وش رايكم بتنزيل الهايلكس الدفرنسين ؟؟

[شاص]

السلام عليكم ورحمة الله وبركاته
واحد من الربع معه هايلكس دفرنسين وتخبرون رفعه الزايد الرجال يبي ينزله (يطيحه) شوي أو على الأقل ينزله مع ورى حتى يتوازن ويخف مطبه شوي .. وش أفضل طريقه يعني هل يسحب سست وأي سسته ؟ وإلا به طريقة ثانية ؟ وش أحسن ورشة تشتغل هالشغلالت؟

[غيّام]

تسحب السسته الاولى اللي تختص بالتحميل لكن لو فعلت ذلك معد تقدر تحمل عليه لانه بيحب الارض على طول تبي رايي خله يدبل المساعدات ويغير المساعدات اللي ورى ويخليها رانشو

غيّام

[الفحل 2003]

اخوي / شاص

السلام عليكم ورحمة الله وبركاته

انا من رايي انك تروح لورشة عبدالله النويصر بالصناعية وهم يعلمونك وش الزين لموتر خويك وهذا ما وجدته في أحد المنتديات عنهم ( منقول ) تابع

•ورشة عبد الله النويصر لتجهيز سيارات القنص وجميع أنواع الترهيمات وتربيط جميع أنواع السيارات
•تقوم الورشة بعمل الآتي : -

1-تجهيز سيارات القنص : -
ويشمل قص السيارات سواء صالون أو حوض وتركيب كراسي المقناص ثابتة أو متحركة حسب رغبة الزبون وعمل شبات الصقور سواءاً داخل السيارة أو في حوض السيارة .

2- تربيط جميع أنواع السيارات :
ويشمل تربيط السيارة من الصدام إلى الصدام ومن فوق ومن تحت وتغيير إي قطعة غير صالحة من جلد ومساعدات أو يايات وتربيط الأبواب ووزنها لتضمن عدم تخلخلها وتربيط الطبلون والمراتب وتغيير جلد البودي وتربيط سقف السيارة إذا كان فيه أصوات .

3- تضمين السيارات :
ويشمل تضمين الصدامات الأمامية والخلفية والرفارف والشمعات والأصطبات والصندوق ( الحوض ) والأبواب لتضمن عدم تخلخلها ومنع تهريب الهواء والغبار من الأبواب الخلفية لسيارات الصالون
ملاحظة :
يجب تضمين السيارة عند شراءها جديدة لتضمن عدم تخلخلها خصوصاً السيارات الصالون جيب لاند كروزر أو باترول نيسان أو جمس وإذا كان السيارة مستعملة يجب تضمينها بعد التربيط .

4- جميع أنواع الترهيمات ويشمل :
ترهيم المساعدات الإضافية :سواء لضمان عدم انقلاب السيارة أثناء انفجار الإطارات لا سمح الله لسيارات البر أو سيارات نقل العائلات وضمان عدم ارتفاع السيارة ونزولها أثناء القيادة بسرعة في البر مما يجعلها متماسكة لا تنحرف عن الطريق أبداً بإذن الله وتكون راسية في الطريق إذا كانت حمولتها زائدة سواء أن كانت السيارة صالون لنقل العائلة في السفر أو سيارة خاصة بالرحلات البرية .

ملاحظة :
ترهيم المساعدات الإضافية مهم جداً جداً لضمان السلامة أن شاء الله .

