بعض الحقــــــــائق عن تحمية الســــــيارة بالشتــــــــاء

[ذيب الصمان]

العادات صعب تغيرها عند البشر على قول المثل (ابو طبيع ما يجوز عن طبعه)

ومن هذي العادات تحمية السياره قبل المشي عليها بالشتاء ويعتقد البعض ان تحمية

السيارة هي الطريقة السليمة للمحافظة على السيارة بحكم ان الزيت بارد ولا فيه لزوجة

وممكن ياثر على البساتم او على المكينة بشكل عام .

ولقد سئلة احد المهندسين المكانيكا المتخصص في السيارات عن هذا الامر وقال ليس من

الضروري تحمية السيارة وان كل ما تحتاج هو 10 ثواني فقط وذاد قائلا انه اذا زاد الامر

عن ذالك قد يكون له تئاثير سلبي على المكينة بسبب عدم الاحترق الكامل للبنزين داخل

المحرك.

ويوجد دراسات تؤكد ان تحمية السيارة مجرد اسراف للاموال وان افضل تحمية لسيارة

هي قيداتها مباشرتا بعد التشغيل وهذا يسرع عملية التحمية.

وان تحمية السيارة قد يكون مميتا اذا كان داخل كراج مغلق وان الادخنة التي تتصاعد في

اول التشغيل تعتبر خطيرة .......هذا وشكرا على القراء

[صاحب حي]

كلامك صحيح لكن لا حياةلمن تنادي

[مضيع نعوله]

مادري ماني مقتنع مادري ليش

[سبتان]

شكراً على المعلومة يا أخي الكريم ...
ولكن لابد من تفضل أحد خبراء السيارات
للإدلاء برأيه ويكون بالدليل إن أمكن .
ولك تحياتي .

[عاشق ورق]

اخوكم ليس مهندس
لكن مجرد ماتشتغل السيارة وتتحرك البساتم ويرتفع الزيت اظن ان الزيت يحتر في وقت
يسير بسب احتكتك البساتم بغرف الاحتراق
هذا ماعندي والله اعلم
تحياتي

[باترول 4500]

إدخل على هذا الموضوع

http://mekshat.com/vb/showthread.php?t=352011

هذي بعض الردود اللي تأكد إن التحمية مهمة


خسرت 1900 ريال وذلك لاني استمعت لمعلومه خاطئه وهي عدم تسخين السياره في الصباح
اللي حصل معي ياحبايبي اني املك سياره فورد قبل اسبوع حصل معي شي غريب وهو اني اذا مشيت والسياره بارده تبدا ترتجف وفيها كتمه غريبه واذا دعست على البنزين تثقل الدعسه بعدين تمشي السياره طبيعي وكل ماهديت صار لي نفس الموضوع لين ماتحتمي السياره وبعدين تروح الرجفه


وعليكم السلام صدقت انا البلوف عندي طقت والسبب يقول انك تمشي والسيارة باردة
بس مازلت الى الان امشي وهي -8 تحت الصفر



انا والله راح علي الرديتر قام يخرخر بعد التجربه المريره والله يهدي اللي نشرها في النت

مشكور اخوي على المعلومه الطيبه وياريت الناس تنتبه لمثل هذه المواضيع




وعليكم السلام ورحمة الله وبركاته

كلام اخوي صحيح ميه بالميه
وصار معي هالشي
ما حميت السيارة ومشيت فيها مسافة ويوم هديت صارت ترجف
ومره مشيت من دون تحميه وطلع صوت طقطقة في المكينة
بعدها ما امشي الا اذا شفت امبير الحرارة على اول خط بعدها امشي بس على خفيف
والان الحمدلله السيارات الان صارت تحمى اسرع من اول فالواحد لا يستخسر على سيارته شوي اهتمام وتحميه لمدة خمس دقايق
وبالنسبة للي يقول ان السيارات في امريكا ما يحمون اقول اي نعم صادق انا الان في امريكا والسيارة تحمى بسرعة عجيبة على طول يشغل وفي خلال دقيقة يمشي فسياراتهم تحمى اسرع من عندنا في السعودية وهذا بسبب اختلاف المواصفات وختلاف نوع الزيت وكل هذا مصمم بحكم برودة الجو في امريكا




ذكرتني نصحية الأخ اللي يقول لا تحمي موترك بنصايح الأخوان اللي يقولون شل البلف وادعي لي

يا ناس البلف مهم جدا واذا موترك يحتر وشلت البلف وبرد فهذا حل مؤقت وليس حل ناجع على قولتهم
لذا شف وش علته وصلحه والبلف لا تشيه لانه يسرع عملية التسخين للسياره

