لمن لهم الخبرة في الفكسار....(( فقط))

[جرح نجد]

السلام عليكم ورحمة الله وبركاته

صار لي قبل أسبوع موقف مع جيبي لكن الحمد الله سلم الله كنت طالع في البر حوالي 60 كليو لحالي وجيت فوق راس طعس وعينت من الله خير ويوم الشمس راح تغيب وانا أحرك ويوم جيت أنزل من الطعس والموتر يغرز ومثل ماتعرفون دبل الجيب دايم مشبوك وأدعس له والموتر ماهو راضي يمشي وخاست معي الأخلاق وأدق الدبل الثقيل وأحطه بالأول وأدعس للجيب لين الضغط وصل 4 والله ماتقول يبغى يتحرك وأنزل وأناظر :eek: ماصدقت ؟؟؟؟ ولا الجيب رابض في محله والتراب متساوي مع المسند الأقدام وأنتم بكرامه وأقعد حوالي 3 ساعات وأنا أحول فيه لين الحمد الله طالع وألحين يارجال ليش الموتر سوى معي كذا هل الدبل ضعيف حق الفكسار ... ولا كيف لاحد يقول إني محمل والله مامعي غير عزبتي.... أفيدوني يارجال بالله عليكم

[ابا الصلابيخ]

والله ياولد الأجواد ما ادري
يمكن الحساسات جايها رمل
ان شاء الله يفيدونك بقية الاخوان

[كاشخ 24 ساعه]

اذا سيارتك من 2006 وطالع ففعلا الدفع الرباعي مستمر ولكن الموديلات القديمه لابد من تشغيل الدبل

ولكن اخي العزيز اي سياره دفع رباعي يجب ان يتعامل معها السائق بمعرفه وخبره وليس شرط ان شغلت الدبل بتطلع السياره من التغريز

عند تشغيل الدبل الثقيل خل دعستك خفيفه وثابته ودعها تتسارع عند احساساك بخروج السياره من الرمال
ايضا احرص على توجيه السياره للامام ولا تلف بالطاره ابد وانت تطلعها الا اذا بدأت بالتحرك
استفد من اليف لوك فهو فعال عند انحراف السياره او ميولها في التغريز

واخر شي نسم الكفرات وبتطلع السياره بسهوله

اتمنى لك التوفيق

[باسم الرياض]

ماقلت لنا الموديل

لايكون مانسمت بالكفرات
والعزم لو كان ضعيف بعد يغرز الموتر مايفز

[ن م ر]

اذا نزلت في ارض رملية نسم هواء الكفرات الى 20 على أي سيارة كنت

وليس ينفع التنسيم وحده مالم تكن هناك مهارة وخفة سواقه

كثير من الناس عنده اعتقاد خاطئ وهو أنه مدام معي جيب مانيب مغرز

وثق ثقه تامه ان كل تجربة تمر بها في التغاريز تزيدك مهارة

[جرح نجد]

ابا الصلابيخ : مشكور على مرورك الجميل.
كاشخ 24 ساعة : أنزل على جنب الطعس والموتر مايل على جنب الطعس
باسم الرياض :الموتر فكسار 2003
ن م ر : مشكور على النصيحة وكان هواء الكفر 30 يعني ماعليه

[كاشخ 24 ساعه]

موديل 2003 الدفع الرباعي غير مستمر وكان المفروض اول ما حسيت السياره غرزت شغلت الدبل الخفيف وهو زر امامك عليه صوره شاصي باربع كفرات وانا متاكد انك لو شغلته بتطلع السياره بسهوله ولكنك دعست وحفرت الكفرات الخلفيه وغطست اكثر وهنا يصعب طلوعه حتى بالدبل الثقيل

[جرح نجد]

مالك لواء ياأخوي كاشخ 24 ساعة الموتر كم مرة في طلعات سابقة لبغى يغرز من دون أدق الدبل تحرث الكفرات الأربعة ويمشي عاد والله ياأخوي هذا اللي شفته بعيني ماهو تكذيب فيك يا أخوي العزيز.

(http://www.mekshat.com/vb/member.php?u=10603)

[ن م ر]

ن م ر : مشكور على النصيحة وكان هواء الكفر 30 يعني ماعليه





العفو اخوي

30 تعتبر كثير

بعض الأحيان أنسم الهواء حتى 10 ويمشي معك الموتر بدون دبل في الأراضي الرمليه

[كاشخ 24 ساعه]

مالك لواء ياأخوي كاشخ 24 ساعة الموتر كم مرة في طلعات سابقة لبغى يغرز من دون أدق الدبل تحرث الكفرات الأربعة ويمشي عاد والله ياأخوي هذا اللي شفته بعيني ماهو تكذيب فيك يا أخوي العزيز.

(http://www.mekshat.com/vb/member.php?u=10603)


غريبه

انا كان معي 2004 نفس سيارتك وارد البريمي ولا يوجد به دفع رباعي مستمر وصديق لي لديه 2006 وكان موجود به

احتمال اكون غلطان ولكن على كذا الا يوجد لديك دبل خفيف... ؟

[سبتان]

اذا سيارتك من 2006 وطالع ففعلا الدفع الرباعي مستمر ولكن الموديلات القديمه لابد من تشغيل الدبل




ولكن اخي العزيز اي سياره دفع رباعي يجب ان يتعامل معها السائق بمعرفه وخبره وليس شرط ان شغلت الدبل بتطلع السياره من التغريز


عند تشغيل الدبل الثقيل خل دعستك خفيفه وثابته ودعها تتسارع عند احساساك بخروج السياره من الرمال
ايضا احرص على توجيه السياره للامام ولا تلف بالطاره ابد وانت تطلعها الا اذا بدأت بالتحرك
استفد من اليف لوك فهو فعال عند انحراف السياره او ميولها في التغريز


واخر شي نسم الكفرات وبتطلع السياره بسهوله



اتمنى لك التوفيق

مشاركة أخونا كاشح 24 ساعة ظهرت من خبير . فأظن أنها عين الصواب . موفق ياالغالي.

