شريت داتسون دفرنشين عطونا شوركم بالإضافات

[b3b3]

السلام عليكم ورحمة الله وبركاته

الله يمسيكم بالخير يالوجيه الطيبة

ان شاء الله كلها كم يوم وأطلع داتسون غمارتين دفرنشين

واللي اطلبه منكم مشورتكم في الإضافات

أول شي نوع الكفرات أنا مقتنع بكفرات ميشلان قناعة تامة

بس وش رايكم اركب كفرات عراض أو لا ؟

وهل أركب جنوط أو لا ؟

وش نصيحتكم أركب ونش على وجه الموتر ؟ وللعلم ما راح أركبه إلا إذا فيه ورشة تركبه صح بدون أن يشوه شي من الصدام

مسألة خزان الماء ما أرغب فيها نهائياً لأن تركيب جركل بصندوق الموتر أهون من مسألة الخزان

وش رايكم في مسألة الفرارات هل لها فائدة قوية أو بس كلام فاضي ؟

وحبيت أسألكم عن ماطور الهواء وش أحسن شي الثابت اللي يوضع بالكبوت أو يكون خارجي وماهي أفضل ماركة ؟

هذا اللي عندي من أسئلة واللي عنده المزيد من النصائح الله الله فينا

وجزاكم الله كل الخير


أخوكم بعبع

[طخيمان]

بالنسبة للونش من رأي انك ماتركب لأنه يثقل على الموتر وبعدين سعره غالي.
والفرارات مهمة لانها تخفف استهلاك البنزين وتخفف الصوت وتريح الموتر .
أما عن موضوع الماطور أنا شريت أبو جمل وخرب علي خراب بسيط ولا لقيت أحد يصلحة.
أما الباقي والله ماعندي علم عنه لكن أنصحك تسأل العضو حاتم و العضو (الأشهب) ولا يهونون الجماعة (لأنهم أخبر مني بالددسن)

[b3b3]

هلا بك أبوالطواري

من ناحية الونش فهو عندي حالياً وانا شاريه مستخدم

ان شاء الله يجون الاخوان حاتم والأشهب ويفزعون


مشكور يالغالي

[بو خليفه]

مبروك عليك السيارة الله يعطيك خيرها
ركب جنوط سفاري مع كفرات أما ميشلان فلا تقرب لأن لا يوجد ضمان للشخص لأن حصلت لي من قبل مشكله معهم عندي لاندر روفر ديسكفري و حصلت مشكله مسبقاً كنت على طريق القصيم ذهبت إلى موقع و كان فيه حجر حاد فدسته بسيارة و تشقق الكفر و راجعت ميشلان للأسف قالوا لي سوء استخدام و بدأت اليوم اركب فقط هانكوك أصلي كوري رخيص و جودة

[(الأشهب)]

بسم الله الرحمن الرحيم

أولاً على البركه أخوي والله يعطيك خيره ويكفيك شره

بالنسبه لددسن أولا ركب الفرارات وهاذي اهم شي لانها تخلي الموتر خفيف ولا تتعب الموتر وتلقاها عند السليماني في الغرابي اسعارها بين 450_550 وانصحك تركب النوع البرازيلي لاني انا مجربه لي تقريباً ثلاث سنين بس اهم شي خله يشحمها لك زين الفرارات قبل مايركبها
ثانياً الونش بيثقل عليك الموتر يعني لازم تنسم مره عشان اذا بغيت تدخل الرمل واذا على الونش خلهم يركبونه لك ورى الصدام يعني يثبت على الشاص ولكن اسعاره غاليه ومالك فيه لزم وتبي نصيحتي لاتركبه خل معك واير جيد ولاتحتاج إلى الونش بأذن الله ثالثا الكفرات ركب كفرات عراض طول وعرض خلها كبيره افضلك في النفود والجنوط لاتركبها لانها تثقل وبعدين تزيد الصرفيه وغير كذا اذا كانت الجنوط ثقيله تبي تضر العمود خله على بلاده وركب كفرات عراض ولا ركب جنوط حديد 7انش او8انش خفيفه زي الي عندي انا ماشيه معي تمام وشفها في الصوره الي تحت ثالثاً اذا كانت تحتاج عزبه في الصندوق ثابته انا عندي مالي فيها على نفس مقاس الصندوق ومعها تانكي مويه ياخذ تقريبا 80 لتر الماطور خذلك ماطور عادي مايثبت لاني سامع ان المواطير الي تثبت خراباتها واجد والماطور العادي لو بغيت تطلع بوتر اي واحد من الربع يمديك تاخذه معك واذا كانك صامل على الماطور الي يثبت ركب ماطورين اسرعلك يعني تجمع لي الماطورين مع بعض
ويعطيك هواء اكثر وغير كذا دعامه تراها تفيدك ركبها فيها معلاق ذبيحه وتقدر تدف الي تبي بالدعامه وبدون ماتخاف على الوجهيه ولاقدر الله تفكك من الصدمات الخفيفه على هذا الي عندي بس لاتنسى الفيبر حق الصندوق والله يوفقك واي استفسار انا حاضر