الله يعوضك يا غالي وجعلها صفر لان كل طقه بتعليمه


التحميلة الزايدة خطاء (فوق 3 دقائق)
لانه في السرعات المنخفضه يكون الحمل على سبايك العمود الكرنك وهذا يقصر عمره الافتراضي
واقل من 30 ثانية ايضا خطاء (وخاصه اذا دعست بنزين بقوة)
لانه هذا ياثر على البلوف
اذا ماهو الصحيح
يجب تحميلة السيارة من 1- 2 دقيقتين (اذا كانت واقفه اكثر من 6 ساعات) كحد اقصى و لا تقوم بالتحميل المحرك (الدعس) الا اذا ارتفع امبير الحرارة تقريبا بعد ( 200- 500 م )

تحياتي اليك



بصراحه مدري كيف مشت سالفة لا تحمي:mad:


يعني بالعقل كلنا جربنا المشي بعد التحمية والسيارة كانت تمام

وجربنا المشي بدون تحمية والتفتفه والاصوات بالمكينه وخراب جلد البلوف كبداية وبعدها تبدأ المشاكل نهاية بالتوظيب للسيارات الامريكية وخاصة فورد



في الخارج يضعون مادة مع ماء الرديتر والزيت من خواصه عدم التجمد او بمعنى اصح الزيت به مواد تمنع تجمده






هنا بالمملكة وخاصه بالشمال جميعنا سمعنا عن تجمد ماء الرديتر ووضع الجمر اسفل المكينه


بالله عليكم انظرو للزيت بالصباح قبل التشغيل والمسه وشوف منظر كأنه متجمد


كيف بالله بغاه يضبط وماتخرب السيارة والزيت كل ما زادت حراراته ازدادت كثافته

وللمعلومية تجمد الزيت بدرجة 21 والماء 0 درجة مئوية



دائما نجد أصحاب الامريكي الذين لا يعترفون بالتحمية صباحا أو اذا توقفت السيارة أكثر من 6 ساعات

يشتكون من جلد البلوف وبعدها جدار السلندر إلى التوظيب إذا استمر بعدم التحمية

وأيضا أصحاب التايوتا والياباني بوجه خاص

لا يحمي وييقول السيارة تمام وفجأة في بحر 200 ألف يحتاج توظيب مكينه



لنسأل أنفسنا هل ماء الرديتر به ماده تحمي من التجمد

وهل الزيت المواد التي تتمنع تجمده جيده وتقوم بعملها





للإسف نحن ندعي المعرفه ونقول مكتوب بالكاتلوج ولكن هل ما يصنع بالخارج مثل ما يصنع هنا ؟!!!!!!



ألا ييكفي انا بنزين الاوكتين أتانا بعد سنين

وألا يكفي أن ارقام البنزين لدينا تختلف عن الخارج

فمثلا بنزين 91 لدينا هو بالخارج 87

وبنزين 95 لدينا هو بالخارج 91

وه1ا نلاحضة بالكاتلوج يقول 91 الذي هو اساسا عندنا 95


وللمعلومة يوجد بنزين اوكتين 120 بالخارج




على العموم نصيحتي لاصحاب الفورد أن يتم تحمية السيارة إلى الخط الابيض أعلى حرف C وأنا على هذا المنوال ولله الحمد لـ 8 سنوات ولا مشاكل



http://www.mekshat.com/pix/upload04/images168/mk78513_1212.gif

مؤشر عليه بالسهم الاحمر والصورة من العبقري احد اعضاء مكشات


عندي سيارتين(( كامري 2008 وأنا أمشي ماأحمي الموتر وماوصلت 90000 إلا والزيت طالع مع البوجي وديتها الوكالة وصلحوها على الضمان بعد جهد جهيد ولين ألحين ماشيكت عليها مدري كيف شغلهم))

والسيارة الثانية فورد موديل 2001 نفس الطريقة أمشي وما أحمي الموتر بعد فترة طلع صوت البلوف والشداد ولين ألحين ماوديتها أصلحها))

فنصيحة لوجه الله لا تمشي بدون ماتحمي الموتر ويهدأ صوت المكينة.



السلام عليكم ورحمة الله وبركاته
موضوع مهم وشيق

أنا من الناس اللي مستحيل أمشي بدون تسخين السياره
ومريت بتجربتين الأولى مع نيسان 2000 والثانية إنفوي 2004
ومشيت على الإثنين للضروره بدون تسخير وكانت النتيجه إنشعر الشكمان (المنفولت)
وأعتقد التسخين مهم جدااااا
ولا يرتبط بوقت معين لأن الأجواء متغيره والسيارات أنواع فيها اللي يسخن بسرعه زي الألماني واللي مايسخن بسرعه زي الياباني وخصوصا النيسان .
وبالنسبه لي ما أحرك الموتر إلا إذا إرتفع عداد الحراره للربع على الأقل

ودمتم

[1000 طين]

الحمد لله استخدمت 3 سيارت خلال اكثر من 10 سنوات
اشغل وامشي صيف وشتاء , ولا أحمي لكن ما ادعس على السيارة
والحمد لله ما جاء مكاينهن شيء
وازيدك من الشعر بيت عندي باترول فاك بلف الماء من سنوات , وبالشتاء اشغل وامشي , لكن أهم شيء ما تسرع أول ماتمشي .

