رحله يومين لا على البال ولا على الخاطر الى (الجندليه ) واطراف الصمان

[المترو]

السلام عليكم ورحمة الله وبركاته

اخوكم راح له تالي نهار الى القصيم يعني كم ساعه ورجعه وفعلا هذا اللي صار وفي خط الرجعه الى الرياض وتحديداً قبل الوصول الى المجمعه الا والجوال يدق الساعه 5 الفجر يوم الاحد وهذا نص المحادثه هلا وابو فلان وشلونك طيب ابد تمام وانت وش اخبارك يا ابو ناصر الحمدلله وين اراضيك الخط السريع وانت وش عندك قال ابو فلان هذا انا هالحين هازع من محطة ام رقيبه يم الجندليه هين عاد اقول انا :) طيب طيب انا قريب عند المجمعه وجايكم )) والله ومير اخاويهم ونقنص يومين طيبات اليوم الاول بالجندليه
واليوم الثاني ننقز الخط جهة الجنوب يم الصمان ونحوووم اليوم الثاني كله دوووووجة طيبه تخللها صيد حبارى وحده ولقينا جره ثانيه شرق نفود الدهنا باللغف الشرقي والصيد على اوله كما يقولون الشباب لكن الموسم يبشر بخير اذا هذا اول الوقت والذكر واجد بالصمان وحول الحجره شرق خط لينه

طبعا الهدف من الرحله البحث عن معشوقة الصقارين الحبارى الضعيفه وبالنسبه لي افتتاح الموسم موسم المطامر والرحلات الشتويه

ولكن الكمره صار لها حادث حليل طاحت لها على حصاة وعيت تصور بعد الحادث ولكن ابشركم اظهرت اللي ببطنها كم صوره اللى كانت بالكرت لكن الللي بالذاكره الداخليه راحت الله يخلف العوض ولا القطيعه

الصور التى لم تظر الحبارى وهي مهدود عليها والفطر الرمضاني البري سنبوسه بالبر كثر منها ومصابيب ابو عبد الله لكن كانت رحله ممتعه مدري عشانها اول طلعه واخوكم خرمان للبر :) :)

واليكم كم صوره قبل خراب الكمره الماخوذه وما باقي بكرت التخزين من صور

الاولى مقيال تحت هذه الطلحه شرق مشذوبه الى الساعه 3 ثم دوجه الى الساعه 4 وشوي ثم وقفت الفطور وسقوط الكمره قبل الغروب بدقائق وبعدها توقف التصوير للاسف


http://www.mekshat.com/pix/upload/images11/mk3016_jandalia-1.jpg




الثانيه
تغسيل بستم للطير بعد الهدد شكل الحبارى عندها اسهال حاد :D


http://www.mekshat.com/pix/upload/images11/mk3016_jandalia4.jpg



الثالثه
الطير وهو تحت الدش

http://www.mekshat.com/pix/upload/images11/mk3016_jandalia3.jpg


الرابعة هالزين تعطل ووقف وهي الوقفه

صيد الكمره


http://www.mekshat.com/pix/upload/images11/mk3016_jandalia-tancker.jpg


الخامسه صوره طلعتها بالغصب من الكمره ولو انها ماهي واضحه للهدد



http://www.mekshat.com/pix/upload/images11/mk3016_jandaliah-88.jpg






السادسه غروب الشمس يوم الاحد شرق مشذوبه ومعلنة انتهاء اليوم الاول للرحله


http://www.mekshat.com/pix/upload/images11/mk3016_jandalia-sunsit.jpg







تخلل الرحله تجربة للمطامر باليايات الاستراليه والمساعدات الجديده وصراحه الموتر ضبط وخاصه بالرمل والرساوه شيء ممتاز ولله الحمد وكذلك


فتوى من اهل الطيور يقولون الصقارين ان طير الحبارى طير غير اجتماعي مع الطيور الاخرى ولذلك مستحيل يصاب بأنفلونزى الطيور بالاضافه الى انه لا يرد الماء والمستنقعات مطلقاً ويعيش بالمناطق النائيه
عاد وش رايكم بهذه الفتوى والا يهكون علي يبوني اخاويهم وانا صدقت كلامهم وابشركم ان الحبارى اللي صدنا بصحه جيده ويالله يالله علقها الطير بالسماء من الصحه يقوله ابو فلان رفيقي

عموما امل اني وسعت صدوركم بهذه الرحله الخطافيه الافتتاحيه ولكم اجمل تحيه

المترو ابو ناصر

[رعد الجنوب]

السلام عليكم ورحمة الله وبركاته

ماشاءلله تبارك الله بداية موفقة مشرفنا العزيز ابوناصر
مع ان الجو حار وقت النهار ويتعب الطير لكن راعي البر والمقانيص مايرده شي
لكن الحمدلله الي ذبحتو وحده وهذه بداية خير وبالتوفيق لجميع الصقارين .
اجمل تحية

