المطب القوى - ودي اعرف الاسباب والحلول ؟

[مفخرة فورد]

السلام عليكم
ليش بعض المواتر تاخذ المطب جامد والبعض يكون خفيف او ناعم ؟
نوع الكفرات - (ضغط الهواء في الكفرات ) - المساعدات - المقصات - الاذرعة - الركب - هل لها دور ؟

بالنسبة للمساعدات عندي سليمة - والكفرات دنلوب اعبيهن 40
فكيف اخلي الموتر ياخذ المطب على خفيف :(
فكسار 98

[مدمن فتك]

الكفرات والهواء والارتفاع والمساعدات وسرعتك اثناء تجاوزك المطب ومواصفات المطب وارتفاعه وحجمه

[عبدالاله 123]

نزل الهواء ل35 يخف معك المطب انشالله

[مجنون نحم]

حسب الموتر يعني في مواتر بمساعدات وفيه مواتر سست ..,

[aboeyade]

40 كثير

نزل لـ 35 يكون أريح لك ولو تحط 30 أفضل

[جديعان]

كنت معاني منها وركبت جنوط هلل الصيني وركبت بالون وخليت الهوااا 25 وشوف الرااااااحه كانك راكب الماني من واقع تجربه

[sameer_1798]

وأنا مثلك ياخوي اعاني من هذه المشكلة
وإذا نزلت الهواء عن 40 صحيح يخف المطب لكن الكفرات يطلع لها صفير و تجيها مسحيه من الخارج .

[بريداوي اصليm]

شكلك مخلي بكفراتك 80 من القهر
حط بهن إذا هن بولين 30 35
وأبد بترتاح

[volcano]

المشكلة ماهي بسيارتك المشكلة بالطريق مواصفات مغشوشة في كل شي الا ما رحم ربي

الظبياني

[ابوصالح77]

هلا بك أخوي
حرام عليك 40 تبغى تشيل حمل دينا
خل فيهن 30 فقط

[ذيب زلفاوي]

عندنا جكسار 2010 من اول يوم شرينا نزلنا هو الكفرات 25 والى الحين وهو مطبة تمام ومريح مريح مرررره

وعندنا ددسن وهايلوكس الهوا مايتعدا 20 وترا عليهم كفرات كبار هانكوك 225

[باترول 4500]

وعليكم السلام

تقريبا النسبة الأكبر للمطب هو الكفرات
جربت دنلوب وماكسس وكان فيه مطب والهانكوك فيه مطب لاكن خفيف وجربت البالون ماشاء الله مريح جدا

انا إذا حطيت بالكفرات 35 يضيق صدري :D

حط بهن بالديره 25 وبالسفر 30 وإن شاء الله يخف عليك المطب

[((ابوملاك))]

البالون مرييييح جدا تحس انك راكب رولز رايز

[مفخرة فورد]

السلام عليكم
الله يجزاكم خير كل باسمه
نزلت الهواء 30 والمطبات احسها أخف عن اول
وراح اجرب 25 يمكن تخف أكثر :)
بارك الله فيكم

[ابويعقوب4]

اما 25 وين مع الوقت يتاثر الكفر بدى يتصلخ والا بينطلق عليك يوم اسمع خلها 30

[مفخرة فورد]

اما 25 وين مع الوقت يتاثر الكفر بدى يتصلخ والا بينطلق عليك يوم اسمع خلها 30
دام فيها هالعلوم - ابشر طال عمرك :)

[باترول 4500]

اما 25 وين مع الوقت يتاثر الكفر بدى يتصلخ والا بينطلق عليك يوم اسمع خلها 30

والله دايم كفراتي وكفرات الوالد ما أحط بهن إلا 25 ويجلس الكفر ثلاث سنوات وبعد باقي به عمر

الكفر ماينصلخ إلا إذا كان هواء الكفر من 15 وتحت

[قطب 999]

شف عيار الهوا ممكن انك تعبي 80 وهو يعطيك القراءه 40 والافضل تخليه 35-32

[ساميو9]

انا المطب يكسر الديكور سيارتي وانا حاط الهواء 25 مدري ايش السبب طبعا كفراتي هانكوك جديد

[تميم2222]

كل ما كان المطب قوي. اصبحت السياره اكثر رساوه.

