رحت ابشتري نيسان باترول الجديد وطلع لي هالعيب ... أبي شوركم يا الربع

[زقم]

السلام عليكم ,


والله يا جماعة الخير لي سنه أبطلع موتر مره أقول اطلع جي اكس آر جديد ومره أقول باترول خصوصا انه من يوم نزل الجيب البترول
بالشكل الجديد 2010 وهو عاجبني من ناحية الشكل الخارجي وكذلك الداخلي وقررت أختار الباترول أكشخ وأقوى وطبعا شكل جديد ومميز
خصوصا اني لقيت واحد من الزملاء الي أمون عليهم مطلع الفئة SE وسألته عن رايه في الموتر وذكر لي إنه حلو ومريح
سواءا في الخط او البر ... جربت انا الموتر ومسكت به طريق المجمعه القديم وصلت بالسرعه الى 180 كتجربه فقط وبالفعل
الموتر وذف وخفيف كأنك تسوق سياره صغيره (مهوب على حجمه )


استخرت الله وقررت اروح للحمراني أطلع لي جديد وقبل امشي تذكرت زميل أخوي ميكانيكي ( عنده ورشه ) وفاهم في السيارات
ورايه اعتقد بيكون مهم في الأختيار


وبعد ما اتصل عليه أخوي يسأله عن البترول الجديد ذكر لنا بعض العيوب بصراحه كلها ممكن إني اتجاوزها الا عيب واحد
وقفت عليه بنفسي لأتأكد ... وهو أن الكفرات الأماميه لا يوجد بينها وبين المكينه صاجه أو حاجز أو ربل !!!
يعني تطل من ورى الكفرات تشوف ليات المكينه !!
رحت لمعرض الحمراني وشفت السياره بنفسي ... فعلا فتحه كبيره ما بين الكفرات ( تحت الرفرف) وما بين المكينه !!
بمعنى لو كنت في البر ونقزت حصاة من الكفر ممكن تضرب جوا المكينه وتتلف أي شي وطبعا الطين والماء والغبار ....الخ عادي
يدخل للمكينه من هالفتحه !!


بصراحه أنا توقعت أن هالعيب في السياره المعروضه عند الحمراني (كسيارة عرض فقط ) لكن تبين لي ان هالعيب في كل السيارات !!


أبي شوركم تكفون وخصوصا أصحاب الخبره
لأني سألت خوينا وقلت له ممكن اسكر هالفتحه وارهم لها فيبر او صاج خفيف او غيره
فذكر لي انه ممكن اذا سكرتها
ترتفع الحراره لأن فتحات التهويه للمكينه مدروسه من قبل الصانعين بعنايه !


سؤالي للجميع


هل يعتبر ما ذكرته عيب شرعي ورئيسي في السياره ؟؟؟


انا بصراحه نفسي في البترول وما ردني عنه الا هالشي


تكفون يا اصحاب الخبره أبي شوركم

[مواسي الطعوس]

كل البواترول القديمه فيها ربل وينطلق الكبس حقه على طول ....واكثر سيارات البر باترول ويجورون عليها جور ظالم ولاعمرهم اشتكوا منه وانا واحد منهم .

[fof6666]

يارجال توكل على الله وطق لك واحد

معرض الفلاح ارخص من الوكالة se1 ب 173000
والوكالة 178000

[خالد ...]

وعليكم السلام ورحمه الله وبركاته

ما اعتقد ان هذا العيب يردك عن شراء الباترول ..

وعسى الله يكتب اللي فيه خير لك

[يريور عيمان]

فعلا لاحظت هالشي
و ما فيه ضرر لو تكبس و تغلق الفتحة بالبلاستيك
ما بتكون عندك مشاكل بالحرارة ابدا

[هاجر الود]

أسئل الوكالة أقصد مسؤول الصيانة عن العيب هذا و أما الموتر بجد والله يساهل تشريه مميز جدا ورفعه مدروس وحجم السعة ممتازة واسياته جدا مريحة توكل على الله وخذه بس لوتقدر على ال400 حصان أفضل لك .

[العاقول1]

الافضل تاخذ من الامارات او عمان مميزات سياراتهم افضل من الحمراني

[مدمن فتك]

من المعلوم ان الباترول صمم للبر والصحراء وليس من المعقول ان تكون الموديلات القديمه افضل من الجديد من ناحية جاهزيته للبر
وراعين الباترولات يجورون عليهن ولااشتكى احد منهم

[ابوغلاب]

اخي توكل على الله واذا خايف من هالفتحه بإمكانك ترهيم شبك خفيف (فتحاته صغيره جدا مثل حق النوافذ اللى بالبيوت) ومنظره لائق وقوي وكما ذكر الاخ هاجر الود بإمكانك ان تسأل فني الصيانة في الوكالة او تخاطب المصنع الام في اليابان بواسطة موقعهم وهم اعتقد ادرى واعرف بما يفعلونه ،استخر وتوكل على الله والله يكتب لك اللى فيه خير وبركة

[طفران بس بطران]

بسيط ان شاء الله

[علي العُمري]

لاحظتها من قبل وفعلا كيف اغفل الصانع هذه النقطة انك تشوف الماكينة من تحت الرفارف

[سيف الظفير]

حلالاه لويحصل لي 400 حصان من الجديد

[هوايتي مكشات]

استخر الله ياغاااالي

[You Like Me]

توكل على الله يا رجل
والله يبارك لك ويعطيك خيرها ويكفيك شرها
سياراتنا القديمه اغلبها مفتوحه ومافيها الا العافيه ما شاء الله
ونكدها كد الويل وماقالت شي الله يبارك لنا فيها

[قصمي]

غير الجيب الندكروزر لاتشتري

[قصمي]

انه شيك صبور موصفات جبره قوي التحمل بسيط ليس معقد كشخه
يتضرب عليه الناس في حله بيعه قوي

[YUKON_GMC]

كل السيارات اصلاً تكون مسكره في ربل او بلاستيك ومع الوقت ينكسر ويطيح ..

