ياراعى الايسوزو

[Waleed1]

السلام عليكم

حبيت أستفسر عن الايسوزو الونيت، حقيقة عندى نية لشراء ونيت وحيث أن مكينتة الديزل وكما تعرفون لها صوت معين لاكن حبيت أعرف لمن جرب الموتر عن مدى الضجيج على الخطوط، طبعاً فية نوعين من المكائن بسعة 2.5 لتر تيربو و 3 لتر سوبر شارج تيربو هل فية فرق غير القوة من ناحية الضجيج . وشكراً للجيع

[حـاتـم]

هلا والله اخوي حنا عندنا واحد ونيت سيزو غماره موديل2000 مكينته 2500 بدون تيربو

بصراحه رحت عليه مشوار من الرياض للعيينه 40 كم عن الرياض يوم وصلت اذني تون من الصجه
وعزمه صح يفحط بكل النمر بس مايمشي بالخامس وكل الدعسه الضغط بالاحمر 140كم بس لسرعه القصوى
مع العلم انه مع عامل (سواق) يمكن هاذا الي موت عزمه مادري
بس الجديد مادري عنه بس يمحونه واخوي السيزو اخبر مني فيه


وشكرا

اخوك / حاتم

[Waleed1]

السلام عليكم

شكراً أخى حاتم على الافادة وننتظر المزيد وفعلاً قاعد أفكر فى أخونا الايسوزو هو الخبير وباقى الاخوان مايقصرون وشكراً

[اسيزو 4x4]

السلام عليكم ورحمة الله وبركاته

راعي السيزو وصل

فيكم البركة يالنشاما ;) :good:

أخوي حاتم صدقت الموديل 2000 ومكينة 2500 وبدون تيربوا مزعجة شوي

بالنسبة للسيزو الجديدة يالغالي ممتازة جدا أنا جربت 2003 و2004 وبحكم التجربة توضح الأتي :

الأسيزو ممتاز وعزمة قوي جدا جدا تقول بنزين ما شاء الله

وبالخط راسي ومريح ولا تسمع لة صوت أبد مع المشي

وحتى الصوت بالموديلات الجديدة خفيف جدا عكس القديم

ووسيع من الداخل ومراتبة مريحة جدا ووسيعة

الصندوق وسيع أوسع من الهايلوكس والددسن

القوة بالنفود ولا احلى ممتاز جداا بالثاني وبدون دبل وتتمشى بالنفود ( طبعا مع التنسيم )

النوع الفل كامل 3000 سي سي تيربو سوبر تشارج 138 حصان قوي لدرجة عجيبة ما شاء الله ويمشي 180 بالراحة

وإقتصادي جدا

ويمشي ممشا الشاص بالدهناء أسأل مجرب أنا :D ومهما تحملة من الحمولة ما يأثر على العزم أبد ما شاء الله لأنة ديزل

والدخان إنسا وإطمئن ___ مابة أي تدخين ما شاء الله تقول سيارة بنزين ...

القطع الغيار ممتازة سعرها مناسب وأستطيع أن أوكد لك أن فية بعض القطع أرخص من الهايلوكس اللي يضرب فية المثل

سيفون زيت بــ20 عشرين فقط

فلتر ديزل بــ 20 عشرين

فلتر هواء 45 ريال فقط

أقمشة يوجد 3 أنواع

1 - أقمشة تجاري 40 ريال أمامي يمشي 40000

2- أقمشة تجاري أمامي وممتاز ما علية وبــ 85 ريال يمشي 90000

3- أقمشة أصلي يابان أمامي من الوكالة بـ 175 ولكن تمشي 230000 على كلام الوكالة

أنا موتري ماشاء الله ماغيرت شد البلد وماشي الموتر حدود 80000 ودايم أستخدامي أقشر وللعلم أنا ساكن بالجنوب

يعني طلعات ونزلات وتستهلك الأقمشة بسرعة ولي أحد الزملاء معة هايلوكس 2002 يقول ماتمشي الأقمشة

الأصلية للهايلوكس ومن الوكالة إلا 45000 فقط وهو متهول من أقمشة السيزو قولو ما شاءالله :D

وأتمنا لك التوفيق والله على ما أقول شهيد والله أعلم ....

أخوك ابو حمود ...

