ليه تخبي أسم مدينتك أو قريتك؟؟ [الأرشيف]

عروان

25/10/2005, 08:53 PM

أخواني

السلام عليكم ورحمة الله وبركاته

بعضنا يطرح سؤال ويستفتسر عن شغلة معينة أو يسأل عن مكانها أو واحد يسأل عن أقرب محل يبيع الشغلة الفلانية, ويوم تطالع على مقر سكنة ولا هو فاضي أو حاطن الوسيعه أو ارض الله, او بين السماء والارض.

أو يجيك واحدن وقول "البارح غرقنا جاتنا سحابتن غشتنا و سالت الارض" وتعاين لمدينته و لا هو فاضي.

ثمن تلقى الاخرين يردون علية : انت وين ساكن؟ وينك فيه؟ أنت في أي ديرة؟

معرفة مقر السكن ما فيها عيب او خنى. ولو كان الرجال ساكن في هجرة صغيرة برضه مافيها شي يستاهل انك تخبي اسمها. المنتدى اللي حنا فيه كله علوم رجال و لا فيه من العيب ذرة حتى الواحد يخبي عنوانة.

فأنا أقترح يا اخوان انكم تحطون مقر سكنكم في اي منطقة او مدينة او هجرة, حتى اذا سيرنا على المكان اللي انتم فيه لينا نذكركم و نرسل لكم بالخاص : زين لنا القهوة ترانا مسيرين عليك. و أن كان ما ودك لا تحط مدينتك.

مجرد رأي

مكشات : أبونايف

nahham

25/10/2005, 09:32 PM

علمك غانم يابو نايف

تكلمنا عن ذلك في اجتماع الشرقيه واعدنا في اجتماع الرياض لكن اشوف الشباب غير متحمسين

واخونا الغالي صقر قال انه يريد اسم وجوال كل عضو ليتم تعميمه على الاعضاء بالخاص لكن .............

انا اؤيد الفكره واضم صوتي الى صوتك

تسلم يالغالي

طشي وامطري

25/10/2005, 10:05 PM

طيب واللي مثلي بين الدمام والرياض
وش اكتب في هالحالة ؟ أنا حالياً ساكن بالدمام لظروف العمل لكن في الغالب خميس وجمعة في الرياض ، وأنتظر النقل الله يجيبه ونرجع لهلنا ، ولاهو تقصير بالدمام واهله بس ملي غنى عن ربعي واهلي وفيافي نجد.

أبو يوسف

26/10/2005, 01:46 PM

انا اشكرك على طرح هالموضوع وهالاقتراح والتساؤل

بس مثلي انا اكون قترات بالرياض وفترات بالقصيم وش اكتب

اما اللي ذكره اخوي نهام
انا من ذيك الليلة قبل انام ارسلت لصقر معلوماتي كاملة
علشان ادخل السحب :)

اكرر شكري لك اخوي ابو نايف على الاقتراح
تحيتي

صقر

26/10/2005, 08:04 PM

كلامك صحيح اخي ابو نايف ... وجزاك الله خير على التذكير.

أعتقد وضع اسم السكن جيد حتى يكون للمكان شهرة بين اعضاء المنتدى.

اكرر شكري لك اخي ابا نايف...

وبارك الله فيك.

http://www.mekshat.com/pix/upload/images11/mk1377_sakan.jpg

.............

ابو ايمن

26/10/2005, 09:42 PM

صدقت أخي عروان

كلام في منتهى الواقعية ومافيه والحمد لله عيب ولا شيء نستحي منه

والمفروض على كل واحد يحط اسم ديرته إلا إذا كان قصده من التسجيل هو أن يستفيد لنفسه وبس

وفي هذه الحالة فماله داعي يكتب أخبار أمطار أو ربيع أو شيء ياخذ المفيد ويتوكل على الله

لكني أتوقع أن معظم أعضاء مكشات نشاما ويرغبون في تعريف أنفسهم على الأقل من باب ( معرفة الرجال كنز )

أما موضوع جوالات وعناوين الأعضاء فلو كان أي عضو ينوي يقصد أي مدينة أو منطقة

عليه أن يضع موضوع يذكر فيه وجهته ويطلب مراسلة الأعضاء اللي من المنطقة ليتصل بهم إذا رغبوا في ذلك

عندما يصل لديرتهم

وأنا أول المؤيدين في أي طرح من شأنه التقارب بين الأخوان

تحية عطرة

عروان

27/10/2005, 02:56 AM

ابو هشام (نهام) حياك الله يالغالي.

