ليش ماتسمع وكالة تويوتا رايك في منتجاتهم

[الفشق المتوووسع]

بسم الله الرحمن الرحيم
السلام عليكم ورحمة الله وبركاته
اخواني المكشاتيين العزيمه (الصمله) تسوي الكثير خاصة اذا كانو الناس يد وحده
المهم فيه فكره تبغا منا جهد خاصة اخواننا المشرفين
الكل منا ماهوب راضي عن وضع الوكالات عندنا في السعوديه خاصه وكالات تويوتا
(عبداللطيف جميل - البازعي) والمشكله هنا ماهي في الوكالات بس المشكله الاساسيه في المصنع
من بعد مانقل الى تايلاند وسيارات تويوتا من اردا في اردا.
الفكره هي:
ان يكون موقع مكشات الغالي الواجهه اللي نقدر نخاطب شركة تويوتا اوغيرها عن طريقه
يكون هناك استفتاء في نوع سيارة مثلا اللاندكروزر وش الميزات الغير مرغوب فيها او اللي نبغا تعديلها
القوه-السعه-صرف البنزين-حجم السياره-متانة المعدن المصنوعه منه.....الخ
وكل هذا عن طريق موقع الشركه على الانترنت واخواننا اللي يعرفون الانجليزي سيكون لهم دور اكبر
ومن المعروف ان دول الخليج من اكبر المستوردين للسيارات. ف لازم يكون لنا كلمه في السيارات اللي نشتريها
واقل شي نسويه لو كل واحد يرسل رساله لموقع الشركه يكون فيها اعتراض على الوضع هذا
واذكر قصه تبين فايدة الاجتماع على كلمه وحده ومناصرة بعضنا البعض سواء في امور الدين او الدنيا
المرآة اللي منعت من دخول معرض في احد الدول الغربيه لأنها ترتدي الحجاب. اختصار القصه ان اخوانها في الله
انهلو على هاتف وموقع المعرض بالمكالمات والشجب لما فعلوه فغير المعرض سياسته مع النساء المتحجبات
ربما تكون القصه ذات فايده في موضوعنا والعذر على الاطاله
عطونا ارائكم واللي عنده اي زياد او اعتراض
تقبل الله منا ومنكم الصيام والقيام
اخوكم ابوعبد الله (الفشق المتوووسع)

[أبو شماس]

الرأي تترك تويوتا خلف وتجع نيسان قدامك يا ذكي

[غيّام]

اسجل تأييدي لابو عبدالله بقوه وكلامك ممتاز جدا

[أبو شماس]

من ملزم عليك بالتويوتا ؟

[الفشق المتوووسع]

السلام عليكم ورحمة الله وبركاته

اخوي غيام بارك الله فيك على التشجيع
ابو شماس جزاك الله الف خير وكل قاري
تويوتا بالنسبه لي انا لو تتحسن بعض الامور فيها بتكون سيارات رائعه. اتمنى لويرجع الجي اكس السبعه مره ثانيه
ولاهوب انا لحالي اغلب الناس تبغى تويوتا وودهم لو تتحسن على مايبون
النيسان مثلا من افضل الجيبوب عنده وهو السفاري لكن البنزين والقربعه وعدم وجود مواصفة الشنطه كلها
نقص فيه
ماقصرتو مره اخرى على المرور يا اخوان ونرجو من البا قين آرآئهم وتفعيل الفكره ان اعجبتهم
ابو عبد الله

[عاشق المزون]

الله يخلي دول الخليج الاخر طلعت الى قطر وشريت الجيب في 6 ساعات بس وشلك مع ابوجميل الله يهدية في هالرمضانية المباركة
اما البازعي غلا فاحش وقل خاتمة بعد البيع صحيح ان شغلة يباني بس الخدمة زفت في المعرض كن الى داخل يشحذ منهم دراهم !!!!

[حـاتـم]

اخوي الفشق المتوسع

مشكورعلى الموضوع بس احب اوظح شغله مهمه

وهي ان شركه تويوتا كلمالها تزيد مبيعاتها حتى لو سياراتها رديه

زي الحين الاندكروزر الـ2006 نشوفها في كل شارع وحتى الهايلكس التايلندي نشوفها كثير الحين
وانا الى الان ماشفت الددسن فالشوارع تمشي
مع انه ياباني

يعني شركه عبداللطيف مايهمه اهم شي ان المبيعات تكون قويه وبكيف المستهلك

وانا اقول اقتراحي بالاند

الاول يرجعونه دفرنس بدل الفليور اعكوس

وثاني شي قيره يقوونه ويخففون عزم الدوران الي ماله سنع الي اول ماتمشي بالاند تشوف الكفرات مسرعه وهو بالرمل يمشي بشويش

