برقع أو تشحيم في وجه السيارة ؟؟؟

[منتعش]

السلام عليكم ورحمة الله وبركاته
هلا وغلا بأخواني النشامى

الكثير منا أثناء السفر يرى سيارات تقوم بتشحيم سياراتهم من الأمام مع المرايات الجانبية بالفيري أو بغيره .
والبعض يقوم بتلبيس سيارته ببرقع .

والسؤال اللي يطرح نفسه :
وش الأفضل في الأستخدام ؟ وكذلك السلبيات والإيحابيات ؟
وبارك الله فيكم وفي أعماركم على الطاعة .

[اسيزو 4x4]

الفيري أستخدمة لي 8 سنوات ومافي اي مشاكل ابد ممتاز ولكن فية عيب لو كانت الأنوار الأمامية بلاستيك ممكن تبلح

والبرقع مكلف جداً والسفرات قليلة والأن مابة غبار الغبار بالصيف ...

مشكور يالغالي منتعش على الموضوع الطيب ....

[منتعش]

ياهلا ودرزن غلا بأخوي المحب : أبوحمود
أولاً : أحب أبارك لك على التوقيع الجديد وتراه :good: :good: :good:

وثانياً : أشكرك على المعلومات القيمة .
وأحب أضيف عيب على البرقع وهو :
يجعل أثر في السيارة مما يؤثر على البودي والبوية .
والله يرعاك ويبارك فيك .

[شاص]

من أفضل الحلول وضع رشة خشنة تشبه رشة الوكالة على الوجه والمرايات

[شاص]

والشحيم ما ينصح به لأن إزالته صعبة ويمكن ما يزول تماماً إلا بالتلميع إضافة إلى سيلانه مع الحرارة ودخوله إلى مناطق تستحيل إزالته منها

[غضنفر]

من أفضل الحلول وضع رشة خشنة تشبه رشة الوكالة على الوجه والمرايات
ومن الي يسوي مثل هالرشة في الرياض؟؟؟؟؟؟؟ بارك الله فيك

[اخو نورة]

خذلك علبة او علبتين فيري وتوكل على الله

[Waleed1]

السلام عليكم

فية رشة خاصة قاموا يبيعونها فى محلات الزينة، وتشوفها على بعض السيارات على الخطوط حتى لونها زى لون الرمل وأزالتها أعتقد تكون سهلة لان فيها شوية شحومة. لا أعرف أسم المنتج، الفيرى جيد لاكن كثر أستخدامة أو تركة على البودى يحرق صبغة السيارة وتروح لمعة الصبغ. هذا ماعندى وشكراً

[منتعش]

ياهلا وغلا بأخوي الغالي : شاص
والله يعطيك العافية على المعلومات القيمة وما قصرت . بس وين تواجد الرشاه اللي مثل الوكالة ؟
والله يحفظك ويرعاك .

================

مراحب أخوي المحب : black path
وأنا معك أسأل أخوي شاص مين ألقاها .
ودمت في رعاية الله .

================

ياهلا بأخوي : اخو نورة
صدقت . بس عيب الفيري إذا طول يظر السيارة وقد تحتاج إلى تلميع كما قال أخونا الحبيب : Waleed1
وأشكرك على مرورك الطيب .

===============
أهلين وسهلين بالحبيب : Waleed1
ماقصرت على المعلومة .
وصدقت أشوف رشه يركبونه على السيارات تشبه الرمل .
بس السؤال هل تذهب لوطولت على السيارة أم أنها مثل الفيري ؟
وكم سعرها وكيف طريقتها وأين أجدها ؟
والل يوفقك ويرعاك .

[الأعصـــــار]

بصراحه أنا أفضل الشحـــــــــــــم وللأنوار أفضل أنك تحط لك
بلاستيك واقي علشان ما تنرمل أذا في غبار وسلامتكم .....

