اهل الشروكي واللى له خبره

[المرابط]

ابشركم يا شباب شريت

شروكي مديل 91 حليو

ونظيف بس فيه مشكلتين

1 ـ الحراره

اذا اسرعت تعديت 120 تعدا النصف

واذا ابطا واقف تعدا النصف نفس

المشكله وقد قمت بالتالي

تصييخ الاديتر وتغيير الخراطيش

وتغيير تماتيك المروحه لان الاول

ضعيف ولا تغير شيء نفس الحراره

ونفس المشاكل مع العلم ان البلف

يوم اغير الخراطيش ليس موجود

وانا ناوي يا اني اركب مراوح

كهرب اواغير الاديتر الى ثلاث رصات

لان الموجود شد بلد ابو رصتين

او اسوى الثنين مع بعض نبغا شوركم

تكفون وما خاب من استشار

2ـ الموتر مطابه قويه شوي

واشتريت مساعدات يوم جيت اركبها

لقيت المساعدات اللي فيه استراليه

وفحصتها قالو زينه وبعضهم قال

هاذى الاستراليه تجي قاسيه شوي

ويجى مطبها قوي وانا اشك انه

نصاب يبي يشتغل وبس وساعدونى

يا النشاما الله لا يحرمنا من خبرتكم.

[القانوص]

السلام عليكم ورحمة الله وبركاته
بالنسبه للحرارة ركب بلف الحرارة وتبي تشوف الفرق باذن الله.
اما بالنسبه للمطب الشيروكي مطبه قاسي شوي وهو طبيعي.

[القماري]

واحدة من قضايا الشروكي (الحرارة) وهي في معظم أو الكثير من سيارات جيب شروكي
أعتقد إن إضافة مروحة إضافية قد تقلل من الحرارة وأيضا أعتقد أنك لاتستطيع إضافة راديتر بحجم أكبر (لاتوجد مساحة كافية في الشروكي بحسب معرفتي) جرب وضع بلف الحرارة (لكن أعتقد انه لن يحصل فرق والله أعلم)
أما المطاب القاسية فهي طبيعة الشروكي أيضا (إذا تبحث عن المريح في الجيب فالجراند شروكي به هذه الخاصية أما الشروكي فلا مجال للراحة فيه - في الخلف يأتي بنظام سيست للموديل الذي معك)

[sharp]

أخوي المرابط:

أبشر باللي يفزع بالرد اللي يبرد كبدك و يعطيك الجواب الشافي:

سيارتك يجيلها رديتر 3 صفات و اللي معك صفتين. أبو ثلاث صفات يركب مئة بالمئة

http://www.mekshat.com/pix/upload/images11/mk19148_rad1.jpg


و راجع هالرابط اللي صاحبه المسيكين عنده نفس مشكلتك و غير الرديتر و صار تمام التمام. لاحظ بالصورة أن ما هنا فرق بالمقاس العرضي للنوعين:

http://www.4x4wire.com/reviews/radiator02/


أتوقع أن الرديتر الأمريكي أبو ثلاث صفات موجود هنا في السوق. و اذا ما حصلت تقدر تطلبه من ها لموقع و بيكلفك حول الستمية ريال من غير مصاريف الشحن.


http://www.radiatorexpress.com/product.asp?part=1991+JEEP+CHEROKEE+LIMITED+%2D+4% 2E0+liter+L6+RADIATOR+Name+Brand+3%2DRow+Rugged+Al l+Metal+Upgrade&part_id=40476&aaia_id=1180088





أما بالنسبة للمساعدات فالله خيرك بين ثنتين:

1- أما أنك واحد راعي بر ومطامر و طلعات مستمرة

2- أو أنك راعي كشتات قريبة و شغل خفافي.


فالأولة يبيلها مساعداتت يابسه مثل اللي عندك الحين. تحمي الموتر و العكوس و تساعدك في الأرض الوعرة.

و الثانية يبيلها مساعدلات الوكالة (الأصلية).

وشف اللي يصلح لك.

و تحياتي لك.

[المرابط]

مشكور اخى القانوص

فكره جيده بس هل فيه بلف

يخلى الحراره الربع او الثلث

لان البلف شد بلد يخلي الحراره النص

اذا فيه بلف نوع ثاني يركب عليه

او احد الاعضاء خابر شيء يدلنا

الله لا يهينه ويبشر بالدعاء

القماري يعطيك العافيه واشكرك

على مرورك وتعليقك.

sharp الله يبرد كبدك وقليبك ويجزاك

بالخير

مشكور على جميع المعلومات اللى ذكرتها

الله يذكرك بالشهاده ومجهود متعوب عليه

وبارك الله فيك يا sharp واذا عندك معلومات

عن البلف ونبغى الحراره الربع او الثلث

لا تحرمنا منها.