[مفخرة فورد]

عليكم السلام ورحمة الله وبركاته

اخوي كاشخ 24 ساعه
كيف الموديلات القديمة لازم الدبل !
انا عندي موديل 98 جربت الموتر في الرمال وماحتجت اشبك الدبل

[بدوي جنوبي]

ينقل لقسم السيارات

[جيب ربع]

الفكسار من 98 وهو دفع رباعي مستمر ونفس الكلام بالجكسار لكن من موديل 2005 ماعدا وارد اليحيا ووكيل ثاني ناسيه...

[.أبوعبدالرحمن]

في الاساس أن الـ 5 في الهواء الكفرات تفرق


يعني امش بالرمل والهواء 25 ونسم الكفر 20 وامش سترى الفرق واضح خصوصا على بعض الكفرات اللينة مثل الهانكوك

ايضا من الاخطاء الكبيرة ان الضغط يصل الى 4 مع العلم ان الضغط لو وصل 2 ما تحركت السيارة وإذا وصل 5 كذلك ما تحركت السيارة ، ولا بد ان تكون انت المسايس للسيارة وليست السيارة هي المساسية لك انت ، أيضا من اول ان تحس السيارة بدأت تحفر دون أن تتحرك توجه لهوا الكفرات لتنزيله الى 15 كأكثر شيء حتى لا تتعب السيارة ومن ثم التبريح لها وإن شاء الله بعد التوكل على الواحد الاحد ستمشي السيارة كما تريد

[كم كيلو باقي]

30 واااجد بالكفرات .. انا احطه 10وانواع الوناسة

بس لازم آخذ الحذر من السيوف لأجل ماينصلخ الكفر

[YUKON_GMC]

مافهمت عليك زين .. وشلون الضغط وصل 4 والسياره ماتحركت بلاخير لقيتها متعلقه ..

السياره تحركت بس اندفنت وانت مادريت .. وتعلقت ..

دائماً يجب ان تنظر للكفرات وتزود على خفيف حتى تشوفها بدأت تدور كأنك على سرعة 1 بالازرفلت واتركها تدور على الراحه وحتى لو تمشي سرع النمله رايح تطلع لكن لو دارت وقامت تنزل تحت وماتحركت يجب التوقف وتنسيم الهواء الى 10 والتبريح عن الكفرات اللي مدقره وماتدور ..

الموتر الدبل مستحيل يتعلق مع سواق الا إذا غشيم بالتغاريز بيتعلق على جنب الازفلت

[moooj]

الهوا30واجد
اكيد-بيغرز

[البرتقالي]

السلام عليكم ورحمة الله وبركاته
صار لي قبل أسبوع موقف مع جيبي لكن الحمد الله سلم الله كنت طالع في البر حوالي 60 كليو لحالي وجيت فوق راس طعس وعينت من الله خير ويوم الشمس راح تغيب وانا أحرك ويوم جيت أنزل من الطعس والموتر يغرز ومثل ماتعرفون دبل الجيب دايم مشبوك وأدعس له والموتر ماهو راضي يمشي وخاست معي الأخلاق وأدق الدبل الثقيل وأحطه بالأول وأدعس للجيب لين الضغط وصل 4 والله ماتقول يبغى يتحرك وأنزل وأناظر :eek: ماصدقت ؟؟؟؟ ولا الجيب رابض في محله والتراب متساوي مع المسند الأقدام وأنتم بكرامه وأقعد حوالي 3 ساعات وأنا أحول فيه لين الحمد الله طالع وألحين يارجال ليش الموتر سوى معي كذا هل الدبل ضعيف حق الفكسار ... ولا كيف لاحد يقول إني محمل والله مامعي غير عزبتي.... أفيدوني يارجال بالله عليكم



عليكم السلام
دبل الجيب دايم مشبوك هذي معلومة خاطئة جدا اخوي
هذا اسمه الدفع الرباعي التفاضلي لتوازن ممشى السيارة بالازفلت ومايفيدك بالرمل ابد
والدليل انه مانفعك وانت تبي تنزل من فوق الطعس
شغل الدبل الخفيف وتزين امورك

واترك الثقيل للأمور الثقيلات
بس لا تعشقه بالأول تراه يقلب نفسيتك ونفسية موترك ;)

[سفاري959]

موديل 2003 الدفع الرباعي غير مستمر وكان المفروض اول ما حسيت السياره غرزت شغلت الدبل الخفيف وهو زر امامك عليه صوره شاصي باربع كفرات وانا متاكد انك لو شغلته بتطلع السياره بسهوله ولكنك دعست وحفرت الكفرات الخلفيه وغطست اكثر وهنا يصعب طلوعه حتى بالدبل الثقيل




غير صحيح طال عمرك كان عندنا في اكس ار 99 الدبل شابك على طول اتوقع عشان الكفرات هواها واجد واكيد انه في رباضه

[جرح نجد]

مشكورين أخواني كلن باسمه على النصائح المفيدة

[مواسي الطعوس]

انا شريت موديل 99 فكسار قير عادي والله ماتم سنه معي ....تعليق زفت ...قصير على يطول يتعلق ...

** خبرتنا بالنفود طويله وننسم الهواء الى 10 واحيانا اقل ....لكن هو مايفيد فيه . وهذا سر تعلق اهل الباترول في الباترول .

** موترك طبيعي 100 % لكن هذا مستواه في الرمل اذا غرز الله يعينك .