تعال تعرف على اماكن التمشيه في منطقة الرياض

[eng_almassoud]

السلام عليكم ورحمه الله وبركاته
انا من السكان الجدد بمنطقة الرياض
ولدي عائلتي الصغيرة وسيارتي الجيب فورتشنر وأرغب بتمشيتهم بشكل اسبوعي بحكم انه ليس لي معارف في الرياض
لذلك اتمنى من الاخوة الكرام افادتنا نحن السكان الجدد بالاماكن البريه المناسبه للعوائل
قرى قريبه او بعيده لحدود 300 كيلو تقريبا
الخرائط لا تنسونها لاني لا ادل شي في الرياض
اسال الله العلي القدير ان يجعل ذلك في ميزان حسناتكم
شكرا

[تناهيت]

مبدئيا واقرب شي

امسك خط صلبوخ= حريملاء شمال ووسع صدرك

وراح تمر على عده محافظات ومناظر جميله ومناطق وشعبان سايله

تطلع لصلبوخ مع الدايري الشمالي غرب ثم صلبوخ الدرعيه شمال

خط سيدين

تحياتي

[صقر مبرقع]

اسمع كلام اخوي تناهيت ولاراح تندم وزد عليها العيينه والجبيله وشعيب سدوس
وعندك خيار ثاني
شعيب غيلانه بعد روضة خريم
ووصفه خط الشرقيه ثم مفرق رماح ثم سيد الين تيك روضة خريم واضحه علي اليمن هو بعدها قبل لاتدخل رماح
وهاذ وموضوع لشعيب غيلانه وبه صور
http://www.mekshat.com/vb/showthread.php?t=375921

[غيث المزن]

حياك الله في الرياض
ان ماشالتك العاصمه تشيلك عيوننا يابعدي :)

تناهيت وصقر
اعطوك الأماكن الجميله اللي احب اتمشى يمها

وان بغيت خدمه يابعدي
اعتبرني اخوك الصغير اللي ساكن بشمال الرياض :)
امر وحنا نطامر


والله يوفقك ويسعدك

[mashariad]

شكرا للجميع

[Mr.3BDULMAJED]

اذا كنت من عشاق النفود اطلع للخراره .. ان شاء الله تنبسط هناك

[الفيصل80]

أزيد على الأخوه ،،،، طبعاً الثمامه ولكن أبعد عن منطقة الزحام يعني استمر حتى مركز شرطة الثمامه ثم أدخل داخل الطعوس اللي على اليسار نظيفه ولا فيه زحمه والواحد نوعاً ما ياخذ راحته مع أهله ..

الثاني / اذا جتك محطة خزام اللي بالثمامه مقابل لها من الشرق طريق البويب استمر حتى تنتهي الشبوك اللي على اليمن واليسار وبعدها اذا بغيت سهال تجيك على اليمين واليسار ،، واذا بغيت شعبان وطلح استمر قدام وتحصلها قريبه من الخط وبتشوف الطلح ،،

وبالتوفيق للجميع ...

[بر الوالدين]

مبدئيا واقرب شي

امسك خط صلبوخ= حريملاء شمال ووسع صدرك

وراح تمر على عده محافظات ومناظر جميله ومناطق وشعبان سايله

تطلع لصلبوخ مع الدايري الشمالي غرب ثم صلبوخ الدرعيه شمال

خط سيدين

تحياتي

يعني تخلي السفارات يسراك و أنت متجه شمال

ثم يجيك كوبري عرقه و على طول سيده


( صح يا أخوان ولا خطأ )

[احمد العروي]

حياك الله بر الوالدين

اخوي تناهيت يقصد اذا جيت مخرج 1 تاخذ مخرج الدرعيه وتسيد على طول لا يمين ولا يسار هذاك هو الخط

وللمعلوميه تراك تمشي مسافه ماهي قليله ثم تجيك نقطه تفتيش وبعدها تبداء المناطق اللي كلموك عليها

الاخوان.

