رفع اللاندكروزر

[عاشق المزون]

السلام عليكم

يااخوان ابي ارفع موتري ذبحني بالحكحكة في البر والنفود معي Gx نفس الى في التوقيع

وشاورت ناس يقولون ركب كعكات بس المشكلة انها ترفع الخلفية وينزل من قدام ابي شوركم ياشباب واذا تنصحوني بشي مجرب ابيكم تعلموني وين اركبة فية في الرياض وشكرا

[ع.ف.الدرويش]

أنا أنصحك بتركيب يايات إسترالية إرتفاع 4 أو 5 سم حمولة 200 كيلو.. أفضل وأضمن من الكعك
لأني سألت واحد معاه باترول مرتفع عن الكعكات ما أثني عليها.. والبيايات ينصح فيها والموتر اللي معاه تمام
اليايات متوفرة لدى الرمايــــة على الطريق التخصصي بالرياض قبل البنك الهولندي

[aziz2727]

موضوع جيد
وياليت اذا في احد الاخوان ركب اليايات يفيدنا فيها واذا كان في صور افضل وافضل .
مع تحياتي للجميع

[عاشق المزون]

مشكور اخوي ع.ف.الدرويش على المعلومة ونتظر نجارب الاخوان الاخرين

طيب هل اليايات ترفع الموتر كثير( ابي اركب الموتر بسلم :)) طيب اذا شريتهن من الرماية وين افضل مكان للتركيب

[النجم الهاوي]

ايو الله حتى انا معي جيب 2005 يحك معي في البر

حتى السبير غيرته وركبت سبير كفر بالون صغير والجنط شنبر

بصراحه خف الحك بالرمل بس لازالت السياره نازله

ياليت يطرحون الاخوان تجاربهم علشان يستفيد الجميع

[اسيزو 4x4]

والأسيزو اللي معي ودي أرفعة هل أحد عندة معرفة أو يفيدنا لا هنتوا يالنشاما جايك الخير با عاشق المزون 100%


.

[الفشق المتوووسع]

السلام عليكم ورحمة الله وبركاته

يااخوان انا انصحكم باليايات الاستراليه بعد اشوف الربع وغير الربع طايحين فيهن

ترفع الموتر لحد طيب ويمكن يكون خطر شوي فأنتبهو الله يحفظكم.

اخوكم (الفشق المتوووسع)

[غضنفر]

وانا بعد ابي ارفع الباثفايندر (وش رايكم نروح مع بعض :D ) بس من دون تغيير مساعدات لأن المساعدات شد البلد تجي مريحة وغيرها يمكن ما يركب مزبوط ويحتاج ترهيم وشغلات

[الفشق المتوووسع]

السلام عليكم ورحمة الله وبركاته

اخوي black path واحد من الربع معه gx 97 مركب يايات استرالي مطب موتره الين من شد بلاده

لكن وش مقاسهن مدري والله.

اخوك في الله (الفشق المتوسع). :)

[غضنفر]

المتوسع الله يوسع عليك دنيا وآخرة
ما قصرت وشكل مالها الا يايات استراليا

[عاشق المزون]

الله يعطيكم العافية على الردود الى توسع الصدر :)

وفعلا انا مع كلام اخوي black path لا تغير المساعدات لان شد البلاد اريح واحسن كل مصنع محدد وزن السيارة ومعطيها مساعدات على وزنها محد عارف للسيارة مثل المصنع .

