كل ما تريد معرفتة عن الأسيزو والهايلوكس والددسن 2006 تجدة هنا مفصل

[اسيزو 4x4]

السلام عليكم ورحمة الله وبركاتة
هذا موضوع فية مقارنة من كل النواحي بين الأسيزو الديماكس و الهايلوكس 2006 و الددسن 2006 الديزل والبنزين :

وانا طرحت هذا الموضوع بعد بحوث وتحريات من مصادر موثوقة

والذي جعلني أطرح هذا الموضوع كثرة الأسئلة عن هذة السيارات الثلاث

ولهذا أتمنى أن يستفيد كل من يريد أي معلومة عن هذة السيارات الثلات
ملاحظة : أذكركم أن حقوقها محفوظة : لمنتدى مكشات ( أسيزو 4x4 )
يعني اللي مسويها أنا أبو حمود


بسم الله :

اولا : الأسيزو الديمكس ISUZU D-MAX

أولا : المكائن

المكينة 1 – ديزل 3000 سي سي 139 حصان تيربو سوبر شارج 4 سيلندر

المكينة 2 – ديزل 2500 سي سي 125 حصان تيربو داخلي 4 سيلندر

المكينة 3 - المتوقع نزولها مع الدفعة الثانية 2006 وهي 3000 سي سي 180 حصان 6 سيلندر تيربو سوبر شارج

ثانيا : نظام الدبل

زر في الطبلون ( كهربائي ) ولكن ممتاز ومجرب ويستحمل مثل القير.. دفرنس عكوس


ثالثا : المواصفات
1- مراتب مفصولة في LS
2- أي بي أس (ABS ) نظام للفرامل مانع للأنزلاق في LS
3- مصابيح هالوجين قوية ويمكن وزنها كهربائيا أعلى وأسفل
4- وسع المقصورة من الداخل ( أوسع من الهايلوكس والددسن )
5- إيرباق 2 في الفل كامل فقط LS
6- مريحة وإقتصادية وشكل جذاب
7- توفر تيربو سوبر شارج بالمكينة ( وهو اقوى نظام تيربو في العالم )
8- قوتها ونشاطها في النفود وتحملها الحمولات الزائدة بدون أن ينقص أو يطيح عزمها
9- الرساوة على الخط مثل السيارة الصغيرة
10- عدم خروج ادخنة الديزل وهذا ميزة ممتازة بالديمكس
11- تضمن شركة أسيزو موتورز الديماكس من الصدا ضمان مفتوح
12- تماسكها وصلابتها وعدم تفككها بسرعة ..
13- توفر نظام الموازنة بين قوة المحورين وتوزيع الزيت بالدفرنس الخلفي و الميزة بهذا النظام عدم دوران كفر دون الاخر وهذي الميزة تنفع أهل النفود
14- خلوص السيارة 49 درجة ( الدبل )
15- جنوط 16
16- إرتفاع ممتاز ومناسب للسيارة وركوب العوايل
17- كفرات مقاس 245 \ 70 \16 نوع برجستون
18- شفاط للتسخين السريع للمكينة


الالوان المتوفرة :

1- أبيض
2- ذهبي
3- رصاصي
4- عودي
5- سكري
6- أسود ( الدفعة الثانية )
7- بحري ( الدفعة الثانية )
8- كحلي ( الدفعة الثانية )
9- أزرق ( الدفعة الثانية )
10- رمادي غامق ( الدفعة الثانية )

الاكسسوارات :

1- فايبر لأرضية الصندوق
2- فايبر غطاء كامل للصندوق ياباني أصلي
3- أربعة أشكال من الدعامات الأمامية
4- دعاسات جانبية
5- تلبيس إسطبات أمامي وخلفي من لون نيكل
6- كشافات ضباب
7- كتوف خلفية للصندوق
8- شناكير ( عراوي متحركة ) للصندوق

الناقل المتوفر ( القير ):

1- عادي
2- أتوماتيك

الأسعار :

1- فل كامل دبل قير عادي 3000 سي سي 75000 ريال سعودي
2- الدبل السياحي قير عادي 2500 سي سي 61000 ريال سعودي

التجميع : تايلندي >>>> ولكن القطع ياباني ...

صور للسيارة :
http://www.mekshat.com/pix/upload/images10/mk6834_d-max_cav4_2.jpg

http://www.mekshat.com/pix/upload/images10/mk6834_d-max_cav4_3.jpg

http://www.mekshat.com/pix/upload/images10/mk6834_e09.jpg




يتبع .....

[اسيزو 4x4]

ثانياً : الهايلوكس 2006 TOYOTA HILOX

أولاً المكائن :

1- بنزين 2700 سي سي 157 حصان vvt-i 4 سيلندر
2- ديزل 2500 سي سي 121 حصان تيربو داخلي 4 سيلندر


ثانيا : نظام الدبل

قير أرضي دفرنس عكوس


المواصفات :

1- شكل أنسيابي
2- مرتبة مفصولة في GLX
3- صندوق أوسع من السابق
4- جنوط 16 في الدبل
5- نظام جديد للمكينة vvt-i يوفر إقتصاد بالبنزين ولكن يؤثر على قوة العزم
6- أي بي أس (ABS ) نظام للفرامل مانع للأنزلاق في GLX
7- مصابيح هالوجين
8- خلوص السيارة 37 درجة ( الدبل )
9- مريحة أكثر من السابق
10- إرتفاع جيد للسيارة
11- كفرات مقاس 245 \ 70 \ 16 النوع برجستون
12- أيرباق للفل الكامل فقط GLX


الالوان المتوفرة :

1- أبيض
2- ذهبي
3- رصاصي

ألأكسسوارات :

1- صدام ( دعامة ) أسود بلاستيك تجميلي
2- خطوط جانبية
3- فايبر لأرضية الصندوق
4- دعاسات جانبية

الناقل المتوفر ( القير ):

1- عادي

الأسعار :

1- البنزين الفل كامل الدبل 2700 سي سي بــ 80000 ريال سعودي
2- الديزل الفل كامل الدبل 2500 سي سي بــ 78000 ريال سعودي

التجميع : تايلندي >>>> ولكن القطع ياباني ..

صور للسيارة :
http://www.mekshat.com/pix/upload/images10/mk6834_556.jpg

http://www.mekshat.com/pix/upload/images10/mk6834_gt5.jpg

http://www.mekshat.com/pix/upload/images10/mk6834_88ui.jpg




يتبع .....