*ترهيم دعامات الرحلات البرية :
ويوجد بها مسحات وكريك ( شيول ) ومطرقة وفأس .ومعلاق للذبيحة وهي قوية ومتينة تتحمل الصدمات لا سمح الله .
* ترهيم دعامات الدوريات : وهي قوية ومتينة تتحمل الصدمات لا سمح الله .
* ترهيم ونش سحب السيارات : بطريقة مخفية وقوية مثل صنع الوكالة أو بارزة حسب رغبة الزبون .
* ترهيم ونش الأستبنة ( الأسبير ) : أسفل السيارة أو من جنب السيارة .
* تدبيل السست : بطريقة فنية لا تجعل مطب السيارة قاسي وترفيع السيارات وتنزيلها ورفع السيارات المرهمة والخاصة بالتحدي بالرمال سواء بالسست أو اليايات .
* عمل قاعدة أنتل ( أريل ) بعيد المدى جانبية وتكون خارجية من تحت مثبته بالشاص سهلة الفك والتركيب .
* تحويل السيارت من هيدروليك إلى عايدي : ويرهم لها يايات ومساعدات سواءاً سيارات لاند كروزر VXR أو فورد وغيرها .
* تدبيل صندوق سيارات الحوض المكسرة او تدبيلها قبل الكسر لان أغلب السيارات الجديدة حديدها ضعيف خصوصاً الجمس الحوض والفورد والدوج الحوض .

الصدق والأمانة شعارهم
وجميع ما تقوم به الورشة من أعمال مضمونة بإذن الله بسبب خبرهم التي تصل إلى اكثر من 37 عاماً والتعاون مع أجهزة الدولة أيدها الله بنصره وحفظها من كل مكروه وأيضاً أخواننا المواطنون هواة الرحلات البرية والقنص .

وهذا عنوانهم ( الرياض – المنطقة الصناعية – ت / 4480233 جوال / 0505232097 ) مع تمنياتي لك ولخويك بالتوفيق .

والسلام عليكم

اخوك

الفحل 2003

الرياض

[مهيلان]

اخوي شاص السلام عليكم
عندي حل بسيط ما جربته واتمنى ان احد يجربه ..
سبب ارتفاع الهايلكس دفع رباعي ان السست فوق الدفرنس ..
لكن لو عدل شي بسيط وحط السست تحت الدفرنس اكيد النتيجه مذهله ..
لاحظ ان الهايلكس الدفع الرباعي هو الوحيد اللي سسته فوق الدفرنس لذلك كان مرتفع جدا ..
ودمت سالما

[برق نجد]

السلام عليكم ورحمة الله وبركاته
اخوي شاص انا ما انصح خويك ينزل الموتر
لان سبب ارتفاع الموتر بهذا الشكل هو الدبل لأن تروس الدبل تحت القير طل تحت الموتر بتشوفه نازل مره علشان
كذا يضطرون انهم يرفعون الموتر واذا نزلته بيكون معرض للحصى والجروف بعكس السوزو تروس الدبل جاية جنب القير
انظر الى الصورة
http://www.mekshat.com/pix/upload/images10/mk5236_dsc02190.jpg
اتمنى اني افدتك ولو بشي قليل.

[شاص]

الإخوة الكرام ,,
غيام.. مشكور على الراي والنصيحة

الفحل 2003.. تفصيل أكثر من رائع كفيت ووفيت

مهيلان .. تبي خويي يجرب وتجي الطقة براسي :j :D ؟؟ لا ياخوي .. أنقل له الفكرة وأعلمك جزيت خيراً

بروق نجد .. يبدو أن هذه من أبرز عيوب الهايلكس الدفرنسين والتي هي السبب في ارتفاعه .. موترك هل هو دفرنسين ؟
إذا كان كذلك وش أبرز التعديلات اللي سويتهن ؟ وكم كلفن ؟ لأن خويي وده بمراوح وشغلات .. لا عدمناك يالغالي

[برق نجد]

موتري دفرنسين ديزل
و ماسويت فيه شي ابد جنوط وكفرات ودعامة وتانكي وشد بس

[شاص]

الله يطعمك من خيره ويكفيك شره .. الشد بكم زينته ؟ وين ؟ والتانكي ستيل ؟ وكم كلف ؟

[برق نجد]

جزاك الله خير
الشد مصلحه عند ورشة التاج الصناعية القديمة شارع الاربعين كلفني 350 ريال
اما التانكي فهو ستنل ستيل 120 لتر مصلحه عند المواهب كلفني 1250 ريال وتراني حاطه في الصندوق باالعرض