المساعد الشخصي الرقمي

مشاهدة النسخة كاملة : رحلة مكشات الرمضانية الاولى ...الرياض ....حياكم


nahham
14/10/2005, 10:19 AM
السلام عليكم ورحمة الله وبركاته

بالامس اجتمعنا مع اخوة كرام على احد الطعوس الرمليه في الدمام ودارت احاديث جميله ومداعبات مرحه وشهد تلك الامسية القمر بكامل جماله كما احضر معه نسيم البحر الممزوج بقليل من الرطوبه كعربون استقبال لنا نحن القادمون من خارج الشرقيه

من القلب اقول شكرا لكل من ساهم في هذا التجمع الطيب المبارك

ونظرا لكونها بسيطة جدا كان هذا الاقبال الكبير ومن هذا المنطلق احببت ان ننافس الاخوة شباب الشرقيه - طبعا ما كان معنا شياب -كلهم شباب ماشاء الله المهم عزمت الامر وتوكلت على الله وسادخل ميدان المنافسه معهم

لذلك سأدعوكم الى Uاللقاء الرمضاني الاول في الرياض يوم الخميس القادم الموافق 17/ 9 ليلة الجمعه 18/ 9

والمكان طريق القصيم السريع مفرق بنبان 30 كم من الرياض وساوضح المكان مع الرسم لاحقا ان شاء الله

والدعوة عامة لجميع اعضاء وزوار منتديات مكشات

كما احب ان انوه ان الاجتماع سيكون بعد الساعه التاسعه ليلا ويمتد الى الرابعه فجرا ولكل اخ حرية البقاء او الانصراف حسب ظروفه

كما احب ان انوه اننا سنسير على طريقة الاخوه في الشرقيه بوجود القهوه والشاي فقط
أبو فراس
14/10/2005, 10:49 AM
السلام عليكم ورحمة الله وبركاته

الغالي ابو هشام

لي الشرف ان اكون اول من رد على موضوعك

سجل عندك واحد شايب اذا اتفقوا الربع
nahham
14/10/2005, 11:01 AM
تستاهل قبله على راسك يابو فراس

غالبية الربع موافقين وانا اخوك سبق التنسيق معهم

بارك الله فيه يالغالي
قناص الحبارى
14/10/2005, 12:51 PM
بسم الله الرحمن الرحيم
والسلام عليكم ورحمة الله وبركاته

أخي الفاضل / أبو هشام ,,

جزاك الله خير الجزاء على هذه الدعوه ..وأنا بإذن الله موااااااااااااااااااافق وما عندي ماااااانع ..

والله شوفة الإخوان تشرح الصدر وتدخل السرور على القلب ..

وشيخنا الفاضل أبو فراس ... دائما سباق بالخير حفظه وبارك في عمره ووقته وصحته ..

أخوي أبو هشام لقد إستفدت من معلوماتك بالأمس ...جزاك الله خير

أبو عبد العزيز

أخوكم/ قناص الحبارى
دله وفنجال
14/10/2005, 12:52 PM
السلام عليكم...
نقول على بركة الله انت ابوها وسمها ...
لاكن عندي اقتراح لو انخلية بحد النقر بنفود ماهوب ازين ونت خابر هلأيام ماشاء الله براد والنفود احس انه له نكه خاصة...
مجرد اقتراح لا أكثر ولا أقل...
ساري15
14/10/2005, 12:52 PM
وانا بعد ولا عليك أمر سجلني عندك

جاي جاي ان شاء الله

وما على الحديد بعيد

واللي يبي يخاويني يتولّم

والله يعطيك العافية يا نهااااااااااااااام
أبو يوسف
14/10/2005, 01:26 PM
موافق على طول الخط

ولو تنظرون لاقتراح اخوي ابو حسين النفود تراه زين

لكن اي مكان ان شاء الله جايينكم بس وصفوه لنا ترا ما معنا قارمن


مع التحية
العطة
14/10/2005, 01:31 PM
السلام عليكم ورحمة الله وبركاته

الاخ ابوهشام

جزاك الله خيرا على الدعوة ونتشرف بشوفة اعضاء مكشات
وسجلني معكم ان شاء

ابوعبدالاله
nahham
14/10/2005, 05:10 PM
هلا والله بقناص الحبارى الساعة المباركة يالغالي انك استفدت وياهلا بك في الرياض

اخوي دله وفنجال كلامك على العين والراس لكن تم اختيار المكان لعدة اسباب اهمها وضوحه وقربه من الطرق السريعه لمساعده الاخوان في الوصول خاصة لمن هم خارج الرياض وقد تم عرض رايك على بعض الاخوان فاجابو ان المكان قد تم ارسال كروكي للاعضاء عبر الخاص وصعب تغييره

على العموم الجايات اكثر وانا اخوك

اخوي ساري هلا بك يابو عبد الاله الله يحييك انت واللي يجي معك تسلم والله


اخوي العطة هلا والله ومرحبا بك يابو عبد الاله نتشرف بحضورك يالغالي


اخوي ابو يوسف هلا بك يالغالي الله يحييك وبالنسبة للمكان هالمره خلها في هالمكان والجايات اكثر يالغالي

ياهلا بكم وبجميع الاعضاء والزوار
الأعصـــــار
14/10/2005, 09:01 PM
تسلم يا بو حمـــــــــــــــد على هالبادره الطيبه وأنا أقول أن شالله أني معكم
ومادري مكانكم الي بتسووون فيه الأجتماع يبي له سياره دبل ولا سيدان ولا تهون أرسلي الكروكي
علشاني مادل شي بالرياض أبد ويعطيك ألف عافيه أخوك



