استفسار عن أفضل موقع للكشتة بالقرب من الرياض

[بندر.ع]

سؤالي للإخوة اللي جالوا الأسبوع الماضي في مواقع الأمطار :lr .. ما أفضل موقع لا يبعد عن الرياض أكثر من 100 كيلو لكشتة شبابية يوم الخميس المقبل .. السيارة دفع رباعي يعني ما فيه مشكلة تتعلق بوعورة الطريق .. نرجو الإفادة وأعتذر إن كان الموضوع طرح في المنتدى غير المناسب

تحية للجميع من زوار ومشرفين

[Saad 11]

الخفس ونفودها .. الي على اليمين واليسار ،،

[sTr0nGeR]

هلا يا بندر كيف حالك ؟
إذا والله طلعتكم من بعد الظهر يعني قهوة وغدا وجلسة إلى المغرب رح وأنا أخوكـ للغدير
والغدير هذا ترى أسمه أكبر منه بس أنه حلو للطلعات الخفيفة ومكان ممتاز جداً ولا يبعد كثير عن الرياض
وإذا بغيت مكانه أبشر أوصفه لك

[ابو نايف 111]

هلا ابسميي:D
انا اقترح انك تروح لم الخراره
قريبه وذفه :D

[بندر.ع]

الله يعطيكم العافية جميع .. ويا ليت موقع الغدير .. الطلعة إن شاء الله من السابعة صباحا
أبو نايف .. أنا بندر أكبر أكبر والناس تقولي يا سكر

[sTr0nGeR]

سم أبشر ما طلبت شيء
هذا طال عمرك إلى منك وصلت محطة الدريس اللي في الثمامة ( اللي يطعسون عندها ) خذ يمين مع المرفق اللي يوديك جهة طويق والبويبات باتجاه الشرق ، رح إلين يجيك خط زفلت يفرق يمين وتراه بعيّد شوي وفي زاويته مسجد صندقة لف معه ، رح إلين يلف بك الشارع يسار وتشوف بوابة قدامك ، قبلها بـ 150 إلى 200 متر أدخل يمين ، إذا دخلت يمين راح تشوف على يدك اليسار زي الضليع ( تصغير ضلع أي جبل ) أسود رح على طول إلين تشوف الغديّر قدامك وفي أخره زي المكان اللي يتجمع فيه الماء.
تراه مكان حلو ، هاديء ، قريب ، وفيه بقاله قريبة منكم إذا نقص عليكم شيء " شفها من عند البوابة اللي لفيتوا قبلها " إذا جيتوا تدخلون قولوا للسيكيوريتي أنكم تبون البقالة وراح يخليكم تدخلون.
الماء هذا من محطة تحلية المياة ودايماً يمشي في الصيف أو في البرد يعني على مدار العام والموية نظيفة يعني مافيها ريحة ولا شيء.
" إذا جربتوا المكان هذا بصراحة ما راح تلقون أحسن منه بحكم القرب والهدوء "
أتمنى أني أفدتك أخوي بندر وأنا والله العظيم كل يوم جمعة بعد الصلاة نطلع نتغدا فيه أنا والشباب إلى المغرب أول العشاء.
تحياتي لك ،،،

[ولد وايل]

الخراره ارض ممطوره وفيها مويه وارضها نظيفه

ولا يوجد بها مراهقين مثل الثمامه


واللي يجونها اغلبهم رجال وقليل من يتمتع بعقل المراهقه مثل الثمامه

[سديراوي نت]

روضة ملهم زينة وقريبة

[دغيم1]

