افضل كفرات تويو ام برجستون ام جودير

[عبادي 2011]

بسم الله الرحمن الرحيم

اخواني و اعزائي اذا امكن تساعدوني في موضوع اي افضل كفرات للتاهو 2007 z71 جنط 18 سمعت عن برجستون و عن فرنستون و عن تويو و عن جودير و نكسن و ماكسس لكن ما ادري ايهم افضل ؟؟؟ و ابيه للسفر و للبر و يكون لين و ناعم هادي و شكله كبير مو مثل التويو الي عندي القديمه صغيرة و مخربه منظر السيارة و اي افضل الي عليه حروف بيضاء ام عادي سادة ...؟؟

اشكركم و ادري كثرت عليكم لكن انت اهلها ....

[abo aryam]

السلام عليكم ورحمة الله وبركاته
والله وانا اخوك ما بقى كفر ماركبته على نوعيات مختلفة من السيارات (سيدان - دفع رباعي) حتى فيه كفرات الظاهر انهم ماصنعوا منها الا 4 حبات وركبتها على موتري الين تشققن. المهم السؤال عن ماركات الكفرات على الاطلاق مايوصلك للنتيجة اللي انت تبغى كيف؟
انا اقولك لأن شركات تصنيع الكفرات تراعي في المقام الاول الشريحة المستهدفة من انتاجها فعلى سبيل المثال تلقى الشركة مهتمة في المقاسات اللي تخدم الجنوط الكبيرة والسرعات العالية في هذه الحالة راح تجدها في هذه الناحية لا يعلى عليها بس لاتجيب طاري المقاسات الاخرى تجدها اقل من المأمول مثل شركة (كونتنلنتال) تجدها المعتمدة لسيارات مرسيدس الفئة s وليس لها ذكر في مجال سيارات الدفع الرباعي . (شكلي طولت عليك الهرج)
عند الشراء لابد ان يكون لديك تصورعن المقاسات والمواصفات المناسبة لسيارتك وفي اي حال من الاحوال لا تتنازل عنها لأن الاسعار تتفاوت بحسبها وذاك هو الوتر الذي يلعب عليه البائع ويقولك هذا احسن شيء لكي يبيعك ماعنده.
في الاخير انصحك بالتويو يجي بعده الهانكوك من واقع تجربة في الخطوط السريعة والنفود ولاتنس الحرارة A ومعامل الانزلاق A لأنه يفرق. والله ولي التوفيق .

[عبادي 2011]

ابو اريام مشكور يالغالي و ماقصرت

[جومانشي]

عليك بالمشن وبس

لك ولازمن

حتى لو ضربك مسمار ما تحتاج ترقع خل مسماره فيه وامش

[عبادي 2011]

جوماتشي مشكور يالغالي الله يسعدك

[كاشت المدن]

أنا جربت التويو والدنلب والميشلان على جنط ١٧ ( ٢٦٥/٧٠/١٧) افضلهن بر وديره التويو وللديره وخط الميشلان
لكن ١٨ اتمنى من اللي جربوه يعطوننا خبر

[ابوتراس]

الاخ العزيز
انصحك بال بريج ستون ولا تقرب القود يير
تحياتي

[و لد ملهم]

البرجستون مضبووط لاكن قااسي أما التويو مثل ما قالوا الاخوان لين و نقشته ما تروح و حليل في البر طبعا ما يقارن بالبر في الأماكن الحجريه بالبرجستون أما في النفود تمام التمام .

[escape_man]

كفرات ما تتحف بسعرها - لا تأسف على تركيبها - غير مقلدة اومصنعة في دبي - لها وكيل يحترمها ويوفرها - صناعة ياباني اصلية 100% - صناعة اذهلت المتسوق الامريكي في عقر داره = اذا لاتبعد عن التويو او اليوكوهاما

[ابوضيف الله]

