طريقة تركيب المراوح الكهرباء بالصور

[عاشق الجبل]

السلام عليكم ورحمة الله وبركاته


طبعآ سأطرح الذي أعرفه عن المراوح الكهرباء ولا أستغني عن أضافاتكم الطيبة :)



طبعآ يجب أن تكون المراوح ذات سرعتين .... ويابانية ( سوبارو ) الأفضل للسيارات الـ6 سلندر

وتكون للمرواح قاعدة لكي تتم عميلة التثبيت بشكل قوي وصحيح .




صورة المراوح قبل التثبيت بقاعدة

http://www.aseturbo.com/assets/images/r33radiator.jpg





مراوح مع الهواية جاهزة للتثبيت حيث أن الهواية البلاستيكة لها دور كبير في التبريد لأنها مصممة

بطريقة تحفظ الهواء لتدفعه المراوح الى الأدريتر فإذا ألغيتها ستلاحظ أن الحرارة سترتفع عندك .


http://images.1aauto.com/RFA/1ARFA00068.jpg

[nahham]

مرحبا اخوي خالد

انا ركبت مراوح سني لكنها ليست مثل مراوح السوبارو

مراوح السوبارو لا يعلى عليها بشرط تكون كتاوت اصليه واسلاك متينه ومعزوله وبعيده عن الردايتر او اي شي متحرك يعرضها للخطر

شكرا لك على الطرح

[أبو يوسف]

شرح وافي

لكن ما عندك فكرة وين الورشة الممتازة للتفكير


مشكور يا ابو منصور
ولا عدمناك


تحيتي

[عاشق الجبل]

كلامك صحيح أخوي الغالي ( نهام )



أبويوسف كثير اللي يركبونها خاصة بالقصيم ..... عندك ورشة الدغيري بالرياض ( أبوعبدالله )


تدخل مع مخرج 16 متجه الى سكن الحرس الوطني حتى تجيك أشارة سمنان ترجع معها من حيث أتيت ( حلوه من حيث أتيت ) :)

يعني تديور وأول محطة على أيدك اليمين ( محطة السعودي ) تلقى الورشة فيها .

[aziz6006]

السلام عليكم
مادري اي افضل مراوح السوبارو والا الفورد موستنغ وكم تكلف
وشكراً

[nahham]

هلا اخوي عزيز

اولا يحكم هذا حجم الردايتر والمسافه بين المكينه والرديتر

مراوح الفور تصيح - تطلع صوت عالي

السوبارو ممتازه وتشتغل المروحتين جميع واذا شغلت المكيف تشتغل المروحتين بالسرعه العاليه

مراوح السوبارو سرعتين

شكرا لك

[البنتلي]

مشكور ياعاشق جبل على الموضوع

لكن الوصف لا ترجع من حيث اتيت

ابتل بعد سمنان تجيك اشارة العثيم سيد ثم تجيك اشارة بعدين ترجع من حيث اتيت المحطة على اليمين

[عاشق الجبل]

عفوآ المقصود محطة السعوي وليس السعودي ( الفرق د ) :)


الأخ : عزيز 6006 ( تعقيبآ لإفادة الأخ الغالي نهام ... ولايهون )

أنا جربت مرواح السوبارو على سيارتين .. ولا .. لاحظت عليها شىء

وبالنسبة لمراوح الفورد فهناك من يمدحها ولكن لاعلم لي آي نوع من الفورد .... وكم تكلفتها .



الأخ : البنتلي ( الخطأ وارد في هذا الشهر الكريم وحسب علمي يالغالي أنك تديور مع أخر أشارة قبل بوابة الحرس ) :)

[عراوي 97]

يا اخوان انا قدر الله علي وشريت هالمراوح ومدري هي تركب على الددسن 97 ولاّ لا
لأني ما لقيت لها مكان تثبت فيه المروحة على الراديتر



http://www.mekshat.com/pix/upload/images11/mk9122_3.jpg

[القطاع عشره]

صح تديور مع اشارة سمنان والورشه داخل محطه السعوي

ورشة عبدالرحمن الدغيري ابو عبدالله

تحياتي اخوكم القطع عشرة

[salehhd]

كم سعر مراوح السوبارو جديدة او مستخدمة

وهل هي افضل ولا مروحة الرسدس

[ab0_feras]

السلام عليكم ورحمة الله وبركاته ...
الحقيقة كنت ناوي أطرح هذا السؤال للأخوان المكشاتيين .. ولكنك سبقتني يا عاشق الجبل

عموما ودي من الأخوان اللي شروا هذه المراوح يعطونا الكود نمبر علشان مانغلط عند طلبها لأني فهمت من أكثر من مشاركه ان هناك نوعين كبير وصغير وشي ب 600 والثاني ب 250

