نصيحه يا اخواان حتى لا تتسبب بكارثه

[أبوعذااب707]

السلام عليكم..

امس وانا مسافر بالليل كان الطريق ما دريت الا وكفر مبنشر بوسط الشارع
ما قدرت اتفاداه لان الطريق رايح جاي ((يا ادعسه يا اخش بالسياره وجه بوجه))

دعسته واعدم علي السياره لحيه وكشاف والنسافات والسمكه ((بين البابين))

اتمنى من الي يسير له بنشر يشيل الكفر لا يخليه بالخط :mad:

[ملقاط بن جمر]

علم أصحاب التريلات على الخطوط السريعة ..

والله يا واحد من العيال سيارتة راحت تشليح بسبب بقايا إطار مسلوخ ..

ويوم جاء المرور قاله لسش ما تشوف الطريق زين وليش ما تنتبه وليش وليش ..

حمد لله على سلامتك على كل حال ..

والله لا يوفق أي واحد كان سبب في ضرر المسلمين ..

[رفيع المقآم]

والله يالغالي اكثر شي اصحاب التريلات اللي مايخاف الله بيخليه
تخيل مره شلنا كفر تريله من نص الشارع
وبغيت اندعس عشانه
بس عمل الخير مافيه الا الاجر
الف شكر لك

[بتاع بر]

الحمد لله عالسلامه

[.أبوعبدالرحمن]

والله العظيم بعض الاحيان ألقاها وسط الدايري الجنوبي ولا فيه أي مبالاة من راعي التريلة


حسبي الله ونعم الوكيل ، والحمدالله على سلامتك يالغالي

[abo_hoor]

وعليكم السلام ورحمة الله وبركاتة
الحمد لله على سلامتك اخوي ابو عذاب
الواحد باللحظه هذي يرتبك وممكن يسوي حادث
بسبب هالتواير اللي مبنجره بشارع لو صاحب هالسياره او الشاحنه
يشيل ويحطهبراء شارع كان احسن ممكن هذا الشي يسبب حوادث للسيارات
الثانيه والله يابو عذاب فيه صفايح خشب تطيح من شاحنات ولاجنه يشوفها
ماله خلق يشيلها من شارع والله لو اي شخص يشوفون سياره يطيح منها شي يوقفه ويقولك ترا اتصل بالشرطه
يتفاهمون وياك
والله يحفظ الجميع يارب

[عناز الحره]

الحمدالله على السلامه

[أبو أمير]

صارت مع اخوي كان يمشي بالدايري الشرقي وفجأه السياره اللي قدامه وطت على قطعة كفر
وطارت على سيارة اخوي وجات على القزازه الأماميه وتشعرت كلها مابقى منها شي بس متماسكه ماتكسرت

لو ماهي أصليه كان تكسرت وطارت على وجيههم ربك ستر

[عبدالله الجري]

الشكوى لله

والحمد لله على سلامتك

[ابوصالح3]

نصيحه بمحلها والحمدلله على السلامه

[بدوي جنوبي]

لا تلومو اصحاب التريلات
لان الكفر ينسلخ ولا يدرى عنه الا اذا وقف
او احد نبهه عنه

شكرا لك على النصيحه

[ابو العز بلس]

وعليكم السلام ورحمة الله وبركاته


الحمدلله على سلامتك

[جون الشمالي]

الحمدلله ع السلامه

[You Like Me]

وعليكم السلام ورحمه الله

الحمد لله على سلامتك اخوي
والله يالغالي بقايا قطع الكفرات بالطريق مشكله مالها حل
قبل كم سنه كنت مسافر وقدامي سياره وطت على قطعه كفر تريله
وطار ما وقع الا بقزازتي الاماميه والحمد لله ماكان معاي احد والقزازه اصليه
طلعت كلها بمرتبه الراكب وباقيها بحضني وربك ستر
وامن الطرق لما جاء وانا انظف نفسي من الزجاج اللي عبئ راسي وجسمي
يقول انت مسرع لو انك ما اسرعت كان قدرت تتفاداها
تبي مويه ههههههههههه
قلت لا يخوي مابي مويه ولا ابي منك شي

[JMr_âLwDââ3]

وعليكم السلام
حمدلله على السلامه اخوي ابو عذاب وخطاك السوو
وزين انك ماجازفت وتجاوزت وتسببت على نفسك وعلى غيرك بحادث قوي والحمدلله انها وصلت هالشغلات البسيطه
والحديد يتعوض اهم شي السلامه

[سليل قروم]

حمد لله على سلامتك

هي بس كفرات؟

هذا موضوع لواحد صار له نفس الشي بس مع صخره في الخط ماهوب كفر بس


في يوم الجمعة الموافق 2009-12-26 م وفي ظل الأجواء الرائعة وعلى العهد الجديد مع الموتر الجديد وفي طريق العودة إلى ربوع الجبيل المٌخضر تسلطن المزاج مع أنغام أبو نورة وفجأة ...........!