الأعصـــــــــــــــــــــــــــــــــــــــــــــ ـــــــــــــــــار
nahham
14/10/2005, 09:32 PM
هلا وغلا اخوي الاعصار

المكان كله اسفلت سيدان كافي

هلا بك والله

ابشر بالكروكي ........... فالك طيب
شاص
14/10/2005, 09:42 PM
سجلللللللللللللللللللللل عندك
nahham
14/10/2005, 09:48 PM
هلا اخوي شاص

هلا والله وغلا

الله يحييك

انتظر الكروكي قريبا جدا ان شاء الله
عبار درب
15/10/2005, 12:40 AM
السلام عليكم ورحمة الله وبركاته
سجل حبه نفر شايب وحبه نفر شباب
وش المطلوب يامال الجنة نبي نفزع واحد هرفي على صحنين حليو اذا تأذنون ترى مناسبه
راسلني على الخاص تكفى وتكفى تهز الرجال
المهاجرxp
15/10/2005, 12:51 AM
السلام عليكم ورحمة الله وبركاته


والله الفكرة مش بطالة والله ودي بشوفتكم كلكم والمناسبة ذي غدينا ما نفوتها لو نجيء من القصيم علشانكم

أتمنى أن أكون أول المتواجدين في تلك الأمسية
أبو فراس
15/10/2005, 01:52 AM
السلام عليكم ورحمة الله وبركاته

الغالي ابو هشام هل كان اتفاقكم على يوم معين الاخوان على موقع معين لان اتفاقي مع الاخوان على ان يكون الاجتماع بروضة خريم ولكن ما ادري من قال انها هذه الايام تكون غبار وليست صالحة للكشتات فهل هذا صحيح ارجو ان تناقش الموضوع مع شيخنا ابو اسماعيل ( ريع الدياب) لان الروضة قريبة من الشرقية وتختصر لهم مسافة ووقت
ابوذيب
15/10/2005, 02:17 AM
عســـــــــــــــــــــــــــــــــــــاكم على القــــــــــــــــــــــــــــــــــوه
BASSAM
15/10/2005, 07:29 AM
السلام عليكم ورحمة الله وبركاته

اخي nahham جزاك الله خير على دعوتك لنا وكذلك عناء حضورك من الرياض .

ارجوا المعذره لعدم استطاعتي الحضور في هذا الموعد لارتباطي بمواعيد اخرى وجزاك الله الف خير.

اخوك ابو محمد
nahham
15/10/2005, 09:38 AM
اخوي عبار درب هلا والله ومرحبا لك رساله على الخاص

اخوي مهاجر الرس ياهلا والله وغلا الهدف الاجتماع والتعارف

حضورك يشرفنا والله

ياهلا بك
nahham
15/10/2005, 10:09 AM
اخوي ابو فراس

اتفاقنا في الشرقيه في روضة خريم لرحلة الشرقيه .... صح او لا

ثانيا كنت منسق مع الاعضاء قبل اعلن عن الرحله واكثر الاعضاء راح يجون من سدير والقصيم وتم اختيار المكان لقربه من طريق القصيم وحتى بالنسبة للبعض من الرياض يبون القرب

وعلى قولتك يمكن الجو غبار هالايام عسى الله يجيب المطر والخير والجايات اكثر يابو فراس ان شاء الله

اخونا ابو اسماعيل بالامكان الحضور مع الاخوه اللي بيجون من الشرقيه وحياكم الله

الغالي ابو ذيب ........ياهلا بالغالي

اخوي بسام كنت اتمنى حضورك لكن اذا عندك عذر اكيد نعذرك وان حصل تجي ياليت

سلام

افتقدناك في الشرقيه عاد عوضنا في الرياض

مشتاقين لشوفتك
كان
15/10/2005, 10:26 AM
عزيزي نهام انا انتظر الكروكي لوسمحت
حـاتـم
15/10/2005, 12:52 PM
يلا مشينا بس اضم صوتي واقول لو تكون بالنفد احسن ولكم حريه الرأي

لان اهم شي الجمعه بهالوجيه الطيبه

والتعرف عليكم والله اكبر مكسب

ومشكور اخوي نهام على هالدعوه الله يعافيك

لان الدمام بعيد ومانقدر عليه بس الرياض سهل واذا تبون فزعه بأي شي ابشروا


وشكرا


اخوكم / حاتم
nahham
15/10/2005, 01:18 PM
كروكي الموقع


http://www.mekshat.com/pix/upload/images11/mk10418_nah 2.jpg

حاولت اجيب صوره من قوقل ايرث لكن الصوره قديمة وما تفي بالغرض

اعتقد الكروكي واضح جدا وسيتم وضع لوحات ارشادية من نهاية الطريق المزدوج ان شاء الله
nahham
15/10/2005, 01:37 PM
هلا اخوي حاتم

لك رساله في الخاص
محمد العبدالسلام
15/10/2005, 02:07 PM
عساكم على القوه وسجلوا اسمي معاكم
الفشق المتوووسع
15/10/2005, 02:36 PM
السلام عليكم ورحمة الله وبركاته

سجل واحد مشوي على الفحم ينتظر يوم الخميس ونتشرف بالحضور والمشاركه بالى تريدون بشرط تسجل من ضمن المشاركات في المنتدى :j :p (ماسخه)
escape_man
15/10/2005, 03:01 PM
انشاء الله اني باحاول اجي مع انها تجربه جديده اقابل مجموعه مو واحد ولا اثنين
بس خلوني اقول ولا تواخذوني على التكرار
لوها باحد هالبران كان اشرح للصدر والواحد لو يضيق خلقه يمشي رجليه بهالنفد
ويتعرفله على واحد او اثنين لكن الحجره بالزفلت والله ما علمتها بحياتي

