مطلوب وصف دقيق ومفصل عن روضة ملهم

[نجدي أصلي]

:good2: السلام عليكم
آمل تزويدي بوصف دقيق ومفصل لكيفية الوصول إلى روضة ملهم من الرياض وإذا كان فيه احداثية على الجارمن شاكرين لكم :f

[فزًاع]

وعليكم السلام ورحمة الله
الشباب ماقصروا منزلين مواضيع لروضة ملهم أو روضة (عبدالعزيز بن فهد)

عموماً ياعزيزي : إذا طلعت من الرياض على السريع رايح للقصيم بعد تفتيش صلبوخ
بـ 4 كم يجيك معبر جمال خذه ورح يمين ممسوح وجهك شرق مسافة 10كم , بعدها تقاطعك ردميه خذها يسار وجهك شمال مسافة 8كم و
هذه الفيضة المستصنعة ,

والإحداثية :.
N 25 15 588
E 046 30 040

أتمنى لك إجازه سعيدة

[rahhal.m]

http://www.mekshat.com/vb/showthread.php?t=165265

وبالله التوفيق .

[عبدالرحمن السالم]

وعليكم السلام والرحمه
هلابك نجدي أصلي ، ابشر به
شف ياطويل العمر اول ماتعدى التفتيش الاول إلى على طريق القصيم ، بعده يبي يجيك مخرج جمال ، ادخل من عنده وافرق يمين وامش مع الردميه ، تجيك ردميه توديك يمين ويسار ، امسك اليسرى وابتل بالماريه تبي تشوف بوجهك طعس الهرم الكبير ، لا بتلت تبي تنزلك على ردميه العاذريه بتصير بوجهك ، افرق يسار وابتل معه تبي تشوف الفيضه قبالك ، الاحدائية N25.15.632 E046.30.028
بس انتبه من راعي الباترول الابيض تراه يبي يبلشك لاتطق خيمتك بالروضه طقه بالنفود وانزلو عليه مشي على رجولكم
موفق خير

[عاشق السيل]

أبشر بسعدك هذا الوصف لا بغيت تجي من طريق الجنادرية ،،

من عند تفتيش منتزه الثمامة اتجه شمال وبعد 9 كيلو بيجيك برج جوال واضح على يسارك استمر شمال وبعد 18 كيلو من التفتيش بيجيك ثاني برج جوال برضو على يسارك بعده مباشرة بـ 50 متر تقريبا فيه طريق واضح يدخل للنفود سهل جدا رح معه وخل وجهك غرب بالضبط لا تروح يمين ولا يسار وبعد 4 كيلو و600 متر تطيح مباشرة بالروضة !!!

وهذا الطريق لا بغيت تجي مع المسحية من ورى العاذرية ،،

بعد محطة خزام المعروفة تطلع يسار حتى ينتهي الطريق بمزرعة الملك فهد الله يرحمه تروح يمين وإذا عكف الطريق وصار وجهك غرب تصير العاذرية على يمينك بعد المدخلين حقة العاذرية تجيك على يمينك مسحية عرضها 20 متر تقريبا لف معها واتجه شمال وبعد 28 كيلو تجيك بوابة الروضة إذا لقيتها مفتوحة تمام وإذا صارت مسكرة تحايل عليها واطلع يسار عن المسحية وارجع ثاني مرة بعد ماتتعدى البوابة وتجيك الروضة على يسارك بعد البوابة يمكن بـ 200 متر فقط !!

رحلة موفقة محفوفة بحفظ الله تعالى ....

[همس الغدير]

ما شاء الله .. لكن اخوي ترا طريقه مطانيج متعب شوي

[نجدي أصلي]

شاكرا لكم جميعا تعاونكم معي
الله يجعلها في موازين اعمالكم
الله يخليكم لنا

[سيف الظفير]

الحرس على اللي على الروضة


يحققون كأنهم من المخابرات

اذا جيت تدخل

من انت ومن معك وليه جاي ووش تبون و و و و و و

[بر الوالدين]

أبشر بسعدك هذا الوصف لا بغيت تجي من طريق الجنادرية ،،

من عند تفتيش منتزه الثمامة اتجه شمال وبعد 9 كيلو بيجيك برج جوال واضح على يسارك استمر شمال وبعد 18 كيلو من التفتيش بيجيك ثاني برج جوال برضو على يسارك بعده مباشرة بـ 50 متر تقريبا فيه طريق واضح يدخل للنفود سهل جدا رح معه وخل وجهك غرب بالضبط لا تروح يمين ولا يسار وبعد 4 كيلو و600 متر تطيح مباشرة بالروضة !!!

وهذا الطريق لا بغيت تجي مع المسحية من ورى العاذرية ،،

بعد محطة خزام المعروفة تطلع يسار حتى ينتهي الطريق بمزرعة الملك فهد الله يرحمه تروح يمين وإذا عكف الطريق وصار وجهك غرب تصير العاذرية على يمينك بعد المدخلين حقة العاذرية تجيك على يمينك مسحية عرضها 20 متر تقريبا لف معها واتجه شمال وبعد 28 كيلو تجيك بوابة الروضة إذا لقيتها مفتوحة تمام وإذا صارت مسكرة تحايل عليها واطلع يسار عن المسحية وارجع ثاني مرة بعد ماتتعدى البوابة وتجيك الروضة على يسارك بعد البوابة يمكن بـ 200 متر فقط !!

رحلة موفقة محفوفة بحفظ الله تعالى ....


رابك الله فيك و الله يجزاك كل خير و الله يوفقك يالله يارب

تقول : من عند نقطة التفتيش > > تقصد نتعدى النقطه لين يجينا ثاني برج للجوال يسار

هذا و اضح جداً و سهل أيضاً

ولكن الرادميه الـ 4 كيلو كلها سهله يعني ( ما به غراز )

[بر الوالدين]

من يوصل للفيضه من خلال هذا الرابط

http://wikimapia.org/#lat=24.6408&lon=46.7728&z=10&l=0&m=b

و أيضاً هذا

http://www.flashearth.com

[عبدالرحمن السالم]

تعاله قطوع من النفود ترا ردميته تكسر إلى مايتكسر انت او ماتعدى التفيش دخل الاحداثيه وشف لك مرقى زين طبعاً بعد ماتمشي 15 كيلو بالضبط ، الا كانك تبي تسرع بالردميه تمشي 120 عشان ماتحس بالبطانيج ، لان الردميه إلى تودي للفيضه منتهيه بطانيجه قويه