فزعتكم يا أهل اليوكنات والتاهوات الدبل؟!! نكفووووون

[الناصح الثاني]

بسم الله الرحمن الرحيم


ومساكم الله بالخير


السالفة ياحبايبي اني شريت لي تاهو 2005 دبل


وبصراحة ما أعرف أستخدم الدبل


والمطلوب منكم يالنشامى:


أنكم تشرحون لي طريقة استخدام الدبل؟


وكيف أعرف الخفيف من الثقيل؟

والـ Auto 4wd كيف استخدامه؟


وهل لازم استخدمه على وضعية الـN ولاوهو يمشي عادي؟


وهل لها سرعه معينة؟


وابغى منكم نصايح لاستخدامه بشكل صحيح.


والله يسعدكم ويحفظكم


وهذي صورة الدبل

http://www.mekshat.com/pix/upload04/images199/mk167860_img0200.jpg

[ريان2002]

مساك الله بالنور والسرور
أولاً الله يعطيك خيره ويكفيك شره
ثانياً أبشرحلك طريقة إستخدام الدبل من خلال الصورة اللي وضعتها وحأبدأ معاك من أعلى زر
الزر الأول / يكون الدبل في حالة تأهب أي يشبك ويفصل وقت إحساسه بالحاجة للدبل من عدمها وأنا أفضل إنك ماتستخدمه علشان تكون إنت اللي تتحكم في الدبل وليس السيارة
الزر الثاني / يفترض أن تكون لمبته شغالة في حالة قيادة السيارة بشكل طبيعي وبدون دبل وهي تدل على أن الدبل مفصول والدفرنس الخلفي هو اللي شغال فقط
الزر الثالث / وهو مايسمى بالدبل الخفيف ومن الممكن أن تشبكه وإنت ماشي وماتتعدى سرعة 80 على كلام البعض وأنا أرى أن تتوقف وليس ضروري أن تكون السيارة في ال N قبل أن تشبكه للحفاظ على الدبل على المدى البعيد
الزر الرابع / وهو مايسمى بالدبل الثقيل ويستخدم فقط في حالة الضرورة القصوى مثل التغريز الصعب لأن بعض التغاريز يطلعك منها بأمر الله الدبل الخفيف
وطريقة إستخدامه ( يجب - يجب - يجب ) الوقوف التام ووضع القير في ال N ثم ضغط الزر وعدم التحرك إلا بعد سماع طقة واضحة في الدفرنس الأمامي تدل على أن دينمو الدبل شبك وجاهز وأكيد مابتقدر تسرع فيه ومع الدبل بتشعر بثقل بسيط في الطارة وهذا طبيعي
وألف مبروك وترى السيارة قوية ومتأكد إذا إنك سواق ماهر وهذا العشم فيك مارارح تحتاج الدبل الثقيل نهائياً لقوة الدبل الخفيف أصلاً
همسة لمن يقرأ الرد ( أنا ماني متعصب بس أعرف هالسيارت زين )

[السلمان2010]

اولا الف مبروك
دائما استخدم الاوتماتيك لانه يشبك الدبل عند الحاجه ثانيا لو نسيته مايكون هناك اي مشكله
انا مره نسيته ولا فصلته الا عند البيت والحمد لله لم يكن اي مشكله0 ويكون اقتصادي للوقود ويقلل من استخدام الدبل على المدى البعيد


- عندك زر4 الامام يعني خفيف ممكن تشبكه عل سرعه خفيفه مره مو لازم تفضي القير وتمشي بس لاتتعدى


60ك عندك زر 4 سهم للخلف هذا الثقيل عند استخدامه لابد من الوقوف وضع القير على N بعدين اضغط الزر وتوكل على الله وطبعا الثقيل عند استخدامه على سرعات خفيفه جدا يعني للطوارىء مثل علقت السياره
او تبي تسحب احد او في منحدر شديد ولا تبي تستخدم الفرامل واهم شي لاتلف الطاره مره يعنى كبر اللفه
عند استخدام الثقيل وبعد ماتنتهي لابد ترجع للخفيف او الاوتماتيك
_ لابد من تنسيم الكفرات 20-15

اتنى اني افدتك

[الناصح الثاني]

ريــــان 2002

الله يبارك فيك ويسعدك ياغالي

الشهاده لله إنك كفيت ووفيت عسى الله يبيض وجهك

وصراحه وضحت لي الصورة تماااااااااااماً

السـلــمــان2010

يسعدك ربي وماقصرت على ردك الوافي

لكن بخصوص الأوتو يعني إذا دخلت طعوس أو أماكن غراز ينفع أخليه مشبوك

وبيض الله وجيهكم

[محمد الحزنوي]