وثالث شي يلغون الاستبنه التحتيه او يرفعونها لانها دايم تحك بالاسطب الكامل وترد الموتر

والفكسار الاحظ فيه انه يسحب مايدفع يعني فالرمل تمشي الكفرات الي قدام اقوى من الي وراء
على حسب ملاحظتي

بس اخوي الفشق المتوسع
انت قلت (((النيسان مثلا من افضل الجيبوب عنده وهو السفاري لكن البنزين والقربعه وعدم وجود مواصفة الشنطه كلها
نقص فيه)))

لا والله البنزين نفس الاند وعندي ادله على ذلك كثيره
والقربعه رح للورشه النويصر واساله عن قربعه الاند ويعلمك وش يتقربع اكثر وخاصه الجديد
ومواصفات الشنطه مهنا زود الشنطه عن البيبان زي مايقولون الناس
البيبان تقربع لا حتى الشنطه تقربع لان معنا جكسار 99 وشنطته تقربع بعد

والاندكروزر دايما الفكسار والجكسار معنا يا الاسطب ينفك من البطانيج او الكبوس
او قواعد الشمعه الاماميه معد ترفع لانه تتكسر مع الوقت وهاذاشي مجربه انا بفكسار ولد عمي

فقط لتوضيح وجه نظري ليس إلا

واتمنى اني ما اطلت عليكم ولا ضيقت خلقكم

وشكرا على الموضوع

وشكرا اخوك / حاتم

[غضنفر]

من الي غاصبكم على تويوتا قاطعوهم وشرط خلال سنة تنزل اسعارهم اجل ال Gxr 2006 ب 180 الف
والله حرام واليوكون ب 115 الف

[salehhd]

السلام عليكم

بصراحة انا ماجربت اللاند لاكن جربت الكزس وبصراحة موتر ما علية كلام

النيسان ممتاز وقوي وعزم غير طبيعي لاكن الناس ما عندها الا تويوتا

وعلى فكرة مين يقول ان دول الخليج اكبر مستوردين في العالم يا رجال كل سكان دول الخليج ما يجون 26 مليون

امريكا وحدها فيها مأت الملايين فلا تغترون بروحكم واجد

[الفشق المتوووسع]

السلام عليكم ورحمة الله وبركاته

اخوي عاشق المزون مشكور على المشاركه وابداء الراي لكن وش يمنع ان احنا نجرب كل الدعوى (ترعيص)
لزرة هالكمبيوتر ويمكن يصير لها جدوى بعدين الدعوى ماهي قولة من الخليج او السعوديه
الدعوى جوده ومواصفات .ياخي قارن بين الجيب 2006 و97 فرق السما عن الارض
اشكرك اخوي على المرور وابداء الراي

اخوي حاتم رأي فذ تشكر عليه
ولكن مثل ماقلت لعاشق المزون كل الدعوى محاوله وممكن ان احنا نعدل في الاسلوب يعني مخاطبة الشركه
ونقول ان المبيعات بتزيد اذا المواصفات على مايبي الناس
انا معك ان القربعه في الاثنين وهاذا القصد، لو تتحسن هالامور بيكون من صالحنا ولاهوب لازم تويوتا لحالها

اخوي black path يامرحبا بك والمقاطعه ماراح تجدي الناس مايطيعون ومعهم حق لان فيها مضره شخصيه نوع ما لان السوق يحكم عليهم لكن نقول بالتي هي احسن :(

اخوي salehhd صحيح ان احنا قليل لكن نستورد بكثره ونعتبر زباين على كل حال لنا حق نبدي ارائنا
والفكره هذي زي ماتقول واحد يبغى سياره طلبيه بحكم الماده اللي عنده. حنا نبغا مواصفات بحكم القاعده الجماهيريه
اللي تأيد هالراي الدعوى تبغى جد بس وتنجح ان شاء الله.