[اسيزو 4x4]

ثالثاً : الددسن 2006 NISSAN DATSON

أولاً : المكائن

1- بنزين 2400 سي سي 160 حصان 4 سيلندر
2- ديزل 2500 سي سي 133 حصان تيربو داخلي 4 سيلندر

ثانياً : نظام الدبل
قير أرضي - الدفرنس عكوس


ثالثا : المواصفات

1- شكل جديد وجذاب
2- رساوة على الخط مثل السيارة الصغيرة
3- مراتب مفصولة
4- أي بي أس (ABS ) نظام للفرامل مانع للأنزلاق في الفل كامل
5- مصابيح هالوجين قوية
6- جنوط 16
7- خلوص السيارة 46 درجة في ( الدبل )
8- تدخين الديزل قليل مقارنة بالهايلوكس
9- إرتفاع جيد للسيارة
10- كفرات مقاس 245 \70 \ 16 بيرجستون

الألوان المتوفرة :

1- أبيض
2- رصاصي
3- أزرق


الأكسسوارات :

1- فيبر لأرضية الصندوق
2- دعاسات جانبية
3- كشافات ضباب


الناقل المتوفر ( القير ) :

1- عادي
2- أوتوماتك ( الدفعة الثانية )

الأسعار :
1- الدبل السياحي الديزل 2500 سي سي 65000 ريال سعودي
2- الدبل الفل كامل الديزل 2500 سي سي 75000 ريال سعودي

التجميع : ياباني >>>> والقطع ياباني ..


صور للسيارة :
http://www.mekshat.com/pix/upload/images10/mk6834_hhh.jpg

http://www.mekshat.com/pix/upload/images10/mk6834_nissan_pickup_2001_01.jpg

http://www.mekshat.com/pix/upload/images10/mk6834_nissan_pickup_2001_03.jpg



أتمنى أن يحوز على رضاكم يالغاليين ونبي نشوف ردودكم !!

[غيّام]

ابو حمود يامبدع والله مجهود رائع تشكر عليه وتستحق اكثر من خمس نجوم
اشكر لك مجهودك وسلمت اناملك ودمت لنا نافعا ورائد اخي الموفق

احبك في الله اخي الكريم
اخوك
غيّام

[اسيزو 4x4]

السلام عليكم ورحمة الله وبركاته

حيا الله الغالي والنشمي ( غيام )

بارك الله فيك :)

الصراحة ما نجي إلا من بعدك يا بعدي وتشريفك الموضوع يكفيني يالغالي :good:

والطيب ساسك ياراعي الجمايل والأخلاق

ومشكور على مرورك الذي زاد الموضوع تميزاً وإشراقاً .... :)


الله يخلي لك راكان وحمد و أيمن .. آمين :good:

.

[هواوي]

الاخ اسيزو

بيض الله وجهك هلى هذا الموضوع الرائع

رغم حبي الكبير للهايلكس الا انني هنا اعترف ان الددسن اجمل بكثير وبما انه كله ياباني في ياباني فهو بيكون افظل ومن ناحيه السعر فالمفروض الهايلكس ارخص لانه تايلندي ولكن الاحض انه اغلى من العام بكثير ودمتم سالمين

[غضنفر]

امس شفت هلكس 2006 أسود غمارتين مكتم وطاق كفرات خط ومولع السكن والله يا الموتر طالع شي يفررررق عن الأبيض البايخ
ما شاء الله تبارك الله

[اسيزو 4x4]

السلام عليكم ورحمة الله وبركاته

حيا الله الغالي هواوي

شرفت الموضوع يا بعدي

الهايلوكس ممتازة ولا يعيبها انها تجميع تايلندي لأن القطع في الاصل ياباني

وأتمنى لك دوام الصحة والعافية يالنشمي :)


حيا الله الغالي والنشمي black path

حيا الله راعي الفزعات النشمي

يا هلابك يالغالي

شرفت ونورت الموضوع بردك الجميل والهايلوكس الجديد يبيلة شوي دعاية ويمشي :good: :D


.

[السارحي]

السلام عليكم ورحمة الله وبركاته

بارك الله فيك يالغالي ........

وموضوع كله ابداع ...........

سؤال اذا ممكن ايش يعني (( الخلوص )) وش فايدته .....

انا اقول الهايلكس ولا اروع تاخذ العقل بس اللي شفتها بالوكاله ماهي فخمه مثل اللي بالصور......

ولاهنت ........

[اسيزو 4x4]

السلام عليكم ورحمة الله وبركاته

حيا الله الغالي السارحي

أبشر باللي يرضيك يابعدي

الخلوص هو أخر درجة يمكن به أن تتعدى السيارة العوائق والوعر وكل ما زاد الخلوص يكون أفضل وما تتعلق السيارة على طول - وكل ما قل الخلوص زاد خطورة تعلقها ونشبتها في الوعر ...

أذا تبي معلومات أكثر أنا تحت أمرك ..... :)

.

[داب الرمث]

دائما مبدع بابو حمود جزاك الله خير .............

[اسيزو 4x4]

السلام عليكم ورحمة الله وبركاته

حيا الله الغالي داب الرمث

الله يبارك فيك يالنشمي ما نجي إلا من بعدك يا ملك الإبداع كلة

ومشكور يالغالي على مرورك الكريم :good:
.

[صفوق الشمري]

الله يعطيك العافية اخوي وشكرا على المعلومات الرائعة جدا
وتمنياتي لك بتوفيق والصحة والعافية وننتظر المزيد من موضيعك الجميلة


اخوك : صفوق الشمري

[Waleed1]

السلام عليكم

أتقدم الى الاخ راعى الايسوزو بجزيل الشكر وحقيقتاً لقد بذل أخونا مجهود جبار لأعطاء صورة وافية للثلاثة أنواع من السيارات اليابانية، وفى الوكالات ولا أحد أصلاً يعطيك وجة ويقعد يشرح لك.

عموماً يبوا وضحاً لى أن سيارات الايسوزو أخذة فى الشهرة والانتشار وهذا جيد لمنافسة الهلى.

وشكراً

[محب الشمال]

الله يعطيك العافيه
صراحه مجهود كبير

[مشغول]

ما عندي زود على كلام الربع يا حبيبي الايسوزو

الله يزوجك الزوجة الصالحة اللي تعينك على طاعة الله وطلعات البر


مقارنة رائعة

[nahham]

مبدع كعادتك يابو حمود

تستاهل قبله على راسك

مجهود متعوب عليه

ما خليت لغيرك شيء

الشهر عليك مبارك يابو حمود وبارك الله فيك

[salehhd]

مجهود جبار وموضوع متكامل

يعطيك العافية يا بو حمود

[الفشق المتوووسع]

السلام عليكم ورحمة الله وبركاته

اخوي ابو حمود جزاك الله خير عز الله انك ماقصرت ابد. دايم مواضيعك وردودك مميزه جدا لواني من المشرفين

كان مدري وش بسويلك من طيبك (ولا قصور بالباقين).