السلام عليكم ورحمة الله وبركاته
حياك الله أخوي
بما انك ماحددت خيار المكان وطبيعة التضاريس
إليك مجموعة خيارات لمكان رحلتكم الميمونة
1- شعيب الرمحية : شعيب جميل - بطحاء - أشجار - قريب من مركز الرمحية والبقالة والخدمات الأخرى - مسفلت حتى قبل الشعيب بقليل والطريق سالك وليس وعر .
وصف المكان : بعد محطة خزام في الثمامة خذ يمين باتجاه الشرق مع طريق بويب الرمحية رماح - قبل الرمحية بـ 10 كم خذ يسار - ( أي عند الكوبي الذي تلتقي فيه مواصير ( أعمدة ) الكهرباء وتنتقل من اليسار إلى اليمين ) خذ يسار وواصل تجد الشعيب أمامك - خذ يمين وخل الشعيب يسارك - واصل حتى يتسع الشعيب - ابحث عن النسب لك .
2- روضة الخفس : الجهة الغربية رمل - الجهة الشمالية أرض سهلة وأشجار العشر الكثيفة . يوجد بقاله في الجهة الغربية على الشارع في أغلب الأحيان .
وصف المكان : طريق الثمامة واصل حتى تصل إلى تقاطع الطوقي مع طريق المجمعة القديم ( الثمامة ) بعده ستجد لوحة ترشدك عن الروضة وستشاهد الرمال يمينك وتشاهد السياج الخاص بالروضة -
3- روضة الخرارة : رمال كثيفة وعالية - الروضة مليئة بالماء الآن بعد الأمطار - جهتها الجنوبية أفضل وأجمل - تحتاج سيارة دفع رباعي .
يوجد بالقرب منها كافة الخدمات .
وصف المكان : طريق مكه - الطائف . بعد تجاوز محافظة المزاحمية - ستجد لوحة إرشادية عند المخرج - ويتم عمل مخرج خاص بها تحت الإنشاء .
4 - شعيب الحائر : أشجار كثيفة - رمال - جبال - مناظر جميلة
وصف المكان : واصل المسير حتى مركز الحائر جنوب الرياض - إمتداد طريق البطحاء جنوب - واصل المسير حتى تصل الحائر واصل المسير حتى تصل نزلة الحائر - سيأتيك مخرج يمين ( مكه - ديراب ) خذ يسار وسيكون مقابلك مسجد جامع - واصل المسير مع الطريق الزراعي الضيق وانتبه للسيارات القادمة - واصل المسير مع الإسفلت - ستجد أماكن جميلة على اليسار - كلما واصلت المسير ستجد أجمل من الأماكن القريبة
قبل نهاية الأسفلت وعند إنعطافة يمين ستجد أمامك مزرعة ( راشد بن دايل - رحمه الله ) خذ يسار مع الطريق الممهد ومع أعمدة الكهرباء واصل المسير قليلا ستجد على يسارك شعيب صغير جميل بعد خيمة وحوش .وإذا حبيت تواصل لنهاية الشعيب قليلا ستجد الشعيب إنفتح مع وادي نساح هناك اماكن كثيرة جميلة ويعاب عليها بعدها عن الخدمات خذ كل مايلزمك .
5 - شعيب القدية : بعد نزلة القدية - طريق مكه - الطائف - أشجار - بطحاء -جبال .يوجد خدمات في مركز قصور المقبل المقابلة جهة الجنوب .
وصف المكان : بعد النزول من طلعة القدية - ستجد نزلة ترابية ( أجلكم الله ) يمين - خذ يمين - واصل المسير حتى بالقرب من الجبل في الزاوية .
6 - روضة المحلية : رمل - جبل .لاتوجد خدمات قريبة - يوجد أماكن للتطعيس واستعراض المهارات .
وصف المكان : بعد النزول من طلعة القدية - خذ مخرج قصور آل مقبل - واصل المسير حتى تصل إلى لوحة نساح - الجفير - الحفيرة - بعد محطة البنزين - خذ يمين - واصل المسير حتى تجد الروضى على يمينك وقد عمل عليها سياج ( مواصير ) حماية - الدخول بالسيارة ممكن .
وإذا رغبت يوجد امكان قريبة منها - بعد الوصول غلى الروضة ستجد طريق مسفلت يسار غلى الأوسط - خذ يسار واصل حتى تصل الهجرة - خذ يمين جهة الجبال المقابلة لك هناك أماكن كثيرة - يوجد في زاوية الأسفلت بقالة عند هجرة الأوسط .
7 - روضة خريم - والأماكن القريبة منها ( شعبان )
أشجار - رمال - بطحاء
وصف المكان : إتجه إلى طريق الرياض - الدمام السريع - عند مخرج محافظة رماح - خذ يمين واتجه شمال ستجد لوحات إرشادية للروضة - قبل الروضة يوجد شعبان كثيرة ذات أشجار ومكان جميل .
هذه تقريبا جملة من الأماكن القريبة حول مدينة الرياض
تمنياتي لكم برحلة سعيدة وآمنه
وأن تقضوا أمتع وأجمل اللحظات
مع رجائي بالمحافظة على النظافة
تقبل تحياتي ومودتي

[الهاوي 9]

الخراره ارض ممطوره وفيها مويه وارضها نظيفه






ولا يوجد بها مراهقين مثل الثمامه




واللي يجونها اغلبهم رجال وقليل من يتمتع بعقل المراهقه مثل الثمامه




:good2::good2:


مازالت بجمالها وهذ صورها


http://sub3.rofof.com/img4/01bdvxn24.jpg (http://www.rofof.com)


0000000000000000


http://sub3.rofof.com/img4/01saihr24.jpg (http://www.rofof.com)


وافضل موقع حول الطلح يسار وانت داخل
كما تشاهد بس لازم الوصول الى هنا بدرررررررررررري


http://sub3.rofof.com/img4/01dmylo24.jpg (http://www.rofof.com)


0000000000000000000


http://sub3.rofof.com/img4/01rigmp24.jpg (http://www.rofof.com)

[الغريق11]

الخبي أو ماوان أو وثيلان في الدلم ..

