باترول قير تماتيك او عادي افضل لو سمحتوا

[محب الشمال]

اخواني اعضاء مكشات حفظهم الله

السلام عليكم ورحمة الله وبركاته

امس مريت شركة الحمراني في شارع الاحساء بالرياض وسألت عن الباترول
لقيت تقريبأً ثلاث انواع وهي
فل كامل تماتيك فقط بـ 155000 ريال
اقل من الفل بدرجه بـ 135000 ريال
ولقيت عادي وليس فل وقير عادي بـ 117000 ريال بعد الخصم بمناسبة رمضان
واحترت صراحه ما فيه شك ان الفل كامل احلى بس انه لا يوجد غير قير تماتيك وكذلك الدرجة الثانية قير تماتيك
فابي فزعتكم ومشورتكم وش اطلع قير تماتيك او قير عادي بغض النظر عن الكماليات والاضافات في الفل كامل الجوده اهم من الشكل مع العلم ان الفرق بس من داخل اكثر شي
مع العلم اني ابي القير والنوع الي يتحمل كرف وطعوس وبر ومقناص يعني يكون شامل


والله يحفظكم ويرعاكم

[Waleed1]

السلام عليكم

أبد الامر بسيط، أحسبها صح فى السنة كاملة كم نسبة أستخدامك للسيارة خارج الطريق، أذا أنت راعى بر على طول خذ العادى، وأذا بس وقت الربيع ترى أتماتيك كفاية. بس أذا فيك شدة على التعشيق أبد خذ أبو 117 ترى 155 واللة مبلغ موب سهل نعم أرخص من أقل سيارة كروزر موصفات لاكن الكورة فى مرماك وأستخير اللة قبل كل شئ واللة يوفق الجميع

[ابو؟؟؟]

السلام عليكم ورحمة الله وبركاته......

انا عند اثنين من اخوياي عندهم سفاري 2005 واحد قير عادي والثاني توماتيك
الزبدة انا راعي القير التوماتيك يقوم علي العادي
والتماتيك يريح اكثر من العادي يعني علي 200التماتك يكون ال ر ب م علي 4 والعادي يكون علي 4.8

وشكرا....

[طخيمان]

أنصحك خذ سفاري ون (1).

[عاشق المزون]

والله ياخوك انا جربت العادي والتماتيك وراعي بر على طول التماتيك فلة لا تصدق ترتاح من شي اسمة تغير واكثر طلعاتي الى النفد بس مشكلة التماتيك اذا غرز يبغاء سواق علشان يطلعة والحمد لله تعنيت اعرز كذا مرة والموتر يصلع بدون دف بس تنسيم كفرات ومرجحة الموتر بالl2 والدبل الثقيل ويطلع زي الحلاوة يعني تماتيك وبس راح عمري مع العادي

[طحنون]

السلام عليكم ورحمة الله وبركاته
اخوي محب البر الف مبروك اولا
ونا اخوك
اتكل على الله وخذ سفاري رقم 2

قير تربونيك تماتيك وعادي
ون كان على الطعوس لاتخاف حول القير على العادي وعشق القيربـ2والدبل الخفيف وعلى حسب احتياجك في التبديل من النمره 1 او2 كلها مجردلمس
والقيرالتماتيك تسارعه سريع جدا
وملاحظه
لاتشتري السياره من الوكاله
اشترها من المعارض وعليها لوحه تفرق بالسعرالكثير
واي استفسار انا حاضر
لاني عندي 2005 سفاري رقم2 له عندي 6 شهور وماشي زي الحلاوه
ولو تنتظر2006 احسن فرق الموديل يكون افضل
الله يوفقك
................
طحنون

[البوصله]

انصحك يامحب الشمال بالعايدي

[محب الشمال]

مشكور يا اخوان على الردود الطيبه والله اني محتار في النوع
الاخ وليد صحيح اني ما اطلع طول السنة للبر بس الطعلة هي الطلعة لو يوم واحد يعني تحتاج الي في السيارة كانك طول السنه اقصد نفس الشي يوم ولا سنه مع الشكر والتقدير
الاخ ابو ؟؟؟ سؤال يطرح نفسة ليش الرام للعادي ضغطة اكثر ولك الشكر والتقدير
الاخ ابو الطواري سفاري ون هو العادي او التماتيك حسب علمي سفاري ون فل كامل مع الشكر والتقدير
الاخ عاشق المزون يعني على كذا اطع فل كامل مع العلم ان اخوك شوي غشيم بالعطوس مع الشكر والتقدير
الاخ طحنون اولاً اسمي محب الشمال اخوك بندر من الرياض وانت تقصد ان الباترول يجي قير عادي وتماتيك واذا يجي نوعين من القير هل هي عملية ولا بس دعاية وحركة من الشركة اخاف انه يصير شغل القير مشي حالك ثم اتورط فيه لا سمح الله مع الشكر والتقدير
وبالنسبة للموديل انا فعلاً اقصد 2006
الاخ البوصلة نصيحتك طيبه وانت والاخوان

اكرر شكري لك قام بمساعدتي بالرد وجيمع اعضاء مكشات

اخوكم محب الشمــــال

[محمد العتيبي]

مافية شي اسمة قير تماتيك وعادي انا عندي باترول موديل 2005 تماتيك يجيك بعد الدي سالب وموجب ولا تقدر تعشق وانت تمشي همخ حاطينها شكل مثلها مثل السيارات التماتيك الصغار لا كن شكل التعشيق غير فقط لاغير
وهاذا شكل القير

P

R

N
=== سالب (-)
D

=== موجب (+)

[طخيمان]

السفاري ون (1) يا محب الشمال يجي مخمل ، كل شيء فيه كهرب (درايش ،مرايات ، أقفال أبواب ... إلخ ) ويجي جنوط الفل كامل وقير عادي .
ويجي بعده سفاري 2 وعلى ما أظن بعده السوبر سفاري .