أخوي طشي و امطري: اللي مثلك يكتب ما بين الدمام و الرياض. مافيها شي.

أخوي أبو يوسف: لوني منك اذكر مقر سكنى اللي أقضي فيه اغلب الايام.

أبو أحمد "صقر" : حياك الله , ليه الادارة ما ترسل طلب بالخاص لجميع الاعضاء بهالخصوص.

أخوي أبو أيمن: حياك الله يالغالي, لامني سيرت على الديرة "عروى" أن شاء الله بسير عليك بالدوادمي :).

ابو ايمن

27/10/2005, 03:40 AM

الله يحييك ياعروان

اثر الإسم مشتق من البيئة

تشرفنا والله

المترو

27/10/2005, 05:06 AM

السلام عليكم ورحمة الله وبركاته

ماشالله تبارك الله اقتراح سليم ومفيد وتذكير ممتاز بيض الله وجهك يا ابو نايف ومن هالين ارني ابحط مكاني :D :D اللي انا فيه
وتسلم على الموضوع والطرح الموفق عوايدك يا عروان راعي عروى اللي جنب جبل عروان :) :)

المترو ابو ناصر
والسلام

الخيال

27/10/2005, 06:14 AM

:good: :good:
مؤيد

الكونترولCONTROL

27/10/2005, 06:30 AM

مجرد أمنيات و اندفاعات !!!! هذا رأيي

هابكيدو

27/10/2005, 06:54 AM

انا أؤيد اقتراحك

عروان

27/10/2005, 02:58 PM

أبو أيمن: الشرف لي بالبناخي.

المترو: حياك الله يا بو ناصر.

الخيال: هلا بك يالخيال و أشكر تأييدك.

الكنترول: الله يحقق لنا أمنياتنا و يكفينا شر الاندفاعات :)

أطيبت تحية للجميع

nahham

27/10/2005, 03:17 PM

هلا ابو نايف

واتشرف بان اكون اول واحد يستجيب لطلبك

كتبت اسم المكان اللي اعيش فيه الان وبلدي الاولى وافتخر بذلك

وانا في خدمة اي عضو يحتاج ...... اكيد كلنا اسرة واحده

تسلم ابو نايف وعساك على القوه

بـران

27/10/2005, 04:11 PM

طيب و ين نحط اسم المدينة ؟؟؟

جلوبلستار

27/10/2005, 04:26 PM

اخوي عروان ... ملاحظة مهمة تشكر عليها ...

عروان

28/10/2005, 03:27 PM

سلام ي اخوان

وشيل: شارك لك تأييدك.

أبو هشام أحسنت كذا الكلام.

الاخ بران: تقدر تحط أسم المدينة من لوحة التحكم الخاصة بك.

جلوبلستار: هلا بك والله ياخوي. أشكر تاييدك.

أطيب تحية لكم جميعاً

خيال الغلبا

28/10/2005, 07:03 PM

للرفع حتى يتم التجاوب

بـران

28/10/2005, 11:32 PM

و براسك أخ / عروان
حطينا اسم المدينة
بس هل الشباب في شقراء و ما حولها يب يقتدون بتجمعات مكشات و يكون لنا تجمع ؟؟؟؟

فهد الفوزان

27/11/2005, 10:55 PM

طيب ليه ياشباب كل واحد يكتب اسم مستعار وش فية لو حط اسمة الحقيقي فية سبب اذا فية سبب ارجوا التوضيح وأنا متأكد مافيه اي سبب صح ؟؟؟؟؟؟؟ وأنا يا واحد مستحيل اشارك بأسم مستعار بأي موقع / أخوكم فهد الفوزان

نبهاوي

27/11/2005, 11:19 PM

لا ياملا العافيه .....يا عروان هذي علوم الرجال ولا بلاش .......

الله يحييكم بالنبهانية ....في أي وقت تبون .....