[Waleed1]

السلام عليكم

واللة ماقصرت يا راعى الايسوزو بيض اللة وجهك وماقصرت كفيت ووفيت، تصدقون ياشباب واللة أنها مفخرة لنا يعنى مامصلحت أخونا الايسوزو وباقى الاعضاء الكرام لما يطرحون موضوع أو يردون طبعاً أولا يبتغون وجة اللة وأجرة وتبادل المعرفة واللة لا دينار ولادرهم أخونا الايسوزو يعنى كم جلس على النت ويكتب ويرد بهذة المعلومات وباقى الشباب اللة يعطيهم العافية حقيقة شئ يوحى بمستقبل مشرق لهذا اليلد الطيب.

عموماً باقى سؤال بسيط يا الايسوزو، بالنسبة للمكاين 2.5 لتر كيفها لان الفل الكامل غالى على ياغالى وجزاك اللة خير وشكراً

[الراعي الرسمي]

السوزو سياره مطلع مثله ديزل . قوي جداً جداً جداً ويتحمل كل شي .
بس ......... عيبه الوحيد قطع غياره مرتفع جداً جداً جدا ً وخاصة في الوكاله

لا تزعل يا ايسوزو :D .. فيه فرق بين صيني و تلندي حق الوكاله .

[اسيزو 4x4]

السلام عليكم ورحمة الله وبركاته

الله يسلمك يا أخوي الغالي وليد 1 (( Waleed1 )) مانجي إلا من بعدك انت والأعضاء الكرام يالغالي وأن تستاهل اكثر يالغالي

أنا سمعت انها ممتازة وإقتصادية أكثر وأكثر وعزمها ممتاز ماعلية وخاصة أن من موديل 2004 الى 2006 مزود بتيربو وعزمة ممتاز ومعقول

وأنا اشوف الشركات بالجنوب مثل شركة العيوني للطرق مشاريعها تشييد عقبات وطرق بالجبال وكل سياراتهم 2500 دبل تيربو

موديلات 2004 وهاتك من هالكرف والمشي بالطرق الوعرة يخشون وديان بين هالجبال تهول والله فيها قوة تحمل وتماسك ما بعدة

سألت أحد الفلبينيين في الشركة لأنة شاف معي سيزو وقالي : هذا سيارة 100% أحسن من هايلوكس ونيسان

ددسن قلت وشو السبب ؟؟ قال مافي خربان على طول و قوي و مافي تك تك :D ( يعني ما يتهربد )

قلت الحمد لله أن ربي وفقني بالأختيار الطيب

وعندي خبر بيني وبينك أنا قبل كم يوم إتصلت على واحد مصري صديق لي مدير مبيعات أسيزو في أبها ويقول خبر يهمك :

يقول أنة بعد 4 شهور أي في شهر 12 بالظبط بينزل الدفعة الثانية 2006 من الاسيزو والفرق بالقوة أقوى بكثير

والشكل أجمل والألوان أكثر ومن الداخل بيجي بعضة بيج ومميزات أكثر ...

ولك التحية والتقدير يالنشمي ولا يردك أحد أسأل وأنا تحت أمرك يا بعدي ;)

___

أخوي الغالي والنشمي الراعي الرسمي الله لا يجيب الزعل يا بعدي أنت عندي أحسن وأطلق من مية ألف أسيزو :D :good:

عطني وكالة قطع غيارها مناسب ورخيص ما بتلاقي :( :)

والنيسان والمتسوبيشي فية البركة ما يقصر ;) :D

أغلى قطع غيار ياباني بالترتيب هم :

1 -المتسوبيشي

2 -السوبارو

3 - الهوندا

4 - النيسان

5 - التيوتا - الأسيزو>>>> مثل بعض تقريبا

6 - السوزوكي - الديهاتسو >>>> تقريبا مثل بعض ...

هذي مقارنة أنا أجريتها بنفسي واللي يبي يتأكد يسأل بنفسة الوكالات

ولك أعذب تحية يالغالي الراعي الرسمي والله لا يجيب الزعل أنت تامر أمر :) :D

[عاشق الجبل]

أضحك الله سنك أخوي حاتم :)


ياراعي الأسيزو عزالله صدقت أنا جربت الموديل الجديد نشيط ماشاء الله ( غمارتين وشلون الغماره )

يقول راعيه أنه يجيب الــ 170 كيلو متر بالساعة .


