خطوات ساعدتني على ترك السرعة الجنونية ..

[ملقاط بن جمر]

بسم الله الرحمن الرحيم ..


الحمد لله .. والصلاة والسلام علي رسول الله ..


همسة للمشرفين .. حسيت إن هالقسم انسب شيء للموضوع .. وإذا كنت غلطان .. العذر والسموحة ..


..


في البداية بحاول أتكلم باختصار :


كنت في الماضي مجنون سرعة بشكل لا يصدق .. بالعربي أي مشوار أروحه ما أرتاح حتى أسوي حفلة في الطبلون !! وخاصة بعد ما تعينت وصرت أمسك طريق الدمام الصباح ولا فيه زحمة وهاتك يا فلة ..
بحمد لله ومنته كانت الأمور تمر علي بسلام .. ولا كنت أفكر في شيء .. ياما شفنا حوادث .. الله يكفينا شرها ولا أتعضنا .. و لسان حال الواحد يقول : أنا ملك الطارة وبعرف أتصرف وقت اللزوم ؟؟


فجأة حسيت أني مريض محتاج للعلاج .. والله يا إخوان إني وقتها حسيت إني مدمن للسرعة ولا أستيطع تركها أبدا ..
بعد توفيق الله لي ..كان فيه خطوات ساعدتني على ترك السرعة بحاول أذكرها هنا عسى ان ينتفع بها غيري ..لأن المسألة يبي لها جهاد وصبر وتحدي للنفس ..


1 / الوالد الله يطول في عمره كان دايم ينصحني لأنه يعرف أني أسرع .. ويقول لي ياولدي لا تسرع تكفى وأنا أبوك لا تروح في الحديد .. لا تحرق قلب آك العجوز عليك .. وكنت ما أعيره أي إهتمام .. لين يوم من الأيام تخيلت نفسي ميت وإلا مكسر ووش بتسوي الوالدة و وش بيكون حالها ؟؟


أخي الكريم .. إذا بتسرع تذكر ترى فيه شايب وإلا عجوز تترجاك ويشوفونك نور عيونهم .. تكفى لا تكون سبب لطيحة دمعة من عيونهم ..


2 / في البداية كنت إذا رحت مشوار أعاهد نفسي ما أسرع أمشي 100 و لا أدري إلا أنا عند 180 وإلا زيادة ؟؟
لأني متعود على دعسة معينة !!
جربت مثبت السرعة لكن ماجاز لي << حتى في السفر ما أحطه أحس أني ما اسوق ..
صرت أحط لي تنبيه على الطبلون .. مرة ورقة مكتوب فيها لا تسرع .. مرة صورة حادث أليم بسبب السرعة ..
يوم أشوفه وأنا مسرع أقول الحمد لله الذي عافانا مما ابتلى به غيرنا .. والحمد لله ساهمت في ضبط السرعة عندي ..


3 / استشعرت إن في ترك السرعة طاعة لله .. لأن فيها طاعة لولي الأمر لأنه محدد سرعة معينة ومناسبة للطريق ..


4 / فكرت لو لا قدر الله صار حادث وأنا أمشي بسرعة هل هذا يعد إنتحار ؟؟
الله سبحان يقول : وَلاَ تُلْقُواْ بِأَيْدِيكُمْ إِلَى التَّهْلُكَةِ .. وأي تهلكة أكثر من السير بسرعة 180 أول 200 ؟؟


5 / صرت أي مشوار أطلع له أحرص أني أبكر شوي حتى يكون عندي وقت كافي ولا اضغط على نفسي لو صار ولقيت زحمة في الطريق ..


والحين الحمد لله .. صرت ما أسرع لو صار ما صار ..
رجلي على الدعسة صارت مضبوطة .. حتى وقت السفر أوصل 140 وألقى نفسي عند 100 و أرجع أزيد السرعة ..


في الختام .. تأكد إنك لو تاصل متاخر دقيقية أو دقيقتين أحسن من إنك تاصل في سيارة الإسعاف أو شرشورة الموتى ..


