حاجات غريبه - ياليت المشاركه من الجميع

[التعـ King ـديل]

السلام عليكم ورحمه الله وبركاته

مساء / صباح الخير على الجميع

كل عام وانتم بخير .. وعيدكم مبارك

بصراحه بالفتره الاخيره ظهرت بعض المواضيع مثل سياره مواصفاتها كذا وكذا كم تسوى البعض ممكن يكون صادق بيشتري لكن البعض الاخر

عكس ذلك منزل الموضوع علشان يشوف سيارته كم تجيب .. طيب كيف تبينا نعطيك سعر للسياره بدون شوف او فحص ؟؟ ولمن ندخل ومانرد

يزعل ويكتب ردود مالها داعي مثل معقوله مااحد يعرف معقوله عدد كذا زوار ومافي الا رد واحد ؟؟ ومن هالكلام اللي ماله داعي انه يكتب

هذي نقطه والنقطه الثانيه ان الواحد اذا بغى يبيع موتر يحط صوره قديمه للموتر وتلاقيها قبل خمس سنوات ولا حواليها والموتر نظيف ورزه

ولمن تطلب منه صور جديده يقولك مااعرف ولمن تروح تشوف الموتر تلاقيه معدوم وغير عن الصوره تراني ماتكلم من فراغ طلعت وشفت

بنفسي كم سياره بالصور ولا احلا وعلى الطبيعه معدومه .. يااخوان فيه حديث عن الرسول عليه الصلاه والسلام فيما معناه ان البيع

يحتاج وضوح وصدق من الطرفين علشان الله يبارك لهم .. ولا بعض الناس يحط صوره سياره ويقول تشبه هالسياره بجد اللي يسوي هالحركه

يرفع ضغطي انت تبي تبيع موترك ولا موتر الرجال .. ولا بعض الناس يقولك جديده ماتحتاج صور ياشيخ لو انه واقفه عند الوكاله نحتاج

صور فمابالك بموتر ماشي ومستخدم .. انا مره ضربت مشوار خارج الرياض على موتر 2009 وذا الكلام قبل سنه يعني على وقت 2009

والرجال يمدح الموتر ومامشى الا 22000 وكلام كثير يخليك تروح وانت مغمض خاصه ان السعر اقل من السوق ب 4000 ريال بالنسبه

لواحد مثلي يعتبر مغري لاني اغير سياره كل سنه .. ولمن رحت وقلبت الموتر لقيته فعلا زي ماقال ماشي 22000 كيلو لكن الموتر مقلوب

ولو حط صور بالنت كان وضحت الرشه لان الرشه مش حالك .. اعذروني على الكلام الطويل وللحديث بقيه بعد مشاهده كتاباتكم

بالختام

الذمه الذمه الذمه علشان الله يبارك لك في بيعك ومشتراك

[abo_hoor]

وعليكم السلام ورحمة الله وبركاتة

مساك الله بالخير اخوي
وكل عام وانت بخير وصحه وسلامه اخوي
موضوعك مهم جدااا
وعين الصواب والله
صح فيه اشخاص يعرضون سياره ويقولك مثلا انها مثل الوكاله وهي تطلع غير اللي يذكره
ويقول سياره جديده هني يعود للشخص اللي يعرض لازم تكون عنده ذمه وضمير
ويقول الشي الصحيح اذا كان جاد في بيعه اما انه يسوي امور ثانيه ليش مو حرام عليه
مفروض اذا كان يبي يبيع يذكر مافيها من اشياء للشاري وربك يرزقك خير
والموضوع يطول اخوي كل الشكر لك على هالموضوع الرائع اللي فيه توضيح ونصيحه
وطبعااا مااعمم هذا على كل الاخوه في منتدى مكشات لاني اذا عممت راح اكون اخطأت

[السومر]

ان شاء الله يستفيدون من الموضوع

[almjrooh_07]

والله كلامك في محله لكن مانقول ان الله يهديهم

[ابوصالح77]