[* ولد الديمن *]

وعليكم السلام ورحمة الله وبركاته

تسلم يابوناصر ما قصرت امتعتنا وونستنا وذكرتنا :good:




فتوى من اهل الطيور يقولون الصقارين ان طير الحبارى طير غير اجتماعي مع الطيور الاخرى ولذلك مستحيل يصاب بأنفلونزى الطيور بالاضافه الى انه لا يرد الماء والمستنقعات مطلقاً ويعيش بالمناطق النائيه

الفتوى ذي تحتاج نظر :rolleyes: (والله لو فيهن جنون بقر ما راح نخليهن)







&&&&&&&&&&&&

[هاوي مقناص]

السلام عليكم ورحمة الله وبركاته................


ياهلا وغلا با اخونا المترو ،وكل عام وانت بخير ،، الحمدلله علي سلامة الا اسفار ،ومبروك عليكم هالحباره ،وعسي الله يرزقنا وياكم بصيد السنه هذه.


اخوك:الخشف

[* الـكـشّـات*]

السلام عليكم ورحمة الله وبركاته وبعد
رحله موفقه ، مبروك الحبارى تكلونها بالعافيه.
لكن عندي سؤال للمشرف الفاضل الجندلية يم حائل ؟ وهل جوها زين؟
وجزاك الله خيرا.

[أيمن]

الحمد لله على السلامة يا أبو ناصر ..
أمتعتنا بهذا السرد الجيل المصور،وان شاء الله ما تكون الكاميرة تأثرت تأثر شديد ..

بارك الله فيك، وما فيه أزين من الرحلات اللي من دون تنسيق مسبق ..

تحيتي

[صقر]

ابو ناصر .... عيني عليك باردة ... بهالسرعة تحولت الى الجندلية والصمان..

لكن تستاهل العنوة ... الربع يذكرون الحبارى هناك .. ومثل ماذكرت ذكر الحبارى هالسنة واجد وشكله أحسن من العام الماضي.

والله يعوض عليك هالكمرة اللي انكسرت ..... وعسى البقاء براسك يابو ناصر.

شكرا على امتاعنا بهذه الرحلة.

وبارك الله فيك.

[سلطان الوايلي]

يعطيك العافية اخوي (( المترو)) على هالصور الرائعة والله يعوضك بدال الكميرة بخرب ودجاجة تلقاهن مع بعض بروضن واحد بأول طلعة لك .
وعندي سؤال لو تكرمت الأرض الي بالصور تقل توها ممطورة ومطرن طيب ياليت توضح لنا هو مطر , و وين مكانه بالضبط .
ومشكوووووور مرة أخرى

[مشوت الحصى]

ماشاء الله

الخير جاي ان شاء الله

والله يعوظك بخير

[أبو فراس]

السلام عليكم ورحمة الله وبركاته

ما شاء الله عليك يبو ناصر والله مابغت شي هالكشتة

عاد تبي الحق كانت من حظنا انك رحت لمهم من شان تنعش خيمة الرحلات وتنشط اهل المكاشيت من اجل يتأكدون من عزبهم ويشيكون على سياراتهم

ولكن ترا اسمكم وأوصاف جيبكم تراه عند تفتيش ام سدرة وانت تعرف الباقي


.

[راع الحبارى]

مشكور بس والله الكمره الآن صارت مثل السلاح مايروح الواحد الا هي معه

[رسلان]

ماشاء الله تبارك الله ...
رحلة خطافية وصيد وعلوم غانمة :) ...
يعطيكم العافية أخوي أبو ناصر على الوصف والصور ...
والله يعوضكم خير ...

[فلاجكو]

يعطيك العافيه ابو ناصر ورحله موفقه

لاكن انا اسئل عن المساعدات الاستراليه من وين ركبته وبكم وهل فيه انواع وشلون تغير معك الموتر بالعربي نبى شرح وافى وسلامتكككك ........

[nahham]

هلا ابو ناصر

من حظنا رحلتك هذي ..... جربت لنا اليايات الاسترالي وعطيتنا الخبر اليقين

الحمد لله على سلامة الاسفار واحسن الله عزاك بالكاميرا ...البقى براسك

عيدك مبارك وكل عام وانت بخير

[العزوم]

الله يعطيك العافيه يابوناصر
تقرير سريع يهم الصقارين
ماقصرت

[شايب الصمان]

هلا أبوناصر والحمدلله على السلامه

الطفاقه مهب زينه ماشاءالله عليك على طول الرجال قال وينك ونهجة يمهم :D

الوعد 3 العيد خلك تتعذر أنت وأبوفيصل . :no2: ;)

[عروان]

ما شاء الله يا بو ناصر

أفتتحت الموسم بمقناص و طرح حبارى

عيني عليك باردة

سلامة الكاميرة, البقى براسك

+++++++++


شايب الصمان

وش المواعيد اللي من خلف الكواليس

3 العيد هو وابو فيصل

وين ناوين ولا علمتوني.