حفظكم الله من كل مكروه ..
لا تنسوني من دعواتكم ..

[خوي نشامى]

جزاك الله خير
واصلح الله حالنا وحال المسلمين
السرعه دائما مافيها خير وياما شفنا ولا اتعضنا على قولك
وشكرا على هالموضوع المفيد
وثبتنا الله واياكم على طاعته

[ريثان القصيم]

بسم الله الرحمن الرحيم ..

صرت أحط لي تنبيه على الطبلون .. مرة ورقة مكتوب فيها لا تسرع .. مرة صورة حادث أليم بسبب السرعة ..

وازيدك زيارة قسم الحوادث بالمستشفيات لترى اخي القارىء المصابين نسأل الله السلامه

وفيه جهاز كان يركب لسيارات الليموزين يحدد السرعه عند 125كم





حفظكم الله من كل مكروه ..
لا تنسوني من دعواتكم ..


ريثان القصيم

[وادي غران]

بارك الله فيك أخي على الموضوع الطيب.
أغلب الحوادث إن لم تكن جميعها مردها إلى السرعة والتهور.
حفظك الله ورعاك ومن كل سوء حماك وجميع شباب المسلمين.

[قناص خلاوي]

بيض الله وجهك
هذا كلام العقل اللي مابعده
الله يتمم عليك ويثبتنا واياك ومن يقرا

[ولد النعيرية]

والله اني مثلك اول بس مسرع والله اني اروح وارجع 180والا 200 حتى ان بعض العيال مايروحون معي يخافون ..... وبيوم من الايام وانا مداوم للخرج واجهت حادث تريله صادم والسواق مقطوع راسه
واللحين والله اني اذا سافرت يم النعيرية والا القصيم او لأي مكان والله ان ممشاي 110الى 100
تبت ياناس من السرعة وتكفون تكفون قبل كل شي

[ابن عيّاف]

الله يهدينا و إيااك يا اخوي

كلامك مرة جميل و حلو ,,, و كلام سليم بعد

وأزيد خطووة زياادة ,, أي رجال متزوج يحط صورة زوجته و عياله

((( حتى لو كانت زوجته متنقبه )))

أو على الاقل صورة أبو و امه

بالتوفيق للجميع وما قصرت اخوي على كلامك

[اابوسعد2]

الله يعطيك العافية على الموضوع
السرعة ماتعرف ملك الطارة ولا ما ملك الطارة
الله يستر على شباب المسلمين

[القناص]

جزاك الله خير
كلام طيب
من رجل يحب الخير لنفسه وللناس

[ماجد105]

جزاك الله خير اخوي ماقصرت وبيض الله وجهك

[MUZAH100]

والله يحفظك و يحفظ جميع المسلمين من الحوادث

[A U R M A N]

جزاك الله خيراً

[زوم]

جزاك الله خير
كلام طيب

[مخاوي العشه]

الحمد لله والشكر

أنا دايم أمشي 100 120 وبالكثير 140
وحصلتلي يمكن 4 مرات وصلت فوق ال 180 ونا على أعصابي
ورابط حزام الامان

لكن الحمد لله أني مني متعود على السرعه

والله يجزاك خير ياصاحب الموضوع

[1-أبوماجد]

السلام عليكم ورحمة الله وبركاته
مساءالخير-
الله يكون بلعون بنسبه لي لاصق مخالفتين امامي
بتوفيق

[أبوجهاد التبوكي]

جزاك الله خير

[غاوي قهاوي]

الله يثبتك ههه,,

[الثويرات]

بيض الله وجهك على الارشادات الوافيه والنصيحه لاخوانك.

لاكن وش يمنع ان الشخص يفتح المصحف ويحلف يمين انه مايسرع الا لضروه فقط.

[ملقاط بن جمر]

بارك الله فيكم إخواني على مروركم ومشاركتكم في الموضوع ..