[الواهج]

اهم شي يكون الراديتر المنيوم امريكي وفيه ماركة زينه اسمها موداين Modine عينين نفس مال الوكالة وانشالله تروح الحرارة

[المرابط]

ثسلم اخى الواهج

بس اعتقد انه

بيصير نفس المشكله

لانه رصتين الا تأيدنى

[العطة]

السلام عليكم ورحمة الله وبركاته

فية بلف يقريبا بين الربع والثلث وسعره 35 ريال
تلفه عند باجحزر في شارع 24 في صناعية القديمة

ابوعبدالاله

[المرابط]

يعطيك العافيه

اخي العطه

ابغا معلومات

اكثر عن ها البلف

وش اسمه ونوعه

وابا وصف المكان مضبوط

ولا عليك امر.

[راع الشيروكي]

السلام عليكم ورحمة الله

جزاك الله خير يا اخ المربط

اولا انا اقدر ازيد شي لان الاخوان الله يجزاهم خير اعطوك المعلومات كلها بس عندي ملاحظة على الحرارة.
السبب الرئيسي هو قوة جبارة للمكينة وصغر شديد للرديتر.
اما الحل الرخيص والسريع والمزعج هو تثبيت المروحة.
بالنسبة لسيارتي انا ريحت راسي بتثبيت المروحة وانتهت مشكلت الحرارة لكن شوي مزعج اذا وصل ضغط المكينة الى 3000 Rpm وغير ذلك لا مشكلة من تثبيت المروحة والحرارة الان بين الربع والثلث

والنصيحة واجبة على كل مسلم

راع الشيروكي


http://www.mekshat.com/pix/upload/sign/images/mk18789.gif

[العطة]

السلام عليكم ورحمة الله وبركاته

البلف امريكي مكتوب عليه درجة الحرارة اظن اقل من الاصلي ب11درجة مئوبة
الوصف غير دقيق من شارع الامير سلمان ادخل شارع 24بالصناعية التقاطع الاول او الثاني سال اي محل ويدلك لانة مشهور
صاحب المعرض ابوعبدالله عنده معلومات كاملة عن الشيروكي ومشاكلة والحلول وكذلك قطع غيار مناسبة
ملاحظة سوى اربع فتحات بالدريل في البلف قبل التركيب

ابوعبدالاله

[anas]

كان عندي شيروكي ما كملت 4 اشهر وبعتها .. ما يمر اسبوعين الا احط فيها شيء ومكلف بعد ... تحس وانت تطعس ان السيارة بتخرب عليك في اي وقت ... نصيحتي لك بعها واشتر بقيمتها باجيرو ربع والا ايسوزو ربع .

[المرابط]

تسلم اخي راعى شروكي

فكره جيده تثبيت المروحه

لكن هل هناك سلبيات غير الازعاج


مشكور اخي العطه وماقصرت

باقي سؤال اخير لك ومعليش على كثر الاسئله

هل المحل اللى تقول ورشه او قطع غيار

او معرض وش اسم المحل .

[الوشاح]

خذ العلم من راعي شروكي

الحراره النص طبيعيه بالشروكي ....لاكن تقدر تنزله عن النص ... غير البلف وركب بلف كابرس بـ20ريال

اما المطاب .... تأكد من المساعدات وذا هي سليمه فاحتمال يكون مضافلة سست زياده ...

وذا عندك اي استفسار ...حاضرين.

اخوك ......الوشاح

[أبو يوسف]

اخي الكريم

هناك بلف يفتح الماء على درجة 65 بينما بلف الوكالة يفتح على 95 وهو خاص بالشروكي سعره 35 ريال
وفيه بلف أنا ركبته واعتدلت عندي الحرارة صارت بين الربع إلى الثلث في هالايام أما بالنفود فتصل النصف مع المطاعس والبلف هذا هو اي سي دلكو 165 سعره 25 ممتاز مرة وجودة اي سي دلكو معروفة

واذا ما فاد معك ممكن تفك حساس مروحة الكهرب اذا كانت عندك وتقل الحرارة بس بتولع عندك لمبة شيك

ما ذكر أعلاه ينطبق على موديل 99 ولا أعلم هل ينطبق على موترك أو لا

تحيتي

[نمر بن حثلين]

اذا تعدا النص بشي بسيط فهو عادي

لان الشروكي شد بلد بصيف ولا شتا لازم امبيره يكون على النص
يعني هو مصمم كذا

[**( تلمي )**]

حسب خبرتي فهو شي عادي أذا المراوح تشتغل بعد ما ترتفع الحراره لا تخاف خصوصاً أذا كان الجيب امريكي .....