[البرحه]

سلام عليكم

اعرف واحد موتره مسمكر من قدام وحط فيري لمدة اسبوع

ويوم غسله حتت البويه !!

وعلى قولة الشاص الرشه اعتقد افضل وامن



ومن الي يسوي مثل هالرشة في الرياض؟؟؟؟؟؟؟ بارك الله فيك

اقرب محل زينه سيارات

وشكرا

[غالي]

بالنسبه لي من خبرت نفسي وانا استخدم الفيري لا وزياده على كذا ان وصلت للمنطقه الي ابيها بعض المرات اجلس يوم او يومين وارجع وانا ماغسلته
وان رجعت للرياض غسلته ومافيه اي اشكاليات ولله الحمد
بس نصيحه اخوي
اذا بغيت تغسله اول شيء يزولونه بالماء بدون فرك علشان مايخدش البويه لين يزول تماماً
والله اعلم

[ابو مبارك]

اولا السلام عليكم ورحمه الله وبركاته انا اقووول اخووي منعش انك تحط تغبيره مثل ما قالوو الاخوان سموها رشه وهي موجود في محلات الزينه وبعض المغاسل السيارات وشكرا والله يعطيك العافيه

[منتعش]

ياحي الله أخوي المحب : الأعصـــــار
عيب الشحم أنه يضر بالبودي .
أما تركيب البلاستيك على الأنوار فأنا معك يحافظ على النور وخدشه من الحشرات اللي في الخط بس مشكلته أن النور يكون ضعيف إذا كان مركب من قديم وكنت صاحب سفرات بالموتر .
ويعطيك العافية على مرورك الطيب .

===================

هلا وغلا بأخوي : البرحه
الله يعطيك العافية على هذه الإضافة .
وصدق أخوي شاص باللي قال .
وأشكرك على مرورك .

==================

مراحب أخوي : غالي
بس يأخوي الغالي ماهو كل مره تسلم الجره .
وأقراء رد أخوي (( البرحه )) مع اللي حصل للي يعرفه .
والله يحفظك ويرعاك .

=================

أهلين وسهلين بالغالي : ابو مبارك
وياليت كان ماعليك كلافه تدلنا وين توجد فيه وكم سعرها وطريقة وضعها ؟
ودمت في رعاية الله .

[اسـير الشـفـر]

السلام عليكم ورحمة الله وبركاته

افضل طريقه على ما قال الاجاويد هي الرشه اللي تشبه الرمل وهذه تلقاها عند محلات تلميع السيارات وليس زينه السيارات لانه اللي عند محلات الزينه بخاخ ماتدري عن مضاره على المدى الطويل فالله يعينك لو بغيت تمسك خط سير على اقرب محل تلميع سيارات وماتاخذ منك الرشه اكثر من 10 دقايق
وبالمناسبه يا طيب الذكر ولايهون القراء لوبغيت ترش السياره من هذه الماده اومن غيرها يستحسن انك ترشها من الامام ثم من تحت الابواب والرفارف خصوصا في طلعات البر لانه احيانا مع المويه والطين بعض الحصى الصغير يطير مع الكفرات ثم يجرح البودي من تحت
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
ودعواتكم لوالدتي بالثبات والرحمه والغفران
<<أنا لله وأنا إلية لاراجعون>><<لاحول ولاقوة إلا بالله العلي العظيم>
اخوي غالي عسى الله يثبت والدتك ويغفر لها ويرحمها امين امين امين
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ
وصلى الله علي سيدنا محمد وعلى اله وصحبه وسلم تسليما كثيرا

[منتعش]

ياهلا مرحبا بأخوي الغالي : اسـير الشـفـر
والله ما قصصصصصصصصصصصرت :good: :good2:
معلومة جيده بارك الله فيك .
أسأل الله أن لا يحرمك الأجر والثواب .
ويعطيك العافية على مرورك الطيب .
والله يحفظك ويرعاك .