مع تمنياتي لك بالتوفيق ورحله ممتعه

[حوووم]

السلام عليكم
.
ان كانك ودك ب300كيلو فعندك الدهنا اجواء روووعه

[ولد سعد]

هلابك اخوي و مرحبابك
انكان لك في الغيران فعندنا في جلاجل شمال الرياض 180 كيلو مخرج 14 و انت متجه للقصيم غيران يحبها قلبك ماقد شفت مثلها لانها مسوين الها الهلي بنيان عليها وحركات ثانية وانا بالخدمة عن اي استفسار

[الشقردي 999]

عندك سعد امسك خط الشرقيه وبتل 50 كيلو نفود وشعيب بعدين انيسه

[D.luffy]

هلا اخوي
خل الدرعيه على يسارك ورح قدام بجيك شعيب بنبان وشعيب صلبوخ وشعيب حريملاء فيه غار(قطار) فيه مويه على طول السنه سواء شتاء ولا صيف , وفيه شعيب بعيثران فيه محميه طولها 30 كيلو فيها شجر طلح وسمر وشعيب بعيثران تبع محافظة ثادق واذا انت تبي احداثيه عطيتك

[الطرس ممدوح]

حياك الله في الرياض
ان ماشالتك العاصمه تشيلك عيوننا يابعدي :)

تناهيت وصقر
اعطوك الأماكن الجميله اللي احب اتمشى يمها

وان بغيت خدمه يابعدي
اعتبرني اخوك الصغير اللي ساكن بشمال الرياض :)
امر وحنا نطامر


والله يوفقك ويسعدك
:good2::good2::good2::good2::good2:

[رحال2]

اول شي مرحبا بك تراحيب المطر
ثاني شي الله يحييك ياضيف عندنا احنااا اخوانك ومعارفك
ثالث شي اطلع على طريق الخرج بعد النقطه 1 كيلو لف يمين هناك نفود يحبه قلبك
رابع شي في امان الله

[Ra3e aljeep]

حياك الله في الرياض
عندك يا غالي طريق الثمامه امش معه مسافة 100 ك تقريباً يجيك مفرق الطوقي يمين فيه كل شيء تبيه شعبان او ضلعان ترقى الطوقي تزين الارض بعده لين توصل حفر العتش
وإذا رحت على طول ما لفيت يم الطوقي تجيك روضة الخفس على يمينك والنفود على يسارك وبتلقى قدامك شعبان وإذا رحت على طول بتقابل طريق القصيم وهناك انت يم ملهم وفيها اماكن زينه
الله يوفقك

[فتى مرات]

اخوي عندك بحيرة الوسيع .. وفيضة المسعودي وام القطا .. وكلها ابشرك سايله ومنطقه توسع الصدر .. طريق الشرقيه مفرق سعد 80 كيلو تقريبا يمين منتزه سعد الي تكلم عنها اخوي الشقردي 999 .. خذ الاوسط كانك بترجع للرياض بيجيك مفرق يمين ادخل معه سيدا اول تقاطع خذ يمين سيداا لين يجيك تقاطع للتوضيح الي يسار فيه زي البوابه وهي توديك للمسعودي .. ويمين لبحيرة الوسيع .. اذا فيه خطا بالوصف اتمنى من الاخوان التعديل ..

[أبوسليمان السهر]

هلا اخوي
خل الدرعيه على يسارك ورح قدام بجيك شعيب بنبان وشعيب صلبوخ وشعيب حريملاء فيه غار(قطار) فيه مويه على طول السنه سواء شتاء ولا صيف , وفيه شعيب بعيثران فيه محميه طولها 30 كيلو فيها شجر طلح وسمر وشعيب بعيثران تبع محافظة ثادق واذا انت تبي احداثيه عطيتك

يعطيك العافية أخوي ودي أنك توصف لي شعيب بعيثران التابع لثادق بدقة
متناهية الله لايهينك

[ابو الشمقمق]

حياك الله بين اهلك واخوانك
اذا كت تحب البر فالاخوان ماقصروا
اما المنتزهات والدبابات والامكن القريبة الخفيفة التي تصلح للعوائل
فكثيرة جدا

طبعا مرحبا بك بالرياض المليء بالزحمة
طبعا حنا بالرياض اذا بغينا البر نطلع 100 كم على اقل تقدير
وانت يمكن جاي من احد المدن الصغيرة اللي البر عند عينك
بس تديور مع الاشارة وتدخل يمين ((((ذكرتني بحايل ))))
الرياض اذا كان ودك تتعشى بالبر لازم تمشي من العصر هههههههههههههه زحمة وقلق
ويمكن بسبب الزحمة تتهاوش انت والمدام وماعاد تطلع ههههههههههههههههه
المهم:
http://www.mekshat.com/vb/showthread.php?t=99603
ممكن هالرابط يفيدك