[هاوي القنص505]

يخوي انا ماتفق معك
ولا امشي الا لين يرتفع انبير الحراره حتى في الحر

[محسن اليامي]

كل شخص يرجع لدليل المالك ويبين هل تحتاج تسخين وكم المده

[ذيب الصمان]

انا اعتقد ان بعض المشاكل في المكينه يكون لها اسباب كثيرة ولاكن الورش عندنا يلعبون علينا ويقولون هذي المشاكل علشان ما تحمي السيارة .............ولا اعتقد ان تحمية السيارة لها تائير على عمر المحرك .......ووجود مواصفات خاصة بالسيارة الموجوده بامريكا في موضوع التحمية تختلف عن موصفتنا لا اعتقد ذالك.

[أبو ستري]

على حسب علمي في احد موديلات لكزس كان مكتوب ان تشغيل السيارة للتحمية اكثر من خمس ثوان يعتبر احتراق زائد في البنزين يعني شغل وامشي ولكن مافيه احد يقتنع ان سياارات اول هي كذا والان العلم تطور ..

[راعي الطلعات]

التحمية مهمة مهمة لو لدقيقتين او ثلاث دقائق

وازيدكم من الشعر بيت السيارات تختلف عن بعضها الامريكيه تحتمي اسرع من الياباني للمعلوميه

والمكينه اذا صارة بارده ما تمشي زين تقطع يعني

[مقلع الرمث]

ياخي بأمريكا عنده نظام البلف مايفتح الا اذا وصلت الحراره تقريبا 90


اما اكثر البلوف عندنا يفتح عند 75 او 65


ونظام المرواح ماتشبك يعني كلن وجوه


لكن شي بالعقل بالاحساس هي مهيب كتالوج ولا حاجه


دق سلف بسيارتك الفجر وحرك على طول وش تحس بالسياره


على طول راح تسمع اصوات والموتر مو على خبرك متغير 180 درجه


لكن اذا حميته وحركته رجع لسلاسته وخفته ومشيه العادي


تدري عاد وش المشكله ان فيه ناس تسمع الكلام وتاخذ عليه


وتروح تطبق ويخبط الموتر والله يدعي عليك وعلى ماسمع وعلى من قال

[ساري 111]

بالنسبه لي اشغل وانتظر دقيقه بس

واحط الموتر بنمره وامشي بدون ماادعس بنززين لمده دقيقه او دقيقتين بعده ادعس على الخفيف الى ترتفع الحراره شوي

ومااوجهتني مشاكل ولله الحمد

[أبوبسام 0104]

واحد من الشباب معاه لكزس 430يقول بنتي الصغيره ارتفعت حرارتها عن 40درجه وعلى طول شغلت الكزس ومشيت وكانت الوقت آخر الليل والجو بارد موطبيعي رحت ابي اقرب مستشفى يقول اسرعت ابلحق على البنت مادريت الا الكزس طفت فجأه خليتها للصبح ووديتها للوكاله والنتيجه تخبيط المكينه والظاهر ان العمود جوى المكينه او السبايك تكسرت
اعتقد مايضر لو الواحد يحمي دقيقتين

[mr_red]

من تجربة

جات فترة اشغل وامشي في البراد اكون مستعجل
بعد كم شهر الا الزيوت طالعه من عند الوجيه ... الكازكيتات قامت تهرب
القزوز انشعر
ونفس ماقالو الشباب لا جيت تمشي تكتم السياره

بس صح كلام من قال راجع دليل المستخدم

[بدوي جنوبي]

في الشتاء 3 دقائق كافيه ،،، اذا زاد عن ذلك أسراف في الوقود
بشرط ما تضغط على المحرك .
في الصيف 30 ثانيه تكفي لطلوع الزيت لأعلى قطعه متحركة في المحرك

[برق الوسيطاء]

كلن يجيب من راسه راي وكل سيارة فيها دليل يعني مانتم ادرى من المصنع
اغلب الي ذكرت مشاركاتهم وان سياراتهم خربت هذي من اول مكاينه تلقاه وسط
واغلب السياراة اذا طفت لمبات الطبلون وبالذات لمبة الزيت توكل على الله وامش واتمنى من الجميع يراجعون كتالوج السيارة

[معشوقي الصمان]

-أنا أشوف أن تحميت السيارة ضروري إلى حداً معقول الصراحة أخلي الموتر يحتمي من دقيقتين إلى ثلاث دقايق وتوكل على الله...