جسم غريب يتمدد ببجاحة على برودة الأسفلت ولكن للأسف لم تكتمل النظرة إلا وأنا في الجو طاير ... ياعيني طاير


وكأن الفكرة التي كنت أتحدث عنها مع الشله قبل نهاية الرحلة قد تحققت وهي فكرة الإنضمام إلى فريق الطيران الشراعي الذي كنا نشاهدة عصراً وقلت: يااااااااااااااااااه سيارات الجيل الجديد حققت حلم يراود النفس و ماهي إلا لحظات حتى حطت الرحلة على أرض الحقيقة وصاح الحلم " يابو الشباب تراك ناقز حيد كبر راسك " مع حساب الفرق من رأس إلى رأس


المهم: ياحلم بدّل ...... غيّر ....... مو معقول حيد هالكبر في طرقنا الحبيبة؟
رد الحلم وقال: إلفقة يعني ( إنطم ) ,,, بالإنقليزي ( شَرَب ) ,, وبلهجتي " إقطع واخس" وطالع يمينك وشمالك وشف كم من سيارة قبلك عاشت هالتجربة؟


إلا والله هالحلم صادق ثلاث سيارات حطت رحالها قبلي ولكن بدون إقلاع!!!


قلت: الموت مع الجماعة رحمة وإيماني الحمد لله قوي ورددت " إنا لله وإنا إليه راجعون "
الطريق مقطوع عن العالم بمعنى الكلمة ومن يعرف طريق " أبو حدريّة " بالإتجاه إلى الجبيل - الخفجي يوافقني الرأي بالرغم من أنه طريق دولي يربط الكويت بالمنطقة الشرقية مروراً بالنعيرية ومعامل ارامكوا إلى أن تصل الخفجي.,


قلت في نفسي مالك إلا أمن الطريق الحلوين يدبرون لك سطحة في غمضة عين وياجعل العدو يفدى عيونهم الغافية أقصد الساهرة


بس تصدقون إني ماكنت حافظ رقمهم؟؟؟؟؟؟؟؟؟


قلت جاء وقت فزعة المرور تدق عليهم بس عشان يعطونك رقم أمن الطرق وطبعاً حافظة ومن صغري وأنا نفسي أدق عليهم مدري لية كذا من الله
993 طوط طوط طوط طوط ....................................... يفتح الله


المرور عانهم الله ماعندهم الوقت يردون مشغولين حيييييييييييييييييييييل وماعندهم برنامج 911 زي غيرهم فلهم العذر
طيب ياولد مالك هيفاء http://www.estabraq.com/vb/images/smilies/16593617tz0.gif ..........905
رد المحترم وقلت العذر وأدري محد قد طلبك هالرقم بس مشها هالمرة عشاني "عطني رقم أمن الطرق لو سمحت"


والحمد لله أنتهيت من المهمة الأولى بنجاح وهي الحصول على رقم أمن الطرق "996" أذكروه زين ومني ببلااااااااش
تم الاتصال والرد بعد سبع محالات وشرحت له الوضع بأن الخط فيه حيد كبر راس العدو وياليت ترسلون أحد يزيلها عن الخط والطلب الثاني طال عمرك ياليت تدبرون لي سطحة ولا تعطوني رقم احد أدق عليه لأن البرد دق عظامي والتريلات اللي تمر تجيب معها هوا سحب عيوني وخشمي إلى حدود مقفى راسي وأخاف تجون وتحسبوني صيني متنكر ! http://www.estabraq.com/vb/images/smilies/34.gif


رد وقال: حدد موقعك ؟ ............. ومن هنا بدأت المعاناة في الشرح وأنا متأكد إن الشيخ مشغول بفخذ حاشي في يده اليمين وسفن أب دايت في يدة اليسار "دايت" عشان الصحة وقولت أخص يالمتطور المحافظ على صحته http://www.estabraq.com/vb/images/smilies/58.gif