شكل مافيه غير اليايات الاسترالية !!!!!!!!
طيب وين ممكن اركبهم فية على حد علمي الرماية ماتركب بس ابي فلبيني وسيع صدرة :)

[غيّام]

ياراعين الجيوب اذا كنتو مابعد ركبتوا يايات استراليه فتراكم مابعد جربتوا الراحه والركزه عجلوا تداركوا ما تبقى من عمركم وركبوا يايات بسررررعه يالربع :D اللي يسمعني يقول هاذا فاته صيام رمضان الله يخلف بس

ابو حمود طول اللعابات ويرتكز موترك ويطلع عليه منظر ما ودك تصد عنه وانا اخوك وعلى فكره ترى قد طلعنا على موتر مثل موترك للرمله والصدق انه اثبت جدارته وماشاء الله تبارك الله

[ع.ف.الدرويش]

السلام عليكم ورحمة الله وبركاته

لمن إستفسر عن المقاسات توجهت قبل كم يوم إلى الرماية للإستفسار
فبين لي بأن اليايات أنواع منها حمولة 150 إلى 200 كيلو
وأما السيارة فيمكن رفعهــا عدة درجة تتراوح ما بين الـ1سم وحتى الـ5 سم
طبعاً محل الرماية كما ذكرت موجود في الرياض - طريق التخصصي - بين البنكين الأمريكي والهولندي
بالنسبة لتركيب القطع فيكون في مركز صيانة تابع لهم على نفس الطريق لكن بعد نفق النقل الجماعي
التكلفة اليايات 500 ريال تقريباً التركيب 140 ريال
.
.
نصيحة لكل من أراد رفع سيارته أو جعل حمولتها أكبر بتغيير المساعدات أو اليايات..
ذكر لي أحد الزملاء كتنبيه.. بأن كل سيارة دفع رباعي مزودة بـ منظم خلفي يعمل على موازنه حمل السيارة والفرامل الخلفية بحيث تزيد درجة الحماية بإذن الله ( جل شأنه ).. وبين لي بأن زيادة درجة الإرتفاع بالإضافة إلى الحمولة قد يؤثر على عمل الجهاز تأثير سلبي ومن هنا أقترح أن يتم مراعاة عدم رفع السيارة بدرجة كبيرة حتى لا يتأثر عمل هذا الجهاز ويحدث الضرر بذلك.. وإن تم رفع السيارة يجب فحص الفرامل وكيفية عملها.. بالطبع تكلفة هذا الجهاز تصل إلى 1200 ريال.. ولذلك جرى التنبيه

هذا كل ما لدي وأتمنى أن تصل الفائدة للجميع.. دعواتكم

أبو فهــد.. ;)

[الشقردي]

هل موترك يحك اذا كنت محمل, ركب بالونات هواء
هل موترك يحك بتحمل ولا بدون تحميل , يمكن يكون عندك مشكل في اليايات او المساعدات أو ان طبيعة السيارة نازلة من الاصل

الصراحة أنا ماقد جربت اليايات الاسترالية, وأسمع كثيرين يمدحونها لكن في رأيي انه تصلح أكثر لراعين المقانيص اللي يمشى ورى الطير ولا يناظر الارض, جاه جرف و شعيب (هذي قوية شوي) ياكله ولا يهتم

لكن حسب تجربتي معي VXR98 وانا راعي مكاشيت ولا نيب من اهل المقانيص ومركب بالونات ومرتاح لأني ما أشتكي من نزول السيارة الا اذا حملتها
وطريقتها انك تنفخ البالون قبل التحميل الى 25 تقريبا وتحمل ويكون ارتفاع الموتر كأنه ما حمل واذا قضيت من مكشاتك ولا من التحميل تنقص الهواء الى 15
وأما من ناحية المطب فهو ما تغير علي أبد, الا طبعا اذا خليت الهواء 25 والسيارة ما حملت فهو يقسى شوي

وبالمناسبة يركب على أكثر من نوع منالسيارات ومن ضمنها الباث فيندر

وترى الموضوع طرحوه الشباب اكثر من مره انظر الرابط
http://www.mekshat.com/vb/showthread.php?s=&threadid=4818
http://www.mekshat.com/vb/showthread.php?s=&threadid=8892

[عاشق المزون]