[حان الرحيل]

السلام عليكم
اصلا اذا مشيت على طول ما راح تمشي السياره صح الا بعد دقيقه..اذا اختصر على نفسك,,,وانتظر دقيقه في كل الاوقات....وهي كافيه باذن الله.....مع اقتناعي براي مشرفنا الغالي بدوي جنوبي

[بآترول 90]

لازم تحمي السياراكثر من 6 دقايق .. انا الباترول عندي زي كذا .. والحمدلله ماشتكيت من شي .. لاكن اذا مشيت وانا محميه ييطفي ويطلع دخان وانوع الخرابات .. فنصيحه حمو السيارة

[يكفيني نظرة]

اؤيد كلام اخوي بدوي جنوبي ومن ناحيتي اشغل لحد ما يهدى صوت المكينه وامشي اتسحب لحد ما يسخن..

[أبوغيث 2003]

والله لو تقولون ان التحمية تضر الموتر وتعدم المكينة بالشتاء لازم أحمي السيارة من 2 - 3 دقايق


أجل أشغل وامشي على طول ؟!!! قلبي ما يسمح لي أسوي كذا

[هاوي المطاريش]

السلام عليكم
باختصار إذا شغلت السياره ومشيت على طول خصوصا إذا دعست بنزين زياده فإن ذلك يكسر(يشعر) رأس المكينه واقل شي يكسر الشنبر اللي في البستم وتصير السياره تدخن دخان ازرق ولكن إذا تسخن تدريجي فإنه لايؤثر عليه
كلام مجرب

[درب الصحراء]

انا عن نفسي من كثر ما قريت وسألت

استنتجت ان التحمية ماتقل عن 3 دقايق وخاصة في البرد وهذا يعتمد على نوع السيارة لان الياباني يحتاج وقت اكثر

وبعد الـ 3 دقايق يكون المشي على خفيف الين توصل الحرارة الربع او اكثر وبعدها خذ راحتك في الدعسه

[صقر الري]

انا معاك اخي ابو بسام 0104 الاعتدال طيب دقيقتين او ثلاث ما تضرك

[EXPLORER_2010]

أنا عني احمي السيارة من دقيقة لثلاث والحمد لله ما صار معي شي

بس اهم شي عند المشي لا يزيد عدد لفات المحرك عن 2000 لفة / الدقيقة

يعني مؤشر ضغط المكينة لا يزيد عن 2

لحد ما تحتمي السيارة ويطلع المؤشر للطبيعي وبعدين دوس على كيفك

تحياااااتي

[يريور عيمان]

التحمية ضرورية ياذيب
و من قال انها مش ضرورية
النقاط الاتية تثبت انها ضرورية
1- ليش ضغظ المكينة يكون عالي عند التشغيل و المكينة باردة و تنخفض تدريجيا مع التحمية
2 - دخنة بيضاء تخرج من شكمان الموتر اذا تحركت السيارة و المكينة باردة
3 - كتيب الماك في السيارة يوصى بتحمية المحرك
4 - الخبرة و الممارسة اثبتت ضرورة تحمية السيارة

[volcano]

شوف يالاخو الكتيب عندي يقول بامكانك قيادة السيارة بعد تشغيلها مباشرة ولاكن لا تسرع بمحرك بارد وهذا اللي اسويه من 7 سنين ولا ضر موتري والحمدلله قرب الـ 400 الف وزي العسل ما شاء الله مع اني راعي جلد

اشغل الموتر واعشق مباشرة وامشي بهدوء وخلال دقيقتين توصل الحرارة الطبيعية اما لو انتظرت لين تحمى وخاصة في البرد احتاج ربع ساعة او اكثر وذاكرين في الكتيب ان التشغيل بدون حمل يضر المحرك مع الزمن ويستهلك بنزين بدون حاجة وبرضو ذاكرين ان صوت المكينة يكون مرتفع وهذا شي طبيعي ما يضر السيارة دام انك تمشي بهدوء في البداية . عشان كذه كل واحد يقرا الكتيب والصانع افهم بسيارتنا منا .