تلاقي موديلات 2007 و 2008 طايح الصاجه وتشوف المكينه من الرفرف وعادي

لو بغيت تسكره تقدر تفصل لو لستك او بلاستك وتفكه متى مابغيت وتركبه في البر فقط على مسامير سكروب

[جومانشي]

توكل على الله وخذه لا يفوتك

ولا تقول انك بتهون وتاخذ تايوتا <<< انحش منه لو يعطونكيه ببلاش اسال مجرب

عليك والله بالنيسان عطي الله

وتراك منتب اخبر من الوكاله

لو انه عيب كان زبطوه

[الصــرح]

وليش يومك تسأل تقول :
عيب شرعي !!
ليه ماتقول عيب فني ولا عيب مصنعي
الأمور الشرعية لابد من إجلالها وعدم تناولها إلا بحقها وجزاك الله خير

[زقم]

جزاكم الله خير جميعا على التفاعل - الله يحرم وجوهكم جميعا عن النار آآآمين

الأخوان الي يقولون ما يضر الموتر انا بصراحه سألت عن هالنقطه مهندس وكذلك سألته عن امكانية الترهيم
ورد علي بالآتي

- بالنسبه للفتحه عندما تنظر للمكينه مباشره تجد ليات ومواصير ستيل مكشوفه مباشره ( وهذا خطر في حال
تعرضت للحجاره او غيرها )
بعكس المواتر القديمه ما فيه الى المكينه والبخاخات فوق

- بخصوص ترهيم غطاء فيبر او بلاستيك لم يأيدني عليه المهندس خوفا من ان يؤدي ذلك الى ارتفاع حرارة المحرك

وعلى العموم انا ودي - الله يجزاكم خير - برد فني

هل هذا يعتبر عيب كبير ام لا

وهل اتوكل على الله واشتريه ( خصوصا ان السعر حوالي 200 الف ريال ) ام استخير عنه واشتري لند كروزر مع هالعالم وبس ..
جزاكم الله خير

[قناص مزاجي]

جزاكم الله خير جميعا على التفاعل - الله يحرم وجوهكم جميعا عن النار آآآمين

الأخوان الي يقولون ما يضر الموتر انا بصراحه سألت عن هالنقطه مهندس وكذلك سألته عن امكانية الترهيم
ورد علي بالآتي

- بالنسبه للفتحه عندما تنظر للمكينه مباشره تجد ليات ومواصير ستيل مكشوفه مباشره ( وهذا خطر في حال
تعرضت للحجاره او غيرها )
بعكس المواتر القديمه ما فيه الى المكينه والبخاخات فوق

- بخصوص ترهيم غطاء فيبر او بلاستيك لم يأيدني عليه المهندس خوفا من ان يؤدي ذلك الى ارتفاع حرارة المحرك

وعلى العموم انا ودي - الله يجزاكم خير - برد فني

هل هذا يعتبر عيب كبير ام لا

وهل اتوكل على الله واشتريه ( خصوصا ان السعر حوالي 200 الف ريال ) ام استخير عنه واشتري لند كروزر مع هالعالم وبس ..
جزاكم الله خير


اقول لا تشتري الا لاند كروزر

السفاري ما ينفع

اذا قروشك واجد خذ سفاري


ملاحظه السياره ما تشوفها كثير ما عليها طلب

[برق الشفاء]

اخوي زقم ان كانك تقول مشكله انا ملاحظها بموتري الاكستيرا فيه نفس الفتحه من عند الكفر الامامي
واجلده في البر وطبيت في طين وحزوم الصمان و مالاحظت اي شي ويوم شفتها جاني نفس التفكير
بس ماننيب ابخص من اليابنيين مع العلم ان موتري موديل 2008 وناوي اخذ 20011 انشاء الله
ونصيحتي لايفوتك خل عنك اللاند كروزر الصيني...............

[لهذام]

إذا كنت ترغب بالبديل ، فأنصحك بلاندكروزر خليجي 8 سرندل
واللاند مع ناس واجد مكدود وماشي ماشاءلله .
وان رغبت الباترول واخذته الله يبارك لك مالي علم بالنيسان ولانيب من اهله .

[ذيب زلفاوي]

يارجال كان معي لاند 99 ومافيه رفارف ولا دريت انه يجي رفارف اصلا

طبيت فيه بمويع لدرجت انها دخلت على من البيبان والموتر ماطفى ولا شي وبعده ددسن نفس الشي الرفارف تطيح على طول وغيرتها وماكملة سنه وطاحة من دون سبب وخليها بس اذا طبيت بمويه كثيييره وطولت تولع لمبة الدينمو واذا طلعت طفت



انا اقول استخر واشتره وان قدرت على 400 حصان افضل بكثيييير بالنسبه لنظام التعليق وقوة المكينه الخورافيه

[بدوي جنوبي]

اصلا اغلب السيارات بعد فتره من الاستخدام يطيح الربل

لكن ودى انك صورت الفراغ الموجود عشان نقدر نقرر .

