راح عليك الضمان والا ما راح [الأرشيف]

مشاهدة النسخة كاملة : راح عليك الضمان والا ما راح

البرتقالي

28/11/2010, 12:51 AM

السلام عليكم

ضمان ابو جميل وما جر غصنه حمراني توكيلات الخ
اذا جيت بعد اي مشكلة قال راح عليك الضمان لانك ماتواصلت معنا
ولا غيرت الزيت عندنا وشلخناك بمبلغ وقدره و و و وو

اليوم وضح لي احد الاخوان امر غايب عني
يقول الضمان دولي ومهوب من حق ابو جميل وغيره
يرفضه لو ما تمر عليه الا بعد 90000 كم
واذا رفض ارسل رسالة للوكيل الاقليمي ويوريه شغله ;)

اللي عنده فكره عن هالموضوع
تأكيد او نفي ينورنا ؟

هبــ حريملاااء ـبوب

28/11/2010, 02:12 AM

وعليكم السلااام ورحمة الله وبركاته

:: بالنسبه لنيسان يعطيك الضمان 5 سنوات او 150000 كم

ايهما أسبق ولا يشرط عليك الصيانه الدوريه ..

اخذت هالكلام من الوكاله على أكثر من موتر ..

وتم الاتصال بي أكثر من مره من دبي

بخصوص تعامل الموزع وبيان صلاحية الضمان أعلاه ..

:: بالنسبه للمتحده .. وكالة جيب .. جربتها قولا وفعلا

سبق وكان عندي رانجلر وتعطلت ووديتها الوكاله وبعد الكشف اتضح

وجوب تغيير نص مكينه العلوي وانتظرت القطع 3 اسابيع وقيمة التكلفه 17300 ريال عدا ونقدا

وتم اصلاحها على الضمان وكان الموتر ماشي 46 الف وماضي عليه سنتين ..

واخذت الموتر بضمان جديد على القطع والاصلاحات الجديده

واخذوا علي 279 ريال فقط لا غير ..

هذي تجربتي .. الله يوفقنا واياك ومن يقرااا

بدوي جنوبي

30/11/2010, 08:45 PM

يثبت الموضوع لأهميته

Ra3i.mekshat

30/11/2010, 09:56 PM

معلومة غايبة عني ..!

لكن الحمد لله اني ما دخلت موتري الوكالة الا بعد ما مشى ٢٥٠ الف والحمد لله
عافاك الله

تقبل مروري
أخوك : فتى الخوالد

أرمادا

30/11/2010, 10:11 PM

معقووله ياخوان اذا ما تابعت الصيانه السياره بتكون تحت الضمان .. !!

انا متابع الصيانه من الصفر الى الآن ..

لكن انا من وجهة نظري انه متابعة الصيانه يضمن لك بعد الله سبحانه ان السياره ما تخرب

abo_hoor

30/11/2010, 10:22 PM

اخوي العزيزا لبرتقالي
لا ضمان مو انك تاخذ سياره وتمشي عليها ولاتسوي سيرفس بالوكاله
اهم شي انك تمر عندهم كل فترة هم يقلون عليها واذا سويت هالشي
صدقني راح يسون لك كل شي تشوف فيه خراب
انا اكلمك عن نفسي وتجربه عندي جيب من وكالة نيسان مهم شريته سيرفس مااسوي بس اغير زيت
مكينه وقير وخرب عندي القير ووكانت تصليحه بالوكالة 800 دينار كويتي تغير كامل
قلت لهم انا منتظم معاكم بتغير الزيت كل 40 الف قالو لي انت ماتسوي سيرفس
ودفعت والله
والحين عندي سياره صالون يوم كانت تحت ظمان كنت اسوي سيرفس لها والحمد لله كل شي اشوفه خرب
فيها اقوله لهم ويصلحونه الى ماانتهى الضمان
ضمان مو بس اسم لازم تغير عندهم وتدخلها سيرفس
ولك الف شكر اخوي وتقبل تحياتي اك

مواسي الطعوس

01/12/2010, 03:48 PM

اللي يؤكدون عليه تسجيل السياره ...اذا مشت 1000 تمر عليهم واذا احتجت شي قبل ينتهي الضمان يصلحونه ....بس ياخذون رسوم الدخول .