ويعلم الله إني ما كتبته إلا محبة في الجميع وخوفا وحرصا على الجميع ..


وتحذير من السرعة اللي يتمت أطفال ورملت نساء .. وفقدنا بسببها الكثير من الأصدقاء والإخوان ..


اسأل الله أن يحميكم من كل مكروه ..

[رفيع المقام]

الله يعافيك اخوي

على هذي التجارب والنصايح المفيدة.
اللي تكتب بماء الذهب.

[مدري علامي]

جزاك الله خير

وكلامك عين العقل وما يجي الا من رجال طيب

الله يوفق الجميع

[كاشت وحداني]

فعلا انها مرض السرعه
ونحاول نتخلص منها بقدر المستطاع
وخطواتك فعلا جيده وتساعد وساهر برضه بيساهم في الموضوع لكن عالجته بكاشف رادار
والله احيان على سرعه 240 اني ادعس الكلتش واطلع القير من الخامس ابي ادور له زود وارده في الخامس اعوذ بالله واحس ان السياره ما تمشي

[ساهر1911]

الله يجزاك خير ويكفينا شر الحوادث ،، المشكله اغلب الناس تتجنب السرعة في المناطق المراقبة بالرادار ونظام ساهر ،، يعني المخالفة تعلمنا النظام واداب القيادة ، بس هذا ما يكفي .. واعتقد ان السبب التوجيه من الصغر واحترام الطريق واعطاء الطريق حقه تساعد على النشئه السليمه فمن شب على شي شاب عليه

[ملقاط بن جمر]

بارك الله فيكم إخواني على مروركم ومشاركتكم في الموضوع ..

[جبرني وقتي]

الله يجزاك خير ويكفينا شر الحوادث

[سليمان VIP]

جزاك الله خير على النصائح
والافضل لمن لا يستطيع تخفيف السرعة وضع صوره حادث على الطبلون ليتذكر حالهم

[رسمال]

بارك الله بك ولك وعليك وحواليك
والله ان موضوعك في الصميم فلا حول ولا قوة إلا بالله ... لا يوجد إنسان تقريبا في منطقة الخليج بالذات إلا وقد فقد عزيزا... أبا واخا أو اختا أو ام ..أوإنه يعاني من تبعات الحوادث من اصابات واعاقات فاللهم احسن خاتمتنا والطف بذرياتنا واحسن مصارعنا ولا تجعلنا ضحايا بسبب الموتورين ولمن لا يبالون بأرواحهم وأرواح الآخرين

السرعة والتهور .. حرام وإثم كبير لأن فيها إعتداء على كل من يسير بالطريق إعتداء على أمن الناس وسلامتهم فالمسرع لا يجني على نفسة ويخرب سيارته فقط بل إن الناس الأبرياء في كثير من الحالات هم أول ضحايا سرعته وتهوره

[sgl2002]

والله أني كنت أسرع ،، لكن بعدين عرفت أنه مايخرب السيارة ويخليك على أعصابك إلا السرعه ..

الحين إذا سافرت ماتعدى 140 هذا وانا لحالي

[sgl2002]

فعلا انها مرض السرعه
ونحاول نتخلص منها بقدر المستطاع
وخطواتك فعلا جيده وتساعد وساهر برضه بيساهم في الموضوع لكن عالجته بكاشف رادار
والله احيان على سرعه 240 اني ادعس الكلتش واطلع القير من الخامس ابي ادور له زود وارده في الخامس اعوذ بالله واحس ان السياره ما تمشي



أنت زاحف .... ;) مانقدر نسوي زيك ؟

[zr-1]

الله يهدينا وياكم وكفينا شر الحوادث

[شمالات نجد]

الله يجزاك خير

فعلاً السرعة إدمان ومرض يجب التخلص منها ومعالجة صاحبها

سلام

[محب الشبه]

جزاك الله خير

[رسيس نجد]

جزاك الله خير على النصيحه 0 السرعه ما فيها خير 0

[أطلال نجد]

جزاك الله خير على هذا التنبيه .