[محب الشمال]

بالنسبة لي أؤيد كلام الاخ ابو شماس ليش انا اترجى شركة تويوتا وشركة جميل عشان شي المفروض هم يبحثون عنه لكن شركة تويوتا ما يهمها غير المكسب على حساب البضاعة الرديئة لانها خلاص تقول انا ضحكت على الناس وعندي سمعة اقدر اضحك عليهم فيه
فكلام الاخ ابو شماس صحيح رح للحمراني وطلع لك باترول وتوكل على الله

[Waleed1]

السلام عليكم

ودى أضيف شى ولايهونون الاخوان، حقيقة تويوتا أصبحت سياراتها بكل الفئات غالية غلى فاحش اليوم أقل نوع من الكروزر 149000 يعنى أرتفت قيمة السيارة فى سنتين بشكل خيالى، بينما الامريكى اليوكن مثالاً باقى بسعرة القديم والسنة هذى اليوكن قطع 10 ب 109 الف عموماً أن لاأقصد اشجع او أمدح الامريكى لاكن اليبانين أصحاب سيارات التنك اصبحت سيارتهم اليوم أسعارها فاحشة ونستاهل ماجانا يا أخى ماتعرفون تقعدون فى بيوتكم شوى وتتركون الصالات اللين ماينشال الغرور من الوكالة واللة فى شهر تشوف كيف تسير الاسعار.

عموماً اللة يعين

[الفشق المتوووسع]

السلام عليكم ورحمة الله وبركاته

اخواني وليد 1 - محب الشمال لكم الشكر الجزيل على المرور والمشاركه

يبدو ان الفكره لن تلاقي قبول لكن بنشوف راي من يريد ان يبدي رايه

[ابوقاسم]

وانا اقول اترك تويوتا تبيع بيض واتجه للنيسان او الهوندا او اي ماركة ترضيك يعني مافي هالبلد الاهالولد والا الناس ما تحب الاخناقينها .......................
من كثر ما خذ سمعة صارت الجيوب مغرزة حتى عند البيبان............

[القطاع عشره]

فكره احلى من رائعه

هاذا المفروض من زمان انك تراسل المصنع حتى نيسان المفروض نراسلها عشان يقنون صرفية البنزين والقربعه اللي مالها سنع ويخلون الخلفيه شنطه مثل التايوتا على فكره ان كان النيسان يقربع ترى التايوتا التالي قلباته كثيره الله يستر علينا وعلى ابناء المسلمين ومايقربع وبس حتى على طول يتكسر الديكور الصدام اجل كلبسات بلاستيك رح ورشة بن مرضاح وشف جيوب جدد من الوكاله للورشه بقرطيسهن يجن يربطن ويضمنن عشان الطرد صح التايوتا كل ماقل موديله صار اصبر التالي صراحه من تايوتا ينعاف وترى النيسان للطرد احسن من تايوتا فيه رساوه احلى من تايوتا حتى لاابنشر الكفر وانت بطريق ومسرع النيسان اامن بعد الله من تايوتا بعدين نضام الفليور اللي هوا العكوس مقلب من جد مقلب كثير الخراب ولا يعيش طويل بعدين الحديد اقل متانه من القديم لافي التايوتا ولا النيسان واخرن وليس اخيرا اقول الغلا الفاحش بالسيارات حتى قطع الغيار غلا فاحش

تحياتي لكم اخوكم القطاع عشره

[اسيزو 4x4]

السلام عليكم ورحمة الله وبركاته

مشكور اخوي الغالي فشق المتوووسع على الموضوع المهم والمميز

الصراحة تويوتا أسعارها خيالية جداً جداً يحسبون الزبون يغرف من جبل فلوس

أنا أشوف ان لازم نبرق للمصنع في اليابان برقية تشرح المشاكل العديدة منها الجودة والسعر ومعاملة الوكالات !!

وهذا الحل الوحيد ...


أخوكم أبو حمود ....

[الكونترولCONTROL]

يا أخي وكالات تعتمد على العناصر الأجنبية لإدارة مبيعاتها وش نرتجي منهم ؟؟؟؟؟
=======================================
سواء تويوتا او نيسان او بنز او جنرال موتورز او فولفو او لادا !!!
=============================
هناك طيارون و مهندسون سعوديون لجميع انواع الطائرات
هناك قبطان سعوديون لجميع انواع السفن
هناك أطباء سعوديون يجرون اعقد العمليات
هناك علماء سعوديون يديرون مصالح ووزارات
هناك معلمون سعوديون في جميع التخصصات المهنية
=============================
و لكن كل هذا في الجانب الحكومي فقط !!!
و لكن اذا نظرت الى الجانب الأهلي تعجبت مما يقال عن عجز السعودي حتى ان يعمل موظف استقبال !!
مما يدل على تقصير واضح و فاضح من قبل القطاع الخاص !!! أين مثل هذه الكفاءات في القطاع الخاص
الذي يدار بأيدي عمالة يتم تدريبهم في نفس الشركات !!!! بينما يرفض السعودي المدرب و المؤهل لعدة سنوات !!!!
شيء محير فعلا !!!! و لكن الحمد لله هناك توجه قوي لإرغام الشركات رغم كذب بعضها و دعايتهم !!
=====================================
كم نسمع من بعض الشركات دعايات و تمويه عن توظيف و تدريب الشباب في الاجازات الصيفية .... و اذا انتهت الاجازة
الصيفية ... لم يبق الا الطاقم الفعلي للشركة (( الأجانب )) ؟؟؟؟ لمدة 10 أشهر ثم يتم تكرار العملية