يريور عيمان

02/12/2010, 12:33 AM

الضمان رايح
هههه
انا ما شيكت السفاري الا مرتين 1000 كيلو و 5000 كيلو
و بعدها الموتر ما شاف الوكالة ههههه

((ابوملاك))

02/12/2010, 01:52 AM

يا رجال مواترنا ماتعرف وشلون قايله الوكاله

ماتطبه ابد الله يسلم الورشات

مراقب الصيد

02/12/2010, 12:22 PM

السؤال اللي يسدح نفسه:ـــ
ـ هل الفنيين اللذين يعملون بورش الوكالات متدربين في نفس مصانع السيارات؟ الجواب عندي ...
ـ الفنيين عمال لم يتدربون بمصانع السيارات بل أغلبهم ممن هرب من كفلاهم ويعمل في ورش وكالات السيارات ، وقد رأيتي في عيني ميكانيكي كان يعمل في ورشة خاصة في أحد محافظات الرياض أعرفها وهرب من كفيلة ويعمل في أحدى ورش الوكلات بشكل خفي ( تستر ).!!!!

famr55

02/12/2010, 02:50 PM

شيئين بالحياة يقهرن التأمين والضمان

التأمين شحططه ونصب اذا صار لك الحق . وردد ياليل ما اطولك

الضمان اقل شي يقول سوء استخدام . ولا يشمل الضمان وتمشي من غير مطرود من الوكالة :D

ومثل ماتفضل الاخ صاحب الموضوع سمعة من كذا شخص ان الضمان من الشركة المصنعه . الوكيل وسيط بين صاحب السياره والمصنعه ..

اشكرك عزيزي

لحظةوداع

02/12/2010, 02:56 PM

وكيل فورد الملحم لا يقبل الضمان إذا لم توجد صيانة دورية عندهم

قمة افرست

02/12/2010, 04:10 PM

جميع الوكلا لايقبل الضمان
حتى تتابع الصيانة الدورية وطبعا كل صيانة بتدفع مبلغ وقدرة
سبق لي تجربة مع وكيل جي ام بالبيد ولتصلت على امريكا ومن ثم دبي
وبالاخير قبلوا السيارة على ان ادفع قيمة الصيانة الدورية
يعني اذا ماتابعت الصيانة راح عليك الضمان
ومعهم حق لنفرض انك شاري السيارة من اي وكيل وجيت بعد 50 الف كيلو ولاغيرت زيت ولاعملت اي صيانة للزيوت وتجي تطالبهم
ولامغير الزيت عند بنشري وناسي الصرة ولامنقص الزيت تجي تطالبهم
لازم نكون واقعيين
المفروض نطالب بمراعاة اسعار الصيانة مثلا يكون بلاش الفحص وياخذون فقط قيمة القطع
المواعيد تكون معقولة ماهو تحط سيارتك وتجلس يوم عشان يغيرون زيت

اما موضوع الضمان في جميع انحاء العالم اذا ماتراجعهم يروح الضمان عليك
ممكن يتجاوزون وتدفع قيمة الصيانة الدورية السابقة وهنا ممكن يصلحون الخللل وممكن لا
والسبب كل وكيل في حالة مطالبة باصلاح خلل فني تطالبه الشركة بلسته اوتقرير فني عن المتابعه للصيانة

فلانحمل الوكيل كل شي وهذا نظام عالمي
وزي مانطالب بشي يخصنا لازم نحترم مايخص الاخرين

ابو فيصل 2011

02/12/2010, 07:29 PM

كانت معي سوناتا هونداي توها جديدة ماشية سبعة الاف كيلو وطلع فيه عيب مصنعي في القير من شريت السيارة ودخلتها على الوكاله اللي في خريص الوعلان وطلبو علي مبلغ باهض 2800 ريال قلت ليش على الضمان قال المهندس انت ماسويت صيانه الاف كيلو ولا الخمسة واحنا بنسوي لك صيانة من الصدام الى الصدام قلت لا وطال الصوت شوي المهم دخلوها عندهم توني واصل الدوام الا وتجيني رسالة منهم السيارة خالصة واتصل على الفني وقال القير طبيعي وسليم قلت سليم وهو يحن ويفضي ويناتع المهم جيب واستلمت السيارة وادخلها يمكن 4 مرات ولا فيه فايدة كل مرة يقولون عطنا مبلغ وقدرة اخر شي بعت السيارة بخسارة الله لايوفق شركة الوعلان ولايربحهم على الغش اللي يسونه في الناس