مشكورين ياشباب على المعلومات المفيدة

طيب اذا بغيت اركب يايات احسن شي ارتفاع كم 5 سم كويسة او اقل او اكثر

[اسيزو 4x4]

السلام عليكم ورحمة الله وبركاته

يعطيكم العافية على التفاعل أنا أشهد انكم راعين فزعة

( أخوي غيام يا ملا العوافي الدوافي يا الغالي )

علومك يالنشمي غيام عساك طويب مع رمضان :good: ;)

الله يجعلنا من المقبولين والمغفور لهم في هذا الشهر الفضيل يارب

بالنسبة للعبات يابعدي هي اللي تجي مع السست ؟؟؟ وتجي لها مفصلتين ؟؟ وكم يرفع سم الله لا يهينك أكيد غثيتك ولكن أستحملني لاني خابرك راعي فزعة وما نستغرب من نشمي مثلك الطيب والشهامة ... ;) :D

أخوك أبو حمود غثيث لكن أستحملة ((( المتكلم : مدير مكتب أبو حمود ))) :D

لاهنت يا بعدي ....

[عزيز نجد]

السلام عليكم ورحمة الله وبركاته
شباب انتبهو رجاء
استخدام الياي الاسترالى اكثر من رائع (طبعا انا اتكلم عن الاندكروز الجداد 98 وفوق)
انا لي تجربه فيها على لاند كرووز 2002 ابحاول اوضحها لكم كلها

لكن المهم الان انك تأخذ الرقم المناسب لاستخدامك ولا توهق بإرتفاع او قوه ما تحتاجها وتقع في نفس الخطأ الي وقعت فيه انا

عموما ابحاول الليلة اعقب على الموضوع بتفصيل اكثر واعلمك الرقم المناسب لك ان شاء الله

[حـاتـم]

انصحكم بالياي الاسترالي تراه مريح جدا وش راحه الوكاله عنده

الياي الاسترالي قمه الراحه

وكلام اخوي عزيز نجد صح ميه بالميه لان واحد من ربعي
توهق وركب وحده رفيعه مره وقويه متنزل على باترول 88 طلع يهفهف

ويروع بالخط انتبهوا

وشكرا


اخوكم /حاتم

[aziz2727]

موضوع جيد ومهم
بس السؤال :
في احد مركبها على جيوب اللاندكروزر من مديل 2000 وطالع ؟؟
اذا في احد ياليت يفيدنا عن :
- مطب الموتر
- الراحه .
- اختلاف القيادة بعد تركيب الياي .
- المقاس الي ركبه .
- كم الرفع على السيارة ؟ وهل عند تحميل السيارة وخاصه اللاندكروزر كما يعلم الجميع انه يهزع هل اختلف عليه الوضع بعد تركيب الياي ؟ يعني ما زال الموتر ينزل معه والا لا ؟

[عاشق المزون]

الله يعطيع العافية اخوي ابوحمود والله انك راعي فزعات تكفون شباب الارتفاع المناسب للاند كروزر
وشكرا لجميع من شارك في الموضوع :D

[الرسام]

السلام عليكم ورحمة الله وبركاته
يا الربع اعرف ثلاث من الشباب راعين كشتات و مقناص مركبين يايات استراليه بارتفاع 5سم
والسيارات هي باترول ولاند موديل2001,و2003 مرتاحين منها ولكن تراها تتحمل اكثر من اليايات الاصليه هذا يؤدي الى ان السياره تصير قاسيه اشوي ولكنك ترتاح.
اما للباث فاندر تقدر تراسل ولد الشايب لانه مغير يايات الوكاله و مركب يايات راج روفر في الامارات و مرتاح جدا منها.
واما لالكعكات انا مرك على سيارتي ولا يفرق شيء في السياره الا انها ترتفع على قدر ارتفاع الكعكه وتركيه سهل وهي رخيصه تقريبا الوحده سعرها 25 ريالاو اقل ويضعونا تحت الياي

[حـاتـم]