عموما اتوقع المصنع ما يغفل مثل هذا الشيئ البسيط


بالتوفيق

[مدمن فتك]

اقول لا تشتري الا لاند كروزر

السفاري ما ينفع

اذا قروشك واجد خذ سفاري


ملاحظه السياره ما تشوفها كثير ما عليها طلب
قويه السفاري ماينفع !!!:p:p
انا مجرب لاند وشاص وسفاري وشيروكي
بالخف بالبر والوعر الفتك ثم الشيروكي ثم الكروزر ويييين وانت تقول ماينفع

[العاذر]

اشتر لاندكروزر تايوتا وعند البيع شيك ماتنزل قيمته

بعدين التايوتا له هيبه

[يريور عيمان]

انا ودي افهم
وش دخل التويوتا في الموضوع ؟؟؟؟؟
صاحب الموضوع يسأل عن الربل ما سأل عن تويوتا



اخوي زقم
المشكلة ليست كبيرة مثل ما قلت لك
و اذا ناوي تسد الفتحة سدها ببلاستيك و خلاص
مستحيل ترفع عليك حرارة وانا اظمن لك
ولا تنسى ان الباترول الجديد عنده فتحات تهوية على الجوانب
يعني التهوية موجودة

الموتر الصراحة لا يعلى عليه قوي و وسيع و مريح و ادائة في البر قوي جدا و مجربينه

[التعـ King ـديل]

الفتك نفس الشي ومع ذلك اطلق جيب بر

استخر ووكل الله بس وخير مااخترت

[نجم الصداوي]

..
.. أولا .. رأي الأخــوة على العين والرأس .. ولا يجي منهم قصور..
..
.. ثــانيــا .. مــادام إنــك ( محتــار بين الإختــيارين) وترددت على رأي فلان المهندس..وعــلان المجرب .. والســالفة كومة دراهــم .. شوري عليك .. قرر الجيب..دام إنك ما تشوف عليه سلبيات في ظميرك.. لو عرض عليك ..
..
.. متى مــاكنت ( بين ) إختيارين .. حتى ولو أخــذت اللي كنت ( متوقف) عن شراءه ..ثق ثقة تــامة .. إنــك حتى لو شريته .. ومن بكرى طلع فيه أي شيء لا قدر الله .. ثق إنك بتقول ليت وليت .. وتتحسف..
..
.. رايي يا لحبيب .. إستخر ربك .. واعزم الأمر .. وإن كان بالك على الباترول..فــاشتره وكأنك لم تترد به أبدا ..
..
.. أمــا وإن عزمت عليه ..وأنت تقدم رجلا وترفع أخرى .. فــ الله يعينك..
..
.. لــن أدعــوك للتشـــائم .. ولن أنسف رأي من سبق..لكنها تجربة الحياة
..
.. ربمــا يوافقن الرشد ما قلت .. ولربما يخالفه .. والخيرة ما اختارهــا الرب..
..
.. تقبل فائق تحياتي ..
..
.. أســأل الله تعالى أن يبارك لك في أهلك ومالك.. ويدلك على الرشد في أمور دينك ودنياك..

[YUKON_GMC]

الا وش رايك تحط موضوعك او تنقله لرابطة جيوب النيسان وتشوف رايهم .. لأنهم هم الاخبر فيه ومشاكله ..

[الربذي]

عليكم السلام صراحة مااشوفه عيب اذا وقفت على هذا الحلول كثيرة
لكن احرص على ابو 400 حصان ترا حتى التعليق يختلف راكد مره تصدق اشوفه اهدى من الكزس

[vxr99]

ياناس المكانيكيه حده يغير يفك ويركب
وش فهمه في المواتر الجديده كلهم يسبون فيها لان تقنيتها عاليه وبدري عليهم يفهمونها
يتكلمون عن المكانيكي على انه مهندس ومستشار

[مقطع العروق]

اخوي اذا العيب بالربل فهو كبير ومع احترامي لكلام الاخوان
لكن انت كلم الصيانة اذا يركبون لك حق مديلات اقل ويحطونه لك
وتقدر تركبه انت بنفسك لانه ضاروري


او فصله عند اقرب بنشري او سمكري جب له الكبس واستك شيول

وخليه يفصله على المقاس المطلوب ويضبط مجربينه في باتروح واحد من الشباب 99 وشوف اللي يريحك
ولا تشتري الا انت متأكد عشان ما يضايقك هالشيء وتحز في نفسك

والله يوفقك وييسر امرك
ويعطيك خير السيارة اللي بتشتريها كانت الباترول او غيرها

والله الموفق

[الباشاء]

التاهو الجديد نفس الطريقة مافيه ربل او صاجه بين الكفرات وبين المكينه تشوف رراس المكينه باين فوق الكفرات الي قدام وعايدي ما يضر بشي والظاهر انه علشان يخفف من حرارة المكينه

[خلوي]

للأمانة أنا خذيت النيسان الستي أبشن أفخم نوع 400 حصان هيدروليك , وبعدها بسبوع خذيت gxr v8 لقناعتي الشخصية ان النيسان الجديد مايصلح للبر من ناحيت المقناص والكرف , بعكس التيوتا الثمانية سلندر. وأضطريت اني استخدم النيسان في المدينة فقط

[البرتقالي]

يا اخوان نيسان وتويوتا عيال عم
وكل موتر فيه حقه وله عشاقه بس بدون تعصب وتنقيص من قدر الآخر :)
نيسان فيه خفة النفس والسلاسة وتويوتا فيه الرزة ويمسك سعره
يعني بلاش احراج لاخواننا المشرفين ;)

انصحك اخوي اذا هالموضوع مضايقك
ترهم له شبك المنيوم يشبه باب المكيف الصحراوي
يرد الحصى ولا يعزل هواء او يمسك حرارة

وترى كان عندي سيارة تهرقلت رفارفه الداخليه
حاولت ارقعها ما نفع بالأخير قصيتها بمشرط ولا شفت الا العافيه

وسواء شريت بطل الدروب او المفخره
الله يبارك لك ويعطيك خيره ويكفيك شره

[K.S.A.A]

عادي وأنا أخوك شف أكثر السيارات المستعمله مع الناس تطيح الربلات والبعض تطيح الصيج عنده
وعادي مايضر ولاشي
توكل على وأشتر والله يكيفك شره ..
وإذا تبي النصيحه من جد , لاتشتري نيسان مع كل الأحترام
أشتر gxr وان كان فلوسك كاش دور لك موديل 2006 او 2007 أشوف أصحابها يمدحونها على الجدد ..