يالربع الي راسلتوهم ارجوا وعدلوها بس خلونا نطلق ركب هالمواتر الخرد
والي معه حطب يشبه والي معه عزبة يفلها ويقهوينا منها
عبار درب
15/10/2005, 04:09 PM
وصلت الرسالة يا نهام وانا والله ودي نوسع الموضوع شوي ترى ماهنا تكلف لكن دامكم منظمين على شاهي وقهوه
خلاص ، وش تقول نفزع بفرش مراكي اي شئي بس علمنا
وربي يحفظك
خالد العوض
15/10/2005, 05:10 PM
مشكور
http://www.twa9ef.com/uploads/a4a9515dc1.bmp
nahham
15/10/2005, 05:15 PM
هلا والله اخوي عبار درب

فزعتك يالغالي حضورك

جعلك تسلم

اخوي خالد العوض حياك الله وان شاء الله نشوفك مع الاعضاء

حباكم الله
رحال الخبر
15/10/2005, 09:07 PM
اخونا الحبيب

نهام

انشاء الله اذا الله سهل ويسر انا بزوركم وبسافر لكم للوجيه السفرة المنورة ولنا لقاء
بس الله الله بعدم الكلافة وان كانت متكلفة ترى الزيارة الاخيرة

وعساكم للقوة والموعد بتساهيل الله

والف تحية اخي العزيز
nahham
15/10/2005, 09:13 PM
هلا والله اخوي ابو براهيم

تشرفنا والله

مافيه كلافه وانا اخوك على شروط الربع

مثل رحلة الشرقيه قهوه وشاهي وشبة الضو والسوالف

نتشرف بوجودك يابو براهيم
ريع الدياب
15/10/2005, 09:52 PM
بسم الله الرحمن الرحيم
السلام عليكم ورحمة الله وبركاته

الغالى nahham راعى حريملا

ماشاء الله عليك قوى الارادة وسريع التنفيذ للمبادرات الطيبة

من يوم شفت موضوعك هذا أمس الجمعة وأنا اقول ليته أعطانا فرصة أطول شوى

اجتماع الرياض هذا أكيد بيجيله أعضاء كثيرين من مدينة الرياض وضواحيها

وهى فرصة عظيمة للتعرف على كل الاخوة الجدد اللى بيحضرون .... ولكن ما باليد حيلة

من أمس وأنا أحاول تغيير (تقديم أو تأخير) الارتباطات المسبفة لعطلة نهاية هذا الأسبوع

ولكنى فشلت .. تخيل كم تحسفت على تفويت هذه الفرصة

ولكن ان شاء الله الجايات أكثر من الرايحات

وعزاءنا الوحيد أن مندوبين من الشرقية (قناص الحبارى - الاعصار - رحال الخبر) حتى الآن

سيتمكنوا بعون الله من الحضور ... وكذلك سنسعد بتقاريركم وصوركم عن اللقاء

ان شاء الله نتقابل فى أم رقيبة فى شوال اذا بقينا حيين

تحية وتقدير لك ولكل الاخوة فى لقاءكم المبارك ان شاء الله
nahham
15/10/2005, 10:01 PM
هلا ابو اسماعيل

استعجلنا حسب طلب البعض ضرورة كونها قبل العشر الاواخر وكانت مبرمجه مسبقا لكن ما حبيت اطرحها الا بعد انتهاء اجتماع الشرقيه

نتمنى حضورك يابو اسماعيل مع الاخوه فكر ثاني وشاور ام اسماعيل هههههههههههههههههه

حضورك يزيدنا فرحة وسرور ا

شكرا لك على الاطراء
عروق الدهنا
15/10/2005, 11:31 PM
السلام عليكم ورحمة الله وبركاته
سجلون معكم واشكركم على هذه المبادره


والسلام خير الختام
ولد سليمان
16/10/2005, 12:49 AM
السلام عليكم ورحمة الله وبركاته

الله يجعلك على القوه اخوي الكبير نهام
واتمنى انك ماتحرمني فرصه الاجر بالشهر الفضيل اني اشيل عنك بعض الشي .
وتراي والله جاهز ولايردك الا انك تأشر وعندك الخاصه علمني .
عاشق الجبل
16/10/2005, 01:10 AM
لي شرف الحضور بينكم :)


وش تبون أجيب معي ..... ماء الغسيل .... والحطب عندي ( سمر ... غضى ... قرض ) تدللوا :)
قاهر الكرك
16/10/2005, 01:17 AM
:( :( :( :( والله خساره :( :( :( :(
ادعوا ربكم انه تحصل لي فرصه احظر واشاركم
(((ياااارب)))

أخوكم قاهرالكرك
دكتور مكشات
16/10/2005, 01:39 AM
رااااااااااااااااااااااااااااااائع


سجلوني معكم




بس وش المطلوب نجيبه؟
قرناس الخبر
16/10/2005, 07:14 AM
السلام عليكم ورحمة الله وبركاته

اذا الله يسر حنا اول الحضور.........