لكن يبي لك سدادات للأذان من اللجه :(

[اسيزو 4x4]

هلا بالغالي عاشق الجبل

أكيد 170 بيكون لجه حتى الهايلوكس البانزين وهو بانزين على 150 لجة أنا جربتة 2002 بخاخ

لكن الديمكس السيزو الى 150 مابة صوت إلا خفيف

وشو الونيت الياباني سواء كان بنزين أو ديزل إذا مشى 170 ما يزعجك صوتة ؟؟؟؟ مابة أبد كلهن سوا ...

:D ;) :)

.

[عاشق الجبل]

طيب يبوحمود ليش ماتركب توانك لموترك

أشوف جركل الماء على باب الحوض بتوقيعك مدري حق الكشته وإلا موية زمزم :):):)

كانه موية زمزم جعل فيه العافيه .... وكانه للكشته طلع الدراهم يبوحمود وفصل لك تانكي ستيل تراكم يا أهل الديازل

صاكين على الدراهم شوي :)

[اسيزو 4x4]

أضحك الله سنك يا عاشق الجبل

الدراهم لو ما صكينا عليها طارت :D بدون رجعه :D

والله هذا يا بعدي الجركل الابيض مويه صحة مخصص للشاي والقهوة (( ولد نعمة )) :D

وبالنسبة للتوانك بلشة تاخذ مساحة الصندوق على طول الوقت بالفاضي ولكن لقيت حل أفضل من التوانك وهو :

عندي جركلين أسطوانية للي يجي لونها أسود كبيرة جدا تاخد الأثنين 200 لتر تقريبا وقريبة حجمها مثل الزرقا الكبار

وقوية ومتينة وتجي بالمقاس في صدر الصندوق جنب بعض وأربطها بحبل ولا تتحرك أبد :good2:

وبلا صدا وبلا بهذلة ومتى ما خلصت كشتتي نزلتها بالمستودع وقعد الصندوق فاضي والسيارة أخف ...

وش رايك بالفكرة عطني رايك ؟؟ :).

[داب الرمث]

ما شاء الله عليك ياخوي ابو حمود ...... والله ماقصرت بكلامك واجتهدت فعلا.... لو درى عنك اليمني حب راسك وجلسك محله وصرفلك راتب مدير مبيعات متجول مع عمولة دبل الدبل على هلكلام الحلو والوصف الي كنه شعرعاشق :D ....................

[اسيزو 4x4]

السلام عليكم ورحمة الله وبركاته

هلا بالغالي والنشمي ( داب الرمث )

علومك طيبة يالغالي بشرنا عنك ....

أولا مانجي إلا من بعدك يا سنايدي وهذا شي قليل جدا اقدمة لأعضاء مكشات - ولو يبون عيوني عطيتهم والله :)

ويا ليت يدرون عني أسيزو باليابان كن سحبوا الوكالة من اليمني وعطون أنا :D تراي أمزح >> ولكن انا في الحقيقة لا ابحث عن مال أو مصلحة فلا والله أنا أريد الأجر والدعاء فقط وخدمتكم ... :)

ولكم كل محبة وتقدير يالنشاما .... تحياتي لك يالمبدع ( داب الرمث ) ;) :D :good:

[عاشق الجبل]

عزالله صكيت علي يبوحمود :)


ومثل ماقال الأخ : داب الرمث :)

[عبدالهادي]

عز الله انة كفى ووفى


لاهنتم

[Waleed1]

السلام عليكم

أتقدم بالشكر الحار لااخونا راعى الايسوزو وباقى الشباب عبدالهادى وراعى الجبل على تفاعلهم الطيب والجميل. أشكركم جميعاً ماقصرتوا وجزاكم اللة خيرا وبارك اللة فيكم. معلومات قيمة ووافية وشكراً للجميع.

معلومة قيمة ومهمة ياراعى الايسوزو أستنى شوية وأشوف الدفعة الثانية جزاك اللة خير.

واللة أنى مستحى منكم لاكن نكرر الشكر

أخوكم وليد

[salehhd]

صراحة استفت كثير من هذا الموضوع

وعساك على القوة يا راعي السيزو