ابن البكيرية

02/12/2010, 09:12 PM

حسبنا الله على جشع أصحاب الوكالات

ابو سليمان 11

03/12/2010, 12:17 AM

انا جربت على سيارت كثير
اول تشيكه 1000 عنده وثاني تشيكه عندهم بعدين مايشوفني بس الواحد لزم يكون ذكي
يعني مايشتري سياره توه نازله او دفعه اول عشان يتلفون الاخطاء
والشىء الثاني اخوي معه فورد طلعه وكان يشيك عليه في الوكالة اول باول
وطلع عنده صوت بالقير و وكان بطنجره وصلحوه على حسابهم
وقبل فتره شيك على تشيكت 40 الف وقالو له عندك مساعد بنفقع وقال مرن بكره ونغيره لك وبكرة مرهم وغيروه له ببلش

والشىء الثالث زي ماقال اخوان
قمت افرست
خلنا نكون مع الحق ياشباب
انك تغير الزيت برى عند زيدي يمكن يكسر لك الصره ويمكن ينقص زيت ويمكن تركب سيفون تجاري الخ
او انك تروح عند ورشة ويقعد يتعلم في سيارتك
الوكاله معه حق 100%
والضمان الدولي اكيد ان له شروط وراح يتصل على المدينة الاي كنت تتعامل معهم ويقول ارسل لان الملف حق السياره

البرتقالي

03/12/2010, 03:05 AM

الله لا يهينكم جميع على المشاركه
واشكر اخوي العزيز بدوي جنوبي على تكرمه بتثبيت الموضوع

اخوي ددسن
اشكرك لتوضيحك بخصوص وكالة نيسان ووكالة جيب

فتى الخوالد
يكفي مرورك عزيزي

ابو هور مواسي عيمان مجهول
تسلمون يابعدي

مراقب وربي كان عندنا ورشه بالصناعية القديمة
وراح من عندنا هندي من جنبها شغلته يصنفر بلوف هههه
وصار فني له اعتباره بوكالة العيسى ;)

famr
الشكر لله ثم لك

لحظة وداع
وكيل فورد توكيلات والحاج حسين هذا اللي اعرفه
واذا وكيلها الملحم اكيد انه من الشرقيه ومعلومة غايبة عني
مشكور :)

قمة افرست السيارة سيارتي
تتوقع اني ابجلس خمسين الف ما غيرت الزيت ؟؟؟
بلاش ترقيع لوكالات النصب والاحتيال الله يرحم والديك

ابو فيصل
الوعلان وهونداي غير
وسع صدرك ولا عاد تقربهم :)

ابن البكيريه
امين يارب

ابو سليمان اي حق الله يرضى عليك
اذا الوكالة يركبون لك سيفون تايلندي ؟؟
الله يحلل الزيود عندهم

شكرا لكم جميعا

البرتقالي

03/12/2010, 03:29 AM

نسيت نقطة مهمة أي واحد راح عليه الضمان
بسبب انه ما واصل الصيانة الدوريه معهم لا يستسلم
يرفع للوكيل الاقليمي شكوى وان شاء الله يحصل مراده

ابوصالح77

03/12/2010, 03:05 PM

يثبت الموضوع لأهميته

يستاهل التثبيت لاهنت يا مشرفنا
بارك الله فيك أخوي البرتقالي

Bader-M

04/12/2010, 01:14 PM

المستهلك بين نارين

الاولى
نار تكلفة الصاينة الدورية التي تقسم ظهر المستهلك
الثاني
فقدان الضمان اذا لم تلتزم بجدول الصيانة

سياتي كيا موهافي يشترط عليك الوكيل بجدول الصيانة على اقل تقدير 80%
ولكن اسعارهم معقولة نسيبا مقارنه بغيرهم
الضمان السيارة خمس سنوات الكيلو مفتوح

هذا جدول الصيانة

http://www.mekshat.com/pix/upload04/images190/mk3046_12882561873.jpg

مقبوله نوعا ما

احد اقاربي ادخل سيارتة الاتيما (نيسان) لصيانة 5000كم طلبوا منه 500 ريال

وهم لم يغيروا له سوى الزيت و فلتر الزيت وتشيك بسيط

أبوجهاد التبوكي

04/12/2010, 01:35 PM

أفدتونا جزاكم الله خير...