صدقت لابد من إرفاق صورة السلعة بوضعها الراهن
ليكون هناك شفافية
وأعتقد إن فيه ناس على بالها تستغفل الآخرين
تقبل مروري

[بيك اب 4X4]

لو فيه خير ما رماه الطير
هذي المقوله تنطبق على السلع المعروضه للبيع
طبعاً مو كل السلع بس نسبه كبيره منها
ثاني شي و دايم اسمعها ان اللي يعرض على النت
يكون فاقد الامل من ان موتره يجيب له سعر بالمعارض
و طبعاً السبب معروف ( لكثرة العيوب بالموتر )
و اكرر ان مو الكل كذا بس مع الاسف ان نسبه كبيره كذا

[التعـ King ـديل]

حياكم الله كلن بااسمه

اخوي بيك اب انا معك لكن فيه ناس عندها ظروف مثلا مايقدر يوقف السياره بمعرض او يفرفر فيها عند الشريطيه

انا من الناس اللي استخدم البيع عن طريق الانترنت لاني موظف بنك مااطلع الا 6 المغرب متى يمديني اروح المعارض

بالاضافه الى ان السياره تحت استخدامي.

[س6ك7ب]

صح لسانك أخوي :good2:
ولو كل واحد تذكر حديث الرسول صلى الله عليه وسلم
" من غشنا فليس منا"
كان ما حصل اللي ذُكِر

[بدوي جنوبي]

جزاك الله خير علي التنبيه

فيه ناس يعدل على الصور وشفت اكثر من موضوع معدله الصور اما ببرنامج الفوتوشوب
او غيره ،،، وهذا يعتبر من الغش

[مفخرة فورد]

عليكم السلام ورحمة الله وبركاته
عشت يالكينق كلامك بمحله
واللي وده يعرض سيارته للبيع يعرضها مثل ماهي عليه سواء فيها سمكرة مافيها (( المهم بوضعها الراهن ))

من جهة ثانية ايش يستفيد اللي يعدل ويسوي عالصورة وهو عارف ان ماحد يشتري الا لما يشوفها !!
صراحة حركة مالها داعي :no2:

[alwssam6]

موضوع جميل يستحق المناقشه للحد من هذه الظاهره مشكور

[كاشت وحداني]

بيض الله وجهك يالكنج
والله اني مجهز كلام حول هالموضوع كنت ناوي ارسله لادارة المنتدى
واضف على ذلك اللي يقولون له ارفق صورة يجي رده يقول يجي يشوف عالطبيعه احسن
طيب اطق لك مشوار على شئ مجهول
ولا يقولك مخزن ماشي 300 الف بس
حتى لو موديله 97 ولا 99 ولا 2000 المخزن معروف وضعه وممشاه .

[الهاجس 354]

كلام 100% الله يرضى عليك

[كم كيلو باقي]

بيض الله وجهك ياكنق

انااا اشهد انك كنق والله .. كلامك سليم وفي محله وننتظر تصرف الإدارة في وضع نظام للحد من هالظاهرة

وطبعا تستطيع ببرامج الصور تطلع تاريخ التقاط الصورة وهل هي معدلة بالفوتوشوب ولا لا

[التعـ King ـديل]

الله يعافيكم على المرور والمشاركه وباانتظار بقيه الاخوان

[abo_basil]

مشكووور على الموضوع اخوي كنق

[بيك اب 4X4]

والله انك صادق يا كنق
بس القله اللي ما يخافون ربهم خربوا على الناس الصادقه
بس ارجع واقول الدنيا باقي بخير و فيه ناس كثير تخاف ربها
و لا يرضى على نفسه قرش حرام

بالتوفيق للجميع

[ابن عكاش]