عليك بالبرجستون افضل ياباني وركبها من الوكيل ارخص من الغرابي ترتصيص ويعبون لك الكفرات نيتروجين
ويفحصون لك الاذرعة ويشيكون لك السيارة من تحت ويزنون لك الاذرعه ان احتاجت والوكيل لورجعت له باي مشكلة في الكفرات ممتاز متعاون معك اذا انت مركبها من عنده
القود ير كانت ممتازة والراشد وكيلها دمار انا مركب من عندهم ةلاخذت 5شهور الاهي محبلة وتروح لهم كنك تشحذ منهم ماكنك جاي بفلوسك ويقول لك اذا ضرب الكفر مانغطية الا اذا جبت الدعسة والتحبيل يقولون ماعلينا فية اذا ماهو مع الجمب يحاولون يتهربون باي طريقة
والكفر لاتستغليه ايد لانه قمبلة موقوته باي وقت ممكن يضرب او ينصلخ

[كشف الغريب]

شف لاتبعد عن اليوكوهما لين وياباني والبرجيستون ياباني وقاسي شوي بس عمرة اطول وخذهم من الوكيل فقط ابعد عن ابو يمن والغرابي غش وكفرات معاد تدويرة بالامارات وفوق هذا يغلونة ويقولك كل شي غالي الحين

[صرمباقه]

عليك بالبررجستون الياباني ابو دعسه سريعه وأدعيلي مركبها من سنتين ولا لقيت منها اي مشكله مع أني أسافر بحكم عملي أسبوعيا ٨٠٠ كم والحمد لله وفيه من البرجستون أندونيسي برضو تلاقيه عند الوكيل ×

[جلمود الحره]

تويو toyo وارقد وامن

[عاشق السيل]

شف وأنا اخوك قبل أرشح لك أي كفر ترى الشغلة توافييييييييييييييييييق !!

ممكن أشتري نوع معين وأطيره فوق من المدح لأنه سالك معي صح وبنفس الوقت يجي واحد ويسبه سب لأنه ماتوفق معه !!!

وبرتب لك النوعيات اللي ذكرتها حسب تجربتي الشخصية :

1 ـ ماكسس
2 ـ قوديير
3 ـ برجستون
4 ـ تويو

والله يوفقك للي فيه الخير والصلاح ....

[واحد مبسوط]

تويو وانت مغمض

[وحش القفار]

من واقعى تجربة التويو ضروري يكون الهواء 35 ولايحبل في اول عمره

[* ابو باسل *]

الحين اخذت جميع الفكره والكل قالك برجستون تويو مشلان وشر رايك تركب اربعه كفرات مختلفه من كل شركه كفر لاني احس انك ماريح تجد الحل فركب من كل شركه وحده وجربها والي يزين لك بعدين طق الاربع سواء

[alkapten]

يا اخوان مساكم الله بالخير وعيدكم مبارك
اللحين تقولون تويو وميشلان وماكسس وغيره وغيره من انواع الكفرات اللحين يقول الاخ انه يبي الافضل سالفة لغرض البر والنفوذ والمزفلت هذي سالفه غير تعالوا نتناقش بالمعايير الدولية والميزات بين الكفرات وبعدين يبين لنا ايهما الافضل . مثال لكفرات معينة وهي هانكوك كورية الصنع ميزاتها
1- 6 طبقات ومنها 7 طبقات
2- فيها 7 مميزات عالمية ( ضد الانزلاق - الالتصاق بالارض-مقاومة لدرجات الحرارة العالية - للطرق الوعره - للسرعات العالية - امنة من الانفجار السريع عند البنشر - صامته وغير مزعجة اثناء السير - مخصصة للسرعات العالية - 116H )
3- منافسة للشكرات الاخرى من حيث الخصائص المتوفره المذكورة اعلاه
4- اسعار منافسة
5- ضمان من الوكيل للعيوب وتبديل فوري + خدمات الترصيص والتركيب ووزن الاذرعه

لدي جمس يوكون 2008 وكفراته جنرال امريكي الصنع - وجدت نفس الكفرات بسعر 750 ريال للكفر وعندي رغبتي بالشراء توقفت قليلاً للتفكير . بحث ووجدت نفسي ادخل في متاهات وفي الاخير وجدت ان الموضوع يتركز في مميزات الكفرات وكل الذي اشرت اليها اعلاه موجوده على الكفرات وليست فلسفه من عندي - يوجد استطلاع عن نوعين من الكفرات ( تويو - وهانكوك ) يرجى الاطلاع
كما ارجو من لديه مداخلة يتفضل على امل أن يدون المميزات ز وشكرا.
http://www.assayyarat.com/forums/thread205552.html

[هاجر الود]

عليك بالجنرال الأمريكي وأدع لي وبعدين موترك جنطه 17 مو 18 يافالح وتقبل مروري .