:) :) :) :) :) :) :) :) :) :)
nahham
16/10/2005, 10:41 AM
الاخ الكريم عروق الدهنا حضورك شرف لنا الله يحييك

الاخ ولد سليمان ما تقصر يالغالي لكن ما فيه تكلف قهوه وشاهي وجلسه تعارف هذا شرط الجميع فزعتك يالعالي حضورك حياك الله

الاخ عاشق الجبل رايتك بيضاء يالغالي يكفينا حضورك يالغالي لاخلا ولا عدم

الاخ قاهر الكرك الله يساعدك ويوفقك للحضور تراها فرصة تعارف ممتازه لاتفوتك يالغالي

الاخ دكتور مكشلت ياهلا والله وسهلا بك ابد يالغالي تعال انت واللي يعز عليك كل شي تمام الله يعافيك

الاخ قرناس الخير ياهلا والله وغلا

نحن في انتطار الجميع ياهلا وسهلا
جو الصمان
16/10/2005, 01:17 PM
السلام عليكم ورحمة الله وبركاته
والله الفكره جديده والواحد يتردد لاكن انشى الله انكون من الحضور
وارجو منكم طلب اي شي (يد وحده ما تصفق ) ارجو مراسلتي على الخاص لاي شي تبون
nahham
16/10/2005, 01:31 PM
هلا بك اخوي

مانبي الا سلامتك وحضورك يالغالي

الله يحييك ويحيي كل الاعضاء والزوار
الشاطر
16/10/2005, 01:35 PM
سجل الشاطر ...حاضر باذن لله

ويااااااااااااااعساكم على القوه
nahham
16/10/2005, 02:15 PM
هلا بك يالشاطر

سجلناك لكن جب معك رسوم التسجيل

ههههههههههههههههههههههه

امزح

حياك الله
**الجدي**
16/10/2005, 03:56 PM
الســـــــــــلام عليكم ورحمة الله

الله يجمعنا وياااااااااااااكم بجنات النعيم

انشااء الله اني من الحضور وبتشرف بمعرفة اخواني بمكشات ... واللي تامروني فيه حاضر ومستعد ورهن الاشاره
ويا ليت نعرف الترتيبات وش لنا وش علينا لجل انه ما يتحملها ناس عن ناس ونبي نتشارك بالاجر والا ما به شك بكل اهل مكشات ............ والله ثم والله انكم بطرانين يا اهل مكشات وتعجبونن بالحيل :D ذكرون افحط وانقلب اذا شفتكم ههههه :p << ايقاله من الوناسه يبي يسوي اي شي

وجمعة مبروكة بأذن الله
العطة
16/10/2005, 07:03 PM
السلام عليكم ورحمة الله وبركاته

اخوي نهام
الله يقويك على جمعة الشباب
اذا تحب النفود قريب تقريبا 15 كلم مترا (طعس الهرم)
بعد التفتيش 8 كلم معبر جمال تاخذ معه يمين وتمسك خطوط قايمة 7 كلم تصل طعس (الهرم)


ابوعبدالاله
nahham
16/10/2005, 10:27 PM
هلا والله بالجدي

الله يحييك يالغالي ما نبي الا سلامتك يكفينا حضورك

هلا اخوي ابو عبد الاله

اعرف النفود لكن الشباب اللي يجون من الشرقيه او الخرج ما يدلونه ونبي القرب للدائري

واعتقد ان المكان ممتاز وتم اختياره بالتنسيق مع بعض الاعضاء

وعموما الجايات اكثر ان شاء الله

المهم لاتنسى الحضور

ياهلا
الحاتمي
17/10/2005, 01:11 AM
السلام عليكم ورحمة الله وبركاته

الله يقويك اخوي nahhamويجزاك خير
وان شاءالله ابكون من اول الحاضرين في المكان والموعدالمحدد
ابو محمد
17/10/2005, 01:13 AM
الأخ العزيز / nahham
لقد قرأت الرسالة ، وأشكرك على هذه الدعوة ، وأسأل الله لنا ولك التوفيق .
لا أستطيع أن أعدك بالحضور ، لكن سأحاول بإذن الله .
أخي العزيز
أكرر لك شكري مرة أخرى .........

أخوك / ابو محمد
مهراس
17/10/2005, 01:23 AM
السلام عليكم ورحمة الله وبركاته:
الأخوان المشرفين والأعضاء والله مشتاق للقاء جديد مثل هذا ومع اللحى الغانمه عسى الله يجمعنا على خير ,,انا سوف احاول أحضر بقدر الأمكان ولو لوحدي فمتعة اللقاء سوف تنسيني طول الطريق.
غالي
17/10/2005, 07:54 AM
اول شيء السلام عليكم ورحمة الله وبركاته
ثاني شيء انا مااعرف احد بالمنتدى ولي الشرف اني اتعرف عليكم يالوجيه الطيبه ..... بس ممكن اجي ؟؟ :(
ثالث شيء عندي اقتراح لاخوي نهام اذا انت تحس ان المكان فيه شيء من التضييع وتستخدمون اجهزة الايكوم او الكينود اتمنى تتفقون على مكتب معين للي لاسمح الله يضيع يحصلكم عليه خصوصا الي بيجون من برا الرياض يمكن يجهلون ذيك المنطقه... هذا اقتراح
واخيرا اخوي نهام ياليتك تتفق معنا وبعض الاخوان نفزع معك بالشاي والقهوه وابشر من عيونا
اخوكم \ غالي
nahham
17/10/2005, 11:09 AM
الاخ الكريم الحاتمي ياهلا بك عين فراش وعين غطاء يالغالي

الاخ الكريم ابو محمد هلا والله وغلا ماسوينا الا الواجب اخوي يقول المثل من قام عانه الله هههههههههههه