انت المفروض ان الشركات تعطيك حق الدعايه القويه هذي خاصة شركة اسوزو ونا والله هوجست اشتري اسوزو

الدفعه اللي مكاينها 6سلندر 180 حصان والله مميزات تستاهل. ماهوب مثل بعض الوكالات

اما بالنسبه لشكل الهايلوكس شكله حلو مره ان كان هالصور بتجينا في السعوديه ماتغير فيها شي؟

الشي الوحي اللي ماجاز لي في الهايلوكس صداماته الفيبر.

واما الددسن في خاطري انه شين لكن ميزة انه يابان في يابان مثل ماقال اخوي هواوي تكفيه

على كلن احسنت يالقرم الفطين.

[شمســـان]

السلام عليكم ورحمة الله وبركاته
اخوي ابو حمود ..الحقيقة ريحتنا كثيرا في هذه المقارنة ...والآن بفضل الله ثم بفضلك كل (ن) يختار سيارته وبدون عناء,,
فجزاك الله عنا خيرا

[جو الصمان]

جزاك الله خير اخوي ابوحمود
والله بعطيك العافيه
ويعلم الله اني يوم اشتري ايسزو ديماكس انك احد الاسباب الي شجعتني له

وانا اطالب بتثبيت الموضوع وذالك لتميزه


وشكرا
عبدالرحمن

[أبـ [مطلق] ـو]

أخوي أبو حمود ..

يعطيك العافيه وماقصرت

على الصور والشرح

تحيااتي

.

[ولد سليمان]

السلام عليكم ورحمة الله وبركاته
حياك الله اخوي ابو حمود والله منتب سهل على هالموضوع المتكامل .
كنت اتابع مشاركاتك واشوفها ماتتعدى النص سطر ولكنك ان سويت موضوع تجي جميع ويطلع كامل ومكمل

ودي استفسر عن الايسوزو الي يجي سته سلندر بنزين 3200 سي سي
هل هم مازالوا يجيبونه وهل عدلوا بالمكينه واخيرا هل اقدر ارهم للمكينه لزياده العزم فقط

لاتحرمنا من مثل هالمواضيع الزينه

[غيّام]

ابو حمود اشكرك على ماقلت اما راكان وحمد وايمن فالله يرحمهم ويجعل مأواهم الفردوس الاعلى :(

[الراعي الرسمي]

ما عندي زود على كلام الربع يا حبيبي الايسوزو

الله يزوجك الزوجة الصالحة اللي تعينك على طاعة الله وطلعات البر


مقارنة رائعة

:D :D :good: :good: :good:

[القصيعة]

الله يجزاك خير يأبو حمود دائم مبدع ماقسرت.
لو عندي دراهم شريت اسيزو 2006 أغلب المواصفات فيها حلوة مشكور.
بس بغيت أسئل عن الهايلوكس غمارة ماطلعة , وكانه طالعة تحط لنا صورة لاهنت.


أبو عبدالله.

[اسيزو 4x4]

السلام عليكم ورحمة الله وبركاته


حيا الله الغالي صفوق الشمري

هذا من طيبك يا بعدي

مشكور يالنشمي على مرورك الكريم ..



حيا الله الغالي Waleed1

يا هلا بك يالنشمي والله تستاهلون أكثر وماشوينا إلا الوجب يا بعدي ( وليد 1 )

مشكور يالنشمي على مرورك الكريم ..



حيا الله الغالي البنادر

الله يسلمك يالنشمي

مشكور يالنشمي على مرورك الكريم ..



حيا الله الغالي مشغول

اللهم امين يارب وياك يا بعدي والله يزوج جميع أعضاء مكشات زوجات صالحات تعينهم على طاعة الله وطلعات البر (( للعزاب فقط )) :D

مشكور يالنشمي على مرورك الكريم ..




حيا الله الغالي nahham

يا هلابك يالغالي شرفت الموضوع والله يبارك فيك والله يجعلة مبارك عليك وعلى المسلمين أجمعين

والله يسلمك من كل شر يا بعدي

مشكور يالنشمي على مرورك الكريم ..



حيا الله الغالي salehhd

الله يبارك فيك يالنشمي

مشكور يالنشمي على مرورك الكريم ..



حيا الله الغالي المتوسع

الله يبارك فيك يا بعدي عطيتني أكثر من حقي يالغالي وهذا من طيبك

وهذا ما عهدناه من طيبة أعضاء مكشات النشاما أمثالك يا بعدي

والصدق ما أجي إلا من بعدك أنت ساسك الطيب والفطانة يا سنايدي (ولا قصور بالباقين)

بالنسبة للأسيزو 180 حصان و 6 سيلندر المتوقع نزولها بعد 3 شهور من الأن بإذن الله وهذا كلام مندوب أسيزو يوم قابلتة بالوكالة

وأبشرك الهالوكس مثل اللي بالصورة ولكن الدبل فقط وبيكون بخطوط أيضا ..

وتقبل خالص التحية ...أخوك ابو حمود ...



حيا الله الغالي البـــاجيـــرو

أنت والأعضاء تستاهلون أكثر من هذا - هذا شيئ بسيط من حقكم وحقكم أكثر يا بعدي

مشكور يالنشمي على مرورك الكريم ..



حيا الله الغالي ICM

يا ملا العوافي يا عبد الرحمن يابعدي

ودنا بالتثبيت والله يسمع منك يالنشمي

والأسيزو موتر طيب للناس الطيبين ما شاء الله تبارك الله الله يعطيك خيرة ويكفيك شرة :)

مشكور يالنشمي على مرورك الكريم ..



حيا الله الغالي أبـ [مطلق] ـو

يا هلابك يالنشمي شرفت يابعدي

مشكور يالنشمي على مرورك الكريم ..



حيا الله الغالي ولد سليمان

منور الموضوع بوجودك يالغالي ويا هلا ويا غلا بك

وبالنسبة للأسيزو 3200 البنزين موجود ولكن قطعوة من 2003 يوجد مع شركة الهاتف واجد غمارة دبل بنزين 3200 سي سي

ويمكن بعد كم سنة يبيعون بعظها

ولكن يوجد أفضل وهو جيب أسيزو روديو بنزين 3500 سي سي و 250 حصان و 6 سيلندر .. وقوي وممتاز

مثل الباثفندر بالظبط



حيا الله الغالي غيام

يا هلا بك يالنشمي والله يرحمهم ويرحم أمواتنا و أموات المسلمين والله يجعلهم بالفردوس الأعلى يا كريم يا عليم ياذا القوة المتين وأسف يالغالي إذا بدر مني أي خطاء سا محني ...



حيا الله الغالي الراعي الرسمي

يا هلابك يالغالي توقيعك شي الله يوفقك ويبارك فيك يا بعدي

مشكور يالنشمي على مرورك الكريم ..



حيا الله الغالي القصيعة

يا هلا ويا غلا بالنشمي

الله يبارك فيك يا بعدي

وبالنسبة للغمارة الظاهر أنها نازلة بالرياض ولكني غير متأكد و الصور بإذن الله قريبا بأبحث عنها وبنزلها لك ..