[زقم]

يا اخوان الله يبارك فيكم البعض فهم موضوعي انه مقارنه بين اللاند وبين الباترول

لاشك عندي ابدا ان اللاند كروزر ارغب عند الناس ويمسك سعره .... الخ

لكن البترول الجديد فخم وكشخه وما انتشر كثير زي اللاند الي صار في الشوارع تشوفه اكثر من الكامري

وعلى العموم لو كانت ما تمشي الا السيارات المرغوبه و الي تمسك سعرها كان ما احد ركب رنج روفر ولا شفنا بي ام وطوارق وغيرها في الشوارع !!

انا اتكلم عن جزئيه فنيه فقط

هل يؤثر عدم وجود صاجة حمايه بين الكفرات والمكينه ولا ما يؤثر ؟؟


ومسألة اني اشتري سياره بفوق 200 الف ريال واحط شبك ولا ارهم فيبر احس انها كايده

عموما اشكركم جميعا واسأل الله لي ولكم التوفيق

[آل زايد502]

اخوي استخر ربك وخاصه اك محتار بين موترين
الله يرزقك الموتر اللي ينسفط على يمناك

[عآشق الحره]

لاندكروزر 2001 يجي مقفل كليا من عند الكفرات ..ومن ناحيه انها تضره اكيد بتضره خاصتا المويا والرمال تحياتي

[لبيه يمنادي]

السلام عليكم ورحمة الله وبركاته

اخوي اتوكل علي الله واشتر الموتر ولاتخاف من شي والفتحة هاذي اللي بين التواير والمكينه ماتسبب اي مشكلة لك ولا للسيارة .... اذا انت متخوف مثل ماقالو الاخوان يزاهم الله خير ... فصل شبك خفيف سهل الفك والتركيب وبتحل المشكله اللي انت متخوف منها ....

وبالتوفيق أن شأ لله ...

[ملك الإحسآس]

نصيحه مني خذلك لاندكروزر
سياره تعتمد عليها وترى يجي مقفل كل شيء من تحت

[MohsinSK]

انا اتكلم عن جزئيه فنيه فقط


هل يؤثر عدم وجود صاجة حمايه بين الكفرات والمكينه ولا ما يؤثر ؟؟








لا ما يأثر,, و ان كان على الماي و الرمل فهم راح يدخلو للمكينة حتى لو كان الرفرف مسكر (هذا في حال طبيت في نفقعة ماي عميقة مثلا)

الحصى لو ضرب لي او ماصورة ما راح تتأثر.. لأن سرعة انطلاق الحصى من التاير ما بتكون بالمستوى الا يسبب الضرر.. احنا نتكلم عن حصى مو عن رصاص سلاح مثلا !!

كان عندي بليزر 91 الحجم الكبير,, معروف عن كبوته كيف انه ديرة.. يمدي البني ادم يخش من تحت السيارة و يطلع من فوق المكينة من زود الفراغات فيه.. و الحمد لله بر و شوارع ما شفت فيه مشاكل بسبب الفراغات..!!

انا عن نفسي... باخذ الباترول بدون تردد..

[RaaaaKan]

السلام عليكم ,



والله يا جماعة الخير لي سنه أبطلع موتر مره أقول اطلع جي اكس آر جديد ومره أقول باترول خصوصا انه من يوم نزل الجيب البترول
بالشكل الجديد 2010 وهو عاجبني من ناحية الشكل الخارجي وكذلك الداخلي وقررت أختار الباترول أكشخ وأقوى وطبعا شكل جديد ومميز
خصوصا اني لقيت واحد من الزملاء الي أمون عليهم مطلع الفئة SE وسألته عن رايه في الموتر وذكر لي إنه حلو ومريح
سواءا في الخط او البر ... جربت انا الموتر ومسكت به طريق المجمعه القديم وصلت بالسرعه الى 180 كتجربه فقط وبالفعل
الموتر وذف وخفيف كأنك تسوق سياره صغيره (مهوب على حجمه )


استخرت الله وقررت اروح للحمراني أطلع لي جديد وقبل امشي تذكرت زميل أخوي ميكانيكي ( عنده ورشه ) وفاهم في السيارات
ورايه اعتقد بيكون مهم في الأختيار


وبعد ما اتصل عليه أخوي يسأله عن البترول الجديد ذكر لنا بعض العيوب بصراحه كلها ممكن إني اتجاوزها الا عيب واحد
وقفت عليه بنفسي لأتأكد ... وهو أن الكفرات الأماميه لا يوجد بينها وبين المكينه صاجه أو حاجز أو ربل !!!
يعني تطل من ورى الكفرات تشوف ليات المكينه !!
رحت لمعرض الحمراني وشفت السياره بنفسي ... فعلا فتحه كبيره ما بين الكفرات ( تحت الرفرف) وما بين المكينه !!
بمعنى لو كنت في البر ونقزت حصاة من الكفر ممكن تضرب جوا المكينه وتتلف أي شي وطبعا الطين والماء والغبار ....الخ عادي
يدخل للمكينه من هالفتحه !!


