

السلام عليكم ورحمة الله وبركاته

سلامي عليك يا العارض....صح لسانك...ولا يهون الربع...والخيل من خيالها

وانا من حزب اليوكن ...تحياتي للجميع


http://www.mekshat.com/pix/upload/images10/mk5821_gmc.jpg

[مريقب العيفار]

اخوي نجم الحق حياك الله

واذا كانت لحية اليوكن تدق بالارض فهذي مشكلة

لكن لم يبدو لي انه طامن


اخوي بو خليفة الف شكر على هالاضافة

[مريقب العيفار]

اخوي العارض يا هلا بك

ولا شك انك تحكم من واقع تجربة

لكن اذا كان صاحبك مغرز والموتر نازل عدال فما لها ترقيع

فضيحة بكل المعاني

واما ان كان على جنب فتصير مع كل المواترولا فيها شيء



اخونا الكشاح اهلا بك

[الـ ع ـارض]

الاخ نجم الحق : كلامك صحيح من موديل 2002 وانت طالع حطوا له لحيتين .... لحيه فيها الكشافات ولحيه تحتها ماااااااااالها داعي وهي اللي دائما تحك وفكتها بسيطه ما تاخذ معك 5 دقايق اما اللحيه اللي فيها الكشافات ماهيب تحك الا اذا طمرت بالموتر ونزل على وجهه فحكته بسيطه وابشرك ياما تحكحكت معي وما تنكسر بس تطيح المشكبيات اللي ماسكتها وهذي الحركه مقصودة من المصنع عشان تنفك اللحيه ولا تكون ناشبه بقوة وتنكسر ... وكلها مشكبيه او سيم حديد وشدها وانتهينا ....


وياااااااا هلااااااااااااا بك

[الـ ع ـارض]

الاخ مريقب العيفار : هذا اللي رافع ضغطي .... انه مغرز وهو نازل ويتفلسف بعد ....

لو انه مغرز على جنب ومتعلق الموتر كان عذرناه ولكن تغريزته تغريزت عليمممممممممممي


وحيااااااااااااااك مولااااااااااااااااك

[حرباش]

السيارة من السواق

ولا ننسى نوع الكفرات يأثر على المواتر والتنسيم مهم جداا جداا ...

.
ابو حمووووود يحب التويو وينصح بها :D


اختلفت وجهات النظر ونا ببدي وجهه نظري


الجموس بشكل عام قوه في المكينه مايحتاج ولا عليها كلام

ولكنها واعوذ بالله من كلمه لكنها قابله للخيانه في اي وقت واخص بالذكر الموديلات الجديده .


يعني مستحيل اضمنه وارتاح في منطقه نائيه زي ماكون مرتاح ونا راكب جيب نيسان او تويوتا :)


وهذي زبده الكلام ووجهه نظري الخاصه : :p





تحياتي لكم جميع ;)

[مريقب العيفار]

أخي العارض اهلا بك

وحياك أيضا مولاك



أخي حرباش اهلا بك

ومشكور على هالرأي