[راكب البترول]

اولا السلام عليكم

ثانيا انت تقول كفرات هادئه ومريحه طعس والخ...

بالنسبه لي انا جربت اغلب كل الكفرات وافضلها ميشلان و بريجستون :)

بس ملاحظه البريجستون قاسي شوي على السياره :good2:

مع تـحـيـاتـيـــ. . . : burnout2 :

[عبدالرحمن السالم]

والله ركب التويو ماتنساه ممتاز جداً وعالي يجي AA ولين وخفيف وعملي ويكفي انه ياباني ويعيش 3 سنوات معك ، لايفوتك

[قمرنا]

أخوي
أنا معي تاهو 2005 ومركب عليه هانكوك كوري
جنط 17
الحقيقه 100% لا يفوتك: ديره/ خط/ بر
لين بالحيل لكن راقبه بالهواء.:good2:

وأسأل عنه ....أعتبره من أفضل الكفرات

والله يوفقك...

[ابو عزيززز]

اخوي


اذا لقيت ميشلان صناعه غير تايلتديه فاعتقد انه سيكون افضل خيار


ميشلان كفر الطيارات والناقلات الضخمه وضمانه مفتوح وغير محدد بمده زمنيه



القوديير انحش عنه لانه يحبل بسرعه



اهتم بالمواصفات واهمها معامل الحراره ولازم يكون A ومعامل الثبات او الاحتكاك ولازم ايضا A او اعلى



هناك خيارات اخرى جيده مثل اليوكوهاما والبريجستون والدانلوب وربما هناك خيارات اخرى لا اعرفها


اهم شي المواصفات ذات المستوى العالي بصرف النظر عن السعر


وبالتوفيق

[كشات 5]

نصيحة يوكوهاما خط وللديرة ولينة حتى تقدر تدخل بدون ماتنسم وأصلية ياباني وكيلها الجميح شارع خريص

[سلكي نت]

أذكر من فترة نزل ترتيب افضل شركات الاطارات في مجلة المال والاعمال هي:
1-مشلان
2-قوديير
3-بيرللي
4-دنلوب
5-جنرال او كونتنينتال مو متاكد منها.

وانا ما اتعدى شركتين فايرستون للسوبربان وهنكوك للونيت
والله يكتب لك الافضل

استغفرك اللهم واتوب اليك

[هوا الشرقية]

تويو افضل يا خوي واسأل مجرب ،، لين وقوي وياباني اصلي

[قريب -منكم]

بلاشك جودير قوه ومتانه

[ابرق نثيل]

والله كل الكفرات اللي تبيها على موترك بنفس المواصفات صعب تحصل فارق كبير كل الفوارق بسيطه
ماهنا فرق جامد اللهم بعض الشركات ابدعت وبعضهم داجه من الفايرستون ...
لكن اقرب الكفرات للبر والخط في نفس الوقت والموصى عليها بكثره من الكشاته هي البرجستون و الدنلوب

[بيك اب 4X4]

السلام عليكم
يا اخوان اسعار الكفرات صارت :f
و بصراحه اول ما كنت اشيل هم نوع الكفرات
بس بعد المقلب اللي اكلته مع كفرات مشلان للجمس الحوض قمت اتخوف من الكفرات
السالفه اني شريت كفرات مشلان من تاير بلس بالدمام قبل سنتين و الحين تطلب الرحمه
انا ماني معترض ان الكفرات انتهت بس المشكله هي ان الكفرات قاسيه و تنتفت مثل كفرات
الشيول :(
طبعاً البدايه كانت بعد سنه من التركيب
الكفرات الاماميه صارت تقرص مع اللفات مع اني مو راعي تفحيط او سرعه او اي شي
اظن ان مشكلتها ان صناعتها كندي
رحت الوكيل اسأل عن صناعه غير الكندي قال ان مقاس 265 \ 70 \ 17
ما يجي إلا كندي :mad:

المهم انا ابي كفرات نوع كويس و سعرها معقول في حدود 600 الى 700 ريال
طلعاتي للبر قليل

انا افكر اركب دنلوب
وش رايكم فيها ؟

الهانكوك يقولون زين بس ما ادري عنه
انا متخوف منه لان صناعته كوري و ما ادري كيف الامان بعد الله طبعاً

