حرارة الشيروكي

[ab0_feras]

بسم الله الرحمن الرحيم

اخواني المكشاتيين ......
السلام عليكم ورحمة الله وبركاته

شريت شيروكي 96 سعودي .. وخلال فترة استخدامه السابقه مع واحد الماني ثم واحد مصري لم يكن مشبوك عمود الدبل .. يعني مادخل رمل قبل كذا

ويقول المصري انه مصيخ الرديتر وسافر عليه من تبوك الى هنا ولا سخن وحرارته الطبيعية على النص والكلام هذا قبل شهرين يعني وقت الصيف ...
عموما طلعنا نجرب السياره بعد ماركبنا عمود الدبل وخليناه يغرز على الدفرنس وكان الوقت بالليل وارتفعت الحرارة فوق النص بشوي ويقول طبيعي

الشباب اللي معي كان عندهم شيروكي قبل كذا ويقولون لا مايصير المفروض انها على الربع واذا طعست تصير على النص ؟؟

واحد ينصحني بتغيير البلف والثاني يقول توماتيك المروحه او تركب مروحه اضافيه بسويتش ؟؟

اعطونا رايكم بحكم خبراتكم
وجزاكم الله خيرا

[الوشاح]

الحراره طبيعيه........النص ومع التطعيس تعدا النص شوي ....... موتري2000ونفس حرارة موترك

وعلى فكره ....غيرت بلف الحراره من 195 إلى165(بلف كابرس)وصارة الحراره الثلث .....


تحيتي لك......

[مهراس]

السلام عليكم ورحمة الله وبركاته:
أذاغيرت البلف الأصلي 195 وحطيت أقل درجه 165 بعد مده مكينة السياره بتغير صوتها وهي واقفه (تتفتف) أو بالأفرنجي (Rough Idle) لأنك بالطريقه هذي بتعطي أشاره خاطئه للكمبيوتر وهي ان المكينه بارده وأيضا لاتعطي المكينه التبريد الكافي. طبعا حل الحراره في عدة أشياء سوف اسردها لك غدا ان شاء الله تعالى.

http://www.mekshat.com/pix/upload/images11/mk6074_96 jgc.jpg

[بواسامه]

لا تشتريه

واذا انت شريته عود بعه

وبين عيبه يبارك لك

ودور نضيف

[العطة]

السلام عليكم ورحمة الله وبركاته

كان معي شيروكي موديل 94 غيرت البلف وصارت الحرارة الربع واذا طعست تاصل النصف او اكثر شوي
ولكن الحل الامثل مروحة كهرب واذا امكن خطين مثل السوبارو وركب حساس للمروحة
وحل اسهل اذا كان فية مساحة كافية في مقدمة السيارة ركب مروحة مرسيدس


ابوعبدالاله

[أبو يوسف]

انا معي شروكي ما يوصل النص بس ساعة الحرارة انا مركبها
يقول الكهربائي انه الى النص عادي بعد النص شف لك حل
الموتر ما فيه مروحة ثانية ؟؟؟

اللي معي فيه مروحتين ميكانيكية وكهربائية

مع التحية

[مهراس]

السلام عليكم ورحمة الله وبركاته:
الأخ أبو فراس...عندما تحس ان السياره حرارتها مرتفعه ,وبما انك توك اشتريت السياره ورغبان فيها أول شي تنسى كلام اللى اشتريتها منه وركز على الآتي بالترتيب:
الصيانه السهله
1- تأكد ان اللديتر سليم وما فيه تهريب وكذلك قربة المويه سليمه والمواسير والليات بحاله جيده
2- موية اللديتر من نوع المقاوم للحراره Antifrees
3- تنظيف المكينه واللديتربمكينة الشفط من أهم عوامل التخلص من ارتفاع درجة الحراره
الصيانه المهمه
1-أفحص ريش المراوح وشوف أذا كان فيهم كسر أو ريشه طايره وموتر المروحه شغال مزبوط ويفصل تلقائي واعرف واحد يوناني يشتغل في الرياض ركب مروحه كهربائيه في سيارته الجيب م 93 وحلت له مشكلة الحراره
2-بعض الاوقات اذا كانت طرمبة المويه ماتدفع زين بسبب انها قديمه .....فهي تؤثر في ارتفاع الحراره يعني على حسب امكانياتك أذاغيرتها تنفع ولو بتخفيض الحراره قليلا.
3-تغيير البواجي والأسلاك والكويل وغطا الديلكو والشاكوش يزيد من عزم السياره وبالتالى يؤثر ايجابيا على دورة التبريد
4-اللدييتر الأصلى(الألمونيوم) يتحمل الحراره اكثر من الوطنى المصنوع من النحاس فاذا ما انحلت المشكله بعد الفحوصات والتغييرات السابقه فعليك بهذا اللديتر وسعره من الوكاله في حدود 1400 ريال
5-شوف قماشات الفرامل ماتكون ماسكه على الهوبات ورا وقدام يعني الكفر يلف بسهوله، ولازم تكون الكفرات الأماميه موزونه.
بعد كذا اذا كنت تبغى تخفض الحراره أكثر بسبب التطعيس أو المشي في الرمال فهناك عدة اضافات ولكنها غاليه اذا كانت موجوده في السوق أو تطلبها من امريكا اذا تقدر وهذه الأضافات :
1- مروحه كهربائيه اسمها Flex-a-lite #110
2- لديتر 3 صفات من شركة GDI
3- طرمبة ماء مع البلف 180 من شركة FlowKool
أرجو ان أكون قد أفدتك واتمنى لك التوفيق