بصراحه أنا توقعت أن هالعيب في السياره المعروضه عند الحمراني (كسيارة عرض فقط ) لكن تبين لي ان هالعيب في كل السيارات !!


أبي شوركم تكفون وخصوصا أصحاب الخبره
لأني سألت خوينا وقلت له ممكن اسكر هالفتحه وارهم لها فيبر او صاج خفيف او غيره
فذكر لي انه ممكن اذا سكرتها
ترتفع الحراره لأن فتحات التهويه للمكينه مدروسه من قبل الصانعين بعنايه !


سؤالي للجميع


هل يعتبر ما ذكرته عيب شرعي ورئيسي في السياره ؟؟؟


انا بصراحه نفسي في البترول وما ردني عنه الا هالشي



تكفون يا اصحاب الخبره أبي شوركم


اسمع طال عمرك انا عندي LE3 2010 وجربته في البر وعلي الخط بالنسبه للخط مافيه كلام واطلق من الجيب اللكزس وفي البر احلا واحلا ولا عليك من الكلام اذا كنت ناوي توكل علي الله ولا تستمع لاحد.وأي سؤال انا حاضر

[K.S.A.A]

انا أضمن لك ضمااااان اخوي انها ماتضر أبد
توكل على الله وأشتر اجل
والله يعطيك خيره ويكفيك شره ..

[ذيب زلفاوي]

ياخوي اصلا استخدامك للموتر في البر راح يكون خفيف لان الموتر غالي ماهو هايلوكس ولا شاص هذا موتر قيمته فوق 200 الف مخصص للمدينه وللطلعات الخفيفه و المتوسطه يعني مانت رايح تشق شعبان فيه ولا تطب بطين الا اذا كانت 200 الف عاديه عندك كانك دافع 20 الف


انا اقول استخر واشتره وترا كلها سنه بالكثييير وتلقاه بكل شارع لاني اعتبره افضل من الرنج والكزز والسيارات الفخمه هذي

[ابو سعود4500]

العيب اللي ذكرته في السياره مهو شي جديد ومن طلعت النيسان وهو اصلا مافيه ورا الكفرات لا صاجات ولاربل
وانا من الاشخاص الي كان عندي باترول 97 وبعدين شريت 99 وبعدين شريت 2005 ولامره بحياتي ذكرت ان المكينه دخلها شي ومن رايي توكل على الله واشتر الموتر واذا ان المسأله مضيقتن صدرك فصله صاجات وركبهن

[باترول 4500]

انا من الاشخاص الي كان عندي باترول 97 وبعدين شريت 99 وبعدين شريت 2005 ولامره بحياتي ذكرت ان المكينه دخلها شي ومن رايي توكل على الله واشتر الموتر واذا ان المسأله مضيقتن صدرك فصله صاجات وركبهن



:good2:

............

[abo_basil]

لا اعتبرها مشكله اطلاقاً
مع العلم انا مجربها بالنفود والمحجره بالشمال ( القريه ) والحمد لله السياره قوه وثبات وعزم واداء مررره ممتاز يبهرك ويزيد فيك حب المغامره والسرعه.

والله يكتب الي فيه الخير للجميع

[وارد منصور]

خذ لاندكروزر خليجي لك ولزمن وبعد شيك بجيبك اذا بعت وخل عنك النيسان الجديد تقول خبل عاض ثوبه وهو مقفي من عندك

[كاشخ 24 ساعه]

من رأيي انتظر الموديل الجديد ولاحظ الفرق فان حلت هذه المشكله فهذا جيد وان لم تحل فاعتقد انها ليست مشكله اصلا لان الموديل الجديد من اي سياره يوجد بها عيوب يتلافاها الصانع في الموديل التالي

النيسان الجديد رائع ولا اعتقد ان ما ذكرته لم يخطر ببال صانعيه

بالتوفيق

[ساري 111]

انا لاحظته بس مهب عيب اذا ماافيه شي حساس مثل لي او اسلاك اوغيره

وياليت تجيب صورة عشان تتضح الصورة وتجيب صوره لنفس المكان للاندكروزر ليكون هناك مقارنه بالفارق هو كبيرر او عادي

[شيخ الرعوجي]

كلامك صحيح يالذيب تقدر تشوف البواجي من القهر يعني التماس على طول في حال وجود امطار بأمر الله

[صقر أمه 506]

والله الباترول الجديد زين من الداخل
اما شكله الخاارجي غبي مدري وش معجب هالعالم فيه هو واسطبه الخلفي اسطب الغرابي
وخلفيه متخلفه وصدامه الامامي على نفس مستوى الشبك وهذا اشوفه عيب ...

[.أبوعبدالرحمن]

لا تستعجل اخوي على الباترول الجديد الا بعد نزول له موديل اخر يعني بتشتري اشتر 2011 ، لأنه من الطبيعي اي سيارة جديدة سواءا نيسان او تويوتا او مرسيدس جديدة على السوق لابد أن تكون هناك عيوب فيتلافونها في الموديلات اللي بعدها ، مع العلم ان شركة نيسان هي الشرة الوحيدة التي تتأخر في تلافي العيوب بكثير ، ولكن من رأيي ان العيب اللي ذكرته ستعرف قدره بعد نزول الامطار واذا طبيت بالمطاين ، فأرى اللاند هو الخيار الافضل وبالذات ثمانية سلندر

[ابو وافي 444]

حبيبي من رايي انك تفصل فيبر ولكن يكون شكله زي الشبك مثلا بحيث ان التهوية مظمونه والحصى الكبار ما تدخل وتخرب عليك شي بالمكينه

[ولد الدايره]

يسلمك ربي والله يبارك لك ويعطيك خيرها ويكفيك شرها

[النجم السراي]

توكل على الله

[عاشق القطا.]