البرجستون احس انتهى بعد ما صار يتصنع خارج اليابان

قوديير لي تجربه معاه من زمان و كرهته
حبل علي بعد مده قصيره على موتر سيدان مع اني مشتريه من الوكيل

كفرات البالون مالي فيها ابداً
المطلوب كفرات زي اللي تجي شد بلد

[الخلاوي 15]

جربت اغلب الانواع / دنلوب -يوكوهاما-تويو-برجستون-هانكوك-ماكسس

افضل ماجربت الدنلوب والتويو والبرجستون والماكسس .. لكن يقولون ان التويو تغير الحين للأسوأ.

انا أنصحك بالدنلوب لأن البرجستون قاسي جداً

بالتوفيق

[ابو العز بلس]

وعليكم السلام ورحمة الله وبركاته

الدنلوب ممتاز

[اابوعبداللطيف]

بنسبه لي اهم شي عندي راحت الكفرات بلخط يعني صووووت مافيه انسيابيه هدوء تااااام
وهذا لقيته في كفرات((جنرال الكنديه))وتجي على الجموس الجديدة عيبها ماتخدم خدمة دنلوب
لكن الي مريحني فيها ماذكرت اعلاه
وفيه واحد من ابناء عمي ركب يوكوهاما لسكويا,,,والله انه كره السيارة وله الحين شهرين من صوتها ويبي يغيرها
هذا ماعندي ان شاءالله افدك

[قناص2000]

الله يعطيك العافية ياخوي ترى بعلمك اختيار الكفرات ترى حاله نفسية عند اي شخص ليه لانه بالعقل الداخلي له يقول فرظا ان الدنلوب احسن من البرجستون او العكس ياولد خلنا نسال بالمنتدى عن الوضع ونشوف انا لا اقلل من الاخوه الاعضاء ولا بقدرهم حشى بس تراها والله نفسية انا كنت ابي ارقب دنلوب على جيب وبالي اركب نوعيه وهي ماكسس كان على عهد اول ما نزلت بالسوق كان محد يبها ولا يناظر فيها قلت ياولد انت تبها وشوله تشاور فلان وفلان والله وتوكل على الله وركبها 1500 ريال اربع كفرات والى الحين شد ومد ما شاء الله ما يحتاج زين وما ابي اطول .
فعاد الوضع نرجع للشخص نفسه لازم تجرب وتقتنع قناعه تامه بالشيء اللي تبيه.
وتقبل تحياتي

[PAJERO]

ارشح لك
ماكسس
او
هانكوك
او
دنلوب

[الخلاوي 15]

دنلوب وبس

مالقيت مثلها .. صدقني اذا تبي استخدام شاق فأنا راعي طرد وسرعه خصوصا موسم الصيد ... اضرب لها الوعر واشق بها نفود ماشاء الله ...

توكل على الله ومر بن زقر وخذ منه اظمن لك لو زاد كم قرش

[السناعيس .f16]

السلام عليكم ورحمة الله وبركاته
هماء هو واضح ابي افضل نوع كفر مابين الدنلوب و الماكسس من ناحيت الخفه و التحمل وافضل مقاس وان شاء الله تفيدوني الموتر هايلوكس دبل مقاس الجنط 16:(

[السناعيس .f16]

..لرفع لرفع

[ااابوعابد]

بسم الله الرحمن الرحيم..

انا تقريبا جربت اكثر الكفرات والمقاسات للجنط 16

افضل

واخف

والين

كفر هو الهانكوك الرملي 85 / 245 / 16
ونصيحه خذه ولاتشاور احد :good:

[ابو سعد 502]

نصيحه اخي انحش عن القودير

[باترول - 91]

السلام عليكم ورحمة الله وبركاته



اليوم رحت لمحلات بيع الكفرات بالدمام وسألتهم عن مقاس 16/70/275
ولقيت


ماكسس : 490
دنلوب : 590
ميشلان : 640 فرنسي , 610 ايطالي
تويو : 660
يوكوهاما : 660



الصراحة انا محتااار بين الكفرات
ضرووري لانه كفرات الموتر منتهية


و ياليت تساعدوني :(

[صفحة تربوية]