مشكور يالنشمي على مرورك الكريم ..



وكل عام وأنتم بخير وبركة الشهر الفضيل :) :good:

[طخيمان]

والله ما ندري يا بو حمود ما ندري وش نبي نسوي بدونك وبدون مواضيعك الزينة
ولا يهونون الجماعة لكن غريبة ان الاسيزو تجميع تايلندي .

[اسيزو 4x4]

السلام عليكم ورحمة الله وبركاته

حيا الله الغالي أبو الطواري

يا هلا بالنشمي والله أنا مقصر بحقكم واجد ا يابعدي :)

والصراحة انا بدونكم ما ادري وش أسوي :) :good:

وهذا الشي القليل بحقكم وحقكم أكثر واكثر والله يبارك فيك يا أبو الطواري

ومشكور يالنشمي على مرورك الكريم ..

...
..
.

[anas]

شكرا جزيلا اخي ايسوزو على هذا الموضوع القيم .. كفيت ووفيت .. من عناء البحث عن الفروقات حتى في ادق التفاصيل فجزاك الله خيرا .

[الشقردي]

جهد تشكر عليه ولكن عندي سؤال بكم الددسن الفل الدبل البنزين ؟؟

وأقترح لو تكون المقارنة على شكل جدول والمواصفات متراصه جنب بعض .

ولاهنت

[الأعصـــــار]

أبو حمووووووووووووووود الله لايخلينا منك ومن مواضيعك تشكر على هالجهووووووووووود الجباره
وعلى وقتك الثمين الي تخصصه للمنتدى جزاك الله خير ويعطيك ألف عافيه


أنا بصراحه بديت أعشق الديماكس (مو أحب لا أعشق ) حسيت أنه موتر المستقبل فخامه +قوه +أقتصاديه +راحه على حسب كلام شخص مجربها في الوكاله +ماتجيب لك حساسيه في الجيب


بس ماعلمتنا أيسوزو كم قيمة سته سلندر ديزل الي بتنزل ؟



وألف شكر لك مره ثانيه
ونتشرف بمعرفتك أخوووووووووووووك الأعصــــــــــــــــــار

[عاشق هدوء]

الاخ / ابو حمود (إيسوزو) مبارك عليك الشهر الكريم
متميز كما هو عادتك دائماً وتشكر على هذا المجهود الرائع
لدي استفسار بسيط بالنسبه للدسن الدبل بنزين كم سعره حيث انك ذكرت الديزل فقط
وتقبل فائق احترامي

[خلف]

مبروك

المفروض ان الشركة يهدونك سيارة مجانية على ذالجهد ( ... امزح )

نشكرك على هذا المقال
وماقصرة

[فتى التويم]

السلام عليكم ورحمة الله وبركاته

مشكور يا ابو حمود على هذا الجهد وما قصرت كفيت ووفيت بس بغيت اسأل عن السوزو في الرمل هل هو نشمي والا لا

[أبو يوسف]

معلومات قيمة ومتعوب عليها

لكن صورة الددسن كأنها مهب مثل اللي عندنا

وما كتبت سعر البانزين من الدداسن

مشكور ومبروك عليك الشهر

[وادي عبقر]

مشكور ياخ بو حمود ويعطيك العافية
واهل اليابان اذا ماعاد يصنعون ببلهم وش يبون يسوون اخشى لا يكون مثل الامريكان ما عاد يبون يصنعون يبون ينهبون ويسرقون يا دافع البلا تكفينا بهم

[دكتور مكشات]

ما شاء الله شغل عدل ..



موفق ..





ومشكور على التهنئة ...



محبك

دكتور مكشات


Efi4500 سابقاًً :d :d

[شاص]

ماشاء الله عليك مجهود أكثر من رائع لموضوع متكامل .. لاهنت
سمعت أن قطع الهايلكس تايلندي حسب ماشاف أحد الشباب

[(التميمي)]

أفدتنا الله يفيديك يالغالي .. موضوع كامل والكامل وجه الله

[اسيزو 4x4]

السلام عليكم ورحمة الله وبركاته

حيا الله الغالي anas

هذا من واجبنا يا بعدي

ومشكور يالنشمي على مرورك الكريم ..



حيا الله الغالي الشقردي

يا هلابك يالنشمي بالنسبة للددسن الدبل البنزين توقعاتي أنها أرخص من الديزل الفل بثلاث ألاف ولكن ماني متأكد

وأبشر أقتراحك ممتاز الجداول سأحاول في المرة القادمة ولا يهمك ...

ومشكور يالنشمي على مرورك الكريم ..



حيا الله الغالي الأعصـــــار

يا هلابك يا بعدي الله لايخلينا من كلامك الطيب يالنشمي

وبالنسبة للأسيزو 6 سيلندر تقريبا بيكون أكثر وأتوقع بيكون في الثمنينات 86 أو 87 ولكن تستاهل ...

ونبارك لك مقدما ...ومشكور يالنشمي على مرورك الكريم ..



حيا الله الغالي عاشق هدوء

الله يبارك بأيامك يالغالي وتقبل الله منا ومنكم خالص الأعمال

والله يجزاك ألف خير يا بعدي

بالنسبة للدسن الدبل البنزين توقعاتي أنها أرخص من الديزل الفل بثلاث ألاف ولكن ماني متأكد

ومشكور يالنشمي على مرورك الكريم ..



حيا الله الغالي خلف

الله يسمع منك يا بعدي :D

والله يكتب لنا أجر هذا الجهد مانبي سيارات نبي أجر بس :) ولله الحمد

ومشكور يالنشمي على مرورك الكريم ..



حيا الله الغالي فتى التويم

لا شكر على واجب يا بعدي

وبالنسبة للأسيزو بالرمل يطربك و ما يحتاج دبل إلا نادر وبالثاني ما شاء الله وبالراحة يمشي بالنفود مع التنسيم

ومشكور يالنشمي على مرورك الكريم ..



حيا الله الغالي أبو يوسف

حياك الله يا أبو يوسف مالك لوا الصور نفسها 100% :D :good:

والله يبارك بأيامك يالغالي والله يجعلنا من المقبولين

ومشكور يالنشمي على مرورك الكريم ..



حيا الله الغالي وادي عبقر

لا تخاف يا بعدي اليابان ما يصنعون في بلدهم لأن أراضيهم ضيقة ولا تكفي لأنشاء مصانع ولهذا تنشأها في تايلند ...

ومشكور يالنشمي على مرورك الكريم ..



حيا الله الغالي دكتور مكشات

يا هلا بالنشمي وين الغيبات أشتقنا لك يا بعدي

بشر وش سويت بالحنايا ركبتهن على الموتر ؟؟ ولا باقي ؟؟ :good: :)

والله يوفقك يا بعدي ... :)

ومشكور يالنشمي على مرورك الكريم ..



