لأصحاب الخبره والذين لديهم باترول ربع فزعتكم تكفون

[patereot]

السلام عليكم ورحمة الله وبركاته
السلام عليكم ورحمة الله وبركاته
يا جماعه الربع عندي مشكله بصراحه بهذلتني وضيقت صدري :(
الله يسلمكم انا عندي جيب باترول ربع سفاري فل كامل
والمشكله الله يسلمكم هي:
اني اسمع صوت طق طق طق طق :mad: اذا جيت اهدي يعني امشي 20كم/س صوت طقطقه مدري وشي وما ادري وش قصتها واذا رحت للوكاله راحت الطقطقه وصار ولا ازين منه وابي اعرف الي عنده خبره لا يبخل علي تكفوون.
مع العلم ان الموتر ما قطع الا 25000كيلو
وتقبلوا خالص تحياتي
الموتر موديل 2004

[عاشق الجبل]

وعليكم السلام

لازم وأنا أخوك ترفع السيارة برافعه عند ورشه وتشغله لأن الإحتمالات واجد .

[اسيزو 4x4]

طيب مادامة 2004 وماشي 25000 فقط ما شاء الله إذا لا تفوت الضمان راجع الوكالة ....

.

[أبـ [مطلق] ـو]

كلام اخوي اسيزو صحيح

دامها جديده مشاء الله

راجع الوكاله على الضمان


.

[patereot]

اولاً احب اشكركم على ردودكم والله انكم ما قصرتو
بس يا شباب انا اذا رحت للوكاله طالع زي الحلاوه ما فيه ولا شي طبيعي
واذا رحت للبيت طلعت المشكله بس هذي المشكله تجي بعض الاحيان مو دايم
بس ما تجي الا اذا كنت امشي 20 او اقل يعني اذا صرت مهدي تسمع صوت طق طق طق
احس انها من القير او عمود الكردان بس ما ادري هي تضر او ما تضر بس انا اذكر اني يوم شريته ما فيه هالصوت ويوم سألت الوكاله قالو لي اذا هالصوت يطلع عادي ما فيه اي مشكله وتهاوشت معهم ودخلت لهم 3 مرات بس ما صار شي هي هي المشكله اطلع من عندهم واسمعها وانا بيني وبينكم ما ابي احط السياره في الوكاله كل يوم
وكل ما رحت لهم قالو لي انت موسوس السياره ما فيها شي زي الحلاوه شيكنا على كل شي وما فيه شي خربان عند لدرجه اني تهاوشت معهم وغير لي الفحمات قلت يمكن منها وغيرو لي المراوح وغير كل شي ما بقاء شي الا وغيروه بس هي هي نفس المشكله
تكفون يالاجاويد عطوني الدبره
الله يعطيكم العافيه وما قصرتوو

[Waleed1]

السلام عليكم

قد ماتكون دقيق قد مايكون هناك أحتمالية لمعرفة المشكلة من قبل الاعضاء جرب شغل الدبل هل فية فرق فى الصوت وبعدين تقول أن الوكالة قالوا لك اذا هالصوت يطلع عادي ما فيه اي مشكله وهم واللة كذبوا لان السيارة تحت الضمان والشغلة زحلقة الين ينتهى الضمان على أفتراض أنها مشكلة كبيرة لذلك أنصحك أن تروح لورشة ممتازة ومعتمدة لكى يجدون لك المشكلة وبعدين حطها فى عين الوكيل واللة يعينك.

[الكابتن]

اخوى قبل فتره صار عندى يمكن نفس المشكله لكن الى دوخنى انها تروح لاوديته للورشه

واخيرا طلعة المشكله فى الصليب حق عامود الدبل مصدى

وسلامتك

[patereot]

والله انكم ما قصرتو ومشكورين على ردودكم
ياليت الاخ وليد تعطيني ورشه كويسه في الرياض شغلها نضيف عشان افحصه عندهم اذا ما عليك كلافه
والاخ الكابتن ياليت تقولي وش صار في الموتر ووش غيرت فيه؟؟؟
وكم التكلفه الله لا يهينك
وبصرحه مشكورين كلكم على الردود وعلى التفاعل الجميل والله انكم ما قصرتو الله يعطيكم الف الف عافيه

[الكابتن]

والاخ الكابتن ياليت تقولي وش صار في الموتر ووش غيرت فيه؟؟؟
وكم التكلفه الله لا يهينك




والله بالنسبه للموتر بعته

ومثل ماقلتلك المشكله طلعت من الصليب يعنى مايبغالها غيرت الصليب وراح الصوت
بالنسبه للتكلفه فى حدود 200ريال

[المهنـدس]

السلام عليكم ورحمة الله وبركاته

وانا اخوك المشكله هذي صارت معي بالجيب حقي(رانجلر) واتضح انها من الصليب الأمامي بالعمود
كلف الصليب 50 ريال وتنزيل العمود 150 اذا ما خانتني الذاكره
والمشكله طلعت بعد ما دخلت في مستنقع مويه بالمصيف ايام المطر ووصلت المويه فوق الكبوت :eek:
على العموم افحص وبيبين معك اكيد
اذا لقيت الصليب مصدي من جوى والرمان متفتت معناته المشكله انحلت..

بالتوفيق...

تحيات اخوك المهندس

[البوصله]

اخوي باتريوت ....