شرحت وشرحت وطال الشرح مع إن الموقع واضح جداً وآخرتها قلت مالك إلا أعطيك الإحداثيات
رد وقال: حدد موقعك بالضبط
قلت: أقول بعطيك الإحداثيات ......... " وكأني تكلمت في السياسية " لأنه قال مانتعامل بهالأشياء بنرسل لك دورية بس ياليت تحدد لنا موقع الحصاة بالضبط
قلت أبشرك طال عمرك الحصاة ماجاها شي وسليمة معافه وإن شاء الله أنا اللي بوخرها من الخط وأبترك لها ماء وطعام الين تجونها بالسلامة " في أمان الله " وياليت ماتعلم أحد إني إتصلت http://www.estabraq.com/vb/images/smilies/1178088055505.gif


إتصال بعدها لراعي الفزاعات " أبو تميم " ودقايق وهو محضر عندي مع 2 كيلو حظ لأن السطحة وقفت مع وقفتة عندي وتم نقل الطائرة الأرضية بسلام لأرض السلام "الجبيل" إلى حين مواساتها عن اللقاء الحار بالصخرة. http://www.estabraq.com/vb/images/smilies/AddEmoticons00527.gif


السؤال ....... أو الأسئلة:


ثلاث سيارات قبل وصولي تضررت
صاحب السيارة الأولى ليه ماسوى خير وأبعدها من الخط؟
صاحب السيارة الثانية ليه ماسوى خير وأبعدها من الخط؟
صاحب السيارة الثالثة ليه ماسوى خير وأبعدها من الخط؟ أم هي تحت بند " خل غيري يذوق ماذقته وسلامي على فعل الخير وإماطة الأذى" http://www.estabraq.com/vb/images/smilies/angry.png


كيف وصل هالحيد لأرض الجريمة حتى المطر في ذاك الوقت لم يعلن مسؤوليته حيال سقوطها من السماء على الأرجح؟ http://www.estabraq.com/vb/images/smilies/canny.png


إذا كانت الصخرة موضوعه بالقصد ألم يعلم واضعها بأن العواقب ربما تكون أشد؟


أمن طرقنا الحبيب في طرقنا الحبيبة الخالية من أي معالم للحياة ... أين خدمة الطرق أو مايسمى بأمنها وكيف بمن معه عائلة في هذه الطرق وفي هذا الموقف؟


أخيراً إلى ساعة الخبر وصلني تأكيد بأن إرسالية أمن الطرق لم تصل إلى الآن !!!!!!!! http://www.estabraq.com/vb/images/smilies/LiNkIn_PoY_20050328192033.gif


أهديت الحيد في ساعتها 3 أبيات على عجل وودعته بها وقلت:







ياحيد أدري وحدة الليل مليـت




صار إجتماعي فيك يازيـن غايـة




جيتك ولكن! للفرح ويش خليت؟




حضنك خذاني بالقسـى للنهايـة




برحل وباقي للأمل قـول ياليـت




من هو دعيته فيك رجوى هدايـة





ومضة: مازال وكلاء السيارات في المملكة يمارسون الضغط ويردون الصاع بصاعين لمن إبتعد عنهم بالشراء من الخارج بأتفه مالم نتخيله وهو بأن تعجز أن تجد بعض القطع لديهم والعذر إختلاق المواصفات بالرغم بأن سيارتك مختوم عليها بختم يقول " مطابقة للمواصفات الخليجية السعودية " وركز على السعودية


http://www.estabraq.com/vb/images/smilies/boss.png
http://file15.9q9q.net/img/98114591/4.JPG (http://file15.9q9q.net/preview/98114591/4.JPG.html)


ولكن لم أكن أعلم بأن لهم السلطة القوية لجعل سيارتنا بلدنا الحبيبة على حسب مزاجهم الفاضل
هاأنا اعجز عن قطعة بحجم الذرة لاتوجد في جميع وكالات السعودية وتوجد في جميع دول الخليج...........!


الحصيلة: كسر رجلين ودموع زيوت وبعض الجروح السطحيّة والزيارة ممنوعة "مش أنا الطايرة" http://www.estabraq.com/vb/images/smilies/unhappy2.gif


الرجل اليسرى


V
V


http://file15.9q9q.net/img/45889668/1.JPG (http://file15.9q9q.net/preview/45889668/1.JPG.html)


راعي الفزاعات (أبو تميم) يحمل بقايا الرجل اليسرى مبتوره
http://file15.9q9q.net/img/26326311/3.JPG (http://file15.9q9q.net/preview/26326311/3.JPG.html)


نظرة وداع


http://file15.9q9q.net/img/92126661/2.JPG (http://file15.9q9q.net/preview/92126661/2.JPG.html)



هذا وتقبلوا خالص إمنياتي بقضاء رحلات ممتعة خالية من اللقاءات غير الحميميّة بالصخور....