اخوي الرسام قيمتها 25 ريال بالقصيم بس هنا فالرياض حسبي الله عليهم الثنتين ب200 ريال

[المهنـدس]

السلام عليكم

بالنسبه للياي والمساعدات الاستراليه واحد من ربعي دايم مكاشيتي معه مركبهن على gxr2000
والموتر بصراحه روعه مابعده.
اذا تبي ارتفاع معقول (وهذا اللي انصحك فيه) ركب ياي 200 وزي ماقالو الشباب عند الرمايه موجود.
اما اذا انك تحب الرفع الزايد وتبي تركب بسلم على قولك ركب ياي400 بس تراه رفيع رفيع رفيع مره والله يستر يزيد الخطر من قلبه السياره على المزفلت والرمل.
وموضوع الراحه لا تشيل همه زي الوكاله اذا مب احسن.

تحياتي اخوك المهنـدس

[داب الرمث]

اخوي عاشق المزون موترك الله يجزاك خير تركبله يايات خلفية فقط ولا تقدر تركب قدام غير مساعدات استرالية فقط لان لاوجود للياي لامامي غير في الموديل 97 ونازل وكانك بترفع موترك من قدام ركب مساعدات استرالية وشد على مسامير الميزانية التي تحت السائق والراكب ويرتفع وجه موترك بس كلما رفعت اكثر كلما فحجت الكفرات الاماميه ارفع شوي كفايه ...... لان موترك مايقبل الترفيع مثل الموديل القديم ................. واختصر المسافه والتعب والخساير والبحث والسوأل من هالكلمتين لانها نتيجة بحث ............................... وسامحني على القصور ولانيب خبير ويمكن اخطي في شي ما وشكرا ..........

[مشغول]

طيب ابعطيكم خبرتي في اليايات والمساعدات

كان معي لاندكروزر gxr 2001 وركبت عليه مساعدات جبرايل ويايات 200 كيلو ومشيت به يوم كامل والحقيقة تضايقت منه مرة لأن الموتر صار رفيع من ورا والمطب صار اقشر ويناقز لأن الموتر فاضي .. المهم رجعت له وحاولت فيه يغير لي اليايات إلى 150 كيلو .. والحمد لله وافق وغيرها لي .. واستخدمتها سنتين إذا كان الموتر فاضي المطب يكون حلو ولا تحس بفرق كبير عن الوكالة أما اذا كان محمل فيكون المطب ممتاز .. والموتر رفيع .. طبعا بعت الموتر وفكيت المساعدات واليايات وركبتها على لاند كروزر 2002 وماشيه معي زي الحلاوة .. والحمد لله ..

نصيحة لا تركب أكثر من 150 كيلو إذا كانت حمولتك عادية ..
انا مركب سلة خلفية مليانه عفش وسبعه من الربع راكبين معي ورايحين للدهنا والصمان السنة الماضية واحس الموتر جيد وقوي وثابت .. وانت لك الخيار

وهلا بكم

[عاشق المزون]

السلام عليكم ورحمة الله وبركاته
اخواني مشكورين على الردود وهذا يدل على الفزعة والله يجزاكم خير في الشهر الفضيل.
انا سالت في كل مكان عن الرفع بجميع الانواع الى في السوق حتى الان :
1)تركيب يايات مثل ماقالو الشباب.
2)تركيب البالون بنوعية في اليايات او على السست.
3) تبديل المساعدات او تدبيلهن .
4)تركيب كعكات.
5) تركيب عضاضات على السست.
هذا الى اعرف حتى الان واعتقد يوجد المزيد من الانواع والاشكال.

