محتار بين التاهو والاف جي

[صخب]

السلام عليكم ورحمة الله وبركاته

يااخوان انا مقبل على شراء سياره مرتفعه ماهو شرط يكون جيب وصراحه كنت افكر بالتاهو مستعمل مديل 2008 او2009 لكن دخل بالسحبه الاف جي 2010 جديد لان سعره حول التاهو مستعمل

مع العلم ان دوامي يبعد 70 كم عن سكني والبر راعي تمشي بس :D

ومتزوج حديث

افيدونا يالذيابه

[ذئب الصحراء]

حسب خبرتي المتواضعه
التاهو قوي وعائلي وحق تمشيه
واذا انت حق بران واجد وقنص لا الاف جي افضل

[رمح الطنايا]

حياك الله بالنسبه للافجي انا سيارتي اف جي 2008 الصراحه سياره
مابعدها سريعه وخفيفه على الطرق وبالبر نعومك عزالله انه سياره راعي البر
ولكن فيها عيب واحد اذا انت صاحب عايله مشكلتها الباب الخلفي
فقط انما كاستخدام سياره لايعلى عليها

التاهو سياره عائليه وفيها سعه اكبر من الاف جي والله العالم انها جيده
حسب كلام بعض الزملاء والامريكي لك عليه مايخلى من التنديه
وخرخرة الزيوت وقير التماتيك بالامريكي ماهو مثل الياباني
جربت الوانيت الجمس وقام قيره عندي مايتحمل الجور بالنفد والطرق الوعره
بعكس الاف جي
وانت شاور اهل الخبره والله يوفقك في مساعيك

[هبــ حريملاااء ـبوب]

وعليكم السلااام ورحمة الله وبركااته

والله الفرق كبير بين الاثنين ! لا من حيث الميكانيكا ولا الحجم ولا المميزات .......... ظلمت التاااهو صراحه

الاف جي يستاهل بس ما يقارن الا مع فئة سته سلندر سبور ..

برأيي تاخذ تاهو مستعمل حديث ولو بغيت تبيع ما تخسر كثير ..

استخر اولا .. الله يوفقنا وايااك

[عبدالله614]

مايبي له سؤال اف جي لان عايلتك صغيرة الامر الاخر اقوى وامتن وعملي حتى النخاع
وفيه متعة قيادة غير عادية وانا عندي واحد ومكيف عليه

[abu fares]

التاهو في نظري أفضل بكثير

[أطلال نجد]

وعليكم السلام ورحمة الله وبركاته

الأف جي وأنت مطمئن

يكفي بس أنك أول واحد يدق سلفه

وبما أنك حديث زواج وتوك شباب لا تستعجل على التاهو، لأنها سيارة عائلية وكبيرة عليكم إلا إذا كنت محتاجها بالفعل .

موفق للخير

[صيادالجبيل]

مايبي له سؤال اف جي لان عايلتك صغيرة الامر الاخر اقوى وامتن وعملي حتى النخاع


وفيه متعة قيادة غير عادية وانا عندي واحد ومكيف عليه

مايبي لها رأي التويوتا معروف انة افضل من الامريكي خذلك اف جي وماتتحسف بأذن الله خذ نصيحتي ولاتفكر تأخذ تاهو الااذا كان عندك عايلة كبيرة ومحتاج سيارة كبيرة انتم اثنين وحتى لو اثنين وعيالهم ثلاثة يصلح لهم الاف جي والله يوفقنا وياك واستخر الله اولا قبل الشراء

[تناساني]

لا مجال للمقارنه
فـ التاهو أمريكي وبيغثك بكثره الصيانه
و انصحك تدخل صيانة الجميح و تشوف بعينك كله تاهو و يوكن
انا دخلت كنت اسوي صيانة للكابريس و انهبلت كله تاهو و يوكن


لكن الـ إف جي يكفيك انه تويوتا ع الأقل مايطلب صيانة
و لافيه اي مشاكل

و الخيـار لك

الله يرزقك بالسياره الي تناسبك

[اليامي 911]

الاف جي سيارة ممتازة بس ما فية زي التاهو سيارة لا يعلا عليها مريح,قوي و عزم ثمانية سلندر وبعدين انت صح متزوج بس وين تروح تشتري اف جي راح يجي زحمة مع الاولاد بأختصار تاهو و بسسسسسسسسسسس

[صخب]

يعطيكم العافيه يالربع

لكن السؤال اللي يطرح نفسه لاصحاب الاف جي هل هو مريح وخاصه اني اقطع يوميا مايقارب 140 كم؟؟

[خضر الماء]

تاهو ما يحتاج سؤال وش تبي بصندوق مزبرق ؟!
ما يصلح اف جي الا مشاوير خفافي ......... بصراحه ممل ومستوى الرؤيه تعبان كنك تطل مع طاقه
مكينه وقير ممتاز لكن وضعه صعب ولو انك تو متزوج ما يصلح التاهو رزه واهيب والخراب كل المواتر تخرب