طالما انك بتحاول يعني بنشوفك معنا ان شاء الله .......... ياهلا

الاخ الكريم مهراس ياهلا والله وغلا ..... صدقني متعة الجلوس مع الاعضاء قمة المتعه

ان شاء الله توصل بالسلامه

الاخ الكريم غالي .. وعليكم السلام ورحمة الله وبركاته

قولك انك ما تعرف احد . .. يالغالي هذا هو الهدف من الاجتماع ...... التعارف عن قرب

واعتبر هذا دعوة خاصة لك .....ياهلا بك

بالنسبة للمكان شوف الكروكي واضح جدا وقريب من طريق القصيم السريع ويوجد لوحات تدل على الموقع من المخرج رقم 6
وغالبية الاعضاء معهم كنوود ولهم نداء موحد اتفقنا على عدم نشره

لكن راح اسوي رقم جوالي هنا يوم الاربعاء او يوم الخميس ان شاء الله

تسلم يالغالي فزعتك الحضور ........حياك الله بين ربعك واخوانك
المرقاب
17/10/2005, 11:16 AM
الله يجزاكم خير
وانا معكم ان الله اراد.
المرقاب
nahham
17/10/2005, 11:19 AM
هلا بك اخوي المرقاب بيت اهلك واخوانك
كبريت
17/10/2005, 01:08 PM
معليش لاهنت الجلسة ويش بيتخللها

وهل من الممكن ناتي باحد الابناء ؟

وشكرا لكم
nahham
17/10/2005, 01:16 PM
هلا ابو محمد

الجلسة قهوه وشاهي وشبة نار وعلوم طيبه سوالف وتعارف

اكيد نتشرف بوجود الشباب الله يحفظهم وبعض الاعضاء يجيب عياله معه

الله يحييك انت وعيالك واللي يعز عليك
شـهـاب
17/10/2005, 01:26 PM
نهـام الله يكثـر خيرك

ووالله اتمنـا اني احضر بس المشكله المكان بعيد علي


انا في حايل وان شاء الله الجايات اكثـــــــرررر

اخوكم شهاب
حـاتـم
17/10/2005, 01:34 PM
الى الان وصل عدد الي ردوا وقالوا بنجي 36 عضو


ماشاء الله تبارك الله

الله يجمعنا على خير ومعزه

وان شاء الله الجميع يستمتع بهالطلعه

والله اني متشوق للطلعه واجد عسى ماتجيني ظروفة وتردني بس

والله يكتب الي فيه خير



وشكرا

اخوكم / حاتم
الســـاري
17/10/2005, 01:35 PM
نهام عساك على القوه

باذن الله اذا ما عندي ارتباط فانا معكم

نتشرف بمعرفة الطيبين

تسلم والله يا نهام على همتك في جمع الشباب وتعارفهم

اعتقد ان الموعد يوم الخميس الجاي والا ؟
nahham
17/10/2005, 01:45 PM
اخوي شهاب فيه ناس تجي من جده وعلى قوله اخونا ابو عبدالاله ما على الحديد بعيد

عندي لك اقتراح نسق مع ابو عبدالاله - ساري - وتعال معه من القصيم توسعون الصدر وتترافقون ....... ياهلا

اخوي حاتم الله يزيد ويبارك

ولا تقعد تونون اجزم وتعال ابيك اتعلم منك شرح الكاتم ههههههههههههههه - تراه سر

اخوي الساري كلامك صحيح ...... نعم الخميس الجاي ان شاء الله

نحن في انتظارك

حياك الله
حـاتـم
17/10/2005, 01:57 PM
اشرح لك الكاتم لاياخوي لاتوهقني

حنا عندنا واحد من الربع مخصوص للكاتم

هههههههههههه

لاتوهقني مع الربع بس
nahham
17/10/2005, 02:08 PM
هلا حاتم

وش هالفضايح

قايلك سر بيني وبينك ابتعلم منك في السر

ههههههههههههههههههههههههه ماصار سر
المرنقط
17/10/2005, 06:09 PM
السلام عليكم

عسى ما فاتني شي واسف على التاخير

على العموم انا ان شاء الله معكم وين ما تروحون

مادام كشتت الشرقية راحت ما ودنا اننا نفوت كشتت الرياض

والله يعطيك العافية اخوي nahham على المبادرة الطيبة
طشي وامطري
17/10/2005, 09:21 PM
السلام عليكم ورحمة الله وبركاته
نجي بدون ما نفزع بشيء ياراعي الأولة؟
hartha
17/10/2005, 09:45 PM
أخوي ( نهام ) جزاك الله خير على هالفكرة التي إنما هي في الحقيقة تزيد من أواصر المحبة وتقوي العلاقة بين الأخوة في منتدى مكشات ، فكثير الشكر لك ، ويا ليت تسمح الظروف لنأتي ونسعد ونتشرف بمعرفتكم ، أخوكم المحب هارثة .
nahham
17/10/2005, 10:14 PM
اخوي المرنقط مافات الا الشر وانا اخوك ....... المهم الحضور الله يحييك

اخوي طشي وامطري ........ حضورك اهم مشاركة يالغالي

اخوي هارثه ..... حياك الله يالغالي والله نتمنى حضورك . حاول تحضر تراها فرصه للتعرف عن قرب

حيا الله الجميع
nahham
18/10/2005, 08:44 AM
السلام عليكم ورحمة الله وبركاته

بناءا على طلب بعض الاعضاء سوف اكرر وصف الموقع كتابة لمن لم يعرف قراءة الكروكي علما ان الاجتماع كما هو مقرر يوم الخميس القادم - بعد بكره - ان شاء الله :