والسرعة لو فيها خير ما تركناها

تحياتي

[عمر 911]

فعلا ً نقاط مهمه جدا ً وتساعد في معالجه إدمان السرعه !

نصيحتي حاول تتمرن إنك ماتتجاوز إجلس مثلا بالمسار الأوسط ولو قدامك واحد يمشي 100 عادي حتى ولو وقف السيارة إلا لحالات طارئة يعني وقف السير فيه حادث مثلا لكن وقف السير لشدة الزحام فإلزم مسارك (وبعد وقت راح تتعود وتشعر إن القيادة راحه وإسترخاء)

أتمنى أشوف تطبيق لضع مسافه 50 متر بينك وبين اللي أمامك ماحصلتها للأسف :(
صراحه الواحد يلبق ورا اللي قدامه وإذا شاف اللي قدامه مشى 99 كيلو راح وتجاوزه !
معقوله كيلو واحد تخليك تتجاوز الناس وتكبيس وسالفه :(

لاحول ولاقوة إلا بالله

[عاشق الحيسية]

جزاك الله خير

موضوع بالفعل مهم


الله يكفينا شر هالسيارات

[مطيعيس]

جزاك الله خير
كلام طيب
من رجل يحب الخير لنفسه وللناس

[ملقاط بن جمر]

بارك الله فيكم إخواني على مروركم ومشاركتكم في الموضوع ..

[ملك الفكتوريا]

عاد والله أنا جربت


حادث والاضرار الجسدية الالام في اليدين والركبه وكدمات بالراس والجسم


والوالده سوت حفله أجل كيف لو صار ليي شئ لا سمح الله



توبه من السرعه

[ساحووق]

الله يكفينااااا الشرررر

لاهنت يالغااااالي

[_TOYOTA_]

خذ لك سياره ديزل بدون تيربو راح تترك السرعه غصب عنك

[أبوزيد20006]

جزاك الله الف خير اخوي

[بداية رحال]

بعد ما جا نظام ساهر أنسى السرعة


ضربتين في الراس توجع , اكلت قسيمتين سرعة من ساهر بــ 1000 ريال خلتني ياشيخ امشي 90 حتى لو السرعة المحددة 180 ههههههههه
بس موضوع جميل تشكر فيه على النصيحة

[رسلان الوايلي]

الله يعطيك العافيه
لتسرعون يربع تركم غالين عند اهلكم

[Hwer]

الحمدلله اتعضت من حادث صار امامي قبل سنتين وبعدها تغيرت حالى 180 درجه الحادث كان بوسط الرياض بشارع خالد بن الوليد شاب متهور معه اكسنت وسيارة عائليه كيا فان جميع من بالسيارة العائليه ماتو الا رضيع وسائق اندنوسي وهم زوجه وثلاثه من ابنائها
اثنين من الابناء انا بنفسي شلتهم لمستشفي ابانمي ووالدتهم شالها واحد ثاني لاكن للاسف جميعهم فارقو الحياة وبعد رجوعي لموقع الحادث رأيت ابوهم الملكوم في حاله يرثا لها وهذي كانت صدمه غيرت من حياتي في قيادة السيارة وفعلا السيارة سلاح ذو حدين اما ان تتقن التعامل معها والا تكون لحم مفروم بين الحديد

[ذئب اليل]

كلامك صحيح ونا مثلك ونشا الله ابي اتبع الخطوات الي ذكرتة والله يصلح الجميع

[Abo gssar]

الله يجزاك خير ويعطيك العافية

[أبو هشام راشد]

الحمد لله عقلت لما غيرت السيارة وحبيت الدنيا :)

لا تنس خلفك من ينتظر رجوعك

[البصراوي1]

اه من السرعه كم افتقنا بسببها من غالي

[لهذام]