[محب الشمال]

يا شيخ ابو هبال صدق انك حكيم وكلامك درر

فعلاً السعوديون ماشاء الله تبارك الله انجزوا في كل مجالات الحياة وليس على المستوى ا لمحلي بل الدولي

لكن العيب في القطاع الخاص الذي لا يهتم بأبناء الوطن والمفروض انهم يخدمون وطنهم الذي قدم لهم الكثير

لكن مصلحتهم الخاصة ومن اجل الربح السريع يقدمون مصلحتهم الخاصة على المصحة العامة

باسميك حيكم مكشات يا ابو هبال

ابو حمود كلامك صحيح اسعار تويوتا مبالغ فيها مره ((غاااااااااااااااالية))

[بن نويشر]

الاخ الفاضل اسزو .. ولا يهون الجميع ..

حتى الأسوزو غالي يقطع القلب ، قبل رمضان كنت عند العيسى وسألت عن الاسوزو دبل قير توماتيك (فل كامل) قال بـ 85000 ريال (يا دافع البلى) ونيت بكب بهالقيمة ؟؟!! الحقيقة شيئ غريب عجيب ، ولما شفت الغطاء الفيبر على الصندوق الحقيقة أعجبني كثير وسألت عن قيمته لقيته فوق الخمسة ألاف ريال ، يعني بصريح العبارة بيطلع علي مع الدعاسات والجناح الخلفي بـ 93000 ريال . والجيب باجيرو موديل 2005 جديد الفئة الثانية (يعني تحتت التوب) بـ 80000 ريال .

[2500HD]

الشركات الكبيرة ما يهمها الا المبيعات وانا اخوك هذا كلام صحيح

لكن تطوير وزيادة المبيعات لا تتم الا بتتبع رغبات المستهلك

اهم شئ عند تويوتا انها تبيع اكبر عدد ممكن من الموديل.فالمفروض نفس الشركة تويوتا هي التي تبحث عن رغبات الزبائن وليس

العكس , فالوضع الحالي يدلك على ان الشركة ما اهتمت بسوق الشرق الاوسط مقارنة بامريكا والدول الاخرى

اول ما طلع موديل اللكزس عام 91 اعتقد , كان هنالك اعلان مشهور في امريكا عن اللكزس , كان يقول اذا خربت عليك اللكزس في اي مكان في امريكا , نحن نرسل لك لكزس اخرى وناخذ الخربانة ونصلحها ونوصلها لباب بيتك .طبعا تويوتا ماسوت هالطريقة الا انها واثقه من منتجها تمام الثقة انه ماراح يفشلهاويخرب وهذا الواقع اللي حدث .
والوكلاء عندنا ما جابو طاري الشركة, اهم شئ يبيع على هالمهبل اللي مثلي ويجمع كاش ,ويغير في هالقطع ويعدل في السيارة ((( ماكفاااه المكسب اللي يجيه من الشركة يبي زوووووود))) لكن على المدى البعيد ما اتوقع تستمر الحال على ماهي عليه , خصوصا بانظمام المملكة لمنظمة القاتgatt

لكن لو اهتم الوكلاء بالمواصفات مثل الامارات اتوقع يكون هنالك فرق.
اجمالي سوق السيارات في الامارات 18مليار درهم
22% منها يعاد تصديرها !!
معدل النمو في سوق السيارات في الامارات 9,2 %
اكبر معدل نمو من السعودية 6,4%

هذا كله يرجع لان المواصفات في الامارات افضل على حسب اعتقادي,والا ايش يمنع السعوديين وغيرهم ما يشترون من اسواقهم المحلية.