1 - الاتجاه الى طريق القصيم لكل الاخوه سواءا من الرياض او من الشرقيه او اي جهة غير القادمين من شمال الرياض ورقم مخرج القصيم من الطريق الدائري الشمالي هو 4

2 - الاتجاه مع طريق القصيم شمالا ولمسافة ثلاثين كيلو مثر تقريبا حتى مخرج بنبان وهو مخرج رقم 6

3 - الان يشترك القادمون من شمال الرياض عبر طريق القصيم السريع والخروج مع مخرج 6 والاتجاه غربا

4 - الخروج مع مخرج رقم 6 والاتجاه غربا وتكون مدينة سلطان للخدمات الانسانيه على يدك اليمين والطريق مزدوج

5 - مسافة الطريق المزدوج 2 كم ثم يكون الطريق مسار واحد

6 - استمر في السير مسافة 2.300 متر

7 - اتجه يمينا مع طريق ترابي ممهد جاهز للسفلته واسع جدا بعرض 100 متر وسيكون هنا لوحة مكتوب عليها - مكشات -
وسهم يتجه لليمين

8 - استمر بالسير متجا نحو الشمال مع الطريق الترابي مسافة 1.5 كم تجد الموقع امامك تماما مع وجود لوحة مكتوب عليها - مكشات

9 - هذا التفصيل هو نفس الموجود في الكروكي ولكن لمزيد من الايضاح فقط

=============

حيا الله الجميع
طلحة
18/10/2005, 12:40 PM
الأخ نهام وباقي الأخوة الكرام:
جزاكم الله خيرا، وأعتقد أنها فرصة للتعرف على الطيبين، وانشاء الله إذا قبلتموني فأنا حاضر الله لا يعوق بشر وسأحضر معي مفاجأة ستمتعكم طوال الليل بإذن الله.
nahham
18/10/2005, 12:54 PM
الله يحييك اخوي طلحه

اكيد نقبل كل الاعضاء والزوار بعد

ياهلا بك
الســـاري
18/10/2005, 12:55 PM
طلحه ...
قل وش المفاجأه عشان نتحمس و نجي بدري ;)
طلحة
18/10/2005, 01:03 PM
أخوي نهام
شكراً لك على ترحيبك
أخوي الساري لو قلتها ما صارت مفاجأة لكن أنا متأكد إن هذه المفاجأة بتخلي بعضنا واقف على رجليه طول الليل من غير ما يحس بالتعب
حـاتـم
18/10/2005, 01:06 PM
اخوي الساري شكلك بتخلينا نلعب كره طائره طول الليل
ههههههههههههه

وحياك الله اخوي معنا

اخوك / حاتم
طلحة
18/10/2005, 01:28 PM
أحوي حاتم كرة الطائرة ليست مفاجأة لأحد فيمكن كل مكشاتي عنده كورة. هذي الفاجأة جديدة عليكم يمكن أول مرة تستخدمونها وما تنفع إلا بالليل فقط.
الخيال
18/10/2005, 01:41 PM
اخوي نهام انشاءالله حاضرين الله لايعوق بشر لكن وش المطلوب علينا وش نجيب لازم نتكاتف تراني تحت امرك
nahham
18/10/2005, 01:44 PM
هلا والله اخوي الخيال

حضورك هو المطلوب يالغالي انت ومن يعز عليك

جعلك تسلم

والله تراها بسيطة جدا مافيها اي تكلف

اهم شي التعارف عن قرب ونشوف اخواننا الاعضاء اللي مانعرفهم الا بالاسماء فقط

وهذا هو الغرض الاساسي من الاجتماع

حياك الله وحنا بانتظارك وباقي الاعضاء
الشوكيss
18/10/2005, 01:58 PM
السلام عليكم ورحمة الله وبركاته
شكراً لك أخي الكريم على هذه الدعوة

فكرة جيده ولعلي استطيع المشاركة معكم
اخي الحبيب هل تحتاجون فزعه تراي مستعد

مع تمنياتي للجميع بحفلة سعيده
nahham
18/10/2005, 02:03 PM
هلا اخوي

فزعتك الحضور طال عمرك

تسلم وما قصرت

الله يحييك يالغالي
العطة
18/10/2005, 02:29 PM
السلام عليكم ورحمة الله وبركاته
اخوي طلحة حياك الله

المفاجاه بتخلينا نوقف من الفرحة او الخوف
انصح الشباب باخذ الحطة والحذر
عموما جايب معي ان شاء الله شوزن وموية نار احتياط

ابوعبدالاله
بـران
18/10/2005, 02:49 PM
السلام عليكم
الأخ / نهام
و لا يهون الربع
وش البرامج المقدمة اللتي ستقدم في المخيم ؟
يعني برنامجكم ؟؟؟؟؟؟؟؟
بارك الله فيك و الزملاء الأعضاء
nahham
18/10/2005, 03:13 PM
وعليكم السلام

البرنامج المتفق عليه كالتالي :

1 - الساعتين الاولى تعارف وكل عضو يعرف بنفسه

2 - بعد الساعه الثانية عشر يبدأ مناقشة الرحلتين القادمتين - رحلة القصيم ايام عيد الفطر واللقاء الموسع في ام رقيبه