وشكررررررررررررا

[قطب 999]

كلن بعقله راضي

[مفتون صيد]

الاراء اختلفت وكلن بقناعته راضي ولا احد يقدر يقول انا صح وغيري غلط وموضوع جميل لكن عندي بعض الاسئلة اخوي وابي لها تعليل

1 ليه اول ما تشتغل السياره في الصبح وبالذات وقت البرد يكون الصوت قوي وانبير الضغط مرتفع الى 5 دقائق ليه ما يهدى بعد نصف دقيقة

2 ليه بعض السيارات لو تبي تشغل وتمشي على طول تقطع حتى تحتمي بعدها تسلك امور الموتر

3 انا مجرب اني اشغل وامشي على طول واخرتها على طول جت القزوز بعدها قامت تنسم ليه ؟

4 بعض السيارات وخصوصا النيسان بحكم انه قاهر الحرارة ماشاء الله ليه ما يلقم القير الا بصعوبة اذا شغلت على طول ومشيت عكس لو تحميه

5 بعض السيارات تطفي اذا صارت بارده جدا عكس لو كان في الصيف ليه ؟

6 اذا كان من الخطاء انك تعبي السيارة ماء اقرب للبرودة اذا فورت على اساس لا تشعر راس المكينة اجل ليه اشغل والسيارة كأنها ثلاجة وامشي على طول واعطيها احتراق وحرارة مفاجأة وقوية قد لا يتحملها وقد تنكسر اشياء بالمكينة

اعتقد هالاشياء اللى نراها هي التي جعلتنا نقتنع باننا نفعل هالامور

عموما انا في الاخير اقول انا مقتنع اني احمي السيارة اذا ماكان هناك امر طارئ

[بيارق 312]

في الاخير نحمي والالا

[همس الغدير]

مشكور اخوي كلامك صحيح سالت احد المهندسين الاكادمين المتخصصين فقال لي بالحرف الواحد تحمية السياره لفتره طويله غلط وغير صحيح يكفي الى عشر ثواني حتى يختلط الزيت في جميع اجزاء المحرك

[الكدن1]

بالنسبة لتحمية السيارة سمعت في الراديو يوم الجمعة الماضية
المهندس عبدالعزيز الفارس يقول ان التحمية لمدة دقيقة ونصف الى ثلاث دقائق بالنسبة للمديلات الحديثة
ومرة سألت ابو عبدالله الصمعاني (صاحب ورشة معروف في القصيم) فقال السيارة لاتحتاج تحمية اهم شيء
تمشي على الخفيف (يعني) لاتدوس حتى تحتمي
المعذرة من المشرفين على ذكر الاسماء لان المثل يقول: (اذا خفت قولت تكذب فسند)

[بنزرت]

خلاصه القول مما سبق
1-لايوجد ضرر من تحميه السياره حتى وان كانت لاتحتاج ولم يسبق ان تعطل محرك بسبب تحميته قبل الانطلاق
2-هناك مشاكل(( قد تحدث ))لعدم تحميه السياره .. وتختلف من شخص لاخر ومن سياره لاخرى حسب تجربه كل شخص
3-اقل مده معقوله للتحميه هي دقيقه في الصيف وثلاث دقائق في الشتاء
4-الزياده في مده التحميه لايشكل اي خطر على المحرك بال بالعكس يعتبر عامل مساعد في المحافظه على المحرك
5-في حاله عدم التحميه لابد من السير بشكل بطئ لمده قصيره حتى يرتفع انبير الحراره ويكون المحرك في قمه نشاطه وقابليته للتسارع المفاجئ

[mjd]

هل الديزل مثل البنزين في التحمية؟؟؟؟؟؟؟؟؟

[volcano]

في الاخير نحمي والالا

طبعا لا :D

[يريور عيمان]

في الاخير نحمي والالا

طبعا نعم
لازم تحمي

[volcano]

1 ليه اول ما تشتغل السياره في الصبح وبالذات وقت البرد يكون الصوت قوي وانبير الضغط مرتفع الى 5 دقائق ليه ما يهدى بعد نصف دقيقة

حتى تدفى بسرعة ولا يعني هذا انك ما تسوقها والدليل الكتيب

2 ليه بعض السيارات لو تبي تشغل وتمشي على طول تقطع حتى تحتمي بعدها تسلك امور الموتر

فلتر الهوا به رطوبة او وسخان جرب وقت ما يكون الفلتر جديد وبرضو راجع الكتيب لو انه طبيعي بيذكره لك


3 انا مجرب اني اشغل وامشي على طول واخرتها على طول جت القزوز بعدها قامت تنسم ليه ؟

يعتمد على طريقة مشيك واضح انك داعس كما لو ان الحرارة في حدودها الطبيعية احنا نقول امش بس بهدوء لين ترتفع حرارة الموتر

4 بعض السيارات وخصوصا النيسان بحكم انه قاهر الحرارة ماشاء الله ليه ما يلقم القير الا بصعوبة اذا شغلت على طول ومشيت عكس لو تحميه

زيت الجير ما وصل للمستوى الطبيعي من الحرارة والشي هذا طبيعي ولا يضر الجير حسب كتيب المصنع لكن لو ارفقت بالدعس التغيير بكون اسلس بكثير ويمكن ما تلاحظه