[بو خليفه]

بالنسبة للبرقع مثل ماقال أخوي منتعش و أضيف أن البرقع يسخن بالسيارة خاصة إذا وقفت
أما صابون الصحون جيد لكن يحتاج عند الوصول من السفر غسله فوراً لأن إذا جعلته مدة طويله يصبح بقع في البايه في المدى البعيد
يوجد حل طبعاً
يوجد لاند روفر عندهم مادة شمع ترشها بعدين تزيلها
و يوجد حل ثاني زيبارت عندهم شمع للوجه و غيره و يعطون ضمان 5 سنوات و هذا الحل العملي

[منتعش]

ياهلا وغلا ومسهلا بأخوي المحب : بوخليفة
يعطيك العافية على المعلومات القيمة .
وماقصرت والله يعطيك العافية .

[كمشتكين]

مشكوووووووووووووووووووووووووورين

[الطير المهاجر]

السلام عليكم
انا انصح بالفيري لكن اول ماتوصل الديرة الي تبي غسله على طول
اما البرقع فأتعقد انه يخلي السيارة حامية في الطريق ومايخلي الهوا يدخل مزبوط
اما رشة الي قاموا يبيعونها ها الايام صارت حق زينة وكل واحد قاعد يشكل على كيفه
تحياتي

[تميراوي]

1-الرشه اللي تشبه الرمل كويسه لكن تحس انها للمراهقين
2-الفيري لاغبار عليه مضبوط اذا كانت الرشه شد بلد لكن اذا كانت السياره مرشوشه مانصحك تخلي الفيري اكثر من يومين
وبالذات الانوار اذا كانت بلاستيك لاتخلي الفيري يطول اكثر من يومين
3-البرقع احسن شي واريح لكنه اطراف البرقع تلعب في البويه وتحككها
4-الشحم متعب في الغسيل

[أبو رشود]

من يوم ما خبرت عمري وأنا وعماني نستخدم فيري

وتمام التمام

طلعت الشرقية - أبها - كل مكان

وشغل نظيف






أخوكم/ أبو رشود

[البيـرق]

السلام عليكم ورحمة الله وبركاته
صبحكم الله بالخير يااعضاء مكشات الاعزاء اما بالنسبة
للحل فهو فيه محل اسمه زيبارت واعتقد انه معروف عندكم
فهو يبيع لزاق لوجه السيارة شفاف وضد الخدش وهو مصمم للخطوط
وممتاز جدا بس عيبه غالي يعني سالته بكم تسويه للاندكروزر قال ب600
ولكم الراي........
اخوكم البيــــــرق............

[s3ed]

السلام عليكم ورحمة الله وبركاته


انا عن نفسي استخدم الشامبو واعتقد انة افضل

الفيري مثل مايقولون يزيل الدهون والدهون شمع وكذا يأثر على صبغ السيارة وتروح لمعتها او البولش اللي عليها


انا افضل الشامبو وجربتة

[قصيمي والهوى شرقي]

التغبير ه متصله بسرعه اغسلها اذ وصلت ولا رحت لو نالموتر نصيحه ترى صار معي في موتري القديم وعلشان كذا بعته

[منتعش]

والله ماقصرتو معلومات قيمة
الله يحفظكم ويرعاكم .

[القناص الأسود]

السلام عليكم

أتمنى اكون فهمت الموضوع قبل الإجابة و إذا ما فهمت خبروني


عند سفري بالبر أرش جسم السيارة بالديزل( جاز )
يأخذ غبار لا أول ولا أخر لو حد شاف السيارة مستحيل يعرف موديلها او لونها
و الأمكنة التي لاترش الزجاج و مقابض الأبواب وفتحة تهوية اللديتر فقط
الكثير ممن يعرفوني سألوني ثم فعلوا مثلي

السبب (الجاز) يسهل غسله في المغسلة بإستخدام صابون
(البدرة -تايد او أي نوع اخر) مع قوة إندفاع الماء...