[شايب الصمان]

ما شاء الله يا بو ناصر

أفتتحت الموسم بمقناص و طرح حبارى

عيني عليك باردة

سلامة الكاميرة, البقى براسك

+++++++++


شايب الصمان

وش المواعيد اللي من خلف الكواليس

3 العيد هو وابو فيصل

وين ناوين ولا علمتوني.
-------------------------------
خله يرد أول ياأبونايف وبعدين أعلمك وياحبك لل؟؟؟؟؟؟؟؟؟؟ ولكنك رفيق الدرب ولان يكون أي شىء خاف الكواليس بدون علمك .

[كشات]

http://www.geocities.com/hraaar_1/1100218787_starting_word.gif

ماشاء الله عليك يابو ناصر

والم بسرعه لهالمشاوير اللي توسع الصدر

كثر الله خيرك على السرد الجميل

وان شاء الله انه بداية موسم زين للقنص وتمغيط الطيور بساقة الحباري

عندي سؤال
الطير يوم غسلتوه وش استعملتو له من شامبو؟ ;)



مداخله ياراعي الموجه

ابو عبد الله الصباغ يدورك
والبلاط يقول السراميك ناقص

<<<< يعرف يغث :D

[المترو]

السلام عليكم
وكل عام وانتم بخير وصحه وعافيه ومن العايدين والفايزين ان شالله رضاه تعالى


واعتذر عن التأخير بالرد لضروف قاهره
اخي الكريم رعد الجنوب
هلا بك
والله يسلمك وعقبال عندكم الصيد ان شالله
وكلامك100% عن حرارة الجو وتعب الطير والله ان الطير بعد الهدد نزل وهو يلهث وكذلك مسيان وقت الدعي اللي منول يلوحون له 150 الى 200 ملواح هالوقت حده 40 ملواح ويبداء يلهث المسيكين وخصوصا ان الطيور تعرف توها مفكوكه من المربط ولياقتها ضعيفه الى حد ما

هلا بك وحياك اخوي

اخي المرقاب سراب

هلا بك والله يسعدك دنيا واخره والساعه المباركه سعاتك من الموضوعك وشد حيلك هلايام عبور الحبارى
وموضوع الفتوى على قولتك لكن فيها قليل من الصحه والا وش رايك وترى الصحه غاليه يا خلفهم
تسلم ولك اجمل تحيه

اخي الكريم الخشف
الله يبارك فيك والله يسلمك وعقبال عندكم الصيد كا عادتكم والله يرزقكم بصيد هالسنه عوضا عن قلة الحبارى السنه الماضيه
لك اجمل تحيه

اخي الكرامه
الله يسلمك ويبارك فيك وتسلم للمرور وسؤالك عن الجندليه لا يخيي الجندليه شرق عروق الدهناء وغرب خط البطيحانيه لينه وشمال خط ام الجماجم حفر الباطن

لك اجمل تحيه

هلا وغلا بأستاذنا الكريم ايمن
حفظك الله ورعاك وتسلم على التشجيع والمرور على الموضوع والحمدلله انه حاز على رضاكم وامتع الجميع
اما الكمره فهي ذاكرتها الداخليه امسحت ولم تعد تخزن الصور داخليا وهي الآن عند المصلح والله مدري وش اخرتها يقول تحتاج قطعه وبعدين نشوف عسى خير ان شالله
مساعد الريس حبيب الجميع صقر
هلا بك ومرحبا والله يحفظك
اخوك لا تطري له كشته ويجي مجلعد وترى الجندليه اذا اهتوى الواحد تصيرعلى درب الرياض :D
المهتوي يقطع المستوى وحتى اللي ماهو مستوي :) :)

وفعلا الذكر واجد للحبارى وهو اول الموسم ولله الحمد
اما الكمره فنقول كما يقولون البدو يا ما ضاع للحاج من جمل ;) وانا اقول ياما ضاع للمكشاتي من كمره ؟؟؟

تحياتي ابو احمد

سلطان القفر

هلا بك وآمين حنا صدنا الدجاجه لكن باقي الخرب ويسد عن 10 كمرات والله يرزقنا الخير وياك اجمعين
سؤالك عن الارض الممطوره مالك لواء والله كما تشوف ارض شهباء لهبا مامطرت من العام لكن قد يكون التصوير ماهو مضبوط وخاصه بعد حادث الكمره الماخوذه ولك اجمل تحيه