5 بعض السيارات تطفي اذا صارت بارده جدا عكس لو كان في الصيف ليه ؟

عمر السيارة له دور وفلتر الهواء والبواجي والاسلاك والبطارية ورطوبة الجو كلها تضعف ايام البراد وممكن برضو برودة البنزين تضعف عمل الطرمبة اذا كانت قديمة فتحتاج وقت اطول للتسخين وطبعا اي سيارة اذا شغلتها وقامت تقطع فلازم تنتظر شوي ثم امش يعني انتظر دقيقة ثم امش على اقل من مهلك وبتشوف نتيجة تسرك ان شاء الله

6 اذا كان من الخطاء انك تعبي السيارة ماء اقرب للبرودة اذا فورت على اساس لا تشعر راس المكينة اجل ليه اشغل والسيارة كأنها ثلاجة وامشي على طول واعطيها احتراق وحرارة مفاجأة وقوية قد لا يتحملها وقد تنكسر اشياء بالمكينة

اصلا انت اول ما تشغل السيارة يكون هناك انفجارات هايلة في الاسطوانات حرارتها شديدة وفجائية نتيجة احتراق البنزين والهواء فالمعنى الوضع هنا يختلف والاسطوانات مصممة لتحمل اقصى درجات الحرارة ولو باخذ بالمثل اللي تقوله كان ما بتقدر تشغل السيارة غير في الصيف .



عموما انا في الاخير اقول انا مقتنع اني احمي السيارة اذا ماكان هناك امر طارئ




المشكلة اني رديت عليك وعارف انك ما راح تقتنع :D طيب دامك مقتنع بالتحمية ليش تحط الاسئلة هههههههههه :D

[عااشق نفود]

حم الموتر على الاقل دقيقتين

[يريور عيمان]

و ايضا ما في اي ضرر عند تحمية السيارة
و الميكانيكي اللي يقول انه في ضرر فهذا مو ميكانيكي للاسف

[ابو يوسف GX-R]

ياعزيزي التحميه الطبيعه لي السيارات بجميع انواعها هي 7 دقائق ساعات الصباح الاولى اذا كان الجو شتاء .اما اذاكانا الجو صيف يكفي 3 دقائق فقط

[عبدالله614]

هذى كلام خرطي الي يقول لاتحمي انا كنت امشي بدون مااحمي وسيارتي فكس ار موديله الفين شريته بوقته
يوم دخل شهره السادس صارت تطلع عندي صوت تكتكه مقرف ومزعج وبالاخير اكتشفت انه
من السبايك وكلف علي حدود 3800 تصليح ومن بعد الي صار صرت مامشي الا وانا
محمي من 4 الى 5 دقايق والحمدالله مرتاح وماشفت الا كل خير مع التسخين

[يريور عيمان]

هذى كلام خرطي الي يقول لاتحمي انا كنت امشي بدون مااحمي وسيارتي فكس ار موديله الفين شريته بوقته
يوم دخل شهره السادس صارت تطلع عندي صوت تكتكه مقرف ومزعج وبالاخير اكتشفت انه
من السبايك وكلف علي حدود 3800 تصليح ومن بعد الي صار صرت مامشي الا وانا
محمي من 4 الى 5 دقايق والحمدالله مرتاح وماشفت الا كل خير مع التسخين


وشهد شاهد من اهلها

لازم التحمية يا اخوان

[الخادم]

مشكور لموضوعك
تعودنا اننا نسخن السياره قبل ما نمشي
و لكن احيانا نستعجل و نشغل و نمشي
و لله الحمد لم اواجه مشاكل
من رائي
انك تشغل السياره للتحميه لو تاخرت ولا استعجل و احيانا تخرب السياره
بمعنى ان اخسر بنزين ووقت
ولا اخسر مكينة السياره

[كلاشنكووف-]

السلام عليكم بالنسبه بالصيف دقايق وتمشي وبنسبه للشتاء لازم الامبير يرتفع =واذكر الشيبان اول يشبون نار--خفيفه تحت كارتير الزيت للتحميه وبعدين لاحضو اهل الجيوب يركب قطعه كرتون في الشتاء قدام الشبك للتصخين-اوقصدير بشبك الامامي وشكرا

[volcano]

مشكور لموضوعك

تعودنا اننا نسخن السياره قبل ما نمشي
و لكن احيانا نستعجل و نشغل و نمشي
و لله الحمد لم اواجه مشاكل
من رائي
انك تشغل السياره للتحميه لو تاخرت ولا استعجل و احيانا تخرب السياره
بمعنى ان اخسر بنزين ووقت

ولا اخسر مكينة السياره


كلام جميل :good2:

[عزوبي]