>>بس اذا جيت الى اليايات لازم تلحيم وتقصيص يعني فيها حوسة شوي ماحد يعرف للسيارة مثل من صنعها.
----------------------------------------------------------------------------------------------------------------
>>اما البالون عيني عليه الحين وخصوصا مافيه عبث بقطع السيارة مجرد انطل البالون في الياي وبس واذا مااعجبك فكة بدون قصقصة للسيارة ونزل وارفع على كيفك واعتقد فية موضوع تكلم عنهن وماقصر راعي الموضوع كفاء وفاء وهذا الرابط (http://mekshat.com/vb/showthread.php?t=8892). والشكر متواصل لخوي مهيلان صاحب الموضوع
----------------------------------------------------------------------------------------------------------------
>> اما الباقي فجاري البحث عن موصفاتهن واذا فيه احد من الشباب جربهن يعطينا الفكرة بس انا دائما اتجنب التعديل في الموتر من قصقصة وتلحيم في البودي وانصح الشباب بذلك خصوصا الى يطول في الكشتة من اسبوع واكثر وشكرا

[عاشق المزون]

الله يعطيك العافية اخوي دلة وفنجال عزالله قهويتنا بعلومك :)
فعلا كلام جميل مرتب يقنع الواحد والله يعطيك العافية على التفصيل مشكور

طيب اجل الى يقول ان تركيب اليايات يبغاء تلحيم وقص مهب مظبوط اجل وش ندور حنا نبي الى مافية الى حل مسمار وركب منبي قصقصة وتلحيم

شكرا

[قناص الليل]

والله يا جماعة الخير نفس الإشكالية عندي .

و بإذن الله اني بأركب هاليايات الأستراليه ، لاكن احترت في المقاس المناسب (( السيارة باثفندر )) ، و مركب تانكي 85 لتر .

_ المشكلة في السيارة من الخلف اذا مليت التانكي و حملة العفش تنزل .
_ ياليت الشور بالمقاس المناسب (( لأني بإذن واحد أحد مركب ، و انشاء الله ما يخيب الرجا )) .
_ بالنسبه للمساعدات الأسترالية الي تتكلمون عنها ، هل هي عند الرماية بعد ..

[العاني]

السلام عليكم ورحمه الله وبركاته

مبارك عليكم الشهر جميعا ولو هي متأخرة شوي لكن اعذروني

بالنسبة لسؤالك اخوي عاشق المزون عن رفع السيارة فمن الافضل كما تفضل الاخوان اليايات الاسترالية وموجودات عند الرماية بجميع

فروعه وافضل مقاس 200 هذا للجيوب الصوالين يعطيك وقفه حيه للسياره ويتحمل الحمل ولاينزل مثل غيره ولكن فيها عيب انها فيها مطب يعني احيانا ماتقدر تقهوى بالسيارة

الكعكات حلوات ولكن مايعطنك مثل شغل اليايات ولكن ميزة الكعكات راحة السيارة ماتختلف بعكس اليايات واذا بغيت المقاس الحلو كانك منتب شره على رفع الجيب 2,5 وكانك شره على الرفع ركب اعلى من هذا المقاس

وعلى فكره اشوف كفراتك دنلوب كانهن نفس اللي بالتوقيع

ركب كفرات بالون 900 ماركه ماكسس 8 كاندس وادع لي

[الوشاح]

السلام عليكم

حبيت اشاركم يالربع ....إذا سمحتولي..

الياي الأسترالي يجي ثلاث مقاسات
1- كبير
2- وسط
3- صغير
وهذا واحد من الربع ركب وسط وأرتفع الموتر من ورا مررره ملا التانكي ماء ولا فاد!!

علشان كذا انصحكم تركبون اصغر مقاس...
اما حبيبنا ابو حمود(إسوزو) فلحل عندي ..........لاكني منب معلمك لين تجي للقصيم .......
.
.
.
.
.
.