حيا الله الغالي شاص

الله يسلمك ويرضى عيك يا بعدي واجب على خدمتكم ...

بالنسبة للقطع الغيار مالك لوا يا الغالي ياباني ولكن لو تسلم من أبو جميل :)

ومشكور يالنشمي على مرورك الكريم ..



حيا الله الغالي (التميمي)

يا هلابك يا بعدي شرفت الموضوع ونورتة ...

ومشكور يالنشمي على مرورك الكريم ..

أخوكم أبو حمود ..

...
..
.

[حرباش]

شغلك لا يختلف يابو حمود :good:



شغل واكي وترتيب تستحق عليه 10 نجوم مو بس خمس :D


الله يعطيك العافيه وبيض الله وجهك وفي انتضار المزيد من ابداعاتك في التنسيق وتوضيح الامور


بارك الله فيك



مافي مقارنه بين الجي والفتك :D

















<<<<<<<<<<<<<<<<<<<<<<< يبي يتعبك
لوووووووووووووووووووووووول



لاهنت يابو حمود
تحياتي لك ;)

[المطلق]

الله يعطيك العافية

موضوع جدً مفييييييييييييييييد

[النفود الشرقي]

ابو حمود يامبدع والله مجهود رائع تشكر عليه وتستحق اكثر من خمس نجوم
اشكر لك مجهودك وسلمت اناملك ودمت لنا نافعا ورائد اخي الموفق

احبك في الله اخي الكريم
اخوك
النفود الشرقي

لم أستطيع أن أعبر عن شكري لك ووجدت أن الإقتباس أحسن
ومشكور يا أبو حمود

وإسمحلي يا الأخ غيام على الإقتباس




والسلام ختام ..........

[اسيزو 4x4]

السلام عليكم ورحمة الله وبركاته

حيا الله الغالي حرباش

يا هلا بالنشمي والله مشرف ومنور الموضوع يا بعدي :good2:

الله يبارك فيك ويوفقك على هالكلام الجميل يالغالي :)

وأبشر بالمقارنة الفنك و الجي :D أصبرلي شوي ويكون جاهز بإذن الله :) والله أنت تستاهل عيوني يا حرباش :good: :)

وأتمنى لك دوام التوفيق ومبارك عليك الشهر الكريم ...



حيا الله الغالي أبو عبد الله ( المطلق )

يهلا بك يالنشمي ومشكور على مرورك الكريم يالنشمي :good2:

وأتمنى لك دوام التوفيق ومبارك عليك الشهر الكريم ...



حيا الله الغالي النفود الشرقي

الله يسلمك يالنشمي وهذا من طيب قلبك :good:

وأشكرك جزيل الشكر يا بعدي :good2:

ووجود ردك ومرورك بموضوعي يعني لي الشيئ الكثير :)

وأتمنى لك دوام التوفيق ومبارك عليك الشهر الكريم ...


ابو حمود ....

[الوشاح]

كفووو يالذيب...والله يعافيك على المقارنه الاكثر من رائعه :good:

ووالله اني خجلان منك يابو حمود لأني تو ماشفت الموضوع :)

محبك ... ابو صالح

[اسيزو 4x4]

السلام عليكم ورحمة الله وبركاته

حيا الله حبيبنا الغالي والنشمي راعي الجمايل ( أبو صالح ) عريفجان ساحوق

يكفي أنك رديت بالموضوع لأن ردك ينور ويشرف ويميز الموضوع أكثر واكثر يا بعدي :good: :)

يا هلا ويا غلا بك يالنشمي يا زين الرس المدينة الغالية على قلبي ذكرتني بها يا بعدي

وأنشاء الله تظبط الكشتات بالقصيم ومثل ما قلت بالرسالة اللي بالجوال أنا ماني ناسي جايك يا أبو صالح تزهب :D

والله يوفقك ويحفظك ويسر دربك :)

أخوك ومحبك في الله ( أبو حمود ) ...


.

[الببر]

الله يجزاك خير شرح وافي من اخونا ملك الابداع
ويمكن نشري ددسن شكلها أحسن وش رايك بقوتها والانشري تايوتا طبعا ببنزين كلهن وش قلت ابي نصحك

[znede]

السلام عليكم.........................
اقول ابو حمود لو سمحت ممكن تعطيني فكره عن بيك اب النيسان (ددسن) الدفرنشين بنزين و كم سعرها
على فكره بغيت اسألك انا رحت لم الوكالة وشفتها بس يختلف صدامها عن الصورة الي ناشرينها في الجرايد وشلووووووووون؟؟؟؟؟؟؟؟

[الجفن]

]السلام عليكم ورحمة الله وبركاته :
بصراحه هذه اول مشاركه لي في مكشات بصراحه حبيت فقط اشكرك يا ابو حمود على مجهوداتك التي اشاهدها وجميع مشاركاتك وكل عام انتم بالف خير ومبروك عليكم الشهر وعسى الله يعيده على الامه السلاميه .[/B]

[اسيزو 4x4]

السلام عليكم ورحمة الله وبركاته

حيا الله الغالي الببر

ياهلا بك يا بعدي نورت الموضوع يالغالي ....

وبالنسبة لسؤالك أذا تبي ونيت بنزين ممتاز >>>> لاتاخذ إلا(( ددسن)) وإذا تبي ديزل ممتاز >>>> (( أسيزو ))

ابعد عن الهايلوكس الجديدة 2006 ما تنفع أبد ....



حيا الله الغالي znede

هلابك يالنشمي شرفت الموضوع يا بعدي

راجع رسائلك الخاصة ... وأنا تحت أمرك ....



حيا الله الغالي (( الجفن ))

بارك الله فيك يالغالي

ومشكور يا بعدي ولا شكر على واجب

أنا في خدمتك و خدمة الأعضاء والزوار واتمنى أن أكون عند حسن الظن

والله يحفظك ويبارك فيك والله يعيد علينا وعليك وعلى المسلمين هذا الشهر الكريم باليُمن والبركات ...

أخوكم أبو حمود ....


.

[مثبت سرعة]

أبو حمود كفيت ووفيت

[znede]

مشكووووووووووووووووووووووووووور واقصرت
الله يجزاك خير الجزاء

[اسيزو 4x4]

السلام عليكم ورحمة الله وبركاته

حيا الله الغالي مثبت سرعة

نورت الموضوع يا بعدي

ومشكور على مرورك الكريم يالنشمي .. :good:



حيا الله الغالي znede

لا شكر على واجب يا بعدي أنا تحت أمرك

ومشكور على مرورك الكريم يالنشمي .. :good:


:) :D :)
..
.