والنقطه الثانية هل تركب على الشروكي 96

وكل عام وانتم بخير

[ولد الشايب]

السلام عليكم

أنا جربت بعض المراوح و أقدر أفيدكم فيها من خلال تجربتي

بالنسبة لسيارات نيسان ( باترول - باثفيندر- شاص - ربع ) لابد من تركيب المراوح الكهرب لأنها من المشي في النهار ودرجة الحرارة العالية والوقفة والمشي وكل شوي تعشق القير يسبب بعد فترة حنه تشبة حنة ال vxr ويضعف عزم الموتر حتى لو ما ارتفعت الحرارة والسبب الرئيسي هي مروحة السير .

بالنسبة لسيارات تويوتا لأ أعتقد أنها تحتاج للذلك والأمر كله راجع للسبب المكينة وتصميمها وهذا لا يعني أنها لاتحتاج مراوح كهرب .

أنواع المراوح :

1-مراوح الفورد - الصغيرة أو الكبيرة - دفع قوي جداً - صوت قوي
2-مراوح الشيروكي - دفع قوي جداً - صوت قوي
3- مراوح المرسيدس - عشر ريش - دفع قوي - ازعاج أقوى
4- مراوح اللومينا - خمس ريش - دفع ممتاز ولكن أقل من السوبارو - الصوت يعني
5- مراوح السوبارو - دفع ممتاز - صوت طبيعي ( ما في أي ازعاج )
6- مراوح ماكسيما - دفع ممتاز - صوت عادي تقريباً

مميزات المراوح الكهرب : قلت استهلاك الوقود نسيباً - الموتر يسير أنشط وأخف ( لأن مروحة السير انشالت )

العيوب : أنها كهرب يعني في أي وقت ممكن تطفى أو يحترق السلك أو الكتاوت فلابد أنك تحسب حساب الكتاوت الأصلي والسلك متين

سيارتي باثفايندر 2003 ومركب مراوح سوبارو خمس ريش ومراوح مرسيدس على رديتر المكيف (للنفود فقط) ومرتاح والحمد لله

وأخيراً لابد من وضع المروح الأصيلة معك في السيارة لا حتمال تعطل مراوح الكهرب

[الضاري]

المراوح هذي يركبن زياده على مروحة السياره الأصلية

أو لازم تفك المروحه الأصلية

[salehhd]

المراوح هذي يركبن زياده على مروحة السياره الأصلية

أو لازم تفك المروحه الأصلية

اولا عيدكم مبارك وكل عام وانتم بخير

نفس السؤال

والسؤال الثاني اذا كان لابد من شيل المروحة الاصليه هل هذا يؤثر على الضمان

وايض افضل مراح تركب على الباث

[الشمطري]

كل عام وانتم بخير يا اخوان الموضوع مهم جداً بس اهم شئ انك تركب الأصلي وتركب المراوح عند واحد فاهم
ورداً على الأخ الضاري والأخ صالح لازم تفك المراوح الأصلية

وكل عام وانتم بخير وعساكم من عوادة

[salehhd]

اشكرك اخ الشمطري على الرد

وكل عام وانت بخير

طيب هل يلغى الضمان بهذي الحركة

[abadee]

بسم الله الرحمن الرحيم

اخواني كل عام وأنتم بخير 0،،،،،

انا لي قصة حب مدتها 3 سنوات مع مراوح الكهرب وأنتهت بالطلاق ركبتها على جيب ربع وركبتها على يوكن 0

البدايه :
جيب الربع سلكت معي نوعاً ماء وبعته وهي فيه
اليوكن الغيت مروحة المكينه وركبت مروحة فورد ميركوري كبيرة ومروحة فلفو بصراحه خف عزم الموتر جداًجداً وراحت حنته وفي النفود يعطيك عزم غير طبيعي ويقلل من صرف الوقود وانس ترتفع الحراره ويوم بعديوم اتضحلي ان العشره بيننا مستحيله أولاً : كل ثلاث شهور تغير البطارية والسبب هو ان مولد الكهرباء مخصص لسيارة بدون مراوح كهربائيه يعني اليوكن قوة المولد شد البلد تجي ( 80 أمبير ) بينما جميع السيارات الجديده التي تعمل على مراوح كهربائيه تصل بعضها الى ( 150 أمبير ) وهذ ا يؤثر على المولد الأساسي والبطاريات وتقعد رايح جاي للصناعيه المهم رهمت مولد كابرس أس أس وكل غير بكره غير سير ومش حالك في يوم من الأيام احترق الكتاوت وماأنتبهت له وقفت المراوح عن العمل ونزلت من السيارة للعثيم وهي تشتغل والمكيف شغال لأن العيال في السيارة وجلست تقريباً 20 دقيقه يوم رجعت والقى مويت الرديتر واصله الدايري والحرارة على الأحمر وخبطة المكينه وكلفتني 8000 ريلا وحلفت اني معاد تستمر عشرتنا مع شي غير شد البلد والله الموفق 0،،،،،