استخر وانا اخوك وانا اقول ياتنتظر الـ2011 ولا الفكسار أبو مكينه 5700 روعه روعه روعه روعه ((أبو خطوط خليجي ))

[Hwer]

اذا انت راعي بر فر منه فرارك من الاسد
واذا انت راعي مدينه فلاباس فيه

[khalid-98]

اذا انت راعي بر فر منه فرارك من الاسد
واذا انت راعي مدينه فلاباس فيه


من واقع تجربة ولا وكالة يقولون؟

انا مفكر بالنيسان بجدية وشف 2011 صراحة ما اقارنه بالاند ابدا

والصدام الامامي متغير صاير مثل الكزس

[ابومحمدحديثي]

اخوي انا معي الجديد وماخليت مكان الوجه وينبع وكشتات وقبله فتك 2006 مالاحظت اي مشكله اصلا لاسقت الجديد تاتنسى العيب

[turkiq]

المعذرة اخوي .. بس تراك كبّرت ملاحظتك
صدقني انك بالغت .. الموتر ماحد يكون قادر ويفوته ابد ابد
وتراك خسران ان اخذت غيره ... لان الفرق بينه وبين منافسينه فرق كبير

والله يوفقك

[حبل الوريد]

انتظر الى 2011 ان تلافو العيب خير وبركه
وان ما زينوه استخر واذا ارتحت للباترول خذ 2010 بيصير ارخص لك بعد
ان كانك منت راعي مهايط بموديل الموتر

[YUKON_GMC]

هو انت ماشريت لهالحين بعد 65 رد

والله ياظنتي ما نت شاري شيء دام هذي علومك

[عبدالله27]

بسيط ان شاء الله

ماتعبت النمله وهي تدور

[زقم]

انتظر الى 2011 ان تلافو العيب خير وبركه
وان ما زينوه استخر واذا ارتحت للباترول خذ 2010 بيصير ارخص لك بعد
ان كانك منت راعي مهايط بموديل الموتر

جزاك الله خير - هذا الي بيصير ان شاء الله

سألت الوكاله امس ( الحمراني ) عن 2011 قالوا يصل بإذن الله أول يناير يعني بعد أقل من شهر
وسألت هل فيه تغيير قالوا لي انه نفس 2010 التغيير في الإستماره فقط
وقد نزل بالفعل 2011 في الكويت والإمارات الأسبوع الماضي وليس به تغيير
لكن على قولتك انابأنتظر الين ينزل 2011 واشوف اذا ما عدلوه معناها انه مافي مشكله
وماراح تفرق معي اني اخذ 2010 ولا 2011 طالما انهم نفس الشكل لأني ناوي استخدم
وليس في نيتي البيع

[زقم]

هو انت ماشريت لهالحين بعد 65 رد

والله ياظنتي ما نت شاري شيء دام هذي علومك

والله يا أخي الكريم أنا ما أعرفك وانت ما تعرفني علشان تقول لي - دام هذي علومك !!
وانا مدري وشهي علومي وش انت شايف مني ؟
هل غلطت على أحد
هل سفهت راي أحد
يخوي هذا منتدى نسولف فيه ونناقش الرجال ’نستفيد من الوجيه الطيبه ونسمع رايهم والخيره يختارها رب العالمين
وبعدين الله يبارك فيك أنا فتحت الموضوع من اربع او خمس ايام وطلبت شور من الأجاويد
الي في المنتدى والي عندهم خبره بها الموضوع
وإذا انت تشوف أن الموضوع ما جاز لك سكر الصفحه ودور موضوع ثاني ولا أنت ملزوم تكتب مثل هالرد
عموما
الله يحللك ويبيحك

[لانو]

اخوي ممكن تغطيه بشبك صغير منها تكون حجبت عن المكينه اي شيا يضره ونفس الوقت لم تحجب التهويه

[the winner]

السلام عليكم
والله اخوي اكيد انه ما طاف على المصنع هالعيب .. بس نصيحتي اخذ موديل 2011 يمكن يكون احسن لانه معروف اول دفعه لازم اشويه يكون فيها عيوب وخااصه بالسياراات
وبالتوفيق ياارب

[زقم]

جزاكم الله خير

[توفيق البلوي]

ابغى اقولك حاجه وحده
الميكانيكي اللي قالك اذا تسكر الفتحه
يحتر حماااااااااااااار تكرمون


ياخي اي سياره كيف الهوا يدخل من الكفر


الشبك الامامي والفتحات الجانبيه
تكفي
ولا تنسى السياره جديده 2010اصفآآآآآآآآآر


كيف بتحتر


اشتر ولا تشاور غير وجه ربك



النيسان راحه وامان
بعد الله



انصحك استنى 2011 وخذه


وبالتوفيق

[النايف999]

بيني وبينك كان معي لاند كروزر 2008 وبعته ونويت على بطل الدروب ورحت وشفته في المعرض ماشاء الله من داخل روعه لكن لاحظت الفتحات اللي تقول عنها ولا حظت ان الشبك الامامي متقدم بزياده ورحت استفسر عن هالسياره ودخلت موقع نيسان ارابيا وقريت المواضيع ولاحظت فيه بعض الاشكاليات مثل صرفية البنزين في 320 حصان واعطال في المكيف والدركسون
بعدها استخرت وشريت لاند كروزر 2010 والحمدلله ماشي معي 40 الف ومافيه احسن منه
موتر يعتمد عليه ومافيه تعقيدات واذا احتجت في البيعه مايطول
وبالتوفيق ان شاء الله