السلام عليكم ورحمة الله وبركاته





اليوم رحت لمحلات بيع الكفرات بالدمام وسألتهم عن مقاس 16/70/275
ولقيت


ماكسس : 490
دنلوب : 590
ميشلان : 640 فرنسي , 610 ايطالي
تويو : 660
يوكوهاما : 660



الصراحة انا محتااار بين الكفرات
ضرووري لانه كفرات الموتر منتهية



و ياليت تساعدوني :(



دنلوب : 590

لاتدور غيرها

بالبلد حط الهواء 25

وفي البر 15

[ياوجودي999]

اذا سيارتك لاندكروزر ...مهيب معقوله تختار افضل من اليابانيين ..هم حطوا لها دنلوب.

[صياد الجبل]

دونلوب ..........

[باترول - 91]

موتري باترول 91

[قازان]

أقول لا تقرب الدنلوب

حطيتهن في سيارتي اكسبديشن ويا ليتني ما حطيتهن

8 شهور تقريباً ما فيه مشكلة وبعدها صوتهن .... الله يجير المسلمين

كرهت موتري .. صار دبابة مو موتر

حتى عيالي ما يسمعون الجوال إذا رن .. وإذا تكلموا ما عاد يسمعون المتصل

لين غيرتهن وافتكيت .. وحلفت اسم الدنلوب ما عاد أقربه حتى لو يغيرون صناعتهم

[باترول - 91]

بيض الله وجهكم



انا سمعت انه الميشلان ممتاز وش رايكم فيه ؟؟؟؟

[abohmad]

بريجستون ودق سلف

[abo aryam]

اذا سيارتك لاندكروزر ...مهيب معقوله تختار افضل من اليابانيين ..هم حطوا لها دنلوب.

السلام عليكم
مع احترامي للمعلومة اللي انت جبت , اليابانيين في نفس الوقت مسوقين ويهمهم تخفيض التكاليف لرفع الارباح واكبر دليل مواصفات الكفر تلقاها الحرارة B والتراكشن B . واذا رحت للبنشري قال كفر وكالة وحط سعره فوق هام السحب وشيل . تحياتي للجميع ,,,

[تمنيتك لي]

برجستووون وريح رآسك

[بداية رحال]

يا اخوان مساكم الله بالخير وعيدكم مبارك
اللحين تقولون تويو وميشلان وماكسس وغيره وغيره من انواع الكفرات اللحين يقول الاخ انه يبي الافضل سالفة لغرض البر والنفوذ والمزفلت هذي سالفه غير تعالوا نتناقش بالمعايير الدولية والميزات بين الكفرات وبعدين يبين لنا ايهما الافضل . مثال لكفرات معينة وهي هانكوك كورية الصنع ميزاتها
1- 6 طبقات ومنها 7 طبقات
2- فيها 7 مميزات عالمية ( ضد الانزلاق - الالتصاق بالارض-مقاومة لدرجات الحرارة العالية - للطرق الوعره - للسرعات العالية - امنة من الانفجار السريع عند البنشر - صامته وغير مزعجة اثناء السير - مخصصة للسرعات العالية - 116H )
3- منافسة للشكرات الاخرى من حيث الخصائص المتوفره المذكورة اعلاه
4- اسعار منافسة
5- ضمان من الوكيل للعيوب وتبديل فوري + خدمات الترصيص والتركيب ووزن الاذرعه

لدي جمس يوكون 2008 وكفراته جنرال امريكي الصنع - وجدت نفس الكفرات بسعر 750 ريال للكفر وعندي رغبتي بالشراء توقفت قليلاً للتفكير . بحث ووجدت نفسي ادخل في متاهات وفي الاخير وجدت ان الموضوع يتركز في مميزات الكفرات وكل الذي اشرت اليها اعلاه موجوده على الكفرات وليست فلسفه من عندي - يوجد استطلاع عن نوعين من الكفرات ( تويو - وهانكوك ) يرجى الاطلاع
كما ارجو من لديه مداخلة يتفضل على امل أن يدون المميزات ز وشكرا.
http://www.assayyarat.com/forums/thread205552.html


انا اوافقك نفس الرأي
عتدي تاهو 2007 وركبت عليها هانكوك كورية والحين بتمكل سنتين ولله الحمد
ميزتها لينة واسعارها مناسبة بس الآن صارت غالية شوي