[شاص]

حيا الله كل باسمه ..
مراوح الكهرب سلمكم الله تونا مركبينهن على هايلكس طبعاً مراوح سوبارو وكان الهدف الأول من تركيبهن التخلص من إزعاج مروحة الشد بلد اللي لها حنة مزعجة إذا اشتغلت حتى أنك بعض الأحيان إذا صرت ماسك خط ما تسمع وش يقول اللي بمرتبة ورا .. المراد ركبناهن عند أبوعبدالله اللي بمحطة السعوي والرجال ماشاء الله متمرس بهالشغلة .. طبعاً تحتاج المراوح إلى حساس حرارة بحيث إذا وصلت الحرارة لدرجة معينة تشتغل المراوح وأنت ورغبتك بنوع الحساس إذا تبي الحرارة تاصل النصف أو الثلث أو الربع .. ويركب مع الحساس فاصل تقدر تشغل به المراوح حتى لو ما ارتفعت الحرارة وغالباً ما يشغل وقت المطاعس أو في حال تعطل الحساس .. المهم النتيجة هي ذهاب إزعاج المراوح الشد بلد و تغير العزم للأفضل و قلة صرفية البنزين نسبياً ..

[اسد رغبه]

السلام عليكم ورحمة الله وبركاته
ياالشاص بالله وصفلي المحل ولا عليك امر

[شاص]

نسيت أقول أنك لازم تحرص أن :
- تكون الكتاوت أصلية
- الأسلاك متينة .
- التمديد ممتاز ومخفي .
- المراوح مثبته بمسامير تثبيت جيد لأنه إذا ماثبتت زين يمكن تطيح أو تنكسر و تشق الأديتر .
- يكون التركيب على نفس مسامير المروحة الشد بلد يعني ماتخرم من جديد للمراوح عشان إذا بغيت تفكهن ماتبين .
- تكون معك المروحة الشد بلد إذا كنت بتبعد بالبر من باب الاحتياط إذا صار شي بمراوح الكهرب تركب الشد بلد .

وبالنسبة لضمان الوكالة طبعاً إذا وديته بالمراوح ما يطيعون يدخلونه على الضمان لكن إذا اضطريت فك المراوح ورجعه مثل ماكان

[شاص]

حياك أخوي أسد رغبة .. الوصف سلمك الله تدخل مع مخرج 16 (السلي) متجه الى سكن الحرس الوطني حتى تجيك أشارة سمنان(تقريباً خامس إشارة ) ترجع معها يعني تديور وأول محطة على يدك اليمين بها صراف الراحجي تلقى الورشة فيها الميكانيكي سعودي اسمه أبو عبدالله ولازم تاخذ موعد قبل لأن عنده زحمة وهذا جواله 0552222006 عبدالرحمن الدغيري .

[المسافر]

اخواني هل مراوح السوبارو الكهربائية الجديدة
تاتي مروحة واحدة لاني اتصلت على واحد في ديرتي اخبرني
انه يوجد مروحة واحدة كهربائية

[اسد رغبه]

مشكور ياالشاص ماقصرت وبيض الله وجهك

[اسد رغبه]

اللي اعرفه يااخوي يا المسافر ان مروحه السبارو تجي مروحه وحده بس كهربائيه طبعا

[الأحوذي]

السلام عليكم

انا استغرب من الشباب في تركيب المراوح لو كانت ما فيها اي مشاكل كان تجيك شد بلد انا عندي اقتناع ان اي تغير في السياره عن شد البلد يسبب مشاكل للسياره لو بعد فتره

والراي لكم يا مكشاتيين

[عاشق الجبل]

الأخ : الأحوذي


يوجد بارك الله فيك بعض أنواع السيارات الجديدة مراوح كهرباء شد بلد

وأنا أوافقك الرأي أنها تخوف نوعآ ما في الأماكن البعيدة ، لكن قبل االمقناص تأكد أن التسليك سليم وخذ معك المروحة

مع كلتشها والمسامير ( شد بلد ) من باب الإحتياط


علمآ أني أستخدمها على سيارتي من 4 سنوات وكل شي على مايرام والحمدلله .

[اسيزو 4x4]

يعطيك العافية يا أبو منصور

شرح وافي وصور طيبة ....

...