لكم مني كل التحية...

[تايتد]

السلام عيكم ورحمة الله وبركاته

مبروك الشهر على الجميع

الرشه الترابيه يرشونها محلات البناشر اللي على طريق القصيم وبألوان مختلفه

والغريب في الامر انه يخلطها بسفن اب وهي رمله مطحونه من حقة صبغات واجهات المنازل

وتزال بالماء فقط والسعر م 25 الى 30 ريال

[GXR2010]

اخوي تجنب البرقع والشحم البرقع وانا اخوك مع السرعه يبان ضربه في البودي والشحم بعد الغسيل يكون مبقع محله الفيري زين وفيه عازل للبودي عند اهل الزينه وتحياتي لك وللجميع اخوكم ابوتركي

[أبوريان سعيد]

تجربتي مع الدورانجو حطيت حماية شفافة أمريكية عليها ضمان 5 سنوات
هي نوع من البلاستك الشفاف عند وضعه على وجهية السيارة لاتكاد تلاحظه
إلا بالتدقيق القريب جدا وعلى حدود التجليده .... جميلة جدا وعملية وتريحك
عند مسك الخطوط ولاتشيل هم الغبار ... بس عيبها إنها غااااالية كلفتني ألفين ريال

[قاهر التضاريس]

السلام عليكم ورحمة الله وبركاته
ياجماعة خلو عنكم الفيري (اكثر مايشهب بالموتر)
والبرقع مزعج شوي مع السرعة
والرشة برضو تشهب بالموتر

الحل الأفضل عن تجربه
مثل اللي قالوا الشباب اللي هو (العازل الشفاف )
لا ازعاج ولا اي شيء
وحتى شكله ما هوب واضح
وممتاز جدا جدا

تحياتي لكم

[خالدي البره]

اخوي كل من الثنين له سلبياته البرقع مع السرعه يمخش الصدام والواجهه

والفيري يبهت اللون وتروح اللمعه اذا طول

انا اعرف واحد يداوم في الشرقيه وكل اسبوع في الرياض

ملبس الوجهيه عازل شفاف والحمد لله موتره لحد الان مالعب فيه الغبار

مع العلم انها غاليه الظاهر تكلف 800 او اكثر بس عليها ضمان واذا بغيت تفكها ترجع لنفس المحل ويفكها لك بدون مايبين على البدي اي شي

تحياتي لك

[راكب الشفر]

عاد هذا تخصصي هههههههههه
أنا ما يمر علي اسبوعين إلا وانا مسافر
مرة لشرقية ومرة لرياض ومرة للقصيم ومطامر بكل مكان <<<قول ما شاء الله
وانا جربت الفيري وجربت التغبيييره وجربت الشحم وجربت رشه جديده شفافه والبرقع ولا وحده منهم زينه
الفيري يطير مع السرعة ومع قوة الهواء
والتغبيرة لامنه جاء عج طار ولا موية
والبرقع يحكك بودي السيارة لأنه بتجي فترة تحطه بالبيت بدون استخدام ويغبر ولما تحطه ومع الشد يحك البدي ولا تنسى مع السرعة يقعد يلعب
والمادة الشفافة لو طولت ما تروح
والشحم يعلق بالموتر وما يروح بسهولة وعانيت منه

وأخيراً الطبقة الشفافة من محلات التلميع
أفضل شي الطبقة الشفافة اللي يسوونها محلات التلميع
صح انها غالية بس ترتاح من الغثى وتقلبات الجو وعليها ضمان
واهم نقطتين
1-لا تحطها إلا في محلات معروفة ومنتشرة على مستوى المملكة زي زيبارت
2- السرعة الزايدة فوق الــ180 مهما حطيت ومهما سويت راح تتأثر وجهيت الموتر وترمل مع الوقت

اتمنى اني افدتك

[بيق مان]

عليكم بالسفن اب
7up