انا عندي سفاري 96 فيه نفس المشكله يطلع الصوت اذا رفعت رجلي عن الكلتش في سرعه 20 بس وماخليت ولا ورشه حتى الوكاله ...
الي يقول بيرنقات القير... :eek:


والي يقول الدفرنس .... :eek: :eek: :eek:



واخر شي واحدمن الربع ارسلني على ورشه متخصصه في الجيوب قالي المهندس من الكلتش وضعت بينهم مدري من اصدق... :confused:


الله يعينك ياخوي باتريوت واذا لقيت الحل ارجوا ابلاغنا... :(


اخوك البوصله

[حرباش]

الوكاله مامنهم فود غير عور الراس

آخرتها امس تلاعنت انا وياهم والسبه في ربله تطلع صوت مع الهوا يقولي مب على الضمان
والصوت فيها من طلعت السياره .(فرع الجبيل)


لكن ياخوي انشبلهم وماعليك منهم وحاول تروح فروع رئيسيه ، المتطرفه ذي مافيها خير



وان كانك في الدمام او حولها عليك بوكاله الجبر فرع الدمام الرئيسي حول الشارع الأول
يوجد بها رجل طيب م/هيثم سوداني الجنسيه ، اشرحله الوضع وبيتساعد معك .


تحياتي لك ;)

[ألشاكي]

ياخو والله ثم والله انهااااا طبيعي هذي صارت في سياره اخوي جيب باترول 99 حتي اذا كان شغال تسمعاااااا قدام القير طبيعي جدا

[أبو يوسف]

اانا عندي هالصوت حتى وانا واقف ولا أدري وش اسوي

الله يعيننا على عثا السيارات وما يسلم من غثاهن احد


مع التحية

[الشوق]

والله ياإخوان الي فهمته من كلام البعض إنه حتى وهو واقف يسمع هذا الصوت عند القير


وهذا صوت فحمة الكلتش وإذا بتتأكد إنه منها

إضغط على الكلتش إذ خف الصوت أو إختفى فأكيد إنه من فحمة الكلتش

وهذا مايضر الموتر أبد أبد

والمشكله إن الفحمه قيمتها 40 ريال لكن تركيبها بحدود 400 لأنه لازم ينزل القير

[دله وفنجال]

السلام عليكم...
اخوي الغالي باتريوت ماودي ازيد على كلام الاخوان والحقيقة ماقصرو لاكن هل شيكت على كراسي البدي لاني مثلك اذا ظربت فرامل تطلع عندي طقطقة ويوم غيرتة راحت ومتري باترول 97 ربع وايضن يمكن عندك فحمة الكلتش وهي صوت طقطقة هذا اذا كنت واقف او ماشي وكذالك فيه صوت لاهوب صوت ونة ولاهوب صوت طقطقة هذي من عامود القير زي الي حصل معي بموتري الاول vx-r 2001
وهو الي خلان اكرة الموتر وبيعه ...
على العموم لاتطب بلغويط الين تشوف كراسي البدي لاربما منهن ويمكنهن مع الوقفة بلميناء وبلوكالات انشفن اشوي....
انت شيك ولاراح يضرك...

[patereot]

والله ما ادري كيف اشكركم والله انكم فعلاً ما قصرتو على هذي الردود
بس انشاء الله اليوم بروح اشيك عليه في الصناعية القديمه وبشوف وش فيه واذا عرفت المشكله بوديه للوكاله بس الله يعين
ومره ثانيه الف الف الف شكر على الي تكرمو علي بردودهم والي زارو الموضوع والله يعطيكم العافيه
تحياتي لكم..

[**الجدي**]

والله ياإخوان الي فهمته من كلام البعض إنه حتى وهو واقف يسمع هذا الصوت عند القير


وهذا صوت فحمة الكلتش وإذا بتتأكد إنه منها

إضغط على الكلتش إذ خف الصوت أو إختفى فأكيد إنه من فحمة الكلتش

وهذا مايضر الموتر أبد أبد

والمشكله إن الفحمه قيمتها 40 ريال لكن تركيبها بحدود 400 لأنه لازم ينزل القير

هذاااااااااااااااااااا الكلامـ .... لاني طلعت شيروكي كلاسيك من الوكاله على الزيرو وبعد ما مشيت عليه تقريبا 15000 كيلو طلع هالصوت وطبيعي وما يضر الموتر

[F34666]

الحمدلله والصلاة والسلام على رسول الله وعلى آله وصحبه أجمعين


اخي باتريوت المشكله عندك اعتقد موجودة في الجلنط لان نظام الباترول يكون في عمود كردان للجلنط
لذا اذا طلع الصوت حاول تمسك جلنط خفيف يمكن يزود عندك الصوت بعدها تعرف من وين العلة

[حـاتـم]

اخوي باترويت انا اذا رفعت رجلي وانا امشي 20 او 40 الموتر يدق شي طبيعي لان القير ثقيل بالاول ولما ماتدعس له يوقوم ينتع او يهبط

اما غير كذا مادري اذا كنت مافهمت المشكله

وشكرا

اخوكم /حاتم

اها تذكرت كانت عندي هالمشكله والحين فعلا راحت من زمان عنها

بس انشاء الله ماعليك الا العافيه هاذا عندي تطلع اذا فضيت القير وانا مهي

طبيعي انشاء الله

بس تراني مازينتها وللحين والحمدلله ماعنيت منا

[الصياد المحترف]

بسم الله الرحمن الرحيم والسلام عليكم ورحمة الله وبركاته
اخواني اذا كان الصوت موجود والسيارة واقفة ممكن من الشكمان ومسامير الربلات الي ماسكاتة اما اذا كان يمشي وخاصة اذا مشيت على موية في الشارع فهذا من ربلات البدي الي بين البدي والشاص او من الصليب او من فحمات السيارة منطلقة او من الفرارات اذا كنت مركب فرارات. او ربلات كراسي المكينة.