مشوت الحصى
هلابك ومرحبا وتسلم لمرورك وعسى فالك بالصيد وافر ولك اجمل تحيه

ابو فراس
هلا بك ومرحبا تشرف الموضوع بمرورك الكريم وتعليقك الاجمل وتهديدك المرح يامل العافيه يا ابو فراس وخلك حبيب مع ربيعك المكشاتيين والساعه المباركه انه الموضوع حاز على رضاك يا جدي ابو فراس :(

راعي الحبارى
هلابك ومرحبا وتسلم لمرورك على الموضوع
والكمره لا يا خيي ماهي ضروريه زي السلاح لكن من مكملات الكشته او المقناص وخاصه للذكرى الجمليه
ولكن فيه بعض خوياي اذا شافوني اصور زعلو وقا لو تراك اشغلتنا بكمرتك يا الفتوكرافي وخاصه الشيبان

اخي الكريم
رسلان
هلابك ومرحبا وتسلم ومن قال يا غالي وهلا بك

اخي فلاجكو
هلابك وتسلم و عن المساعدات مر خيمة السيارات وتجد طلبك

nahham

هلابك ابو هشام ويا مرحبا وتسلم لمرورك وتعليقك الجميل والله يعوض خير من الكمره
ولك اجمل تحيه

العزوم مرحبا ومسهلا وتسلم وهلا بك

شايب الصمان هلا بك ومرحبا والله يسلمك واركد اقول :cool:

وش هو 3 العيد وش هنا؟؟؟؟ وابو فيصل بالديره ماهي حولي ولا ينطال هلاالايام :confused:

هلا ابو نايف عروان راعي عروى
الله يوفقك ويستر عليك وتسلم وراسك الباقي الفنى بالعمر والا الكمره وغيرها مقدور عليها لا سلم العود الحال تعود

وخل عنك سواليف شايب الصمان وقف سوقه بالمحاماه ويدور له قضيه ينشب للخلق فيها :D :D

شاسب الصمان للمره الثانيه
ننطه هذا يدور قضيه يترافع فيها لا ويولم التهم قبل القضيه ا :j

كشات ابو علي
هلابك ومرحبا وتسلم للمرور وعلى قولتك البر كللللللللللللللللللله يوسع الخاطر فيه صيد والا لا

اما الشامبو اذا علي انا اقول انه هداندشولدر واذا الصدز مادري وشهو لكن اضن انه مطهر كحولي او ماشابه
تحيتي لك

وعموما سوف اكون خارج الديره من بكره الى 5 شوال وماني معلم شايب الصمان وين ابي اروح
والسلام

[ابوذيب]

ماقصرت يابو ناصر علومك دائما طيبه
تحياتي للجميع

[الأعصـــــار]

سلم يابو ناصر على هالموضوع الطيب
وتسلم مره ثانيه على الحكمه الجديده بصراحه يبي لها تثبيت
( يا ما ضاع للحاج من جمل وانا اقول ياما ضاع للمكشاتي من كمره )
والله يعوض عليك .......

[الضاري]

مشاء الله عليكم وسلامه الاسفار ومبروك عليكم صيدكم

[محمد العبدالسلام]

ماشاء الله عليك يا ابو ناصر ما عندك وقت
الحمد لله على سلامتكم والحقيقة ابهجتنا بهالصور الجميلة للرحلة الخطافيه والله يعوض عليك الكاميرا

[المترو]

السلام عليكم ورحمة الله وبركاته

هلا وغلا ابو ذيب ياالله تحييه تسلم لمرورك على الموضوع والله يحفظك ولك
اجمل تحيه

الاعصار هلا وغلا ومرحبا وتسلم يا غالي وطاب فالك والحكمه بما ان الكرمه صلحنها ابشرك تلغلى حتى تنكسر الكرمه مره ثانيه

لك اجمل تحيه

الضاري هلا بك وعساك سالم وغانم ياغالي والله يحفك وتسلم لمرورك علي الموضوع
لك اجمل تحيه

نجـ أبن ـد هلا وغلا وتسلم على التشجيع الطيب والله يبهجك ويسعدك دوم يارب ولك اجمل تحيه

ولكم جميعا اعذب الاماني

المترو ابو ناصر

[واثق]

لله ماأجمل هذه الرحلات
بوركت أناملك

[ريف النشاما]

تسلم يابو ناصر على هذه الرحلة الممتعه

والعوض ولا القطيعه

===

أما البستم شي ثاني ..........

[صوح الجبل]

ياسلام .... ياسلام .... رحله موفقه .... وبكمله بالصورة والقلم .... والحمدالله على السلامه ..... وموفقين في ذهابكم وايابكم