[الأعصـــــار]

شوف حبيبي هذا يعتمد على ميولك وعلى الزحمه أذا أنت هاوي عادي خذ عادي
بس نصيحتي لك تماتيك أشوفه مناسب وخصوصا أذا عرفت له يصير النيسان
معك زي الحلاوه ولاتنسى كفرات شاهين وأدعي لي ومبروك عليك
السياره الي بتطلعها مقدما ........

[بو خليفه]

جير أوتوماتيك أفضل

[طحنون]

معليش غلطنا في الاسم يامحب الشمال
اخوي محمدالعتيبي
اذا موترك 2005 سفاري
اتمنى انك تراجع كتيب السياره
دليل المالك......
ويتتأكد بنفسك
ان القير يعمل بنضامين التعشيق الوتوماتيكي....واليدوي في تبديل النمر



واذا بالك طويل اقرى الكتيب بتمعن تستفيد اكثر
وانا ارشح القيرالاتماتيك

[sony2000]

محب الشمال توكل على الله وخذ تماتيك
وترا مكينته فتك 4800 مشاء الله قويه بالحيل يعني الموتر يزبنك بالنفود
والعادي الحين قليل الي يبونه والدليل شف معارض السيارات بالنادر تلقى عادي


محمد العتيبي
من يقول القير ما يعشق والسياره تمشي ؟؟
انا شايفه راعيه يعشق وما كنه يسوق الا عادي
يمكنك ما عرفت طريقته

[محب الشمال]

الله يجزاكم خير ويبارك فيكم
اخوي محمد العتيبي انا كان معي باترول موديل 97 عادي زي اللوز كان معي وسمعت انه فيه باترول يجي عادي وتماتيك
بس الموظف في المعرض ما قال لي هذا الكلام قالي الاوصاف الي كتبتها فوق
يعني قال لي فيه تماتيك رقم واحد واثنين وعادي فقط نوعية وحده ما يجي فل كامل فلا تلومني ماني خبير
مع انه في اعتقادي لما يجي قيرين مع بعض انها غير عملية والله اعلم قد اكون غلطان لاني ماني خبير زي ما قلت لك
ابو الطواري بيض الله وجهك
الاعصار الله يعطيك العافية وبالنبسه لهوايتي العادي وذلك لان
مثلاً مره في مكشات يتكلمون الشباب عن القير العادي مثلاً
1/ لما تغرز لا سمح الله ممكن انك ترقص الموتر ورا وقدام وتبرح له ويرجع لما تفضي القير مع الطريق الي برحته لين ما يطلع وهذي صعبة بالقير التماتيك
2/ لا سمح الله تخلص البطارية ولا فيه شاحن او الشاحن ما اشتغل يمكن انك تنتعها اذا معكم سياره ثانية او ناس يدفون السيارة
ونصحيتك طيبه الله يجزاك خير ويوفقك
بس اني غشيم بالنت ولا عرفت اطلع الموضوع القديم عن القير فقلت اعضاء مكشات ما يقصرون هذا من طيبهم
بو خليفة شكراً لك ولمرورك
طحنون شكراً لمرورك وشكراً على ترشيحك الطيب,, وعادي ما صار شي ترانا نحب البر ونحب الشمال ونحب الطيبين شرواك
الاخ سوني 2000 شكراً لمرورك وهل افهم من كلامك انه العادي ما يجي ماكينة الفتك 4800 سي سي

عل كذا اطلع فل كامل ان شاء الله ما دام الدعوه تماتيك في تماتيك واستفيد من المميزات الثانيه من فتحة وجلد وغيرهن

اكرر شكري لك من شارك معي في النصحية وجزاكم الله خير ولا اراكم مكروه ولا تنسون اخوكم من صالح دعاكم
والله يحفظكم

اخوكم محب الشمال

[محمد العتيبي]

السلام عليكم ورحمة الله وبركاته

الموتر للبيع يامحب الشمال ماشي 13000

[ابومناحي]

نصيحتي لك يامحب الشمال
تاخذ اتماتيك وانسي العايدي الا اذا انت رايح جاي من الربع الخالى للدهنا
واتذكر حادثه حصلت معنا في ام دباب واحد من الشباب الله يهديه معه باترول 2001 قير عايدي احترق الدزق والكلتش بالنفود وسحبنا الموتر يوم كامل عشان نطلعه من 3 نقر الوحده طولها عن عشرين دور وسلملي على الشاص الي سحبه انشهد انه موتر
المهم الباترول فيه عيب ان الدزق والكلتش خفيف جدا وسريع الاحتراق خاصه مع الناس الي ماتعرفله
هذا مجرد راي والاختيار لك
والسلام ختام

[أبو شماس]

لا شك ان قير التماتيك أفضل في الخطوط لصرفيته القليلة مقارنة بالعادي واكثر راحة في القيادة وهناك طريقة للتجاوز في الخطوط غير السريعة وهي تحويل القير للوضع اليدوي حسب سرعة السيارة أما للوضع 3 أو 4
و افضل وضعية للطعوس وضعه في الدبل الثقيل وتحويله للوضع اليدوي 2 0
والقير العادي مع الاستعمال الطويل يخرج فيه عيب في الترس الخامس تقريبا عند مسافة 000 250كم 0 والقير التماتيك لم يخرج فيه شيء ولله الحمد 0 ودمتم سالمين 0

[محب الشمال]

ابو مناحي ومحمد وابو شماس
دمتم سالمين وشكراً لمروركم وعلى توجيهكم الطيب
بس سؤال يطرح نفسه هل القير اذا يجي عادي وتماتيك عملي او انه دعاية فقط