اعطني نصيحة ولك الدعاء

[www5555]

السلام عليكم يا اخوان ابي نصيحة مجرب كنت ابى اشتري جيب ولقيت الاسعار خياليه وانا احيانا اطلع البر ونحني واحد باليوكن الدبل والسعر معقول تكفوووووون الله يوفق من ينصحي بالشي الطيبوانا محتار لم اجرب الامريكي وشوف اليوكن منتشر مع الناس

[أبوسعد111]

أسأل الله أن يوفق لما فيه الخير

ولاتنسى
أستخر
وجربه
وبالنسبة لأسعار السيارات أنت عارف أن هالايام تعتبر موسم وترتفع فيه الاسعار

تقبل مروري

[تبوكي 2000]

ودي افيدك لكن بالسيارات ما اعرف ابد

الله يوفقك ويرزقك السياره السنعه

[التعـ King ـديل]

كانك منت راعي بر دايم

الله الله بالباثفيندر او البرادو والكفه تميل للبرادو

اقل من 2008 تلاقيها بالسبعينات

[omar 3]

تهاهو شكل احلى ويجي دف لوك



وماشاء الله تبارك الله خط رساوه

[www5555]

انا ابشتري جديد فهل اليوكن يقوم مقام الجيب بالرمال مع ان طلعاتي للبرقليلة وكيف يصبر مايتهربد وقوة السيارة بالقومةالله يوفق جميع اللي ردوا على موضوعي وشاكر ولكن نبي معلومات اكثر

[التعـ King ـديل]

اليوكن والتاهو سيارات حلوة لكن فيها عيب

لاقدر الله وخرب الدبل تضطر تركب دبل جديد ولا ماراح تتحرك السياره

[باث 3]

أنصحك بالأف جي

موتر قوي-شكل حلو-كد ومد-قطع متوفره-قيمته معقوله


والله يبارك لك مقدما

[س6ك7ب]

أخوي إن كانك منت متزوج ولا راعي عائلة
أنصحك بالجمس السييرا 4*4 أو ال Z71 مقاس عشرة - شاص قصير - قوي وفعال ولا يتهربد وصرفية البنزين قليلة أحسن من الجيوب وراسي بالخطوط ولا هو غالي بالحيل ولا بغيت تبيعه ما ينزل من سعره إلا حاجة بسيطة ومرغوب
وشكله جميل وأنصحك بالغمارة Z71
والله يختارلك الطيب

[السليطين]

انا بقول لك اللي شفته (مهوب اللي سمعته).

الامريكي انحش عنه اذا كنت راعي بر ... نعم انحش انحش ..
احد الزملاء اشترى سييرا صحن صندوق قصير 2009 والان قيره منكسر للمره الثانيه ..
تخيل 2009 وقيره منكسر مرتين ..
ابن عمي اشترى يوكون 2009 وبعد مامشى 12000 كم طفى موتره وغير كمبيوتره ..
ابن عمتي اشترى جمس سييرا 2010 صندوق قصير وقبل امس دخلنا النفود ويوم عشقنا الدبل قام يطقطق وضاق صدره ورجعنا والموتر مامشى 500 كم ..

والله العظيم اني صادق .<<< لحد يجي الحين ويقول انك ماتحب الامريكي .. لكن والله هذا الحاصل ..

خلك على الياباني مهما كانت قيمته ..

[abo_hoor]

وعليكم السلام ورحمة الله وبركاتة
اخوي استخير بالاول
واذا تبي نصيحه مني انصحك تشوف لك برداو او اي سيارة من تويوتا زين وخربات قليل
وصيانة قليلة
والواحد يااخوي يقط فلوسه على شي مضمون ومايحاتي بعدين منه
والله يوفقك يارب

[الروضة]

وعليكم السلام ورحمة الله وبركاته
أخوي أنا أتصور تايوتا ولاتفكر في اليوكن أو الأمريكي عموماً
حتى لو سعرتايوتا غالي لوبغيت تبيع بعد سنة أو أكثر يكون ماسك سعره
أما الأمريكي سعره على طول تحت
وللمعلومية الأمريكي إذا ماشاف حوله أحد في البر قال هذا محلي يعني يتعطل فجئة
ولافيه أفضل من صلاة الاستخارة
والله يكتب لك الذي فيه خير لك