القصيم-الرس

27/11/2005, 11:42 PM

شوفون أنا ماشاء الله علي
مسمي أسي بأسم مدينتي

والله إني خطير

أبو المثنى

28/11/2005, 12:00 AM

الحقيقة فكرة جيدة هذه ولا أدري ورى البعض يخفي اسمه ما أدري خايف إنه يجيه أحد ويبلش بإكرامه وإلا وش السالفة

وكذلك فكرة الجوال إنه يكون لدى المشرفين جميع أرقام جوالات الأعضاء

ولو إنهم يغيرون شروط الاشتراك حيث يلزم الواحد بوضع جواله والتأكيد يكون عن طريق الجوال يعني يجيه رقم يقوم بتسجيله بالمكان المحدد بالمنتدى ويتفعل اشتراكه

حتى يتم مراسلتهم بما يستجد عن الموقع

وهناك مواقع تقوم بالإرسال بأسعار أقل من رسائل الجوال بـ 50 % والاشتراك معهم سهل وأنا أستخدم هذه الخدمات لأنها توفر عليك الرسايل

شكرا لك على هذا الاقتراح

عاشق الشبرمية

28/11/2005, 12:07 AM

السلام عليكم
مع اني عضو جديد على هذا المنتدى الأكثر من رائع الا انني اؤيد هذه الفكرة اخوكم \ عاشق الشبرمية
من الدوادمي

مسافر1

28/11/2005, 05:58 AM

ما هنالك ما يمنع ........

أبو يحيى

28/11/2005, 08:08 AM

عاد تصدق إني كنت مستغرب ليش بعض الأعضاء تظهر معلوماتهم إلا أنا ......... جزاك الله خير.

ورأي موفق ......

beddo

28/11/2005, 08:44 AM

الاخ ابو نايف وانا اتفق مع رايك وراي الريس ابو صقرالموقروهاانا ابدا التطبيق العملي فانا بين عنيزة والرياض لي بيت هنا وهنا

ولكني بارياض اكثر بحكم العمل

مشغول

28/11/2005, 11:16 AM

تسلم اخوي عروان

عاشق المزون

28/11/2005, 02:51 PM

مشكور اخوي عروان علا الملاحظة القيمة وتوي ادري ان اهل ديرتي واجد في المنتدى :) ويالله حيهم كلن باسمة

كشات

28/11/2005, 08:26 PM

http://www.geocities.com/hraaar_1/1100218787_starting_word.gif

هلا وغلا بابو نايف

بالبدايه دخلت الموضوع عشان اضم صوتي لصوتك

وقلت ياكشات(بدون شده) دوربالموضوع يمكن تلقا لك سيم والا سكروب لاني مقفل على مفتاح السياره :D

لاعدمناك يابونايف (الصدقي)

عروان

03/12/2005, 11:55 AM

الله يرفع قدرك ا خيال الغلبا لرفعك الموضوع.

أطيب تحية لك
__________

بران
نبهاوي
القصيم-الرس

تحياتي لكم على مشاركتكم الموضوع

عروان

03/12/2005, 11:57 AM

أبو المثنى

عاشق الشبرمية

مسافر 1

أبو يحي

تحياتل لكم و شاكر تفاعلكم مع الموضوع

عروان

03/12/2005, 12:02 PM

أخوي Beddo

انت عرضت تأييدك للفكرة بس ما طبقتها

باقى ما حطيت اسم مدينتك او مقر سكنك. :)

________________________

أخو مشغول

تحياتي لك على مرورك الخفيف

____________________

عاشق المزون

صدقت ترا ما كنت أدري ان اهل شقرا كثار و حتى أهل الشعراء تراهم كثير تابع بعض الشباب و بتشوف مقرهم الشعراء.

أطيب تحية لك

عروان

03/12/2005, 12:05 PM

كشات

هلا براعي الخبيزة

هلا و مسهلا

وين موضوع رحلتكم أنت و صالح

مافيه صور و لا علوم عن الرحلة, رحلاتكم سكاتي :)

ما نستغنى عن فزعاتكم خبرك أخوك أبو النكبات هههههههههههه

أطيب تحية لك

ابو سمر

03/12/2005, 12:05 PM

أخوي عروان

من يوم تسجيلي وأنا كاتب إقامتي بالرياض الله يحرس جميع بلادنا وبلاد المسلمين ..

شكرا لك وملاحظة جميلة ..

عروان

03/12/2005, 12:07 PM

حياك الله يا بو سمر

شرفت الموضوع الله يرفع قدرك

ابوقاسم

15/12/2005, 02:47 PM

الموضوع طيب ولكن اللي له حاجة يبي يطلب من الاعضاء كل في منطقته يرد عليه ويوافيه بالاخبار 000000000والمفروض اللي يعرض اي خبر يخص المكان يذكر وينهو فيه ..................
وبالنسبة لي (انا رحت اخذت تاكسي ورحت لين لوحة التحكم وكلمت الموظف حق اللوحة انه يحددبالظبط وين السكن ووافق بعد المحاولة وهذا هو جاهز وانا تحت الامر) ...............
والعذر والسموحة على الاطالة.