[abodhem]

والله يابو حمود ما قصرت الان كل واحد يبي يشري موتر يقارن ويختار وتراي انصح باسوزو لأنه اجمل بنظري واوسع وارخص واريح من غيره والسلام

[عاشق ربـع]

مشكووور اخوي ابو حمود

موضوع رائع

بالنسبة لقطع غيار الايسزوزو هل هي غالية؟؟؟

[حر اليدين]

يعطيك العافية اخوي ابو حمود
بصراحة وفرت علينا لفلفة عشان نشوف وش الجديد بالسيارات
واضح من كلامك انك من هاوين سيارت الدفع الرباعي
لانك ماقمت تفصل عن العايدية

حر اليدين
تقبل تحياتي

[1001001]

مشاء الله

مجهود تشكر عليه

وكثر الله من امثالك بهل منتدى العملاق

وشكراً لك

[الربذي]

السلام عليكم
اخوي ابو حمود من العايدين والفايزين تقبل الله منا ومنكم صالح الاعمال
جهود كبيره من عضو عملاق له باع طويل وخبره عن سيارات الدفع الرباعي
بصراحه كفيت ووفيت
وكل شي حتى الاسعار
لكن انا معجب بالددسن بصراحه شكله رزه ورهيب وخيال ياترى نزل عندنا مثلها او لا بصراحه تكسر سوق الايزوزو لو تنزل (ياهه !!! عزلنا ابو حمود لالا ااقصد الهلي !!! بصراحه انت مدافع وقلعه حصينه بوجه الاعداء له اسيزو !!!
بس تبي الصراحه انت روعه
وتسلم وموضوع مسكت لم مجال لتساؤءل او فقره بدون اجابه
محبك

[اسيزو 4x4]

السلام عليم ورحمه الله وبركاته

كل عام وانتم بخير ومن العايدين الفايزين

حيا الله الغالي abodhem

اشكرك اخوي الغالي على مرورك الكريم وشهاده اعتز بها


حيا الله اخي الغالي عاشق ربـع

اشكرك على مرورك الكريم وبالنسبه لقطع غيار الاسيزو فهي ارخص من التويوتا وبامكاني اثباتلك ما قلت وانت اسأل وقارن عن ( سيفون الزيت - فلتر الهوا - فلتر الديزل ) وانظر مالاغلى هل هي الاسيزو او الهلي وستلاحظ ان الهلي اغلى



حيا الله الغالي حر اليدين

اشكرك على مرورك الكريم وفعلا انا من هواة الدفع الربع وما كتبت عنها الا لانها من تخصص اعضاء مكشات واستخداماتهم



حيا الله النشمي 1001001

اشكرك على مرورك الكريم نورت صفحتي بردك



حيا الله اخوي الغالي ابو وليد ( الربذي )


ياهلا والله بهالطله وكل عام ونت بخير ومن العايدين الفايزين

والددسن موجوده ابو وليد

وتسلم على مرورك يالغالي اتحفتنا

ولاتحرمنا وجودك

محبك في الله ابوحمود ذابح القعود ومن كرم ربه يجود



ابوحمود

[غريب الدر]

ماشاء الله تبارك الله موضوع مرتب صح والله يجزاك خير لان موضوعك حل الشكال عندي مابين الهايلوكس والأسيزو

[نيشان نجد]

مشاء الله

مجهود تشكر عليه
والله لايحرمنا من جديدك

[ذيب حضن]

أخي الكريم اسوزو 4*4
ذكرث الاكسسوارات الخاصة بالاسوزو وين القاها
ثانيا هل هناك فرق بينه وبين الموديل السابق 2005 من ناحية المحركات
وبارك الله فيك وفي ايامك

[العودالازرقhk]

السلام عليكم ورحمة الله وبركاته
الله يعطيك الف عافيه وماقصرت
بس عندي سؤال هل هددسن عندنا موجود ولا بينزل قريب
والسلام عليكم ورحمة الله وبركاته........

[اسيزو 4x4]

السلام عليكم ورحمة الله وبركاتة ...


حيا الله الغالي غريب الدر

شرفت الموضوع يالغالي وشهادتك أعتز بها وبارك الله فيك يابعدي ...



حيا الله الغالي طير شلوا

يا هلا بك يالنشمي ومشكور على مرورك المشرف ....وبارك الله فيك ...


حيا الله الغالي ذيب حضن

الأكسسوارات عند الوكالة أو الغرابي ولا يوجد فرق بالمكاين يالغالي وبارك الله فيك يالنشمي ....


حيا الله الغالي العود الأزرق hk

نعم الددسن موجود الأن عند الحمراني وحياك الله يالغالي ومشكور على مرورك المشرف بارك الله فيك ...


أخوكم أبو حمود ....


...

[r89070]

في حد يفيدنا اذا كان الجير الاوتاميتيكي يباع في الامارات بالنسبة للنيسان والاسيزو

[بعيد الهقاوي!]

الله ينطيك الف عافية وما قصرت يالغالي:)

[اسيزو 4x4]

حيا الله الغالي r89070

يا هلا ويا غلا بالنسبة للقير التوماتيك الأسيزو موجود ...بالأمارات ...



حيا الله الغالي بعيد الهقاوي !

حيا الله النشمي نورت الموضوع وتشرف بزيارتك الكريمة ....وبارك الله فيك ....


... أبو حمود ...

ـــــــــــــــــــــــــــــــــــــــــــ

[ابن اسلوم]

الاخوة الاعزاء
ما هي افضل كفرات للخطوط الطويلة جنط 15
ما هي القياسات لو تكرمتوا

[ربيق]

بارك الله فيك
جهدك يا بو حمود
يذكر فيشكر
الله لا يهينك وما قصرت

[مراسل وراط]

الله يطيك العافيه

[salehhd]

السلام عليكم

اخي ابو حمود

استأذنك في نقل هذا الموضوع الى منتدى السيارات مع العلم بأني اشرت انه تم نقلة من هذا المنتدى واشرت انك انت كاتب الموضوع

http://www.assayyarat.com/forums/showthread.php?p=860041

وفي حال وجود اي مانع سأقوم بكل سرور بحذف الموضوع وشكراً

اخوك صالح

[اسيزو 4x4]

السلام عليكم ورحمة الله وبركاتة .... حيا الله النشاما ...

حيا الله الغالي أبن اسلوم

يا هلا ويا غلا أنصحك بالتويو والميشلان والدنلوب كلها طيبة ....



حيا الله الغالي ربيق

يا هلا وغلا بالنشمي نور الموضوع بوجودك يالغالي ومشكور على مرورك الكريم ....



حيا الله الغالي مراسل وراط

الله يعطيك العافية وبارك الله فيك ...



حيا الله الغالي salehhd

يا هلا بالنشمي شرف لي أن تنقل موضوعي بإسمي يالغالي والموضوع وراعي الموضوع تحت أمرك يا بعدي وخذ راحتك يالنشمي .....