[ورد طائفي]

مرة أنا والأهل راجعين من المدينة بإتجاه القصيم ، كنا في الليل ، وفجأة وبدون أي مقدمات تفاجأت بوجود كفر مصلوخ قدامي ، فما قدرت اوخر عنه ، ولو وخرت كان انقلبت ، فتمسكت بالطاره بقوة وثبتها بفضل الله ، ويوم صدمتها انصدموا اهلي وجاهم شد عضلي الظاهر بالظهر ، وأنا قعدت ادعي لي شوي .



وبعد ذاك المقلب !


بفضل الله كلما سافرت مع شباب قبل لا نطلع من ديرتنا ونمسك الخط أقول لهم وش رايكم ناخذ عهد على أنفسنا بأننا ما نلقى شي يؤذي المسلمين في الخط إلا ناقف ونشيله ، ويتحمسون والله الشباب ولا يقصرون .

فكرة جميلة ادعوكم لتطبيقها.

[فايز العامر]

كلام سليم

ولكن المشكلة في بعض الناس أنه ينسى كل اللي حوله ويعيش جو المشكلة اللي قدام عيونه بس.

حدثني أحد الاخوة غفر الله ، قال : حصل حادث على أحد الطرق السريعة وكان الحادث عبارة عن قطع في رقبة أحد المسافرين بسبب قطعة من جنط تريلة ضربته سيارة وطار على السائق وضربه في حلقة وقطعه، حتى أن والد المتوفى طلب بالتحقيق في الحادث لأنه لما شاف ابنه توقع أنه منحور! وهذا بسبب الشاحنات التي لاتطبق عليها الأنظمة للأسف.

[volcano]

كلام سليم

ولكن المشكلة في بعض الناس أنه ينسى كل اللي حوله ويعيش جو المشكلة اللي قدام عيونه بس.
.


صحيح وصارت معي كثير والله ان الواحد ينسى ثم حتى لو الكفر المنسلخ قدامي ما شوفه من دوشة الموقف اركب الاسبير وامشي . :)

[سعود محمد]

الحمد لله على السلامه .
وجزاك الله خير على تنويهك

[فنجال شاهي]

البرد دق عظامي والتريلات اللي تمر تجيب معها هوا سحب عيوني وخشمي إلى حدود مقفى راسي وأخاف تجون وتحسبوني صيني متنكر !



هههههههههههههههههههه ضحكت لحد البكاء :D

والحمدالله على السلامة

[عاشق الموطن]

اشكر صاحب الموضوع على التنبيه والتنويه
قبل 3 سنوات اخوي برمضان راجع من العمره هو واهله وقدامه راعي تريلا طار منه كفر الاسبير الظاهر
ويتدحرج على سيارت اخوي يقولي وحاولت اهرب منه لاكن مافي فايده وينزل تحت السياره معه مرسيدس بنز صغيره وانقلب كم قلبه وزحفت فيه السياره على الاسفلت ...
والحمدلله الله سلمهم من الاصابات وماجاهم غير خدوش وحروق بسيطه
فالحذر الحذر من السيارات الي امامك ...
اكرر شكري لصاحب الموضوع

[ويلومني]

الحمد لله على السلامة

مره وأنا مسافر والقى كفر تريله منسلخ وأشيله عن الطريق والتريله تبعد تقريبا عن الكفر كيلو وأتكلم معه ليش ماشلت الكفر ويطير أعيونه علي وأمشي

ماأنا ملزوم يجلدن عند أعيالي

وهذا واحد من عيال الحاره كان راكب بسيارة رفيقه بالخلف الا وقدامهم راعي جيب ويطى حصاه ويطير على السيارة ويكسر الزجاج الأمامي وتدخل الحصاة وتضرب رفيقي من عند وجهه ويتوفى على طول (الله يغفرله ويرحمه ويوسع منازله ويجمعنا به بجنات الفردوس ووالدينا والمسلمين أجمعين )

[خيال العشواء]

وين رسوم المواصلات راحت

عشان الإهتمام بالطرق

عموماً .. الحمد لله على السلامه