[السلمان2010]

والله يالحبيب يقول مايمدح السوق الا من ربح فيه ولا يذم السوق الا من خسر فيه
انا مجرب اليوكن 2008(ماشاء الله) مافيه كلام راحه وسعه في المدينه وقوه وعزم في البر
ولا خليت احد مغرز وطلب المساعده الا سحبته
والحمد لله الامور تمام
ولاتكثر مشاوره
كان الموتر داخل براسك
استخر وان ارتحت توكل على الله
والله يكتبلك الخير وين ماكان

[آل زايد502]

مشكله كل اللي يردون عن اليوكن موب عارفين وش هو
وياخيو اللي تقول كل عائلتكم عندها جمس ماكذبك لاكن شي مايدخل العقل ربعنا عندهم جمو وانا عندي ماقد شكيت منه الحمدلله الا قير كرفته كرف والزيتوالله اني مشيت عليه 200 الف ولا غيرته بعدين خبطلاحظ موديله 2001 الحمدلله وقيره قريب خبط
واللي يقول التايوتا خويي عنده فورتشنر خبط مرتتين القير مامشى الا 100 الف
الاستخاره اهم شي

[ملك الفكتوريا]

يا رجال خذ اليوكن والاستعمال يكون اوكيه


وبعدين تويوتا عدو الانسان انظمة الحماية زفت

[يوسف عبدالله]

الاندكروزر او البرادو .. الأفضل على الإطلاق ولايهون البترول وخصوصاً ابو رفارف سود

وبقية السيارات فيهم خير وبركه .. وإستخدامك وميزانيتك هي من تحدد

[saalh123]

حياك اخوي
السيارات توفيق من الله
وكل نوع تلقى من يمدح ومن يذم
نصيحتي لك طب السوق واشتر على قد فلوسك وعليك بالثمانية سلندر
واشور عليك بالاكسبدشن تراه معي له اكثر من ثلاث سنوات زي الحلاوة وسعره معقول
تحياتي

[بيبسي]

صراحه الامريكي مشاكله كثيره واغلبه كهرب ويتفكك بسرعه

انا انصحك - لاند كروزر- اف جي - برادو 6 سلندر - فورتشنر 6 سلندر
وكلها اتوتماتيك راح ترتاح باذن الله من امور الصيانه

[رويال4446]

الي ما جرب رجاء لا يتكلم من فراغ ..
انا مجرب يوكن 2003 ومكسره تكسير ولا قال اح ودايم تطعيس ودايم اسحب الي مغرز ويحتاج مساعدة ولا قال شي ومشى معي انا بس250ولا اشتكى من شيى الا اشياء استهلاكية
والي يقوول امريكي ومدري ايش..كل هاسوالف تهااااويل
ولا تلاقيه يقولون
وبعدين انت ما سئلت عن سيارة غريبة او قليلة الانتشار
انت تسئل عن سيارة يمتلكها اغلب الناس ويكاد اغلب البيوت ما تخلو من جمس
واذا تبي تسئل اسئل مجرب نصيييحة لا تسئل الا مجرب وهذا شيئ طبيعي..
واكرر انت تسئل عن سيارة ما تبي مشورة روح وخذ لك واحد2011ولله انت تسعد بحياتك وخاصة من 2009 وطالع نزل قير جديد6غيار يتحمل الكرف اكثر من الاول وبكثييير
واذا تبي تستفيد اكثر ومن ناس مجربة روح لم منتدى السيارات العربية
ويتوفيق اخوي
واي خدمة او سؤال انا موجود..

[هلبان]

لا تنسى صلاة الأستخاره
وانصحك بتاهو جديد أو جيب تويوتا من مديل 2006 أو 2005

[رحال7]

انصحك ابعد عن الامريكى حتى لو اغراك بالسعر او بأى شىء اخر.....انحش!

[حاتم العمر]

عندي لك اقتراح واعتقد انه مناسب لك مره .. استأجر يوكن يوم واطلع انت وعيالك وجربه بالبر
والتجربه خير برهان .. وتراه موتر جبار