السلام عليكم ورحمة الله وبركاته

الله يجزاك خير ونسأل الله لنا ولكم التوفيق

اسأل الله أن يغفرلنا و لك ما تقدم من ذنوبنا وما تأخر

[حوض 2003]

الظاهرأفادوك الشباب
بس في نقاط مهمة لازم تتنتبه لها
1- اللأوتو لا تستخدمه في البر نهائيا لأنه يخرب الدبل وأنا أفضل أنك ما تستخدمه الى في مناطق الزلق (أول المطر ، الثلوج )
2- أنتبه تشغل الدبل وأنت حاطه على البي ( بارك ) لأنه يخربه
3- أذا أردت أطفأت الدبل وخصوصا الثقيل أرجع ريوس شوي حتى يفصل الدبل مائة بالمائة
4- أذا أردت سحب أحد أولا نسم الكفرات ثانيا أشبك الخفيف ثالثا أجعل وضعيت السحب للريوس لأنه أقوى وأنتبه لا تتنتع لأن قير الجمس ما يتحمل النتع واجد ربعا أضغط الزر الموجود في القير (يطلع لك لبه في الطبلون ونش ) وتوكل على الله
5- حاول قدر الأمكان عدم أستخدام الثقيل

وأي شي تريده فأنا موجود لخدمتك

[كديان]

اخوي حوض 2003
عند فصل الدبل الثقيل لا يلزم اطلاقا ارجاع الموتر للخلف
فقط تفضي القير و مسك الفرامل ثم فصل الثقيل
و مايحتاج عندنا جمس م2001 و الان ما شاء الله له 9 سنوات
و الحمدلله ماتثر الموتر على كثر استخدامنا له الثقيل و الخفيف دايم كشتات

نقطة اخرى وانت اخطأت فيها و هي اعظم و اخطر و اشد من الاولى
اذا بغيت تسحب موتر فلازم تحط الدبل بالثقيل + وضع القير على نمرة 1 + تليين الكفرات
لو سحب موتر مغرز بالخفيف راح يحتمي القير ثم تحرق الكلتشات و يضعف القير

و معروف اي موتر سواء امريكي او ياباني لازم تريح القير و المكينة و وتحط الدبل بالثقيل سواء كان القير
تماتيك او قير عادي

[السلمان2010]

لكن بخصوص الأوتو يعني إذا دخلت طعوس أو أماكن غراز ينفع أخليه مشبوك

[/QUOTE]


الاوتو لم توضع عبث وهي وضعيه مريحه للدبل ومريحه لقائد السياره
نعم تخليه مشبوك نسم كفراتك وتوكل على الله (من وواقع تجربه)
يعني اعطيك مثال لوكنت بطعوس ثم انتقلت الي جلد ثم طعوس هذا الوضع
يقوم بمهمه شبك الدبل على الخفيف وفصله عنك

وافضل شي راجع كاتلوج السياره لكي يطمأن قلبك

اتمنى اني افدتك

[ابو داحم 9999]

شف يالغالي انا معي افلانش 2002

وانصح الشباب نصيحه لاني اضطريت اوضب الدبل والقير بسبب هالشي

ابدا لاتشغل الدبل الا وانت موقف وقوف تام وعلى وضع الـN

ولاتتعدى السرعه 60 ابد

والدبل لاكانت سواقتك مهب اللي بالبر شغل الدبل الخفيف والموتر يعطيك مايقول لا ماشاء الله

وانصحك ماتستخدم الاوتو لانه احيانا بعد الشد على السيارة يعلق الدبل وشف عاد متى يفك

والثقيل اذا شبكته دعسته خفيفه ويطلع ان شاء الله يعني لاتدعس له بقوة

ومشورتي لك هذي بعد التعامل 5 سنوات مع سيارتي ومع يوكن دينالي ويوكن ثاني 2005

وكلها تختلف كل مكينه بس ان شاء الله ماراح تواجه مشاكل معه نهائيا انت قبل تدخل اشبك الخفيف وتمش ومايحتاج تنسيم اذا كفراتك عرضها 275

انا ادخل بدون الدبل وبدون تنسيم باماكن قشرا ويمشي الموتر لان مكاينها قوية والموتر ماشاء الله يطربك

ويعطيك خيره ويكفيك شره

واشوف الصورة انت مولع النور عادي الموتر يولع اوتوماتيك النور في حال الضباب او الغيوم وبالليل

[الناصح الثاني]

الله يسعدكم على الردود

وصراحه منكم نستفيد

وشاكر لكم على مروركم