أخوكم أبو حمود

[salehhd]

السلام عليكم

جزاك الله ير يابو حمود وهذا والله الرجا فيك

بارك الله فيك

[اسيزو 4x4]

يا هلا بالغالي salehhd
والله خيرك سابق يالغالي ونت راعي جمايل ومانجي إلا من بعدك يالنشمي وبارك الله فيك


....

[محمد السبيعي]

يعطيك الف عافيه يابوحمود

موضوع يستحق الاشاده ومقارنه شبه معقوله :D :D ;)


ولكنك نسبت اهم نقطه في الموضوع


قطع الغيار

[خالد20]

يابو حمود
ما خلان
اجزم على الاسوزو
الا انت
والحين ما اقول
الا
الله يجزاك خير ويسمح دربك

[الطعس الذهبي]

الله يبيض وجهك

[اسيزو 4x4]

السلام عليكم ورحمة الله وبركاتة ....



حيا الله الغالي أبو عبد الله ( محمد السبيعي )

يا هلا ويا غلا بالنشمي ..ونورت الموضوع يابعدي ...:good2:



حيا الله الغالي خالد 20

والله أنت تستاهل الطيب كلة يالنشمي :alarm: :good2:



حيا الله الغالي الطعس الذهبي

الله يعافيك ويبارك فيك يالنشمي :good:



أخوكم أبو حمود ...

[س هـ ى دماكس]

دماكس وبسسسسسسسس

اسأل مجرب !!!

[عمار السفينه]

ولله ماقصرت ياأبو حمود ,, بس وش تشور علي أشتري 2006 ولا أنتظر 2007 وهل هو بيتغير

[القماري]

يعطيك الف عافية يابو حمود على هذا الرصد المتقن
الف شكر

[الحسي]

مبدع ياابو حمود


شكرا لك

[الحسي]

مبدع ياابو حمود


شكرا لك

أهم ميزة
القير الأتوماتيك

واسأل مجرب

[خير المزن]

السلام عليكم.............
الشكر للأخ على هذا التصنيف.
فيه ملاحضة على الهايلكس 2006
يذكر في الساحة أن 20 سيارة من الهايلكس إحترقت في السعودية وذلك لأن مافيه عازل صاجة بين القير و خزان الوقود

[rehaam88]

وين المازدا و الميتسوبيشي اضافه الى الفورد والجمس الحجم الصغير؟

[rehaam88]

:D [QUOTE=rehaam88]وين المازدا و الميتسوبيشي اضافه الى الفورد والجمس الحجم الصغير؟........................................... .؟:D

[عزااازي]

الله يعطيك العافية

[majidmy]

موضوع رائع يالغالي بس انا افضل عايهن الحوض للبر طبعا لان القيمه غاليه جدا لكل السيارات المذكوره يجبن لك حوض 85000 ريال زودها شوي وتاخذ سياره على كيف كيفك للبر

[كلرز]

اخ اسيزو عندي ملحوظة الددسن 60 الف الدفرسين الدفرنس 40 الف حسب ما سمعت من اصحاب الددسن

[القويعي]

يعطيك الف عافيه اخوي

[الصاروخ]

لله يعطيك العافيه على هذي المعلومات

تحياتي لسوزو

[ذيبان نجد]

مشكور يا أبـوحـــــــمـــــود

[ذيبان نجد]

مــــــشـــــكور يــــــا أبــــــــــــــــــو حــــــــــــــــــــمـــــــــــود على المــــــعلومـــــــات
بـــــس أنـــا عندي الددسن أفضل
ذيـــــــــبان نــــــــــــــجد

[باترول أسود]

الله يعطيك ألف عافيه.....
ماقصرت أخوي أسيزو4×4
.
.
.
.
.

[ابوقاهر]

السلام عليكم
اولا يعطيك العافيه على المعلومات الجيده
وانقول ثانيا هل يوجد سياره في الوكاله لتجربه

ارجو الرد السريع وشكرا----------

[جمس قطعه 10]

أبسألك الله لايهينك ياأبو حمود الدميكس من متى مبدأ الشكل الجديد أنا ابغا من موديل 2003 وتحت ماأبغا دفرنسين دفرنس وبنزين وش رأيك واسعارهن كم

[salehhd]

السلام عليكم

موديل 2007 وصل وشكلة مختلف عن الموديل القديم اختلاف كبير

فلا تستعجل في الشراء وتراه موجود عند الوكيل لاكن حاطينة في المستودعات علشان يصرفون القديم

وغير كذا سعرة اقل من القديم

[ع العمرو]

http://gotolive.googlepages.com/15027319.gifمشكور على مجهودكم الطيب وماقصرت

[االديحاني]

بارك الله فيك

[خلاوي3]

الله يعطيك عافيه أخوي
لكن الى الآن وأن محتار
بين الديمكس والهايلوكس والددسن
لكن فيه ناس يمدحون الديماكس وناس يسبونه نبي الي جرب الديماكس يعطينا رايه وتجربته بصراحه وهل الى الأن معه الموتر والا لا
طلب عاجل للخوان الأعزاء
:j

[اسيزو 4x4]

السلام عليكم ورحمة الله وبركاتة ...

أسف لتأخري بالرد .. لظروووف ..

بالنسبة للي يسأل عن تجربة الديمكس أنا مجربة الموتر نشيط جداً ويزبن بالبر ولا علية ملاحظات أبد ...

والهايلكس ممتاز وعيوبة تلافت من تالي ولا علية غبار .. لكن لو يسلم من خرابيط أبو جميل...

الددسن ممتاز ولا علية مشاكل لكن 2008 نزل نفادا وصار تايلندي مثل الهايلوكس والسوزو ..

والله يكتب للمسلمين كل خير ...

ومشكووورين على ردووودكم الطيبة واللي نورت الموضوووع وزادتة تألق :)

أخوكم أبو حمود :cool:

[VTC]

السلام عليكم ورحمة الله
اخوي اسوزو بارك الله فيك النيفارا امريكي وليس تايلندي على حسب كلام الوكالة
والددسن الديزل من 2006 وطالع تيربو خارجي ويعطي 161حصان على حسب كتلوج السيارة

ووجهة نظري في الايسوزو الديزل من واقع تجربة 2003 و2005 الموتر نشيط والشكل حلو ولاكن الموتر فيه مشاكل كثيرة في الدبل والكهرباء والسوبر تشارج حقه غثيث
وهذا من واقع تجربة

اما الددسن الديزل انا ماجربته بس اثنين من الربع معهم 2006 و2007 ومن الناس الي ماترحم المواتر وراعين قنص ومكاشيت ورعين طيور وواحد منهم شاريه عقب الدماكس واسئلهم عن الموتر يقلون لاتنشد عز الله انه موتر بس عيبة انه مايجي تماتيك
والله اعلم