3 - بعد الساعه الواحده مناقشة مواضيع المنتدى وحتى نهاية السهره

وحياك الله
هاوي قصيده
18/10/2005, 08:35 PM
افا اجل فاتني اجتماع الشرقيه

يالله المرات الجايه اكثر باذن الله

تشكرات
nahham
18/10/2005, 08:41 PM
هلا اخوي

ما فات الا الشر

اجتماع الرياض بعد بكره - يوم الخميس

حياك
المهاجرxp
18/10/2005, 08:56 PM
السلام عليكم

أحيي فيك يا أخ نهام أنت والبقية هذه الروح الطيبة

وهناك سؤال مهم وهو السيارات الصغيرة كالفورد والكامري تستطيع الوصول للمكان أم لا

وشكرا لكم

وهاه تبون كليجا أو سكري أو شيء اطلبوا علشان نجزم ونجي
nahham
18/10/2005, 09:05 PM
هلا اخوي مهاجر الرس

وعليكم السلام

شكر ا على الاطراء

نعم اخي الكريم الطرق مسفلته كلها الا كيلو ونصف ممهد وجاهز للسفلته

يمكن لجميع السيارات الوصول بسهوله

حضورك يكفي يالغالي

لاتضيع الحضور تراه فرصه للتعارف عن قرب

اكرر ترحيبي بك
صنيتان
18/10/2005, 11:58 PM
السلام عليكم

شكرا لك اخي nahham على هذه الدعوه

ارجو قبول اعتذاري لعدم تمكني من الحضور

ان شاء الله الجايات اكثر

شكرا لك
nahham
19/10/2005, 12:42 AM
هلا والله اخوي

كنت اتمنى حضورك

خيرها بغيرها يالغالي
ابو عبودي
19/10/2005, 02:20 AM
بسم الله الرحمن الرحيم
والسلام عليكم ورحمة الله وبركاته

أخي الفاضل / أبو هشام ,,
مادري فيه احداثية للموقع وشكرا
nahham
19/10/2005, 02:24 AM
هلا اخوي ابو عبودي

وعليكم السلام ورحمة الله وبركاته

الحين والله ما معي الاحداثيه

لكن ترا واضح جدا

وراح اسوي رقم الجوال يوم الخميس الصبح ان شاء الله هنا

حياك الله
هاوي الحباري
19/10/2005, 02:40 AM
سلام لنهام ولكل الأخوان ....

الله ييسر لنا مشاركتكم ، في هاللقاء المبارك سلفا إن شاء الله .

ولك تحياتي .
nahham
19/10/2005, 08:43 AM
وعليكم السلام ورحمة الله

ياهلا بك وبكل الشرقاويين

تاصلون بالسلامه ان شاء الله

الله يحييكم
الأعصـــــار
20/10/2005, 12:15 AM
بصراحه يانهام خايف أضيع أبيك تقول للي بيجي من الشرقيه وصف دقيق أول كبري يخليه أو ثاني أشاره معها يمين
يعني زي كذا ترى خويك عليمي الله بالخير في الرياض (تحملنا بنتعبك معنا)


الأعصـــــــــــــار
nahham
20/10/2005, 12:29 AM
هلا باقوى اعصار

لك رساله في الخاص
شايب الصمان
20/10/2005, 12:38 AM
أبو هشام سجلني من الحضور بأذن الله
nahham
20/10/2005, 12:41 AM
اخوي الاعصار

يا اخوي ترا الرياض هي العاصمه

ما عندك ولا اشاره <<<<<<<<<<<<< امزح

وانت جاي من الشرقيه استمر بنفس الاتجاه وتجاوز تقاطع المطار وهو المخرج رقم 8 واستمر متجها غربا وتجاوز كل المخارج حتى تلاقي مخرج رقم 4 وهو مخرج طريق القصيم

واستمر متجها شمالا مع طريق القصيم حتى مخرج رقم 6 حسب الكروكي

باختصار اتبع لوحة القصيم

حياك الله يالغالي
nahham
20/10/2005, 12:44 AM
ابشر اخوي شايب الصمان

حياك الله وياهلا وسهلا
هشام عزيز
20/10/2005, 01:48 AM
السلام عليكم
مشكور يابوي هو " أبو هشام " وأنا هشام على النشاط والحركة الدؤوبة والعمل المتواصل .. أكمل ولا خلاص ..؟!
بعذرك يا نهام أنت الأسد من محاسيك الشبل .. ها ها ها
عموما يابوي يمكن ما أجي ومثلك عارف ما يمكن يفضى البيت من الرجاجيل شرواك يا الأبو يا الولد ؟!!
لكن شوري عليك يابوي أنك تتوصى في أهل اللحى الغانمة والعلوم الطيبة واحرصوا على التوثيق والتصوير لتحفظ مثل هذه النشاطات وتكون ركيزة ولبنة لما بعدها من لقاءات ونشاطات .. وللحديث بقية

يا ما حلا جيات بعض الرجاجيل .. ينسى بها المرء المعنى همومه
في جيته نعطيه كل التفاصيل .. من زود حبه قبل ناخذ علومه
ومقربين التمر قبل الفناجيل .. والعود الأزرق يحترق في قدومه
nahham
20/10/2005, 08:34 AM
وعليكم السلام ورحمة الله وبركاته

هههههههههههههههه

لا خلاص لاتكمل

عسى المانع خير والله كنت اتمنى حضورك مع النشاما لكن الجايات اكثر ان شاء الله

ولا يهمك الرجاجيل شرواك في عيوننا وتسلم على الشعر صح لسانك

حياك الله يالغالي
nahham
20/10/2005, 01:01 PM
للتذكير

اليوم الخميس هو موعد اجتماع اللقاء الرمضاني الاول في الرياض

اعيد وصف الموقع كتابة وتحت ذلك كروكي

1 - الاتجاه الى طريق القصيم لكل الاخوه سواءا من الرياض او من الشرقيه او اي جهة غير القادمين من شمال الرياض ورقم مخرج القصيم من الطريق الدائري الشمالي هو 4