لله درك على هذه الكلمات الصادقة ، وجميع الإخوة المشاركين بالردود
مثل هذه المواضيع تساهم في الوعي عند الناس وتستحق النشر
شكرا لكم
وحفظنا الله وإياكم

[FAPioO]

انا كان معي سوناتا 2011 وكنت 200 ذي ما انزل عنها بالخطوط
وجوا الديره تلحيم وتخييط وتدعيس
وقبل حول الشهر شريت لي فتك جيب ومدري وش جاني ههههههه صرت كني شايب يالله امشي ولا ودي ادعس وبالخط اثبت على 160

فعشان كذا انا عندي قناعه ان السياره تلعب دور في السرعه

[حبيتر]

مره جربت امشي مسافه 70كلم بسرعه 140 الوقت المقوع طلع 34 دقيقه ومره ثانيه مشيت نفس المسافه بسرعه 160 وطلع الوقت الي قطعت فيه المسافه 31 دقيقه الفرق بس 3 دقايق وبعدها ماعمري مشيت 160 ممشاي على 140 فقط

[aboabdullah96]

مره جربت امشي مسافه 70كلم بسرعه 140 الوقت المقوع طلع 34 دقيقه ومره ثانيه مشيت نفس المسافه بسرعه 160 وطلع الوقت الي قطعت فيه المسافه 31 دقيقه الفرق بس 3 دقايق وبعدها ماعمري مشيت 160 ممشاي على 140 فقط




مشاءالله عليك يعجبني اللي يحسبها صح ويفكر بتعمق وقناعه اكبر

[aboabdullah96]

شكرا على الطرح


بالنسبه لي في خطوط السفر سواقتي عاديه ممكن اسرع لحظات بس ارجع اسوق طبيعي
مشكلتي في الرياض اللي يشوفني يقول هذا سيارته ملغمه على الطبلون لو هداء راح تنفجر
ابسط المشاورير لازم سرعه وتخيط ومناورات اشياء كل ما اتذكرها اقول كيف كنت اسويها

صحيح سيارتي تفصل بس كنت اجاكر بشكل مميت اهم شي ما يتعداني
لدرجه فكرت اروح لطبيب نفساني تعبت خصوصا بعد ما اوصل مشواري ابداء اعاتب نفسي

التغييرات الحمدلله كبيره
اولا انسرف مسجلي وركبت مسجل بس ما اخليه في السياره انزله كل ما نزلت مع الوقت طفشت وصرت ما اخذه وفرقت معي لان الاغاني تهيج ( لم تحرم عبث )

كذا مره اشوف سيارات فيها اطفال يلعبون خصوصا في الخلف في السيارات الكبيره الجموس وغيرها وبعض الاطفال يعلب علي ويضحك
اول ما اشوف هالموقف تسود الدنياء بوجهي واتخيل لو كنت اخيط بين السيارات وفجئه لقطت موتر وفيه اطفال وصابهم شي
ماني قايل وفاه ابقول فرضا اعاقه دائمه وش استفيد وقتها
لو خيرت بين اتسبب على شخص او مليون وسياره وزوجه واشياء كثيره وجوال نوكيا ههههههه قديم
طبيعي ما راح اختار الضرر على غيري وابتنازل عن كل شي
الان هذا تفكير لكن وقت الجد مافيه خيارات اذا وقع الضرر مافيه تراجع ولافيه شي يعوض
والقهر ليش وش الدافع مافي اي دافع ولا فائده

هذا السبب الثاني اللي ركدني

السبب الثالث مره وقت عج وانصدمت من الخلف طبعا ما ادري مين اللي صدمني ولا استوعبت شي الا والسياره فوق الرصيف وانا في المرتبه الخلفيه مع اني ما كانت مسرع امشي بحدود 80 لكن بما ان وزني 75 والسياره ارتطمت في نخله يعني توقف مفاجئي صار وزني وزن الريشه وزين اني طويل ومرجع المرتبه ولا كان افخاذي تعورت كثير من الدركسون بس الحمدلله مجرد رضوض الشاهد مع ادنى انحراف للسياراه المخ ينشغل في التفكير كيف يسيطر على الجسم و راح ننسى موضوع السياره ووين متجهه
وقتها ايقنت ان حزام الامان اهم جزء في السياره لان لو الجسم ثابت وقت الخطر لا سمح الله راح يكون في مجال للشخص التفكير بالسياره وكيفيه السيطره عليها