[الشاطر ماطر]

مجهود رائع تشكر عليه

[جب هآت ود عط]

انا اتوقع انا الهايلكس اصرف من غيره وغيره وغيره من واقع تجربت الموتر في زفلت وبر وتقبل مروري

[drhamad]

الصراحة يا أخوان أنا ولائي للددسن وبس , الله يعطيك العافية وانا أخوك

[هبوب الصبا]

لمزيد من التفاعل

[هبوب الصبا]

مين يعطينا ارقام العيسى واليمني للسيارات في الرياض

الله يعطيكم العافيه

[هبوب الصبا]

وباخشب الله يعطيكم العافيه

[مواسي الطعوس]

الصراحة يا أخوان أنا ولائي للددسن وبس , الله يعطيك العافية وانا أخوك

***********************
***********************

** اذا تبغى ديزل لاتتعدى الددسن . افضل من الددسن البنزين بكثير .

** اذا بنزين الهايلكس افضل من الددسن الشكل الجديد .

[ذيب زلفاوي]

اولا اشكرك على مجهودك
ثانيا ليش ماحطيت قيمت الددسن البنزين

[تميراوي55]

مشكور أخوي على المجهود

بس نسيت الميتسوبيشي؟

[هبوب الصبا]

الديمكس وبس

[ملف علاقي]

سمعت انا انهم يقولن يبون يخلون حقين سيارات الديزل مايخشون وسط البلد إلا بعد الساعه 9 مثلهم مثل المعدات 0 هاهاهاها 000 تحياتي لك واشكرك علي الأبداع 0

[هبوب الصبا]

لعلمك اخ ملف علقلق

سيارات الديزل صديقة البيئة وروح تأكد ..

[شاص1988]

اسوزو الديمكس موتر مشالله عليه ذيب وين ماتبي يوصلك ونشيط في البر وتى قطعه ياباني مهب تايلندي الهم الشد تايلندي يعني تجميع فقط

[بو الجموس]

شباب تمدحون لي ددسن او هايلوكس
ووش افضل اخذ جديد ولا مستعمل
وافضل موديل وسعره حلو بما اني طالب معروف بتكون الدراهم اللي معي مو ذاك الزود
بس ابي رايكم لني قريب اشتري ومحاتر

[هبوب الصبا]

اخوي ابو الجموس

خذ لك ديمكس 3 لتر ومابتندم
طع شوري
دبل وحجم كبير للمحرك ومواصفات
من العيسى احسن واجد

[azd]

السلام ع
وبسال الشباب
عندى وانيت اسوزو 6 سلند وخزان البانزين صقير 50 لتر فى هل ننصحونى بعمل خزان كبير مكان الموجود الصقير
قصدى ليس الخزان فى الحوض قصدى الخزان تبديل الموجود بخزان اكبر
واسال عن الاسعارالخزانات
وهل فى موقع نشترى منه خزان كبير

[azd]

للرفع---------

[خزان الوادي]

الاخوة الاعضاء

ويسرنا دعوتكم للمشاركة فى مسابقة خزان الوادي الشهرية لافضل 3 مواضيع , على الرابط :

http://www.mekshat.com/vb/showthread.php?t=253688

مع تحيات ادارة
خزان الوادي

[gbl4gt]

السلام عليكم جميعا
أنا رجل متعصب جدا لتويوتا وجميع سياراتها......
لي من العمر فوق الخمسين وجربت كثير من هذه السيارات في عمري من الكورولا الى ال Vxr والحمد الله لم أندم على شرائي أي سيارة من تويوتا ...سواء أيام الياباني أو التايلندي حاليا.
ولكن الحكم النهائي في هذا الأمر هو السوق !!!!!!!!!!!!!
نعم السوق.... ليس رأيي وليس رأي صاحب الايسوزو أو النيسان .. أو غيرها . بل السوق ..
يعني الميدان .. ياحميدان..

روح المعارض وقارن بين أسعار هذه السيارات من ذات الفئة وسوف تقتنع ..

أكثر من ذلك .. حاول تدور لك على سبيل المثال هايلكس مستخدم ونظيف بقيمة معقولة. ...

أنا متأكد أنك ان وجدت .. فسوف يكون بقيمة الجديد تقريبا..
أما الأنواع الأخرى فستجدها على (قفى من يشيل) ... ليش؟؟؟؟؟ الناس ماهي أغبياء .. ولاهي لها قرابة أو مصلحة مع أبو جميل لامن قريب ولا من بعيد ( بما فيهم أنا والله على ما أقول شهيد)........ ولكن الجودة تفرض نفسها.. والله في كل الظروف . ..طبعا ما أبغى أذكر أيضا توفر قطع الغيار وسهولة الصيانة لو تعرضت لعطل في منطقة نائية... ( روح دور طرنبة الديزل للايسوزو أو حتى الفلتر)!!!!!!!!!

التويوتا وبس .............في نفوذ والا في جبال والا في أي مكان ..
من وين الناس اللي أفتت ان التويوتا تنفع في النفوذ ولا تصلح في المناطق الأخرى أتوا بمعلوماتهم ؟؟؟ نريد مصادرهم والأبحاث والتجارب التي استندوا عليها !!! لأن هذه أمانة !!!!

ختاما .....
والى آخر لحظة في عمري أنصح وأقول ...

تويوتا وبس !!!!!!!!!!

تحياتي..

أبو ثامر

[700]

الاخ ابو حمود السلام عليكم ورحمة الله وبركاته حبيت اسئلك وش الافضل بالنسبه للهايلكس الديزل مقارنه مع الايسوزو وكلها غماره علمأ اني حاجتي للسياره بالغالب حاجة عمل تقريبا في مزارع وكذا ودي اعرف وش الفرق بينهم ووش اللي افضل للاستخدام .... وشكرأ

[هبوب الصبا]

الاخ ابو حمود السلام عليكم ورحمة الله وبركاته حبيت اسئلك وش الافضل بالنسبه للهايلكس الديزل مقارنه مع الايسوزو وكلها غماره علمأ اني حاجتي للسياره بالغالب حاجة عمل تقريبا في مزارع وكذا ودي اعرف وش الفرق بينهم ووش اللي افضل للاستخدام .... وشكرأ


ابجاوب عن ابو حمود
لا مقارنة بين التويوتا ديزل والايسوزو ,,,, لصالح الاخيرة طبعا
وبالتوفيق

[700]

مشكور وتسلم اخوي صبا نجد على الرد ولاهنت وابي اضيف ان السياره اللي ابيها غماره وحده وبدون دبل وودي التووضيح وش النواحي اللي هي افضل فيها بالنسبه للايسوزو وشكرااا لكم

[700]

عفوووا اخووي نكك هبووووب الصبااااا وانا غلطت فيه

[أبوجاسرالتميم]

مشكور على الموضوع يالغالي