[الوشاح]

مهراس .... ونا اخوك وش المشكلة إذا نزلت حرارة المكينة من 195 إلى165؟؟ انا نزلت الحراره ومالاحضت اي شي على الموتر! ممكن توضح اكثر :)

[ab0_feras]

أشكر الجميع على الاهنمام بالموضوع ...

1/ عموما مريت على 3 محلات لرديترات وكلهم يقولون ماعندي مشكله بالرديتر وملحقاته ..
2/ الكهربائي يقول حساس المروحة الاضافيه اللي المروحة الصغيرة حقت المكيف طلعت سليمه ودروان المروحة قوي ومافيه مشكله
3/ بقيت المروحة الرئيسية للمحرك واحد من الكهربائيين اللي مريتم يقولن انها تدور بخفه ( والسيارة طافيه طبعا ) خفيفة والمفروض انها تكون ثقيله .. ويقول روح للمكيانيكي خله يتأكد من كلتش المروحة أو البعض يسميه توماتيك المروحة
4/ بالنسبه للبلف لي رغبه اركبه اذا مانفعت جميع الحلول اللي ذكرتوها علشان ارتاح مره وحده من مشكلة الحرارة ولكن التأثيراللي ذكرته يا أخ مهراس على الماكينة هل هو على المدى القريب او البعيد
5/ سألت عن المروحة الاضافيه يقولون مالها محل تركب فيه ؟؟؟ الا كهربائي واحد يقول ركب قاعده حديد عن الحداد وجيب مروحة مرسيدس 83 وتضبط .. ( اعطوني تجاربكم في هذا الخصوص )
5/ الأخ مهراس بالنسبة للقطع التي ذركتها هل هناك امكانية طلبها من السوق المحلي او من الخارج ( البحرين ... الكويت .. الامارات ) بحكم اني من سكان الدمام ) ... وكم تكلف تقريباً ؟؟؟

ولكم جميعا جزيل الشكر

[مهراس]

السلام عليكم ورحمة الله وبركاته:
الأخ عريفجان شكرا لك على الرد والحقيقه انا كنت أقصد اللي يشيل البلف من الكوع تصير السياره تتفتف واذا كان فيها كمبيوتر للمكينه والمعذره على الخطأ، اما البلف أبو 165 ودي أعرف حق اي سياره وأيش المكينه، اذا صار بيخفض الحراره أركبه واشوف. ولك تحياتي.

[الوشاح]

ab0_feras

الحمد لله كل شي تمام .......البلف حق كابرس ركبه وبتدعيلي ....

مهراس ........ صدقت ...اكبر خطأ انك تشيل البلف نهائي !! ......لأن المكينه تصير بارده على طول ...
البلف مثل ماقلت بلف كابرس ...سعره ... 20 ريال

تحياتي.......

[ab0_feras]

السلام عليكم ورحمة الله وبركاته ...

قررت تركيب كلتش مروحة وذلك بعد مقارنة سيارتي مع سيارة من نفس النوع ووجدت المروحة الرئيسية خفيفة

ومن ثم ركبت بلف كابرس بـ25 ريال Ac Delco واكتشفت ان السيارة لايوجد بها بلف من الأساس (( واعتقد ان هذا سبب رئيسي للحرارة لأن المويه ماتأخذ وقت كافي حتى يبردها الرديتر ثم يفتح البلف وتبرد الماكينة ))

اتضح ان المروحة الاضافية لا تعمل وذلك بسبب الكتاوت الموجود خلف البطارية واستبدلته بنوع Boch الماني ب 25 ريال

والحمد لله استقرت الحرارة تحت النص وتوصل للنص عند الوقوف ..

وبقي الآن في حالة التطعيس اتوقع ان الماكينة بتكون لهب واخاف ان الحراة تطير فوق النص وافكر بتركيب مروحة ثالثة كهربائية امام الرديتر ؟؟؟ وش رايكم