[فارس العمور]

كل مانقص الهواء زادت الراحة وزادت الحرارة و قلت الرساوة وعمر الكفرات

[الحربي B]

الرجال كلامه صحيح بعضالسيارت ناعمه وبعضها قاسيه مع المطباات اقولكم كيف
قبل ثلاث سنوات ركبت طقم كفرات دنلوب وكان الهوء 30 وكانت جدا مريحه وتمسك الخط
وقبل شهر ركبت طقم كفرات دنلوب والهوء 30 وصار قاسيه ولاهو يمسك الخط
يعني السالفه كلها الجودة اختلفت في صناعة الكفرات

[أحمد الدهمشي]

وعليكم السلام ورحمة الله وبركاته
40 كثير مرة ويؤثر مع الوقت على جلد المقصات والركب والاذرعة
اذا فتحت باب السائق تجد قياس الهواء المناسب
وهو للكروزر 30 امام 32 خلف
انا اخليه 30 كلهن

[abo naser 1]

الدنلوب خلقه قاسي خذ نفس مقاسة هنكوك وحطة 30 مريح جدا للسيارة والركاب

لا تنسي الكفر اذا تعدا سنة او سنين يزدد قساوة ومطب ومايمسك بريك زي الجديد واصوات

[كم كيلو باقي]

كل مانقص الهواء زادت الراحة وزادت الحرارة و قلت الرساوة وعمر الكفرات

عجيب .. اشوف الشياب اذا جا موسم المطر ينزلون هوا الكفرات الا 25 تقريبا يقولون افضل وقت الزلق

[نايس × كول]

انا عندي ددين وكفرات عاديه وهواها 30 في الطب مريح وناعم

الكفرات حق الوكاله حرقتها ما تنفع بشي

[سحب ممطرة]

هناك فلسفة عند اغلب الناس ومدري عن صحتها :D

يقولك دايم السيارة المهروشه بالبران و الوعر تجدها مركب مريح و ماتناقز

عكس الموتر الجديد ..

لا ادري هل السبب ليونة الجلد و المساعدات من كثر المناقز ..


لكن أنصحك . أذا مركب ياي أسترالي غيره للوكالة لان الاسترالي قاسي و خفض بهواء الكفرات الى 25

[دانفوس]

الهوى 40 هههههههههه شكلك معك دينا جابو ...

لاغلبت الروم خل الهوى 30

ترتاح انت والسياره....

[الحربي B]

هههههههههه الموضوع له اربع سنوات

[المنيعي1]

خلك على 30
ﻻتنزل اقل منه الا اذا تمشي بر
وكذلك الاخوه الي يقولون 25 و20
لأن الكفرات اذا نزل الهوا عن 30 تتلف بسب ارتفاع حرارتها عن الطبيعي من الاحتكاك الزائد
وقد يسبب حوادث غير متوقعه ﻻسمح الله

[المنيعي1]

هههههههههه الموضوع له اربع سنوات

هذا من اخطاء المنتدى الله يهديهم المفروض اي موضوع يمر عليه عام من كتابته يقفل تلقائي.

[تركي1]

بالعكس يإخوان يعني مثل هالموضوع حتى لو مر عليه سنوات ففائدته متجددة ومعوماته حاصلة لكل وقت
وجهة نظر

[SNIPER07]

هلا و غلا

عندنا شوارع الله يكون في العون الردميه افضل منها

لكن مثل ما تفضلووا لخوان كلها اسباب

بخصوص ضغط الهواء بالكفرات 25 الى 30

تحياتي