سابقا اذا صار اللي واري يكبس بالنور اسرع وابداء اجاكر
الان انا نظامي امشي سرعه الدائري 120 ولا راح اخالف لعيون اي شخص لاني لو ابطلع للمسار الوسطي كل ما كبس لي احد لان كذا بيكون مشواري متعب ومطول وبنفس الوقت ماراح اسرع ويمكن اخذ مخالفه عشان المتهور اللي وراي يوقف تكبيس

النظام المتبع ما افتح الا اذا حسيت فعلا ان فيه حاله طارئه فلاشرات وكذا



الاكيد الان لو اتهور واشطف او اخيط تجيني ام الركب صرت خواف مات القلب ههههههه
والسرعه نادر اسرع واذا اسرعت يكون الطريق فاضي وبمسار واحد عكس سابقا من اقصى اليمين الى اقصى اليسار



اسف على الاطاله لكن موضوعك على الجرح :D

[ناصح]

اشكرك على هذه النصيحة المفيدة


والتي قد تنقذ بها كم شاب واسره


وتكون سببا لدخول الجنة


وأنا معك قلبا وقالبا


فالسرعة هي السبب الأول في الحوادث
يليها الرعانه والتهور في القيادة مثل :
التجاوز الخاطيء وقطع الاشارة وعكس السير والدخول بشكل مخالف مع المخارج ...إلخ



عموما أنا أشاهد يوميا ضحايا الحوادث من مكسورين ومبتوري الاطراف والمشلولين


سلسلة قصص من عيادتي يرويها لكم محبكم ~ ناصح (http://www.mekshat.com/vb/showthread.php?t=439545)

[عريدان]

مره جربت امشي مسافه 70كلم بسرعه 140 الوقت المقوع طلع 34 دقيقه ومره ثانيه مشيت نفس المسافه بسرعه 160 وطلع الوقت الي قطعت فيه المسافه 31 دقيقه الفرق بس 3 دقايق ,وربما تفرق العمر يطير منك

[بوسدن]

نصيحة اقدمها لي و لكل ...الاستماع للأشرطة الدينية والدروس الاسلامية تؤدي بإذن الله الي القيادة المتأنية وذلك لانك تنسجم معها وتحاول تفهم وبالتالي تترك السرعة ...وأحذر من الاستماع للأغاني لأنها تحمس الشخص على السرعة ووالقيادة باستهتار..
واسأل الله لنا الهداية وأن يحفظنا ويحفظ الناس منا

[معنى الحياة]

لا بأس بالمشاركة للمنفعة خاصة أن الموضوع متجدد
اذكر قولة احد كبار السن وكان يصحبني في السيارة (لا تسرع ترانا عجلين يصير صدم او يستوقفك المرور او تتعطل السيارة تحتر او تبنشر او تاكل حفرة )
نرفق ونوصل بسلامة لو تأخرنا ازين من سرعة مع احتمال ما يكدر
قوله صلى الله عليه وسلم في الحديث الصحيح :×
" إن الله رفيق يحب الرفق , وإن الله يعطي على الرفق مالا يعطي على العنف "×
•×( إن الله يحب الرفق في الأمر كله )×
رواه البخاري 6395
•×( من يحرم الرفق يحرم الخير كله )×
صحيح الجامع 6606
•×( إن الرفق لا يكون في شيء إلا زانه . ولا ينزع من شيء إلا شانه )×
رواه مسلم 2594
وسلامتكم

[معنى الحياة]

.............................

[البواردي2009]

جزاك الله خير
وحفظ الله شبابنا لديهم تهور عجيب