[مواسي الطعوس]

النايف 999 :

** صرفيته ممتازه جدا لكن هو يكتب ان البنزين انتهى وتولع اللمبه اذا خلص 100 لتر . والباقي يعتبرونه احتياط ....لكن عندنا ناس ماتفهم يحسبونه انتهى لكن بالتجربه تبين لهم انه باقي فيه 45 لتر (اللي هو بمثابة التانكي الاحتياطي )ومع هذا يمشي الى 650 كيلو ...كثر خيره 100 لتر يمشي هذا الممشى ...اعتبره ابداع .
رايح يمشي اقل شي 200 لتر في 40لتر ..650+200=850 وش نبغى اكثر ؟؟؟

** المكيف تبريده 100% بس يبغونه ينفخ بقوه وهو مدروس توزيعه الصف الثالث بعضه موجه للصف الثاني علشان مايصير نفخه قوي على اصحاب المرتبه الثانيه.اما الارجل لازم يوجه عن طريق السائق او الراكب (يعني من الامام).

** كل انظمته مايعرفون لها اصبر فتره ويتعلمون ....مانعرف نقراء الكتالوج ابد ؟؟؟؟

[مالقيت نك زين]

وقفت على هذي .؟

توكل على الله وماعليك من احد اما انك بتسئل فلان وفلانن ثاني تبي تبلش تحتار لين تهون عن السيارات كلهن

اذا تبي شين مايخرب طقلك سيكل !!

خذها نصيحه .: خذ الموتر اذا انت تبيه لاتاخذ شور احد وماهي واقفتن على صاجه والا ربل ولاهم يحزنون

توكل على الله بس

[عاااشق الرمث]

اعقلها وتوكل الموتر مجربه ومافيه خلاف,وذا ما اعتقد انه عيب يمنعك من شراء السياره

[Abo gssar]

نصيحتي لك انتظر الموديل الجاي اكيد راح يتلافون العيوب اللي في الدفعة الاولى

[ابو ناصر 606]

توكل على الله ، اغلب السيارات الامريكية الدفع الرباعي مثل فورد F150 مفتوح الرفرف .

[big boss]

اذا انت راعي بر فر منه فرارك من الاسد
واذا انت راعي مدينه فلاباس فيه


ممكن تعلمنا ليش نفر منه بالبر

[ArMaDa1398]

الله يكتب لك اللي فيه خير اخوي
اعتقد اكثر سيارات النيسان بنفس النظام والواضح لي من ردود الاخوان في المنتدى على موضوعك السيارات القديمه والجديده
انا عن نفسي معي باثفايندر 2010 ونفس الشي المكينه ومواصير الومنيوم اشوفها خلف الكفر ما عليها اي ربل او صاجه تغطيه ولو هو عيب في النيسان ما اعتقد بيسوون نفس الطريقه في الموديلات الجديده والقديمه وفئات غير الباترول من سياراتهم
واعرف كم واحد يثنون على الباترول الجديد وهم كانو من ملاك الاندكروزر ويكفيني شي واحد فيه (ان جميع اكسسواراته اصليه من المصنع) ما ركبو له جنوط تايلنديه ولا ركبو له اكسسوارات صينيه مثل مسخره الارض

[صاحب هواجيس]

أذا ابنجلس نعد عيب في كل سيارة ازهلها ماحد شرا
الإسكويا فرس النهر
والفتشنر كلب سلوقي
وجي اكس ار مو زي اول
الباثفندر شكله غلط
والمدري ايش مابه ونش
اجل نخليها كعابي

يارجل توكل على الله
وإذا تقدر ترهم لا بأس
بس لابد من ايكون عندنا اقتناع بأنه ما كل ما نلاحظه في المواتر يكون عائق دون الشراء
قبل فترة طلع مقطع فيديو لجي اكس ار 2008 جديد وموبش يعني كل الجي اكس ارات مبوشه ؟؟؟
اكيد لا

المعذرة تدخلت وفيه منه اعرف مني بس هذي اشياء انا مقتنع فيها

[خلان الاشده]

توكل على الله ترااه شيخ النيسان
خذلك LE 3 وركب صدام ستي اوبشن

[HENNO]

الإسكويا فرس النهر
والفتشنر كلب سلوقي
وجي اكس ار مو زي اول
الباثفندر شكله غلط
والمدري ايش مابه ونش
اجل نخليها كعابي

صــــح لــســانــك
:D

[أستاذ محتار]

كيف الصرفية كانه يصرف بنزين مثل الأول هج

[مواسي الطعوس]

البنزين من القصيم الى الطائف على سرعة 140 150 توها مولعه اللمبه وش تبي احسن من كذا؟؟؟؟؟؟؟

[monsixnet]

-



تويوتا بلا منازع

قوة ومتانه وشيك

-

[لاندكروزر11]

ونا اخوك الموتر توه طالع يعني يكون فيه بعض العيوب لا تغمر بدراهمك خذ لاندكروزر 2011 وبس اشص واحس وصفات http://www.youtube.com/watch?v=xR5WGPH3q_Q لاحض 220 برابع

[يريور عيمان]

^^^^^^
ليش هو شاري السيارة علشان يسرع و يجيب 220 !!!!!!!!
تفكير غريب

[ابونبيل]

غير اللند كروزر لا تدور جيب ...شي مضمون ومافيه خرابات مثل الباترولات

[الرجم النايف]

والله خذها نصيحه من مجرب

التويوتا وبسسس

ويكفيك عن كلامي لافتحت كبوت الباترول وكبوت التويوتا وشوف الفرق

والله يالنيسان انه غبي وخراباته واااجد عكس التويوتا ..