كيف الحال وكل عام وانت بألف خير وين اللي بيسير تراي للحين انتظر منك الزياره
كلامك صحيح وبصراحه انا صرت ما احرص على بيع او شراء السيارات من النت لعدة اسباب
منها الصور في الغالب تخدعك خاصة إذا كانت من زاويه معينه وعلى قولت المثل من الراس ولا من القرطاس
وكذلك إذا الموتر خارج مدينتي معاد التفت له لأنه في الغالب تدق مشوار ثم ما يصلح لك الموتر وتتحسف
اتمنى من الأخوه ان يتحرو الصدق لأننا في هالمنتدى تجمعنى على الخير والصدق
اشكرك على كلامك واتمنى انه ياصل مبتغاك
تقبل مروري ابن عكاش ابوصقر

[التعـ King ـديل]

الله يحي كلن بااسمه وبصراحه نورتوني

ابو صقر ابمرك ان شاء الله قريب .. زهب الحليب والمراصيع

[ابا الصلابيخ]

اخوي ابقولك ها الكلام وهو محسوب على وبذمتي
90 % من الشريطية نصابين ولا يعرف البيع الا با الغش

يا اخي الكريم
ابراهيم عليه السلام قال لرب العالمين ليطمئن قلبي
هذا نبي وشلون شرمذة شريطية
تلقاهم واقفين قبل المعارض وقبل صلاة العصر لا صلاة ولا عبادة
ومتلطم وعيونه حمر من جرش الحبوب
با الله وين تبي الأمانه من ها الشكال

ماعليش طولت عليك

[mas111mas]

مشكور على الموضوع......وبصراحه كلامك صحيح ............

[بريداوي اصليm]

كلامك صحيح
وفي نقطه ثالثه الي هي لا منك طلعت عيوب الموتر
يبدا راعي الموتر يلعن ويشتم عليك ويحاول قدام الأعضاء
أن يطلعك تسذااب أنا مره صارت معي مع واحد الله لايوفقوه
بس علشان قلت لو موترك بوه تسذا وتسذا أرسلي رساله
حول أربع أسطر سب × سب
أرسلتلوه جزاك الله خير أومر يطيح وجهوه
جزاك الله خير ع الموضوع
أغديه يوعي الناس الي ما عندهم ذمه

[سلومي سار]

ضعف الوازع الديني خل الناس تغش وتتجه للكسب السريع اين كان


وانا واحد من الذين صار لهم الشي هذا بس اقول حسبي الله ونعم الوكيل



في بعض المواقع الاجنبيه والمتخصصه ببيع السيارات او غيرها لا يبيعك الا وقد صور لك السلعه من جميع الاتجاهات وخصوصا العيوب ان وجدت تحت الفرشات خلف المراتب في مكان ما تشوفه الصوره لزوم يبين لك العيوب وهو اجنبي الله اعلم بدينه ومذهبه


وحنا في بلد الرساله ومع كل اسف تفنن ومجاهره بالغش والتدليس وكله من شان حفنه دراهم راح يلاقيها بقبره



الله يهدي الجميع للصواب



فائده
(( من لزم الاستغفار لقي جميع ما يتمنا من الله ))ِ

[العبدي1]

كلامك صحيح وما أقول الا الله ينفع به

[سبتان]

أنا معك فيما قلت ، ولكن نريد حل ، والحل قد يكون من القائمين على المنتدى .

[صديق كلم رفيق]

كلامك سليم يا كنق لكن ليتك تطرقت لشريطيه النت


والله إن شريطية المعارض ارحم من شريطية النت وهالكلام عن تجربه ،


قبل فتره بعت لي شاص 93 ، وعرضته للبيع في احدى المواقع ونزلت له اكثر من عشر صور من داخل ومن برا ، وبينت كل شيء حتى عذاريبه ، واخرتها يسومونه بـ 25 و27 ، شي غريب ، واخرتها نزلته بالمعارض والله ماجلست عشر دقايق على طول شراه راعي معرض ب38 عسى الله يبارك له ويرزقه .


حتى بهالمنتدى انواع بخس السلعه ، يستغفلون الناس ، والله حسيبهم .


شكلي شطحت عن الموضوع :D وكل عام وانت بخير يا كنق