[المرابط]

الوشاح

يعطيك العافيه وتسلم

البلف حق الكابرس اي مديل ولا عليك امر

وش رايك في اديتر ثلاث رصات وهل

موجود في السوق نفس النوع اللى ذكره

اخي sharp بحيث يكون نفس مقاس ابو رصتين

علشان لوبغيت اركب مراوح كهرب يكون

فيه مجال تركب وسؤال اخير معليش تعبناك

معنا وش نوع الفرارت المضبوطه للشروكي

وين احصلها وتسلم يالغالي.


ابو يوسف

مشكور على زيارتك وعلى المعلومات

والله لايهينك .


نمر بن حثلين

حياك الله وبالنسبه للحراره

فهى مع الخط من يوم اتعدى 120

وهي متعديه النص تاصل ثلاث ارباع

واعتقد هاذا شي غير طبيعي.

تلمي هلابك ومرحبا

موتري سعودي والمراوح تشتغل ولا تنزل

الحراره الا اذا هديت واما اذا كنت

واقف تنزل الحراره الى تحت النص

وللمعلوميه اذا شغلت المكيف يبرد

الموتر شوى وترجع نفس المشكله.

[الخطابة]

اقول الشروكي قوي هو صح لاكنه يتخرع



مع تحياتي
المرابط

[الابهق]

أخوي المرابط مساك الله بالخير
علشان ما أطول عليك لوتتصل على جوالي أفضل عشان أعطيك العلم اللي ينفع لك وأدلك على الورشه الصححححححححححح
0555440629

[مهراس]

السلام عليكم ورحمة الله وبركاته:
الأخ المرابط

أنا عندي قراند شيروكي م 93 / 6 سلندر (نفس الكلام لـ 8 سلندر وكل موديلات الشيروكي الى2001) له ثلاث سنوات ونصف وبعد البحث في المنتديات العربيه والأجنبيه وجدت هذه الخلاصه عن ما يقال (حرارة الشيروكي) اذاكان كل شي عندك تمام:

1- امبير الحراره على النص(210) طبيعي ويصير أقل مع المشى على الخط السريع وحتى مع تشغيل المكيف مايزيد على النص، هذا يدل ان كل شي في نظام التبريد شغال مزبوط، والعكس صحيح، يعني اذا انت ماشي على سرعة 120 والحراره اكثر من النص عندك مشكله.

2- ترتفع الحراره في فصل الصيف مع تشغيل المكيف (فوق 210) عند الأشارات والتوقف المستمر الى تقريبا (235) وهذا شي طبيعي أما اذا سخنت السياره(خروج الماء من القربه)، فهذا يعني انه هنك خلل في أحد أجهزة التبريد(لديتر،مروحه، كلتش)

3-في المطاعس وتسلق الكثبان الرمليه سوف ترتفع الحراره الى 230 تقريبا بس لاتزيد واذا وصلت لهذه المرحله لابد لك تخف على السياره ولا تعفسها ولا يعني ذلك عيب فيها فانت دارى السياره ولا تحملها اكثر مما يجب وطلوع المطاعس ليس اختبار لقدرة اي سياره خاصة في الجو الحار كما يعتقد البعض.

4-اللديتر الأصلي الألمونيوم أفضل من النحاس الوطني صفين او ثلاثه.

طبعا هناك اضافات لنظام التبريد ليكون اكثر فاعليه ولكن لا ضمانة لأداء المحرك على المدى الطويل انه يبقى كما هو اذا ماكان يهمك الأحتفاظ بالسياره مده طويله:
1-تركيب طرمبة ماء صنع شركة Flowkool مع بلف 185 وسوف يخفض الحراره الى الربع في المشي العادي ولكن في الكرف على الطعوس أومع المكيف وسط الزحام في الصيف تروح الحراره فوق النص.

2-الغاء المروحه والكلتش وتركيب مروحة كهرباء GM أي مصنوعه للجمس أو الشفر.

3-تركيب لديتر وطني 3 صفوف وقد أخبرني مصلح لديترات انه ليس هناك فرق كبير بينه وبين أبو صفين في تخفيض الحراره.

وصدقني اذا نظام التبريد عندك مفحوص وكويس فالمشكله الأن في المحرك تسوي له فحص شامل أو ما يسميه البعض (TUNE UP) والحاجات اللي تغيرها كالتالي لاحد يتفلسف عليك:
1- البواجي، 2- فلتر الهواء، 3-فلتر بخار المكينه(صغير على غطا البلوف من الخلف)، 4-الشاكوش وغطاالديلكو والأسلاك مع بعض، 5-الكويل، 6-فلتر البنزين

أما قولك اذا تعديت 120 ترتفع الحراره، شوف السير عندك مشدود ولا رابخ ؟؟؟؟؟ مع السرعه يمكن يفلت من على بكرة المروحه ولا يخلي المروحه تدور بنفس سرعة المحرك.
وانشاء الله السياره تزبط معاك. والمعذره على الاطاله والله الهادي الى سواء السبيل.
أبو فهد

[المرابط]

الخطابه

حياك الله

الابهق

تسلم وشاكرلك الله لا يحرمنا

من خبرتك.