ولا تدري خذ الحل

الحل تركب لعابات......مثل ماذكر احد الاخوان ... وبأذن الله تضبط :good:

اخوكم ابو صالح

[عاشق الجيوب]

كم موديل موترك :confused:

[اسيزو 4x4]

السلام عليكم ورحمة الله وبركاته

أخوي الغالي والنشمي أبو صالح ( عريفجان ساحوق ) :D

جايك القصيم بإذن الله

الله يعينك على >> أبو حمود يا هو بيغثك :D ( وبتقول ياليتة ماجا ) :D :D تراي امزح

والله هذا من طيبه قلبك يالغالي والله أني أتمنا شوفتك على أحر من الجمر شوفتك تنشرى يالذيب :) :good:

وبالنسبة للعبات هي اللي تجي مع السست في الخلف

أخوك أبو حمود .... :D

[عاشق المزون]

مشكور اخوي العاني على المشاركة وللجميع

بس اخوي انا مركب دنونالوب علشان جودتهن في كل الطرقات اما الشاهين فالنفود فقط ويتمسحن بسرعة في الحزوم

بس ياليت يا اخوان تفيدوني هل يحتاج تركيب اليايات الى تلحيم وقصقصة ؟؟؟؟وشكرا

[دله وفنجال]

السلام عليكم...
اخوي الغالي عاشق المزون انت اذا غيرت البواجي يحتاج انك تقص وتلحم بلمكينة ؟
طبعن لا وكذالك الياي من الي يقولك يحتاج. ياخوي مايحتاج رح وعلى ظمانتي اذا كان كلامي غلط ...
وثاني شي لاتاخذ مقاس كبير يرفع الموتر بسماء :no2: واذا جيت تركب يبيلك تجيب سلم, خذلك اقل شي لانه هو النوع الي تبي تحتاجة وهو العملي ولا عليك خطر من زيادة الارتفاع ...
يارجال توكل على الله والي يقولك قص وتلحيم ما افتالك ابد,تلقاه اخذ مقاس 200 وبلش برتفاع الموتر وراح وقصة علشان كذا لاتورط بشي فوق الحد المعقول...

[العاني]

السلام عليكم ورحمة الله وبركاته

اخوي عاشق مزون بالنسبه للكفرات اذا انت تبي الراحه والطرب وتنسى البطانيج بالردميات والمطبات

بالاسفلت فعليك بالبالون مثل ماقلت للك maxis 900 يرتفع الموتر انا مركب بالون maxis


وعلى فكره معي gx_r2002

وبالنسبه لليايات يركبن بدون ترهيم (تقصيص)

[الذيب سرحان]

الاخوة الافاضل :
حقيقة توني قاري هذا الموضوع ، والحقيقة لي اكثر من شهر مركب يايات استرالية من عند الرماية بالخبر ، ولاحظت ارتفاع السيارة { لاندكروزر } 2003 البريمي وجنطه 17 ، والحقيقة ان السيارة والحمد لله معاد هيب تحك مثل اول ، واليايات الاسترالية احجام ، منها :
2سم حمولة 50 كيلو ، موديل { 862}
4سم حمولة 110 كيلو ، 200كيلو ، 400 كيلو
5 سم حمولة 200كيلو ، 400كيلو
وقيمة الانواع الثلاثة 495ريال والجيد بالمكاسر لايذخر
لكن طيعوني وطيعوا شوري ، انا مجرب رقم واحد ولا احلى منه ، لانه مايرفع السيارة واجد ولا يشوه منظرها بعكس بعض السيارات اللي يركبون 5 سم وتلاحظها مرتفعها كثير ، والشباب اللي يقولون انها تنزل من قدام اذا كانت السيارة فيها { فليورات } امامية فهي ماراح تنزل ابد مثل اللي عندي .
وسامحونا على القصور في الشرح .

[عاشق المزون]

مشكوريا يااخوان على المجهود في الشرح

خلاص انشاء الله نويت اركب يايات مقاس 200 على السيارة ومساعدات على الاربع كفرات واعطيكم النتيجة وصور اذا امكن انشاء الله والشكر لكل من شارك معنا في الموضوع.