كريم الطباع

04/12/2010, 02:16 PM

الله يعطيك العافية على الموضوع
ليس عندي تعليق الا تجربة حصلت لي

عندي كورلا ضمانها 100000 وحصل فيها مشكلة في الكهرباء عند 91000 كم ولا قد سويت صيانة عندهم >شاريها مستعملة
المهم قالي المصري حق وكالة ابو جميل, سألني تسوي صيانة قلت لا قال ما تدخل >>>> يجس النبض
قلت الا لازم تدخل وانتم ملزمين >هايطت عليه شوي< وقلت يا اخي اعتبرني شاريها من الخليج ولا شاريها من هنا وساكن بالخليج واسوي صيانة في الخليج
قالي خلاص بندخلها ونحاول ندخلها في الضمان >يوم توهق< وزينوها لي ورجعت شيكت طلعت لهم خرابات يوم وصلت 98000 قبل ينتهي الضمان

>على العموم هم ملزمين بالضمان حتى لو ما شريت من عندهم
واما نفع راسل الشركة الام بالايميل >>>>خصوصا جنرال موتورز راسل اللي في دبي ثم يتصلون عليك كل الوكلاء يترجونك >حصلت مع واحد اعرفه

طولنا عليكم
وسلامتكم

الامسك

08/12/2010, 09:43 AM

السلام عليكم ورحمة الله وبركاته

اخواني ان شاء الله افيدكم بما هو من واقع تجربه :

1- جميل

2- توكيلات الجزيره

3 - الحمراني

كلهم اشتريت منهم سيارات واهم شي هي او تشيكيتين فقط لانها هي الاهم وخصوصا اول وحده اللي هي على الف كيلو وبعدها ال 5000 كيلو

بعدها ما عليك منهم وان تكلموا وانت جالس قله عطني ورقه اني جبت لك السياره بتاريخ كذا وهي ماشية كذا وانك رافض تصلحها لخروجها من الضمان

ولا ريال تدفعه دام انها ما خلصت الممشى اللي هو محددينه لك او المده يعني مدة الضمان

ريال لو يقولك ادفعه قله رح بلط بحر

اخر مره صارت معي عند ابوجميل

شيكت عندهم والسياره ماشية 14 الف وبعدها ما شافوني الا وهي ماشية 70 الف

جيت عندي مشكله بسيطه بالفتحه تفتح بس تتاخر شوي مرات

والله العالم شرطت شرط عليهم تتغير ماهو تتصلح طبعا هم قالوا بتتاخر نطلب القطعه من اليبابن قلت كم تبي يوم قال 20 يوم قلت له لك شهرين ما عندي مشكله ولو ينتهي الضمان بهالوقت انت بتركبونها لانها سجلت العطل قبل نهايية الضمان

وفعلا صلحوها

وابقولكم شي مهم

كل الوكالات كثيييير تقولك سيارتك تحتاج وقت كذا للتصليح ويمغطونك بوقت وانت طبعا مستعجل

بالاخير تروح وتصلح برى الوكاله

الافضل اذا قالوا لك اسبوع قل شهر

وبعد ما تطلع من عندهم تعالهم ثاني يوم وابلشهم لان السياره اذا سجلت دخول وتم طلب الاصلاح يتوهقون لازم تتصل

وعلى فكره الضمان هذه فكرته ان شاء الله على كل شي مو بس السيارات

يعني دائما حاجهم بشروط ضمان الشركه الام ولا تقبل شروط الموزع

لانه هو موزع فقط ولا يشرط على العميل لانه موزع

هو يجيب بضاعه من الشركه الام بشروطها ويبيعها فقط وهذا نظام اي وكيل او موزع بالعالم