مهراس

كلامك على العين والراس.

[الوشاح]

اخوي المرابط .........البلف اسي ديلكو للموديلات القديمه وهو معروف أسأل محلات القطع الامريكيه ..
عليه رقم165

لاكن اعتقد ان المشكله عندك في الاديتر .....شيك عليه ...إذا هو وسخ لازم تصيخه...وتأكد هو المنيوم ولا نحاس
لأن النحاس ماينفع بريال......ولايهمك الاديتر كم رصه ....اهم شي بألأديترنوع المعدن.....

اتوقع لوركبت اديتر ثلاث رصات ماتقدر تركب مروحة كهرب .....لأن المسافه بين المروحه ومكرة السير صغيره
(عندي بموتري اقل من 1سم)

اما الفرارات .......ماعرف احد ركبهن لشروكي....ونا أشوف ان الشروكي مهب بحاجة الفرارات .....
لاصرف ولاثقل...

إذا عندك اي استفسار ......لاتتردد :) ... اخوك .......الوشاح

[المرابط]

الوشاح

بيض الله وجهك

كفيت ووفيت.

[أبو أسماء]

اخي الكريم

هناك بلف يفتح الماء على درجة 65 بينما بلف الوكالة يفتح على 95 وهو خاص بالشروكي سعره 35 ريال
وفيه بلف أنا ركبته واعتدلت عندي الحرارة صارت بين الربع إلى الثلث في هالايام أما بالنفود فتصل النصف مع المطاعس والبلف هذا هو اي سي دلكو 165 سعره 25 ممتاز مرة وجودة اي سي دلكو معروفة

واذا ما فاد معك ممكن تفك حساس مروحة الكهرب اذا كانت عندك وتقل الحرارة بس بتولع عندك لمبة شيك

ما ذكر أعلاه ينطبق على موديل 99 ولا أعلم هل ينطبق على موترك أو لا

تحيتي





















السلام وعليكم ورحمة الله وبركاته الحراره تدل على عطل ما اصاب احد اجهزة السيارة واعطال الحرارة اخوي كثيره حتى انك ماتتوقع اشياء تكون باينه بس ماتكون مشكك فيها ومشكلتنا دايم نوجه اللوم لمجموعة التبريد ونتهمها بينما يكون العطل في مكان اخر
مثال عندي احد اصدقائي كانت عنده نفس المشكله وعمل نفس الاشياء الي ذكرتها انت واخواني القراء
وبعد الفحص والتدقيق
طلع عنده
1- كربون كثير في المحرك 2- الديلكو متاكل وعياره مايضبط 3- اوساخ كثيره في ممرات راس المحرك وعملتها انا بنفسي ولله الحمد الي الان المتر اوكي ولا فيه حراره بدلت اليلكو ونضفنا راس المحرك تنضيف عكسي بالماء ونضفنا المحرك من الكربون والعمليه اوكي بس مااقولك اخوي العزيز انك تعمل هاذي الاشياء وتنفع لان حصلت معاي مشاكل كثيره مع الحراره مثل كاديلاك sts كان المني فولد يسخن الي درجة الجمر لونه يكون وكانت النتيجه العطل بصيط والله لو اقولك ممكن ماتصدقني (سلك التاريض الارضي الواصل من الشاصي للمحرك مقطوع وماسورة الاكزوز فيها طعج ) اذا تبي اذكرلك اسباب الحراره حاضر ولو ان اكثرها تقدر تقوم فيه بنفسك

[ابو خطاب]

البلف هو نفسه بلف شركة Gm ونفس مقاس بلف الصلون.........وستجد ارقام عديده له.. والرقم يشير الى قوة ضغط السبرنق للبلف بالنيوتن.......عموما كل ماصغر الرقم يعني تدفق ماء اسرع.. والعكس صحيح..

لمزيد من المعلومات اتصل على شاب اسمه رياض في احد فروع باجحزر ورقمه: 4480983
وستجد عنده ماتريد.. بس لا تجيه وقت زحمه... وتراه يحب يخدم.

[المرابط]

أبو أسماء

تسلم يا دكتور وتستاهل

هذا اللقب بدون مجامله


ابو خطاب

تسلم يا الغالي

ويعطيك العافيه