كلام كبير وروعه
كثر من الناس تجهل هالموضوع تحديدا
اشكر لك التوضيح

[ramy asiry]

لي 8 سنوات عندي لاند كروزر ما عمري حميت في الصبح إلا مرات قليلة جدا والحمدلله الموتر ما فيه أي شيء

[شايب السبيت]

اجواء السعودية
شديدة الحراره صيفاً
شديدة البروده شتاءً


الحل الامثل تركيب بلف 60 صيفاً
وفي الشتاء يركب بلف 90


تحمية السياره ضروري جداً بخاصه في الشتاء
اما الصيف ما يحتاج


ويختلف الامر با اختلاف نظام حقن الوقود
البخاخات تحمى بسرعه اما الكلبليتر يحتاج وقت اطول

[عاشق هلي 2005]

اجل معنا جيب ديزل نشغله نص ساعه من الفجر والحين له 21 سنه ماجاهـ شي يعني التحمية واجبة

[شمالات نجد]

يا أخوي خذ كوب زجاج (قزاز) وحطه في الفليزر خمس دقايق بعدين طلعه وصب فيه شاهي أو مويه حاره وشف وش يصير ههههههههههههههههه



التحمية ضرورية مافيها مجال وبعد التحمية لازم الواحد يمشي على الهادي


وأصلاً المحركات ما تعطي قمة انتاجيتها إلى إذا ارتفعت الحراره


سلام

[ذيب حوران1]

ياخي انا اعتقد ان تحميت السيارة شي ضروري لان بعض السيارات ماتمشي اذا كانت بارده

[al7eran]

الجو بارد جدا هالايام والمكينه كأنك حاطها بفريزر :D


لازم تحميه السيارة عشان تسخن وتمشي وغياراتها تكون سلسه

[سعود الحربي]

ياخي بأمريكا عنده نظام البلف مايفتح الا اذا وصلت الحراره تقريبا 90



اما اكثر البلوف عندنا يفتح عند 75 او 65


ونظام المرواح ماتشبك يعني كلن وجوه


لكن شي بالعقل بالاحساس هي مهيب كتالوج ولا حاجه


دق سلف بسيارتك الفجر وحرك على طول وش تحس بالسياره


على طول راح تسمع اصوات والموتر مو على خبرك متغير 180 درجه


لكن اذا حميته وحركته رجع لسلاسته وخفته ومشيه العادي


تدري عاد وش المشكله ان فيه ناس تسمع الكلام وتاخذ عليه



وتروح تطبق ويخبط الموتر والله يدعي عليك وعلى ماسمع وعلى من قال

كلامك عين العقل ومن لايحمي السياره الصباح لايفقه شي
خذ مثال الامريكي يعلق حتى تسخن السياره درها براسك ليش يعلق

ياخي انا اغلب السيارات اللي جربت من امريكي وياباني تماتيك
إذا ماسخنت السياره شف القير كيف يبدل كان القير يبي ينفجر

لكن تسخين السياره 5 دقايق فقط وكافي

[volcano]

يا أخوي خذ كوب زجاج (قزاز) وحطه في الفليزر خمس دقايق بعدين طلعه وصب فيه شاهي أو مويه حاره وشف وش يصير ههههههههههههههههه







اجل كوب قزاز وفريز زي معدن الالمونيوم والحديد شكلك راسب في العلوم ههههههههه:D

[volcano]

كلامك عين العقل ومن لايحمي السياره الصباح لايفقه شي


وش عنده الياباني :D

[بوسدن]

السلام عليكم
منذ سنه 1991 ما أسخن السياره أشغل وأمشي ولكن لا أسرع في البداية وإستخدمت خلال هذه الفتره :
لكزس لمدة 4 سنوات ومرسيدس لمدة 5 سنوات ويوكن لمدة 6 سنوات وتاهو لمدة سنتين ووانيت جمس لمدة 3 سنوات وكروزر لمدة سنه ونصف تقريبا والحمد لله ما صار شي مع أي سياره
تدرون ليش لأني آخذ المعلومة من صانع السيارة وليس من الأصدقاء وعوام الناس

[abu fares]

ياخي بأمريكا عنده نظام البلف مايفتح الا اذا وصلت الحراره تقريبا 90



اما اكثر البلوف عندنا يفتح عند 75 او 65


ونظام المرواح ماتشبك يعني كلن وجوه


لكن شي بالعقل بالاحساس هي مهيب كتالوج ولا حاجه


دق سلف بسيارتك الفجر وحرك على طول وش تحس بالسياره


على طول راح تسمع اصوات والموتر مو على خبرك متغير 180 درجه


لكن اذا حميته وحركته رجع لسلاسته وخفته ومشيه العادي




نفس الكلام اللي ودي اقوله

[أرمادا]

الدليل ان التحميه مو ضروريه سيارات هيونداي الجديده مافيها انبير حراره يعني اللي مقتنع بالتحميه وش يسوي .. !!