------------
اما بالنسبة للتعديل على مواصفات السيارة , فالشركة ما عندها مانع في ذلك
بشرط ان الوكيل هو اللي يطلب المواصفات , لانه يسحب على 1000 و 2000 سيارة , وتويوتا مهيب مستعدة انها تعدل مواصفااات علشان 100 والا 200 سيارة .
فاذا اراد الاخوان اي موصفات فعليكم بابو جميل , راسلوه :)

وشكرا

[2500HD]

خبر جديد

كشفت شركة تويوتا اليابانية لصناعة السيارات عن ارتفاع صافي أرباحها عن النصف الأول من العام الحالي بنسبة 11.4 بالمئة بعد أن حققت معدلات البيع خارج البلاد طفرة كبيرة، وذلك على الرغم من معاناة الشركة من انخفاض قيمة الدولار أمام الين.

وأعلنت الشركة عن أرباح بلغت 584 مليار ين ياباني أو مايوزاي 5.5 مليار دولار في فترة الستة أشهر التي انتهت في شهر سبتمبر / أيلول الماضي حيث زادت المبيعات بنسبة 9.7 بالمئة لتصل 9.03 مليار ين ياباني.

يذكر أن أكثر طرز تيويتا شعبية ومبيعا هو طراز بريوس المهجنة وطراز كامري.

وقد استطاعت الشركة زيادة مبيعاتها في الولايات المتحدة عن طريق التوسع في التصنيع المحلي للسيارات وانفاق نقود أقل على الحملات الدعائية واستبدالها بالقيام بعمليات تخفيض للأسعار مما أثر على أرباح الشركات المنافسة.

وقد حققت السيارات من طراز بيروس التي تسير بالبنزين والكهرباء مبيعات جيدة في الولايات المتحدة.

وقد ارتفعت أرباح تويوتا في أمريكا الشمالية في النصف الأول من العام بنسبة 5.8 بالمئة لتصل 3.2 تريليون ين وذلك بالمقارنة مع المدة نفسها في العام الماضي، كما ارتفعت مبيعات الشركة في أوروبا بنسبة خلال نفس المدة إلى 16.4 بالمئة لتصل إلى 1.2 تريليون ين ياباني.

كما ارتفعت مبيعات سيارات تويوتا هذا العام في اليابان بنسبة 5.2 بالمئة لتصل إلى 5.8 تريليون ين وقد تعهدت الشركة نتيجة لهذا النجاح بأن يتم انتاج منتجات جديدة تناسب كل سوق على حدة كما توقعت انتهاج سياسة بيع قوية.

[الفشق المتوووسع]

السلام عليكم ورحمة الله وبركاته

اخوي الغضى يامرحبا بك ورايك على الراس والعين بس اذا اللي نشتكي منه هو افضل الموجود مالنا اللى هالحل
اخوي العزيز اسيزو4×4 حياك الله وبياك وجعل الجنه مأ وانا ومأواك وكل المسلمين
ايه يبعدي مبطين عن التأييد والربع مادري وش فيهم شاكين في هالفكره اللي ماتضر على قول القايل
ان..........والاماضرها.............
بارك الله فيك يبو حمود
اخواني الغالين ابو هبال و محب الشمال( والله اني احب الشمال مثلك)كلامكم يا اخوان على متمه واني معكم فيه
لكن خلونا نجرب نكون يد وحده لعل الله ييسرها ونقدر نغير من هالوضع المزري واذا حنا قعدنا بس كل واحدة يشكي من جهه ماسوينا شي والحال على ماهي عليه
اخوي سنيدي مايمنع تخاطب حتى شركة اسيزو
2500Hd عز الله انك ماقصرت لو مايجينا اللى الفايد الي استفدنا منك والفكره ترا ماهي كتاب منزل . اللا قابله للتعديل على مايرون الاخوان فلو غيرنا الخطاب الى عبد اللطيف او البازعي مافيه باس اهم شي نطلع بفايده
ومايخفاكم ان المنتدى يظم شريحه كبيره من المهتمين بالسيارات والمنتدى اظن ان له شهره ممتازه تواجه مثل اهله.

[الفشق المتوووسع]

السلام عليكم ورحمة الله وبركاته

اخوي القطاع عشره العذر والسموحه مشاركتك جايتن في اخر الصفحه الاولى وما انتبهت الها
جزاك الله خير على تأييد الفكره والله عقبك انت وابو حمود رجع لي الامل مره ثانيه
عسى الله يدلنا لما فيه صالح الاسلام والمسلمين
شكراً لك أخي الكريم .

[الوسم]

سجلنييييييييييييييييييييي
معك يا المتوسع
وأطلب الديزل التيربو

[الفشق المتوووسع]

السلام عليكم ورحمة الله وبركاته

اخوي الوسم يامرحبابك
وهه سجلنــــــــــــــــــــاك
عقبال مانسجل الباقين