[مغلي]

هل ممكن تركيب مروحة السوبارو على يوكن 2002 امريكي طبعا ابيها تشتغل مع المكيف فقط لأني اذا شغلت المكيف والسياره واقفه ترتفع الحراره وتقترب من الاحمر .... وكم تكلفتها كامله لليوكن

[شروكي ربع]

السلام عليكم ورحمة الله وبركاته


طبعآ سأطرح الذي أعرفه عن المراوح الكهرباء ولا أستغني عن أضافاتكم الطيبة :)



طبعآ يجب أن تكون المراوح ذات سرعتين .... ويابانية ( سوبارو ) الأفضل للسيارات الـ6 سلندر

وتكون للمرواح قاعدة لكي تتم عميلة التثبيت بشكل قوي وصحيح .




صورة المراوح قبل التثبيت بقاعدة

http://www.aseturbo.com/assets/images/r33radiator.jpg





مراوح مع الهواية جاهزة للتثبيت حيث أن الهواية البلاستيكة لها دور كبير في التبريد لأنها مصممة

بطريقة تحفظ الهواء لتدفعه المراوح الى الأدريتر فإذا ألغيتها ستلاحظ أن الحرارة سترتفع عندك .


http://images.1aauto.com/RFA/1ARFA00068.jpg


حبيب قلبي صورة المراوح اللي أنت حاطها ماهي سوباروا !! وانما مكسيما او صني يبدو لي .

السوباروا تجي وحدة واطارها حديد .




المراوح هذي يركبن زياده على مروحة السياره الأصلية

أو لازم تفك المروحه الأصلية


لا لازم تفك المروحة الأصلية , وتقدر تركبها زيادة على الاصلية قدام الرديتر .

[شروكي ربع]

كثر السؤال عن المراوح وطريقة تركيبها و الحرص عليها ..

وخذوها مني نصيحة السيارات اللتي لا تشتكي من حرارة لا تتفلسف فيها و تغير مراوحها .

الا اذا كانت مروحة البلد مزعجة وصوتها مرتفع ولو اني افضلها على الكهرب .

اما السيارات التي تشتكي او يرغب اصحابها بتغير مراوحها يركبون اما السوباروا وسعارها 150 ريال للوحدة تزيد او تنقص (( الصغيرة ))

واما السوباروا الكبيرة اسعارها 70 ريال تزيد او تنقص .

او مراوح المكسيما وسعرها حول 400 ريال للمروحتين كما في الموضوع .

ويجيب تسليكها تسليك جيد والكتاوت مهمة وان حصل تحط فيوزات , زيادة أمان لان الكهرب مشكلة الحبرشة فيه .

بالنسبة لموتري الشروكي انا حاط مروحة وحدة سوباروا وتركت مروحة البلد الكهرب والحمد لله اموري تمام .

الموتر 98 كلاسيك .

[الرسيفر]

والله يا جماعة أنا كانت بالموتر وشلتها والسبب مرة طالعين للنفود

حنا والشباب وفجأة فقدت ربعي يا ولد وين الناس
وراجع والقاهم فاتحين الكبوت ( الله يستر )
خاصة إنه مهب وقته
ما فيه ارسال جوال
أقرب ديرة 90 كم نفود يعني ما فيه راادمية أو خط زين يعني بين هالنفد
طبعا الشباب مهب اللي تبي بالصيانة
نزلنا يا ولد وش السالفة ؟
قال المراوح ما تشتغل والحرارة H !! أو الله الحالة طيب والحل قال ما أدري حاولنا حاولنا مرة ما فيه فايدة تعرف عليمية وخفنا نحوس كهرب الموتر خاصة إنه جيب جديد 2007
قلنا مالنا ألا السحب سحبناه 60 كم بين هالنفد طبعا إذا هيار شغل ودس حتى جاء الارسال دقينا على واحد من الشباب وعلمنا كيف نشبك المراوح على طول ما تطفى يعني إذا دقيت سلف تشتغل

بعد ما رجعنا لهلنا كل الشباب فكو مراوحهم وارجعو على شد البلد

[mutleb]

أنا مع اخوي شروكي ربع ......

[معدم الظلام]

انا مركب لي مروحة سوبارو على تاهوz71بس اسمع لها صوت والشباب يقولون مالها صوت وش العلم

[معدم الظلام]

حمدالله على سلامتكم اخوي شروكي ربع مراوح الجيب حقك لها صوت مثلي

[badr.fj]

السلام عليكم ورحمة الله وبركاته
سؤال عن مراوح المرسيدس 300 و500 من حيث الكهرب هل هي اقل استهلاك للكهرباء من السوبارو وهل هي اقوى// ارجو الافاده:
واذا من ناحيت الصوت ماتفرق معي اهم شي الحراره
مع العلم ان موتري تاهو 2000