2 - الاتجاه مع طريق القصيم شمالا ولمسافة ثلاثين كيلو مثر تقريبا حتى مخرج بنبان وهو مخرج رقم 6

3 - الان يشترك القادمون من شمال الرياض عبر طريق القصيم السريع والخروج مع مخرج 6 والاتجاه غربا

4 - الخروج مع مخرج رقم 6 والاتجاه غربا وتكون مدينة سلطان للخدمات الانسانيه على يدك اليمين والطريق مزدوج

5 - مسافة الطريق المزدوج 2 كم ثم يكون الطريق مسار واحد

6 - استمر في السير مسافة 2.300 متر

7 - اتجه يمينا مع طريق ترابي ممهد جاهز للسفلته واسع جدا بعرض 100 متر وسيكون هنا لوحة مكتوب عليها - مكشات -
وسهم يتجه لليمين

8 - استمر بالسير متجا نحو الشمال مع الطريق الترابي مسافة 1.5 كم تجد الموقع امامك تماما مع وجود لوحة مكتوب عليها - مكشات 9 - هذا التفصيل هو نفس الموجود في الكروكي ولكن لمزيد من الايضاح فقطhttp://www.mekshat.com/pix/upload/images11/mk10418_nah%202.jpg
nahham
20/10/2005, 01:17 PM
لم افلح في اخراج الكروكي

لكن الكروكي موجود في الصفحة الثانية المشاركة رقم 23 في هذا الموضوع
ساري15
20/10/2005, 01:22 PM
الله يعطيك العافية يابو هشاااااام

وماقصرت وبيض الله وجهك

وهذا الكروكي بالنيابة عنك .. المعذرة


http://www.mekshat.com/pix/upload/images11/mk10418_nah%202.jpg
nahham
20/10/2005, 01:24 PM
هلا ابو عبد الاله

يعطيك العافيه

ليش مزرقن معي ومو راشي يطلع الصوره او المسأله واسطات

عموما لو تقدر تكبر الكروكي اكبر شي ممكن

باليت
ساري15
20/10/2005, 01:52 PM
تامر امر يابو هشام

هذا الكروكي الأصلي :: للقادم من الرياض والشرقية

http://sary15.jeeran.com/meknaham.jpg

وهذا للقادم من القصيم واللي حولها :: ((( اذا كان فيه خطأ نبهني يابو هشام))

http://sary15.jeeran.com/maqb.jpg
nahham
20/10/2005, 02:19 PM
تمام

يعطيك الف عافية ابو عبد الاله

تاصل بالسلامه ان شاء الله
ابوذيب
20/10/2005, 09:32 PM
هذه اخر مشاركه وهي امنيه مني لكل من حضر بان يكون سعيدا مع اعضاء مكشات وان يتم التعارف على البر والتقوى
وامنيه اخرى اتمنى للذين كان بودهم الحضور ولم يستطيعوا مثلي ان ييسر الله لهم الحضور بالمرات القادمه
واتمنى الصحه والعافيه للجميع

وهذا اخر الموضوع وستجدون موضوع جديد الليله ليتحفونا الشباب بما لديهم من اخبار وصور
تحياتي للجميع
طشي وامطري
21/10/2005, 01:10 AM
حبسني حابس
الشكوى لله كان ودي بالجية لكن قدر الله وما شاء فعل ليتكم تسوون تغطية للحدث واش سويتوا
راعى ثادق
21/10/2005, 01:36 AM
الله يبارك لكم فى جمعتكم وانا اعتذر عن الحضور وذالك بسبب ضروفى ونا معكم فى جميع قرراتكم وقتراحاتكم
nahham
21/10/2005, 03:44 AM
مرحبا بالجميع

الحمد لله لقد تم اللقاء

http://mekshat.com/vb/showthread.php?t=36925
محب البر
28/10/2005, 10:51 PM
إخواني أعضاء مكشات :

السلام عليكم ورحمة الله وبركاته ، وبعد :

مما يسر الخاطر هذا الدور الذي قامت به منتديات مكشات على كافة المستويات ، وأخص بالذكر تجمعات أعضاء المنتدى في الشرقية والرياض والقادم في أم رقيبة والقصيم.
فما من شك أن هذه التجمعات لها من الإيجابيات الشيء الكثير ولعل أولها التعارف الحقيقي بين الأعضاء وتكوين صداقات جديدة يعتز بها الإنسان كثيراً .
ولكن هذه الإجتماعات بعدت عن مجال تخصص مكشات الخاص بالصيد والرحلات البرية وما يدور حولهما وأصبحت تتم في المدن والمناطق التي حولها ، بدون تنظيم رسمي يحويها ، وهناك موضوع مطروح في الخيمة العامة لإنشاء جمعية لهواة الصيد والرحلات ! متى يصبح الحلم حقيقه ؟ (http://www.mekshat.com/vb/showthread.php?t=36898) والتي في حال إنشائها تكون هي الغطاء الرسمي لعقد مثل هذه الإجتماعات ، وحتى يتم ذلك الأمر ، فقد درست إدارة مكشات الموضوع من جميع جوانبه وأرتأت أن يتم التوقف عن الإعلان عنها في مكشات

الرجاء من الأخوة الكرام أعضاء مكشات تقدير الموقف وتفهم هذا الأمر