[شمالات نجد]

اجل كوب قزاز وفريز زي معدن الالمونيوم والحديد شكلك راسب في العلوم ههههههههه:D


ههههههههه

لا الحمد لله ممتاز في العلوم الله يذكر أيام الدراسة بالخير


حتى الأجزاء داخل المحرك إذا كانت بارده وتعرضت لحراره بشكل سريع تنكسر ولاتستغرب ذلك.

سلام

[شمالات نجد]

الدليل ان التحميه مو ضروريه سيارات هيونداي الجديده مافيها انبير حراره يعني اللي مقتنع بالتحميه وش يسوي .. !!


انا معي حالياً سيارة هونداي النترا ومافيها إلا لمبة حمراء تولع إذا تجاوزت الحراره الحد المسموح وهذا يعني ايقاف المحرك والسيارة تماماً ومعالجة المشكلة قبل تفاقمها.

هذا مذكور في كتاب دليل المستخدم للسيارة

وإذا كانت معك سيارة هونداي بدون مقياس حراره ومحتار في وقت التحميه فهو تقديري بما تراه من حال الطقس من 3 إلى 6 دقائق

اتذكر مره جت معي هونداي اكسنت مافيها مقياس حراره وفيها لمبة تولع وهي بارده أزرق وإذا صارت الحراره مناسبة تقفل كذلك تولع إذا ارتفعت حرارتها بزياده عن اللزوم أحمر.

وكونه لا يوجد مقياس للحراره هذا ليس دليل على عدم وجوب تسخين المحرك

سلام

[حسن ابو طالب]

الي يبي يوضب المكينه بخلال اسبوع بالاكثر لايحمي السيارة

ههههههههههههههههههه

هالكلام غير صحيح ابداً وانا في مرة قمت مستعجل بروح المستشفى
وشغلت ومشيت وسيارتي موديل حديث طلعت البساتم من عرض المكينه

جرب هالطريقة انت ياصاحب الموضوع وبعد اسبوع عطنا رأيك في الموتر

[التعـ King ـديل]

كل سياراتي اول شي احط المفتاح على ستارت اللي قبل التشغيل لحد مايخلص الجرس وبعدها اشغل السياره واصبر 30 ثانيه بالكثير وامشي بهدوء والحمدلله من عام 1996 وهذي طريقتي ولا شفت الا كل خير
علما بااني استخدمت سيارات مشكله ددسن - كابرس - كامري - برادو - هدد - باترولات اشكال والوان وموديلات متعدده - فورتشنر .. اهم شي انك ماتشغل السياره قبل يوقف الجرس حق التشغيل

[ابو العز بلس]

ماشاء الله تبارك الله
الاغلبية يحمون السيارات وهذا شيء حلو

بالنسبة لي احمي السيارة لحد مايوصل الخط وبعدها امشي ويالله لك الحمد الامور ماشية

[أطلال نجد]

في الشتاء 3 دقائق كافيه ،،، إذا زاد عن ذلك أسراف في الوقود
بشرط ما تضغط على المحرك .
في الصيف 30 ثانيه تكفي لطلوع الزيت لأعلى قطعه متحركة في المحرك

:good::good::good::good:

أسراف في الوقود وفي الوقت وتقصير لعمر المحرك أيضاً .

شكراً لك أخي العزيز / بدوي جنوبي

[أرمادا]

انا معي حالياً سيارة هونداي النترا ومافيها إلا لمبة حمراء تولع إذا تجاوزت الحراره الحد المسموح وهذا يعني ايقاف المحرك والسيارة تماماً ومعالجة المشكلة قبل تفاقمها.

هذا مذكور في كتاب دليل المستخدم للسيارة

وإذا كانت معك سيارة هونداي بدون مقياس حراره ومحتار في وقت التحميه فهو تقديري بما تراه من حال الطقس من 3 إلى 6 دقائق

اتذكر مره جت معي هونداي اكسنت مافيها مقياس حراره وفيها لمبة تولع وهي بارده أزرق وإذا صارت الحراره مناسبة تقفل كذلك تولع إذا ارتفعت حرارتها بزياده عن اللزوم أحمر.

وكونه لا يوجد مقياس للحراره هذا ليس دليل على عدم وجوب تسخين المحرك

سلام



صح كلامك فيه لمبه اذا شبت الحراره .. انا عندي الالنترا واول ما اشغل يصير الانبير ضغطه عالي وبعد 30 ثانيه بس يرجع الضغط عادي واعشق وامشي على الخفيف مدة خمس دقايق وبعدها اتوكل على الله ..

[راعي جمس]

كلامك صحيح