والدلم تبعد عن الرياض 120 جنوب

http://www.mekshat.com/vb/showthread.php?t=375984

[@..ابن الدلم..@]

خلك الدلم
الخفس العين ماوان الخبي وثيلان تمير السوط
واااااااجد تبعد عن الرياض 100 115
ادخل اسمي وشف المواضيع وتشوف

[غيث الحيا]

منطقة الوسيع وروضة المسعودي شمال محطة الضخ على طريق الدمام 100 كيلو تقريبا عن الرياض ممطورة والان فيها مغادر ماء وفيها أشجار ونفد إذا تبي النفد هادية جدا وبعيدة عن إزعاج المزعجين الله يهدينا وإياهم

[الطرس ممدوح]

سم أبشر ما طلبت شيء

هذا طال عمرك إلى منك وصلت محطة الدريس اللي في الثمامة ( اللي يطعسون عندها ) خذ يمين مع المرفق اللي يوديك جهة طويق والبويبات باتجاه الشرق ، رح إلين يجيك خط زفلت يفرق يمين وتراه بعيّد شوي وفي زاويته مسجد صندقة لف معه ، رح إلين يلف بك الشارع يسار وتشوف بوابة قدامك ، قبلها بـ 150 إلى 200 متر أدخل يمين ، إذا دخلت يمين راح تشوف على يدك اليسار زي الضليع ( تصغير ضلع أي جبل ) أسود رح على طول إلين تشوف الغديّر قدامك وفي أخره زي المكان اللي يتجمع فيه الماء.
تراه مكان حلو ، هاديء ، قريب ، وفيه بقاله قريبة منكم إذا نقص عليكم شيء " شفها من عند البوابة اللي لفيتوا قبلها " إذا جيتوا تدخلون قولوا للسيكيوريتي أنكم تبون البقالة وراح يخليكم تدخلون.
الماء هذا من محطة تحلية المياة ودايماً يمشي في الصيف أو في البرد يعني على مدار العام والموية نظيفة يعني مافيها ريحة ولا شيء.
" إذا جربتوا المكان هذا بصراحة ما راح تلقون أحسن منه بحكم القرب والهدوء "
أتمنى أني أفدتك أخوي بندر وأنا والله العظيم كل يوم جمعة بعد الصلاة نطلع نتغدا فيه أنا والشباب إلى المغرب أول العشاء.

تحياتي لك ،،،

:good2::good2::good2::good2::good2:

[_Abu Omar]

الخرارة حلوة مرة بس زحمة

واللي يقول ما فيها بزارين غلطان

[أبو الحارث 4]

حياك ربي ، ما قصر الاخوة ، ولاسيما الأخ دغيم حفظه الله ، وأزيد واحدة شعيب الواشلة جنوبا يبعد عن الرياض ما يقرب 30كم قريبا حدرت شعبانه، طلاح وسمر لكن توغل من داخل، رحلة سعيدة

[بندر.ع]

الله يرحم والديكم جميعا .. وألف شكر وتقدير

[بر الوالدين]

روضة ملهم زينة وقريبة




مطلووووووووووووووب لا هنت

وصف دقيق ( للغشمان ) أمثالي :)

من جهة الثمامه أو من جهة طريق القصيم بعد نقطة التفتيش الأولى

يجي ( معبر جمال ) و بعدين



حياك ربي ، ما قصر الاخوة ، ولاسيما الأخ دغيم حفظه الله ، وأزيد واحدة شعيب الواشلة جنوبا يبعد عن الرياض ما يقرب 30كم قريبا حدرت شعبانه، طلاح وسمر لكن توغل من داخل، رحلة سعيدة


وصف لا هنت نفس الكلام اللي فوق هههههه ( للغشمان )

بطلع لحالي سيارة صغيرة فورد ( بكره كر )

[بر الوالدين]

وجدنا هذا الوصف و ياليت وصف أدق من ذلك :)



طريق الرياض بإتجاهـ >>>>>> القصيم




بعد أول نقطة تفتيش صلبوخ للخارج من الرياض




يأتيك كوبري معبر جمال تأخذ يمين مع المعبر ( أكيد فيه طريق ولا لا )


بعدها مباشرة فيه ردمية ( طريق ترابي ) يتجه للشرق
إلى أن تقترب من نقا كبير قرابة 10 كيلو


( الرمية قد تختفي معالمها قليلاً لكن لا يهم أهم شي اتجهه نحو الطعس الكبير )




بعدها يجيك حرف T ردمية اخرى تأخذ يسار حوالي 8 كيلو




تأتيك بوابة الروضة بجانبها طلحة كبيرة . ( هنا الموقع )

هل الطريق من عند ( مدينة الأمير سلطان الطبيه يودي للروضه ) وكيف الوصف



فهل هذا وصف سهل ؟




أن كان فيه وصف أقل مسافه من ( الثمامه مثلاً )




يكون أسهل و أوضح

[سديراوي نت]

أخوي بر الوالدين معذرة على التاخير.. وصدقني الوصف اللي لقيته واضح وما راح تتوه.. اذا طلعت مع مفرق الجمال شرق بيجيك طريق ترابي مهوب مزفلت رح شرق ومثل ما قالوا الشباب تختفي معالم الجادة بس انت توجه للطعس الكبير.. الين تجيك الجادة اللي تتجه شمال جنوب.. رح شمال الين تجيك البوابة