تحياتي....

[b3b3]

شكرا لك اخوي بو خليفه

وعساك على القوة يالذيب


اخوي (الأشهب)

ان شاء الله اني اخذت شورك وماراح اركب الونش

وبالنسبة لصندوق العزبه ماراح افكر فيه لأن صندوق الغمارتين صغير ولا أبغى الضيق فيه

وبالنسبة للدعامية وين أحصل اللي تقول عنها ؟

وماطور الهواء وش تنصحني فيه ؟

طيب وش رايك في جنوط كروم نفس اللي تجي على الغمارتين جي اكس ال (( جنوط ألمونيوم )) راح اشتريها من الوكالة اذا تنصح فيها

ولكم الشكر

[(الأشهب)]

هلا والله أخوي بالنسبه لصندوق العزبه انا معك فيها يتضيق على الصندوق وعلى العموم ترا عندي صندوق عزبه مفصله على الصندوق مع تانكي المويه اذا كان لك نظر انا فاكه لانه يضيق الصندوق

وعندك الدعامه ياطويل العمر والسلامه في الصناعيه القديمه وانا مبطي ماجيت الصناعيه على العموم اذا بغيت الوصف صح اتصل علي انشاء الله اني بذكرها 0504238358

وجنوط الكروم حقت الددسن الغمارتين الوكاله حلوه بس ترا الجنط موب عريض بس شكلها حلو يعني انت اخاتر بين شكل الجنط ولا تركب جنط اعرض بس شكل عادي

وبالنسبه للمواطير انا والله شاريلي ماطور امريكي موب غالي عادي ولاعندي خبره في المواطير بس اسمع عن ابو جمل اظاهر انه هو يمدحونه

وبالنسبه للمساعدات ان كانك راعي طعوس ومطامر وساعة صدر غيرها لان مساعدات الوكاله ميب شي ركب مساعدات نوع منرو او منرول الي تجي صفر او ركب جبريل الي لونها ابيض وبالتوفيق
تحياتي.....

[b3b3]

شكرا لك اخوي الأشهب


بارك الله فيك على الرد والمعلومات

[راع الونيت]

أخوي الله يبارك لك بالسيارة ويعطيك من خيرها ويكفيك شرها
الصراحة الأخوان ما قصروا ولكن لكل شخص وجهة نظر والهدف الإفادة والإستفادة أنا شريت دفرنسين غمارتين 2005 وماشية معي 5000 كلم مركب جنوط باثفندر 2004 ألمنيو مقاس 16 ومركب عليهن كفرات دنلوب مقاس 245/70/16 وصراحة ما فيها كلام
أما جنوط الباترول فهي ما تصلح لأنها عريضة زيادة وكذلك كفر السفاري لأنه عريض ويحك بالرفرف وترى سبق أن ناقشنا موضوع الددسن الدفرنسين ولا قصروا الشباب إبحث عن الموضوع وستجد ضالتك ولك خالص تحياتي

[b3b3]

هلا بك اخوي راع الونيت

الله يعطيك العافية على الافادة

يعني هل تنصحني بجنوط الباث فندر وبكم احصلها وهل ماتحدث رجه في الدركسون ؟

تسلم يالغالي

[(الأشهب)]

معليش أخوي
يعني انا موتري له ثلاث سنين ونص وغير كذا ماشي عليه 180000 واقول انه يرج وانت ابخص

تحياتي......

[b3b3]

معليش أخوي
يعني انا موتري له ثلاث سنين ونص وغير كذا ماشي عليه 180000 واقول انه يرج وانت ابخص

تحياتي......

الاشهب

شكرا لك وخلاص راح آخذ بشورك ان شاء الله


ومافيه أمل اركب جنوط :d