وطبعا مشكلة الضمان عندنا هو جهل الناس بكيفية التعامل مع الضمان

وعشان تحافظ على الضمان صح

فيه جدول لكل سياره يبين متى تسوي تشييك لسيارتك انت اهم شي تسوي التشييك خارج الوكاله باي مكان وخل معاك دليل مثلا فاتورة من المحطه او غيره واحفظها

لان ابسط عذر يقولونه لك لو حصل اي عطل انت ما غيرت الزيت مثلا الا بعد 10 الاف كيلو وهذا يضر بالسياره وهذا يعتبر سوء استخدام

تحط هالفواتير بوجهم ولا يقدرون يبمون حرف واحد

ودائما احكم بتغيير القطعه لا اصلاحها

وابقولكم سر خطير اكتشفت ان بعض الوكلات تتعامل فيه

مثلا انت جبت سيارتك تحت الضمان وفيها عطل بالمكيف الكمبروسر

ودخلوا سيارتك الصيانه على طول يسوون طلب للشركه الام ترسل لهم كمبروسر او تدفع لهم قيمة القطعه اذا كانت متوفره عندهم لان السياره تحت الضمان والضمان يدفع تكاليفه الشركه الام

وطبعا تجيهم الموافقه على القطع سواء يرسلونها لهم او يدفعون لهم قيمتها للموزع اللي يصلح سيارتك

هنا الموزع تجي لعبته هو ما يغيرلك القطعه هو يصلحها لك

وبكذا كلفة الاصلاح عنده تساوي اقل من ربع القيمه وبكذا يكون ربحان قطعه يبيعها كقطع غيار

واكبر دليل على كلامي اي سياره تدخل الضمان من الشركه الام اي تصليح عليها ويقولن لك نطلب لها قطعها او نبدل لك قطعه لازم يرسلون للشركة الام ويعطونها خبر

وبالشركه الام ينفتح لها ملف صيانه عشان يتابعون حالة السياره

ولو لقوا ان السياره بتكلف عليهم كثير قالوا للموزع عطه سياره بديله او سوي تسوية مع العميل لان السياره تكلفتها عاليه على قيمة صيانتها .

اتمنى اكون افدتكم وتراي مستعجل وانا اكتب هالكلام .

رعب الصحراء

09/12/2010, 10:59 PM

السلام عليكم و رحمة الله و بركاته
جزى الله الجنة صاحب الموضوع

احبتي الفكرة ان بعض وكلاء السيارات مبالغ باجور الصيانة و هي تعد العائق الأول امام العميل
الشي الثاني حنا المستفيدين الاول من السيارة يعني لازم نهتم باشياء منها :
1- حقك لا تفرط فيه ( خلك نشبه و عله و بثر و غثيث ) و طالبهم مرة و ثنتين و مليون مرة لين تحصل حقك .
2- اي شي يصير لك مع اي وكالة اتصل بالشركة الام و صدقوني يا اخوان الشركة الام اذا لاحظت كثرة
الشكاوى من بلد معين اكيد بتوقف الشركة الف مرة لصوتنا و بتطالب الموزع بتقرير بالمشكلة و بالنهاية بنحصل حقنا .

أخواني الكرام من هاللحظة اللي نقرأ فيها هالموضوع الرائع نبحث عن ارقام الاتصال بالشركة الأم لجميع وكلاء السيارات ( رقم الاتصال- الايميل - الفاكس ) اي وسيلة اتصال ممكنة .
و نسهل على بعض حل مشاكلنا .

اللهم ارنا الحق حقا و ارزقنا اتباعه و ارنا الباطل باطلا و ارزقنا اجتنابه

سوبر مكشات

12/12/2010, 02:11 PM

ازين مافي الوكاله ان القطع اغلبها اصلي

و
لكن وش لوننتواصل مع الوكيل الاقليمي
اذا كان عندك روابطاو عناوين زودنا بها الله لايهينك

aziz155

12/12/2010, 07:28 PM

مع الاسف وكالات السيارات لدينا لاتحترم العميل

ابو حسان الجنوبي

14/12/2010, 10:36 AM