[راعي المستوي]

والله خذها نصيحه من مجرب

النيسان وبسسس

ويكفيك عن كلامي لافتحت كبوت الباترول وكبوت التويوتا وشوف الفرق

والله يالتيوتا انه غبي

[مواسي الطعوس]

دخلوا علينا اهل شعار تو....... وقط او تو ........وبس. اللي عنده علم يطرحه والخربطه فكونا منها .

[راعي المستوي]

دخلوا علينا اهل شعار تو....... وقط او تو ........وبس. اللي عنده علم يطرحه والخربطه فكونا منها .

اعجبني ردك
انا مثلك ما احب الخثرقة و الخربطة

[معشوقي الصمان]

أخوي أستخر الله وتوكل الموتر ما شاء الله مايحتاج كلام وعليك بv8 حصان400 :good2:

[ALBDRANE]

راعي المستوى جبتها صح...

[الرجم النايف]

راعي المستوي انت ببغاء ههههههه

الله كرمك وخلقك انسسان ..

تكلم زي الاوادم ولا اسكت اكرم لك :)

وباين انك راعي خثرقه من ردك هههههههههه

[بوخليفه77]

مرحبابك اخوي
والله ياخوي ما اعتقد هذا العيب يبطل الموضوع
والله انها سياره صدق وبالاخص الي قوتها 400hb
الله يوفقك
تحياتي

[bmw_07450]

هذا مو عيب لانه موجود في اكثر السيارات وفي الباترول الموديل الي قبله
والموتر خفيف ريشه فما بالك ال le 400 حصان

[راعي المستوي]

اكلت الطعم اخوي الرجم النايف هههههههههههه
شفت ياخوي الرجم النايف ردي استفزك و خلاك تسب و تشتم
وردي مثل ردك ولكن عكست بعض الكلمات
ولم اعصب واشتم و اسب خلق الله
وعموا اذا على الببغاء يردد فأذا هو عند رجال ويسمع علوم زينة و كلام رجال فهذ المطلوب واذا هو عند !!!!! فسيكون كلامة مثل صاحبة.. وعساك تفهم لأنه باين انك شخص تتعصب لرأيك و لا تنظر الناس شي
ولكن انصحك وانصح نفسي و جميع الاخوه : اترك التعصب لأنه يبعد الناس عن بعضها

واحب اهديك هالصورة

http://store2.up-00.com/Dec10/9Nn57231.jpg

[الرجم النايف]

اكلت الطعم اخوي الرجم النايف هههههههههههه
شفت ياخوي الرجم النايف ردي استفزك و خلاك تسب و تشتم
وردي مثل ردك ولكن عكست بعض الكلمات
ولم اعصب واشتم و اسب خلق الله
وعموا اذا على الببغاء يردد فأذا هو عند رجال ويسمع علوم زينة و كلام رجال فهذ المطلوب واذا هو عند !!!!! فسيكون كلامة مثل صاحبة.. وعساك تفهم لأنه باين انك شخص تتعصب لرأيك و لا تنظر الناس شي
ولكن انصحك وانصح نفسي و جميع الاخوه : اترك التعصب لأنه يبعد الناس عن بعضها

واحب اهديك هالصورة

http://store2.up-00.com/Dec10/9Nn57231.jpg


اولا اذا انت ملاحظ انا ماسبيت ولاشتمت قلت انت تردد الكلام مثل الببغاء وهذا الي انت سويته :)

ثانيا انت قلت ماحب الخثرقه وانا فاهم وش تقصد يعني لاتسوي عندي ذكي ياشاطر :)

يعني انا رديت كلامك عليك اذا هو سب فانت سبيت وشتمت نفسك ... :)

ثالثا واخيرا شيل صورة هالكديش الي مهوي بالطعس والي يرحم والديك هههههه :)

[راعي المستوي]

اولا اذا انت ملاحظ انا ماسبيت ولاشتمت قلت انت تردد الكلام مثل الببغاء وهذا الي انت سويته :)

ثانيا انت قلت ماحب الخثرقه وانا فاهم وش تقصد يعني لاتسوي عندي ذكي ياشاطر :)

يعني انا رديت كلامك عليك اذا هو سب فانت سبيت وشتمت نفسك ... :)

ثالثا واخيرا شيل صورة هالكديش الي مهوي بالطعس والي يرحم والديك هههههه :)

اخوي هداك الله
ما معنى ببغاء
اذا ماتعرف ان اقولك يعني : حيوان طائر
وانت قلت اني ببغاء يعني حيوان .... هذا مو سب وشتم!!!

عموما .. الله يصلحك و يهديك
واذا بغيت تكثر مشاركاتك اختر مواضيع و ردود تليق بك وبالاعضاء

[الرجم النايف]

اخوي هداك الله
ما معنى ببغاء
اذا ماتعرف ان اقولك يعني : حيوان طائر
وانت قلت اني ببغاء يعني حيوان .... هذا مو سب وشتم!!!

عموما .. الله يصلحك و يهديك
واذا بغيت تكثر مشاركاتك اختر مواضيع و ردود تليق بك وبالاعضاء


لا لا محشوووم عن الحيوان وكل من يقرى الموضوع :)

بعدين الببغاء طائر جميل ويقتنيه الناااس ودايم نحصله ببيوتهم :)

وان شاء الله اني ماسبيتك ولاشتمتك بس انت الله يهديك باين انك عصبي هههههه :)

طول بالك وروق :)

[بدوي جنوبي]

يغلق الموضوع