وثاب

15/12/2005, 09:59 PM

اظن ما يحتاج ناصف لك الدار -- ماقف طويق حي هاك الديارا

شرقيها ضلع كما المزن ظهار -- وغربـيها من نايــفات الزبـارا

ابو سلامه

19/12/2005, 08:54 AM

السلام عليكم ورحمة الله وبركاته

انا عبد العزيز الراجحي
من اهل القصيم - البكيريه
من سكان مدينه الرياض
ساكن في حي الروابي
هذا جوالي للي يبي اي خدمه
0553131315
ومشكور على موضوعك يابو نايف

أبو أديب التميمي

19/12/2005, 09:50 AM

والله راي سديد الحقيقة !! وبارك الله فيك يا ابو نايف على الموضوع !!

ومكشات الحقيقة ما اعتبره إلا مجلس رجال واهل لحوات غانمة شرواكم!!

وانا منذ البداية موضح مقر الإقامة وهي ( الرياض + حوطة بني تميم )

وأنا تحت خدمة الجميع !!

تقبلوا خالص تحيات اخوكم

أبو فارس

ابو شكاع

19/12/2005, 12:43 PM

السلام عليكم
يالله انك لاتمسي هالوجيه الا بالخير
عروان
مشاركة موفقة وكله بركة
ورأيي من رأيك ...
وبالنسبة لي ...من يوم سجلت بمكشات وأنا كاتبن أسم مدينتي اللي هي الرس الله يخلين له ويخليه لي
وعلى فكرة ترى صقر ماكتب بريدة إلا عقب هالموضوع ... :D
عندي أنك ياصقر تتطردن من مكشات
بس ياخوك نخيتك ولانخيت الذيب ... خلن بذا على الأقل لمين يقضي الشتاء :D
ومشكور وماقصرت

عروان

19/12/2005, 01:36 PM

هلا بك والله يا بوشكاع

هلا بذيب الرس

أبشر بسعدك أن شاء الله ما يجيك الا كل خير من أبو أحمد "صقر".

صقر سنافي ولا يضر أحد.

مشكور على مروووووووووورك يالغالي.

أبو أديب التميمي

19/12/2005, 02:14 PM

اعذرني ياخوي عروان !! في الرد السابق نسيت انك انت اللي كاتب الموضوع !! ونسبته لأبو نايف !!

وتراك مشكور على الموضوع مرة ثانية !!

تقبل تحيات اخوك

أبو فارس

الورد

30/12/2005, 01:48 AM

السلام عليكم ورحمة الله وبركاته انا اويدك بقوه طبعا مافيها شى تحط عنوانك مهما كانت ديرتك تدل عليها باقرب منطقه حولك 0 واخوكم من الجوف وتحديدا من محافظه دومه الجندل واى سؤال عن المنطقه انا حاضر واى استفسار عن المحميات التى فى انا حاضر واى واحد يبى يخاونى نكشت برضوا انا حاضر 0 والسلام ختام

حـاتـم

30/12/2005, 04:36 AM

انا معكم فالي تبون

والي تبون انا حاظر

تبون نفتح موضوع خاص بالعناوين يلا عندي استعداد

وشكرا

اخوكم / حاتم

فنجان

15/01/2006, 09:07 PM

ماشاء الله كلكم مؤيدين الفكرة لكن ما عرفتونا على دياركم

عروان

16/01/2006, 07:58 AM

أخوي فنجان

الشباب حطو أسم مدنهم أو القرى في لوحة التحكم. تقدر تعرف مقر أقامتي في أي مشاركه لي ناظر تحت المثلت الاحمر على يسار المشاركة و بتشوف أسم المدينة.

يعني أنت اللي ما عرّف بأسم مدينته :)

أطيب تحية لك

fhad abo fofo

18/01/2006, 10:36 AM

اشكر جميع الاخوه وانا معكم في هذا الراي ليش ماتكون معرفه بيننا اخوكم محب المكاشيت 0503025241

fhad abo fofo

18/01/2006, 12:05 PM

السلام عليكم اشوف الغالبيه مؤيدين للفكرة بس ماحد عرف بنفسه الا القليل يمكن الظروف تحكم البعض المهم معكم اخوكم (محب المكاشيت ) اراسلكم من نت صديق لي (محب المكاشيت مكان العمل المدينه المنوره المقر تيماء وبراريها رقم الجوال 0503025241 )